Blog

Kandidati për kryeministër nga radhët e PDK-së, Bedri Hamza ka vizituar familjen e Afrim Mexhuanit nga Obiliqi.

Nga ai, Hamza thotë se dëgjoi brengat që sipas tij, sot i kanë mijëra qytetarë: çmime të larta, paga të pamjaftueshme dhe mungesë perspektive.

Përmes një postimi në Facebook, kreu i PDK-së tha se Kosova nuk ka nevojë për propagandë e përçarje, por sipas tij ka nevojë për një qeveri që merret me jetën reale të njerëzve, me paga më të larta, çmime më të ulëta dhe më shumë dinjitet për çdo familje.

“Më 7 qershor, ta bëjmë bashkë kthesën e madhe”, ka shkruar ai.

Tre aksidente të rënda trafiku janë raportuar sot në Kosovë, me pasoja fatale dhe disa persona të lënduar në Klinë, Ferizaj dhe Vushtrri.

Në fshatin Dollc të Klinës, rreth orës 04:55, ka ndodhur një vetaksident me fatalitet. Sipas Policisë së Kosovës, një person ka humbur jetën në vendin e ngjarjes, ndërsa katër të tjerë janë lënduar dhe janë dërguar për trajtim në Spitalin Rajonal të Pejës.

“Si pasojё e kёtij vetaksidenti njё person ka pёsuar me fatalitet, vdekjen e sё cilit e kanё konstatuar ekipi mjekёsor nё vendin e ngjarjёs, ndёrsa katёr (4) tё tjerё janё dёrguar nё spitalin rajonal nё Pejё pёr tretman mjekёsor dhe tё njëjtit sipas mjekёve janё jasht rrezikut pёr jetё”, thuhet në njoftimin e Policisë.

Në rrjetet sociale është shpërndarë një video prej 6 sekondave, ku shihet një autobus që është ndaluar në hyrje të Maqedonisë së Veriut, respektivisht në pikën kufitare të Bllatës në Dibër.

Disa media në Tiranë raportuan se janë ndaluar studentët nga Shqipëria, që pritej t’i bashkohen protestës së studentëve në Shkup, me kërkesë që provimi i jurisprudencës të mbahet edhe në gjuhën shqipe.

Ndërsa në rrjetet sociale kanë reaguar edhe studentët.

“Lëshoni menjëherë vëllezërit tanë shqiptarë të ndaluar në pikën kufitare! Kërkojmë veprim të menjëhershëm dhe lejim të hyrjes së tyre pa vonesë. Nëse nuk ka ndërhyrje të shpejtë dhe zgjidhje urgjente, ne do të jemi të detyruar të marshojmë drejt Ministrisë së Punëve të Brendshme!”, ka shkruar Mevlan Ademi, një nga studentët, pjesë e organizatorëve të protestës.

Petrit Kllokoqi është ngjitur në Everest, majen më të lartë në botë.

Ai ka publikuar në Facebook një video nga mali Everest, më i larti në tokë, ndërsa nuk ka mundur të përmbahet emocionalisht pas mbërritjes atje.

Kllokoqi i quajti “lot gëzimi”, ndërsa publkoi edhe dy fotografi, në të cilat shihet duke mbajtur në duar flamurin e Kosovës, atë kombëtar dhe flamurin dardan.

Harbin Vitija, i njohur me nofkën “Plaku”, vazhdon të jetë në gjendje shumë të rëndë shëndetësore pas plagëve të rënda që mori disa ditë më parë në lagjen “Bregu i Diellit” në Prishtinë.

Për gjendjen e tij kanë folur për Reporteri.net nga Klinika e Mjekimit Intensiv në Qendrën Klinike Universitare të Kosovës (QKUK), ku ai po trajtohet.

Shefi i Mjekimit Intensiv, Shaqir Uka, ka bërë të ditur se Vitija mbetet në kujdes intensiv dhe është i varur nga aparaturat mjekësore.

