Është ndarë nga jeta ish-luftëtari i Ushtrisë Çlirimtare të Kosovës, Ismet Tafilaj.
Brigada 133 “Adrian Krasniqi”, ka dhënë lajmin e hidhur përmes një postimi në Facebook.
Në njoftim bëhet e ditur se veterani do të varroset këtë të hënë në varrezat e fshatit Jabllanicë e Madhe.
“Ngushëllime familjes dhe shokëve të Brigadës 133 Adrian Krasniqi!”, thuhet në njoftim.
Ish-deputetja e PDK-së, Blerta Deliu-Kodra, ka reaguar lidhur me raportin e WorldAtlas, i cili e renditi Kosovën si vendin e dytë më të varfër në Evropë, pas Moldavisë.
Përmes një postimi në Facebook, Deliu-Kodra shkroi se kjo gjendje është pasojë e keqqeverisjes, paaftësisë dhe mungesës së vizionit për shtetin dhe qytetarët, derisa tha se qytetarëve po u servohen narrativa të rreme.
“Kosova sot është ndër vendet më të varfra në Evropë. Një realitet i dhimbshëm që nuk erdhi rastësisht, por si pasojë e keqqeverisjes, paaftësisë dhe mungesës së vizionit për shtetin dhe qytetarët. Ata që ju thonë ndryshe, ju gënjejnë”, ka shkruar ajo.
Sipas Deliut, për herë të parë pas luftës, shumë qytetarë ndihen të pasigurt dhe pa perspektivë në vendin e tyre.
“Familjet po e kanë gjithnjë e më të vështirë jetën, ndërsa të rinjtë po e humbin besimin se mund ta ndërtojnë të ardhmen në Kosovë. Një shtet nuk mbahet me propagandë e përçarje, por me punë, zhvillim, stabilitet dhe përkujdesje për qytetarin. Kjo gjendje duhet të ndryshojë sa më shpejt, para se pasojat të bëhen shumë të rënda për vendin tonë. 7 qershori është data”, shkroi ish-deputetja e PDK-së.
Shai Gilgeous-Alexander është shpallur lojtari më i vlefshëm i sezonit në NBA për të dytin vit radhazi, duke hyrë në mesin e legjendave që e kanë fituar këtë çmim në sezone të njëpasnjëshme.
Ylli i Oklahoma City Thunder vazhdoi dominimin në ligën më të fortë të basketbollit në botë, duke u bërë lojtari i 14-të në histori që fiton çmimin MVP dy vite me radhë.
Kanadezi pati një sezon të jashtëzakonshëm, duke u bërë organizatori i parë në historinë e NBA-së që mesatarisht realizon mbi 30 pikë për ndeshje me më shumë se 55 për qind saktësi në gjuajtje.
Gilgeous-Alexander e mbylli sezonin me mesatare prej 31.1 pikësh për ndeshje dhe ishte shënuesi i dytë më i mirë në ligë, menjëherë pas Luka Doncic.
Në garën për çmimin MVP, ai la pas bindshëm Nikola Jokic, ndërsa në vendin e tretë u rendit Victor Wembanyama.
Basketbollisti i Oklahoma City Thunder grumbulloi gjithsej 939 pikë në votim, plot 305 më shumë se Jokic dhe 370 më shumë se Wembanyama. Ai mori gjithashtu 83 nga 100 votat për vendin e parë.
Ky çmim konfirmon edhe një herë dominimin e Shai Gilgeous-Alexander në NBA, pasi edhe sezonin e kaluar ishte shpallur lojtari më i vlefshëm i ligës
Ushtruesja e detyrës së presidentes së vendit, Albulena Haxhiu ka reaguar pasi Këshilli Prokurorial i Kosovës, ka shpallur konkursin për Kryeprokuror të Shtetit.
Haxhiu, përmes një postimi në profilin e saj në rrjetin social Facebook, ka shkruar se ky veprim i Këshillit Prokurorial të Kosovës rikthen mundësinë për një proces të rregullt, transparent dhe të bazuar në meritë.
