Blog

Proceset e shpeshta zgjedhore në Kosovë kanë krijuar lodhje politike dhe institucionale, thotë ministri në detyrë për Komunitete dhe Kthim, Nenad Rashiq.

Ai, në intervistën zgjedhore të KosovaPress, thotë se vendi ka tejkaluar çdo formë normaliteti me zgjedhjet e vazhdueshme, teksa shton se kur përmenden zgjedhjet “e kap një mini-infarkt”.

“Kur përmenden zgjedhjet, më beso që kam një mini-infarkt. Sepse me të vërtetë kemi tejkaluar çdo formë normaliteti me tre, katër lloj zgjedhjesh, duke përfshirë edhe zgjedhjet lokale. Është me të vërtetë tepër dhe unë me hajgare kam thënë edhe disa kolegëve të mi, derisa nuk vijnë deri në atë formë sikur në Ukrainë, besoj në vitet ’90, kur qytetarët i kanë pritur deputetët duke dalë prej sallës dhe i kanë kapur, i kanë gjuajtur përreth kontejnerëve. Pak hajgare, por me të vërtetë sa herë po na duhet të dalim në zgjedhje, është boll. Kështu që po na vështirëson shumë neve”, thotë ai.

Rashiq i cili drejton Partinë për Liri, Drejtësi dhe Mbijetesë komenton edhe ofertën që kryeministri në detyrë, Albin Kurti, ia kishte bërë Lidhja Demokratike e Kosovës për bashkëpunim politik dhe zgjedhjen e presidentit.

Sipas tij, oferta e Kurtit kishte qenë “gjeneroze” dhe “me vend”, ndërsa tha se ishte i befasuar nga refuzimi i saj nga LDK-ja.

“Mua më ka befasuar, së pari, oferta e zotit Kurti në atë kohë për LDK-në. Dhe edhe më shumë ka qenë befasi për mua refuzimi i LDK-së. Absolutisht po. Unë jam 20 vjet në politikë, siç thashë, kam qenë edhe ministër dhe në qeveri të mëhershme. Kam besuar që kjo do të ishte një ofertë shumë, siç keni thënë ju, gjeneroze dhe shumë me vend, por kur e pashë refuzimin, refleksi im i parë ka qenë se ishte gabim i LDK-së. Refleksi im i parë, po them kështu. Dhe tani, shikoni, çdo moment kur jeni në garë e ka një dozë rreziku. Është mirë të dalin në zgjedhje, mirëpo kur realizimet për qytetarët nuk janë ashtu siç keni pritur, atëherë duhet të merrni përgjegjësinë. Prandaj, e ka pasur ai momentum që një ofertë ka qenë e mirë. Në vendin e LDK-së, unë do ta kisha pranuar pa kurrfarë problemi”, shton Rashiq.

Duke folur për pozicionin e tij pas zgjedhjeve, Rashiq tha se, bazuar në përvojën e viteve të fundit, adresa e parë për bashkëpunim politik do të ishte sërish kryeministri në detyrë, Kurti.

Megjithatë, ai theksoi se mbetet i hapur për bashkëpunim me të gjitha subjektet politike që, sipas tij, punojnë për interesat e Kosovës dhe të komuniteteve joshumicë.

Pas zgjedhjeve, po normale, sikur i kam thënë edhe më herët, bazuar në eksperiencën që kemi pasur disa viteve të fundit, normale që adresa e parë do të ishte zoti Kurti. Por absolutisht, unë pas 20 vitesh njihem personalisht me shumicën e përfaqësuesve, qoftë deputetë, qoftë kryetarë partish e kështu me radhë. Absolutisht jam i gatshëm të bisedoj me çdo person i cili do të mirën e Kosovës në formën e mbrojtjes së interesave të komuniteteve, në këtë rast mbrojtjen e interesave të serbëve. Absolutisht nuk kam problem të flas me këdo që është në tavolinë për bashkëpunim parimor ose zhvillim të përbashkët. Nëse gjejmë vetëm një element bashkëpunimi, unë jam aty që të bashkëpunojmë”, përfundon ai.

Murat Jashari ka demantuar deklaratën e kryeministrit në detyrë Albin Kurti, i cili ka thënë se mediat i kishin bërë “pritë” Jasharit gjatë deklarimeve për çështjen e presidentit.