“Pacienti po vazhdon trajtimin në njësinë e mjekimit intensiv. Gjendja e tij e përgjithshme është shumë e rëndë. Ai mbahet në gjumë me barna, është i lidhur me aparatura mjekësore dhe varet nga to. Po i nënshtrohet trajtimit të vazhdueshëm, si dhe të gjitha ekzaminimeve të nevojshme laboratorike dhe radiologjike. Gjendja e tij mbetet kritike”, tha Uka.

Harbin Vitija u plagos të enjten e 14 majit në një lpkal në Breg të Diellit, pak muaj pasi ishte liruar nga burgu.

Instituti i Kosovës për Mbrojtjen e Monumenteve (IKMM) ka miratuar kërkesën e Drejtorisë për Transformim të Komunës së Prishtinës, duke dhënë pëlqimin për realizimin e punimeve të infrastrukturës nëntokësore në sheshin “Xhorxh Bush”.

Ish-drejtori i Transformimit në Komunën e Prishtinës, Gezím Kastrati, e ka cilësuar vendimin si një hap të rëndësishëm për vazhdimin e projektit.

“Një superlajm për Kryeqytetin drejt zhvillimit të projektit ‘Xhorxh Bush’. Miratohet kërkesa e parashtruar nga Drejtoria për Transformim – Komuna e Prishtinës për pëlqim për punimet e infrastrukturës nëntokësore në sheshin ‘Xhorxh Bush’- ka shkruar Kastrati.

Ai ka vlerësuar vendimin e Komisionit të IKMM-së dhe të Qendrës Rajonale për Trashëgimi Kulturore (QRTK), duke thënë se institucionet kanë mbajtur një qasje profesionale ndaj projektit.

“Një vendim i shumëpritur dhe konstruktiv i Komisionit të Institutit të Kosovës për Mbrojtjen e Monumenteve dhe Qendrës Rajonale për Trashëgimi Kulturore, me ç’rast i përgëzoj për qëndrimin profesional ndaj këtij projekti shumë të rëndësishëm për krijimin e hapësirave publike kualitative në dobi të qytetarëve dhe Kryeqytetit”, ka shtuar ai.

Sipas Kastratit, ditë më parë ka arritur edhe një sasi e konsiderueshme e shtresës finale të granitit, ndërsa së shpejti pritet të nisë implementimi i saj në terren.

Një aksident i rëndë ka ndodhur mes 3 veturave në rrugën rrugën Mitrovicë–Prishtinë, saktësisht në fshatin Doberllukë të Vushtrrisë.

Në aksident janë përfshir tri vetura me targa vendore.

Rasti për IndeksOnline e ka konfirmuar zëdhënës i policië për Mitrovicën e Jugut, Ilmi Prekazi, ku ka bërë të ditur se gjashtë persona kanë pësuar lëndime, ndërsa njëri nga drejtuesit e automjeteve ka pësuar lëndime të rënda trupore.

Prekazi njoftoj se pesë persona të lënduar janë dërguar në QKUK për trajtim.

“Sot, më 18.05.2026, rreth orës 11:50, në rrugën Mitrovicë–Prishtinë, saktësisht në fshatin Doberllukë të Vushtrrisë, ka ndodhur një aksident trafiku me lëndime të rënda trupore. Në aksident janë përfshirë tri automjete me targa civile vendore. Deri më tani, gjashtë persona kanë pësuar lëndime, ndërsa njëri nga drejtuesit e automjeteve ka pësuar lëndime të rënda trupore. Personat e lënduar janë dërguar për trajtim mjekësor në Emergjencën e Spitalit në Vushtrri, ndërsa pesë prej tyre janë dërguar për trajtim të mëtejmë në QKUK. Njësitë përkatëse policore janë duke u marrë me hetimin e rrethanave të aksidentit”, ka thënë Prekazi.

Rreth 10 viktima të dyshuara “të reja” janë paraqitur si pjesë e një hetimi francez mbi rrjetin e ish-sulmuesit seksual amerikan Jeffrey Epstein.