Postimi i saj i plotë:
Përshëndes shpalljen e konkursit për Kryeprokuror të Shtetit. Ky veprim i Këshillit Prokurorial të Kosovës rikthen mundësinë për një proces të rregullt, transparent dhe të bazuar në meritë.
Është me rëndësi që i gjithë procesi të zhvillohet në mënyrë të paanshme, të besueshme dhe larg çdo ndikimi politik apo interesi të ngushtë, në mënyrë që në krye të Prokurorisë së Shtetit të zgjidhet kandidati më kompetent dhe me integritet të lartë profesional.
Besimi i qytetarëve në sistemin e drejtësisë ndërtohet pikërisht përmes proceseve të drejta, transparente dhe të bazuara në meritokraci.
Michael Carrick ka nënshkruar kontratë të re me Manchester Unitedin, sipas raportimeve të gazetarit Fabrizio Romano.
Sipas marrëveshjes së re, trajneri 44-vjeçar do të qëndrojë në “Old Trafford” deri në qershor të vitit 2028, me opsion për vazhdimin e kontratës edhe për një sezon tjetër, deri në vitin 2029.
Po ashtu, edhe ndihmëstrajneri Steve Holland ka firmosur rinovimin me kushte të ngjashme dhe me të njëjtën kohëzgjatje.
Carrick mori drejtimin e Manchester Unitedit në janar të vitit 2026, pas largimit të Ruben Amorim, dhe ka arritur të sjellë rezultate shumë pozitive në Ligën Premier.
Në 16 ndeshje kampionale nën drejtimin e tij, Manchester United ka regjistruar 11 fitore, tri barazime dhe vetëm dy humbje.
Aktualisht, “Djajtë e Kuq” ndodhen në vendin e tretë në tabelën e Ligës Premier dhe e kanë siguruar tashmë kualifikimin për sezonin e ardhshëm në Ligën e Kampionëve.
Federata e Futbollit e Kosovës, në bashkëpunim me sponsorin zyrtar të Superligës, Albi Mall, ka vazhduar ndarjen e çmimit tradicional “Ylli i Javës”, i cili i takon futbollistit më të dalluar të javës në elitën e futbollit kosovar.
Për javën e 34-t të këtij edicioni, ky vlerësim i është ndarë futbollistit të Llapit, Arianit Hasani, pas paraqitjes së shkëlqyer dhe kontributit të madh në fitoren e skuadrës së tij ndaj SC Gjilanit.
Vlerësimi është bërë nga Komisioni i Veteranëve të Futbollit.
Pas marrjes së çmimit, Hasani u shpreh i lumtur për suksesin e arritur dhe rëndësinë e fitores për skuadrën e tij.
“E kemi ditur që na pret një ndeshje shumë e vështirë. Jemi përgatitur gjatë gjithë javës për këtë përballje dhe presioni ka qenë shumë i madh, por jam i lumtur që morëm tri pikë dhe dolëm faqebardhë”.
“Ssynimet tona kanë qenë të jemi në top 3. Normalisht, renditja aktuale nuk është ajo që e dëshirojmë dhe shpresojmë t’i shmangemi edhe barazhit”.
“E dimë që kemi ekip të mirë dhe nuk e meritojmë pozitën ku ndodhemi aktualisht. I falënderoj bashkëlojtarët dhe trajnerin, sepse pa ta nuk do të mund ta fitoja këtë çmim. Shpresoj të vazhdojmë me rezultate pozitive edhe në ndeshjet e ardhshme. Gjithashtu, jam shumë i lumtur edhe në aspektin personal për këtë vlerësim”, deklaroi Hasani për faqen zyrtare të FFK-së.
Pas një periudhe të gjatë larg skenës aktive muzikore, Bashkim Myftari rikthehet me një projekt të veçantë dokumentar që premton të sjellë atmosferën reale të muzikës alternative dhe jetës urbane në Kosovë.
Bëhet fjalë për dokumentarin “Urban Underground Unplugged”, produksion i The Life Of Sound, i cili do të lansohet premierë gjatë muajit qershor.