Përmes një përgjigjeje dërguar moderatorit të “Debat Plus” në RTV Dukagjini, Ermal Panduri, Jashari ka thënë se nuk e konsideron si “pritë” trajtimin që kishte marrë nga mediat.

“Përshëndetje Ermal. Jo, qëndroj pas asaj që kam deklaruar. Të përshëndes dhe suksese për ju! Sinqerisht! Murati.”, ka shkruar Jashari.

Paraprakisht Panduri i kishte dërguar pyetje Murat Jasharit lidhur me pretendimin e Kurtit.

“A e keni konsideruar z.Jashari pritë atë çfarë në momentin kur jeni deklaruar për media për çështjen e presidentit, me nderime Ermal Panduri”, ishte mesazhi i Pandurit.

Deklarata e Jasharit vjen pasi Kurti, gjatë një interviste në KTV, deklaroi se mediat kishin vepruar padrejtësisht ndaj tij.

“Shumë keq e shumë fish më keq, më keq pra, se sa Glauk Konjufcës ja bënë pritën Murat Jasharit mediat. U thanë ato fjalë dhe ja ku jemi”, ka thënë Kurti.

Pas kësaj deklarate reagoi edhe Panduri, i cili kritikoi qasjen e Kurtit ndaj mediave dhe familjes Jashari.

“Kush jena na me ja nxan familjes Jashari priten si media, kur ja kanë nxan do të tjerë e dinë çka kanë pësu e deri ku është sakrifiku familja Jashari”, deklaroi ai.

Kryetari i Skënderajt, Sami Lushtaku, ka reaguar pas akuzave të Kryeministrit në detyrë, Albin Kurti, i cili ka deklaruar se Lushtaku ka synuar që me veturë zyrtare të shkaktojë aksident me eskortën ku ndodhej ai.

Lushtaku ka deklaruar se nuk ka lidhje më këtë rast, duke thënë se do të merret privatisht me Kurtin qoftë edhe përmes padive.

“Unë e di që Kurti është edhe mashtrues edhe rrenc, dhe kjo nuk i bën nder atij…Nuk është hera e parë që merret me mua. Nuk e di çfarë qëllimi ka ai, por miza me më hangër, unë dhe familja ime kemi me adresu te Albin Kurti. Privatisht kam me kërku që të merrem me të”.

Sipas Lushtakut, Kurti po shpif.

“Vetëm Kurti nëse ka frikë nga vetvetja, sepse unë lidhje nuk kam me atë rast. Ai ka qenë me ekskortë, dhe unë ka dalë nga pompa e benzinës, janë kamerat dhe nuk është mirë me u sjellë në këtë mënyrë”, ka thënë ai në T7.

Kurti ka deklaruar se Lushtaku ka synuar që me veturë zyrtare të shkaktojë ndeshje komunikacioni me eskortën ku ndodhej ai, teksa foli për incidentin e javës së kaluar në Skënderaj si dhe përmendi një tubim të Vetëvendosjes atje më 31 janar 2025.

“Kryetari i Komunës së Skënderajt, me veturë zyrtare 2-Z, ka synuar që të bëjë ndeshje komunikacioni me eskortën ku ndodhesha unë. …Tri vetura ishin aty…Kam qenë vetëm unë dhe mbrojtja e afërt e imja. Ka synu që ta ndërprejë qarkullimin e eskortës sonë në mënyrë të dhunshme”, ka deklaruar Kurti.

Kryetari i Skënderajt, Sami Lushtaku, pas deklaratve të kryeministrit në detyrë Albin Kurti, i cili tha se Lushtaku ka synuar të aksidentohet me eskortën e tij, është deklaruar në Pressing duke thënë se për këtë situatë ekzistojnë pamjet e kamerave dhe të njëjtat policia i ka dërguar në prokurori.

“Unë s’po e kuptoj, po i them Albin Kurtit, lem rehat o vlla”, tha Lushtaku në Pressing.

Ai në Pressing në T7, tha se nuk bëhet fjalë “as për dalje të pakujdesshme, janë kamerat o vlla…Albulena Haxhiu më ka akuzu po atë ditë, policia janë ardhë i kanë marrë kamerat dhe i kanë dërgu në prokurori..”, deklaroi Lushtaku.