Franca hapi një hetim për trafikim qeniesh njerëzore pasi Departamenti i Drejtësisë i SHBA-së publikoi dosjet më të fundit nga hetimi ndaj pedofilit, i cili vdiq në burg në vitin 2019 ndërsa përballej me akuza për trafikim vajzash të mitura.

Francezët po kërkojnë të hetojnë vepra të mundshme penale të kryera në Francë ose që përfshijnë autorë francezë që lehtësuan krimet e tij.

Prokurorja e lartë e Parisit, Laure Beccuau, tha se rreth 20 viktima të dyshuara ishin bërë të ditura. Disa prej tyre ishin të njohur tashmë për hetuesit

“Por patëm edhe viktima të reja që dolën përpara, të cilat nuk i njihnim fare. Janë rreth 10 prej tyre”, shtoi ajo.

“Zgjedhja që kemi bërë për momentin është t’i dëgjojmë këto viktima”, deklaroi prokurorja.

“Një numër i caktuar i tyre janë jashtë vendit, kështu që hetuesit janë përpjekur të caktojnë takime që i përshtaten kur ata të jenë në gjendje të vijnë në Paris”, shtoi ajo.

Malisheva ka nisur zyrtarisht fushatën e dezinsektimit në zonat endemike të kësaj komune, në kuadër të masave për luftimin dhe parandalimin e Etheve Hemorragjike Krime Kongo (EHKK).

Ky proces ka për qëllim reduktimin e rrezikut nga kontaktet me rriqrat, të cilët konsiderohen bartësit kryesorë të virusit të EHKK-së.

Për të përcjellë nga afër zhvillimin e punimeve në terren, zonat ku po realizohet dezinsektimi i ka vizituar, të hënën, kryetari i Komunës Ekrem Kastrati, i shoqëruar nga zyrtarë të shtabit emergjent, raporton kosovapress.

Me këtë rast, ai theksoi rëndësinë e zbatimit të Strategjisë Nacionale për parandalimin e EHKK-së dhe falënderoi ekipet e angazhuara në terren.

“Jemi maksimalisht të përkushtuar për mbrojtjen e shëndetit të qytetarëve tanë. Falënderoj të gjithë ata që janë të përfshirë në këto aktivitete dhe u bëj thirrje qytetarëve që të vazhdojnë të respektojnë masat mbrojtëse me kujdes të shtuar”, deklaroi kryetari i Malishevës.

Sipas autoriteteve komunale, dezinsektimi është pjesë e planit operativ për luftimin dhe parandalimin e EHKK-së. Paraprakisht janë realizuar edhe aktivitete të tjera, përfshirë fushata vetëdijesuese, repelimin e kafshëve (procesin e trajtimit të kafshëve me mjete ose substanca mbrojtëse që largojnë parazitët, insektet ose rriqrat) si dhe trajtimin e rasteve të pickimeve nga rriqrat.

Shtabi komunal për menaxhimin e situatës me EHKK u ka bërë apel qytetarëve që të tregojnë kujdes gjatë qëndrimit në natyrë dhe të kërkojnë menjëherë ndihmë mjekësore në rast të pickimeve nga rriqrat.

Rriqrat, sipas informacioneve të përgjithshme mjekësore dhe shkencore, janë parazitë që bëjnë pjesë në grupin e araknidëve, ku përfshihen edhe merimangat dhe akrepat, dhe nuk konsiderohen insekte. Ndryshe nga insektet që kanë gjashtë këmbë, rriqrat e rritura kanë tetë këmbë. Ato ushqehen me gjakun e njerëzve dhe kafshëve, duke u ngjitur në lëkurë dhe duke pickuar. Rriqrat zakonisht gjenden në bar të lartë, pyje, kullota dhe te kafshët shtëpiake apo bagëtitë, ndërsa njihen edhe si bartëse të sëmundjeve të ndryshme, përfshirë Ethet Hemorragjike Krime-Kongo (EHKK).