I realizuar në stil reality show, dokumentari ndjek nga afër artistët urbanë, performancat live dhe momentet spontane të skenës underground, duke sjellë një energji autentike që rrallë shihet në produksionet muzikore moderne.
Në fokus është rikthimi artistik i ish-liderit të Garazhat e Bardha, i cili në këtë projekt prezanton këngë të reja origjinale dhe interpretime unplugged në lokacione urbane.
Një element interesant i dokumentarit janë përpunimet e këngëve të vjetra shqipe, të transformuara në stil urban rock, me tingull modern dhe interpretim alternativ, por duke ruajtur emocionin dhe tregimin origjinal shqiptar.
Mes projekteve më interesante është edhe interpretimi i poezisë “Anës Lumenjve” të Fan Noli, e sjellë në një version krejtësisht ndryshe muzikor dhe të përshtatur me frymën e kohës së sotme.
Në dokumentar do të prezantohen edhe këngët:
“Ëndërrime”
“Atdhe e Mëmëdhe”
“E ti tani buzëqeshe”
Kjo e fundit konsiderohet si kënga nga e cila lindi e gjithë ideja e projektit “Urban Underground Unplugged”.
Pjesë e dokumentarit janë edhe artistë të tjerë të skenës alternative, përfshirë Anton Krasniqi, si dhe Harmonious, kori i vajzave që po përgatitet për një performancë të mundshme live më 4 korrik në aktivitetet e Ambasadës Amerikane.
Produksioni thekson se dokumentari është realizuar pa përdorim të inteligjencës artificiale dhe pa ndërhyrje të tepruara audio në performancat live.
“Shpirti i muzikës live është autenticiteti”, thuhet në konceptin e projektit, i cili synon të rikthejë emocionin real të performancës së drejtpërdrejtë dhe lidhjen e pastër mes artistit dhe publikut.
Sipas të dhënave të Fondit Monetar Ndërkombëtar (FMN) për vitin 2025 të publikuar nga Platforma WolrdAtlas, Kosova renditet e dyta si vendi më i varfër në Evropë, pas Moldavisë.
Lidhur më këtë ka folur ministri në detyrë i Financave Hekuran Murati, duke thënë se në qeverisjet e kaluara Kosova ka qenë e fundit, duke shtuar se Kosova tash ka shënuar ngritje.
“Po të ishte gazetaria si duhej do ta kishte shpërfaq gjithë trendin si ka qenë, pra Kosova ka qenë e fundit kur ne kemi marrë qeverisjen dhe tash kemi ngritje më lartë në atë tabelën e rangimit. Në fakt nëse shihet viteve të kaluara, pra deri në vitin 2019 diferenca e Kosovës me vendet e tjera ka shku duke u rrit, pra vendet tjera i kanë ik Kosovës, kurse tash lëre që e kemi ngushtu diferencën por edhe e kemi kalu një shtet dhe presim që shumë shpejtë ky trend të vazhdojë dhe nëse vazhdon ky trend dhe qeverisja e mirë t’i kalojmë edhe shtetet e tjera”, ka thënë Murati.
Sipas tij, Kosova ka përparim në raport me shtetet e tjera.
“FMN-ja aty ka raporturar të ardhurat për kokë banori të bazuar në fuqinë blerëse. Unë nuk po bëj vlerësime, unë vetëm e thash që nëse shikohet trendi, pyetja do të mund të ishte shtruar pak më ndryshe sepse trendi tregon që Kosova ka përparim në raport me shtetet e tjera, pra kemi qenë në vendin e fundit gjatë qeverisjeve të kaluara, tash po kemi kaluar Moldavinë dhe presim t’i kalojmë edhe shtetet tjera nëse vazhdohet ky trend”, ka deklaruar Murati. /Ekonomiaonline
Kandidatja për presidente, Vjosa Osmani ka thënë se me Unazën e Brendshme të Prishtinës, qytetarët e kryeqytetit po fitojnë një zgjidhje të madhe për trafikun dhe qarkullimin që prek gjithë Kosovën.