Edhe gjatë kësaj jave, vendi ynë do të vazhdojë të mbetet nën ndikimin e kushteve të paqëndrueshme atmosferike dhe masave më të ftohta për këtë periudhë kohore.

Në Kosovë priten vranësira të shpeshta dhe intervale me diell, ku herë pas here do të ketë reshje lokale shiu, të cilat mund të jenë edhe në formë rrebeshesh. Po ashtu, mund të ketë ndonjë vetëtimë dhe bubullimë.

Të mërkurën do të vijojë moti me diell dhe vranësira, ku në disa lokalitete mund të ketë reshje të izoluara shiu.

Nga dita e enjte deri në fundjavë parashikohen vranësira të shpeshta dhe intervale me diell, ku herë pas here priten reshje lokale shiu, të cilat në momente të caktuara do të jenë në formë rrebeshesh. Vranësirat dhe reshjet pritet të intensifikohen duke filluar nga dita e premte, duke mos përjashtuar mundësinë që të shoqërohen edhe me shkarkesa rrufesh

Era do të fryjë nga veriu dhe verilindja, ndërsa herë pas here pritet të jetë mjaft e fuqishme në pjesën e dytë të javës, me shpejtësi prej 15 deri në 50 km/h.

Temperaturat minimale do të lëvizin nga 7 deri në 13°C, ndërsa ato maksimale nga 15 deri në 24°C. /MeteoKosova/

Nënkryetari i Partisë Demokratike të Kosovës dhe numri dy në listën e kësaj partie për zgjedhjet e parakohshme parlamentare të 7 qershorit, Uran Ismaili, ka komentuar zhvillimet e ditëve të fundit në Skenderaj dhe dërgimin e njësive speciale, duke e cilësuar këtë veprim si qasje autoritare nga kryeministri në detyrë dhe operacion politik.

Sipas Ismailit, dërgimi i njësisë speciale në Skenderaj nuk ka qenë në përputhje me situatën në terren, pasi, sipas tij, bëhej fjalë për një incident të izoluar dhe jo për një situatë të vazhdueshme dhune.

“Me u përdor njësia speciale, me u dërgu në Skenderaj, me e rrethu Skenderajn deri në orën 2 të natës, është pikërisht tendencë e një sistemi autoritar, sepse aty nuk ka pasur dhunë të vazhdueshme. Ka pasur një incident”, tha Ismaili.

Ai shtoi se, sipas bindjes së tij, e gjithë situata kishte prapavijë politike. “Për mua ka qenë 100 për qind operacion politik”, u shpreh ai.

Ismaili tha se kryeministri në detyrë Albin Kurti nuk e njeh Drenicën dhe Skenderajn, duke shtuar se shumë nga qytetarët që kishin dalë atë ditë kishin treguar respekt ndaj Policisë së Kosovës.

“Zoti Kurti nuk e njeh Drenicën, nuk e njeh Skenderajn. Ai nuk e di që shumica e atyre njerëzve që kanë dalë atë ditë kanë qenë njerëz, shumë prej tyre ish-ushtarë që kanë rrezikuar jetën e tyre dhe, kur e kanë parë Policinë e Kosovës, i kanë pritur me ujë dhe i kanë pritur si është më së miri, sepse ata nuk kanë dalë kundër shtetit të Kosovës”, tha Ismaili.

Ai shtoi se me këtë veprim është tentuar të krijohet perceptimi se në Drenicë po sfidohet shteti, gjë që sipas tij nuk qëndron dhe tregon mungesë njohjeje për këtë rajon.

Kandidati për deputet nga AAK-ja, Daut Haradinaj, i ftuar në Pressing në T7, u është përgjigjur atyre që e duan partinë e tij jashtë Kuvendit të Kosovës.

Haradinaj u shpreh i bindur që AAK po e bën një punë të jashtëzakonshme duke theksuar që pret një rezultat fitues në këto zgjedhje.

“Kemi besim te elektorati…më bëjnë me besu që një rezultat befasues do të jetë i AAK-së, pavarësisht sulmeve që i kemi nën brez që nuk po ndalen”, tha Haradinaj në Pressing, transmeton Gazeta Express.

“Qaty kanë me pas Aleancën qysh e kan pas”, shtoi ai.