Përmes një postimi në Facebook, Osmani tha se ky investim strategjik e bën shtetin më funksional, ekonominë më dinamike dhe jetën e qytetarëve më të lehtë.
“Përgëzime për kryetarin Përparim Rama dhe të gjithë ata që u angazhuan në përfundimin e këtij projekti”, ka shkruar ajo.
Irani ka ekzekutuar një numër “tronditës” prej 2.159 personash më 2025, u tha në raportin e Amnesty International të publikuar më 18 maj. Sipas organizatës për të drejtat e njeriut, numri i ekzekutimeve ka tejkaluar rekordin e vitit 1981 të regjistruar në këtë shtet.
Amnesty International tha se të paktën 2.707 persona u ekzekutuan në mbarë botën vitin e kaluar, edhe pse dënimet me vdekje të shqiptuara në Kinë nuk janë përfshirë në këtë shifër.
Organizata me seli në Londër tha se “mijëra ekzekutime” janë kryer në Kinë, shtetit që përdor më së shumti dënimin me vdekje. Megjithatë, sipas Amnesty detajet janë të paqarta për shkak të “sekretit shtetëror” mbi të dhënat në Kinë.
Amnesty tha se shifra globale për vitin 2025 – që përfshijnë ekzekutimet në Arabinë Saudite, Kuvajt, Egjipt, Jemen, Singapor dhe Shtetet e Bashkuara – paraqet rritje për më shumë se dy të tratat krahasuar me shifrën e përgjithshme më 2024.
“Ky trend ishte më i theksuar në shtetet ku autoritetet kanë forcuar kontrollin mbi pushtetin, duke kufizuar hapësirën civile, duke heshtur disidencën dhe duke treguar shpërfillje ndaj mbrojtjeve të vendosura nga ligjet dhe standardet ndërkombëtare për të drejtat e njeriut”, u tha në deklaratë.
Në veçanti, “rritja tronditëse e ekzekutimeve të regjistruara në Iran” erdhi në kohën kur autoritetet “intensifikuan përdorimin e dënimit me vdekje si mjet shtypës politik dhe të kontrollit”, veçanërisht pas luftës së qershorit të vitit 2025 me Izraelin.
Amnesty dhe grupe të tjera për të drejtat e njeriut kanë thënë se Teherani po intensifikon përdorimin e dënimit me vdekje pas protestave masive antiqeveritare në janar dhe luftës që më pas shpërtheu ndaj Izraelit dhe Shteteve të Bashkuara.
Organizata tha se 2.159 ekzekutime janë regjistruar në Iran më 2025 dhe kjo shifër “përbën shifrën më të lartë që nga viti 1981” që është regjistruar në këtë shtet. Po ashtu, kjo është shifra më e lartë e regjistruar në një shtet të vetëm që nga ai vit.
Për shkak të vështirësisë për marrjen e informacioneve konkrete, grupe të tjera kanë ofruar shifra të tjera sa u përket ekzekutimeve në Iran.
Organizata joqeveritare Të Drejtat e Njeriut Iran – organizatë me seli në Norvegji – më herët gjatë vitit tha se të paktën 1.639 persona ishin ekzekutuar në Iran vitin e kaluar.
Teherani e ka pranuar se ka ekzekutuar 30 persona deri më tani gjatë këtij viti.
Arabia Saudite vitin e kaluar kreu të paktën 356 ekzekutime, që është shifër më e lartë sesa rekordi i regjistruar më 2024 prej të paktën 345 ekzekutimesh, tha Amnesty.
Ekzekutimet në Kuvajt u rritën nga gjashtë më 2024 në 17. Në Egjipt, nga 13 numri i ekzekutimeve u rrit në 23. Në Jemen, shifrat vjetore u rritën nga 38 në të paktën 51.
Ndërkaq, në SHBA, Amnesty tha se ka pasur një “rritje të paprecedent” të ekzekutimeve në Floridë – ku janë regjistruar 19 dënime me vdekje – duke bërë që numri i përgjithshëm të arrijë në 47, që paraqet shifrën më të lartë që nga viti 2009. /REL