ATV

Blog

  • ​Dogana konfiskon 30 automjete të pazhdoganura

    ​Dogana konfiskon 30 automjete të pazhdoganura

    Njësitë Antikontrabandë të Doganës së Kosovës kanë sekuestruar 30 automjete të pa-zhdoganuara në Rahovec dhe Malishevë.

    Njësitë e Doganës kanë identifikuar dhe kryer kontrollin e automjeteve me targa të huaja, si dhe kanë gjetur auto pjesë pa dokumentacionin e nevojshëm që dëshmon se automjetet nuk janë te zhdoganuara.

    “Njësitë Antikontrabandë të Doganës të Kosovës vazhdojnë të kryejnë kontrolla nëpër territorin e vendit për të parandaluar veprimtarinë e kontrabandës. Gjatë një operacioni janë kryer kontrolle në tre lokacione të ndryshme, me pika thelbësore në Xërxe të Rahovecit dhe dy në Carallukë të Malishevës. Si rezultat të këtyre kontrolleve, janë zbuluar dhe sekuestruar 30 automjete të pa-zhdoganuara, si dhe pjesë të automjeteve të paligjshme në këto tri lokacione. Në përputhje me procedurat ligjore, është filluar procesi i kundërvajtjeve”, thuhet në njoftimin e Doganës.

  • ​Borrell: Jemi duke u përgatitur për valën e ardhshme të zgjerimit

    ​Borrell: Jemi duke u përgatitur për valën e ardhshme të zgjerimit

    Përfaqësuesi i Lartë i Bashkimit Evropian, Josep Borrell, ka thënë se janë duke u përgatitur për valën e ardhshme të zgjerimit.

    Kështu tha Borrell ndërkohë që është deklaruar për takimin e mbrëmshëm në Nju Jork me liderët e Ballkanit Perëndimor, ku mori pjesë edhe presidentja Vjosa Osmani, me rastin e sesionit të 78-të të Asamblesë së Kombeve të Bashkuara.

    Borrell i quajti ata anëtarë të ardhshëm të BE-së, teksa tha se janë duke u përgatitur për valën e re të zgjerimit.

    Takim tradicional me gjashtë partnerët tanë të Ballkanit Perëndimor, anëtarët e ardhshëm të BE-së. Ne diskutuam sfidat aktuale globale, përafrimin, punën e përbashkët në forume shumëpalëshe dhe reformat. Duke u përgatitur për valën e ardhshme të zgjerimit, ne duam ta bëjmë realitet integrimin progresiv”, ka shkruar Borrell në rrjetin social ‘X’.

  • Detaje nga rasti tragjik në Malishevë

    Detaje nga rasti tragjik në Malishevë

    Sot rreth orës 07:15 një vrasje ka ndodhur në Banjë të Malishevës. Mësohet se A.B., i cili është nga komuna e Suharekës, u vra nga një person i komunës së Malishevës me inicialet I.Z.
    Vrasjen e ka konfirmuar për ATV-në, zëdhënësi i Policisë së Kosovës për rajonin e Gjakovës, Sheremet Elezaj.

    Sipas policisë, ende nuk dihen motivet që çuan drejt vrasjes, pavarësisht që sot, një i dyshuar është dorëzuar menjëherë në stacionin policor në Malishevë.

    Ekipet mjekësore kishin dalë në vendin e ngjarjes, ku kishin konstatuar vdekjen e tij, e po ashtu bashkë me ekipet mjekësore edhe njësitet e nevojshme policore kanë dalë në vendin e ngjarjes si dhe kanë njoftuar edhe Prokurorinë e Shtetit.

    Vlen të ceket se deri para pak çastesh, trupi i të ndjerit kishte qëndruar në vendin e ngjarjes, mirëpo tani është larguar dhe në vendin e ngjarjes kanë mbetur vetëm veturat afër të të cilave i ndjeri ishte vrarë.

    Ekipet e forenzikës janë duke qëndruar në vend të ngjarjes ku po grumbullojnë prova dhe fakte të cilat do të ndihmojnë në zbardhjen e rastit.

    Vlen të ceket që rruga, e cila kalon nga fshati Duhël për në fshatin Bellanicë, ka mbetur e mbyllur për qytetarët, kështu që këta të fundit, po përdorin rrugë të tjera alternative nëpër fshatin Senik e Lladrovicë. /atvlive.tv

  • ​Hovenier: ShBA beson në Lajçakun dhe Borrellin si ndërmjetësues të dialogut

    ​Hovenier: ShBA beson në Lajçakun dhe Borrellin si ndërmjetësues të dialogut

    Shtetet e Bashkuara të Amerikës kanë rikonfirmuar edhe njëherë mbështetjen ndaj Bashkimit Evropian si ndërmjetësues të dialogut. Mbështetje konkrete ambasadori amerikan, Jeffrey Hovenier, i dha sot (e mërkurë) edhe ndërmjetësve evropianë të dialogut, Josep Borrell dhe Miroslav Lajçak.

    Në samitin e Paqes dhe Demokracisë (KDPS), Hovenier tha se vetëm normalizimi i marrëdhënieve Kosovë-Serbi i sjell dy vendet më pranë institucioneve trans-atlantike. Derisa theksoi se Shtetet e Bashkuara dhe partnerët e shohin dialogun e lehtësuar nga BE si më të mirën dhe si të vetmen mënyrë për të avancuar dhe arritur integrimin e plotë evropian dhe paqe e prosperitet të qëndrueshëm në rajon.

    E siç tha ai, zbatimi i marrëveshjes së bazike dhe aneksit të saj nga të dyja palët, mbetet pritshmëri e ShBA-së.

    “Ne po përpiqemi të mbështesim secilin vend këtu për t’u transformuar, për t’u bërë një kontribues i sigurisë dhe jo një burim problemesh dhe destabiliteti. Kjo do të thotë se do të vazhdoni të shihni mbështetjen e plotë amerikane për dialogun e lehtësuar nga BE. ShBA ka besim të plotë në Bashkimin Evropian, në lehtësimin e saj të dialogut, dhe se ShBA ka besim të plotë te përfaqësuesi i Lartë Borrell dhe përfaqësuesi Special i BE-së, Lajçak, si zbatues objektivë të kësaj politike. Dhe, këtu nuk dua të flas me fjalë. Është e rëndësishme për të gjithë akterët në këtë proces, të pranojnë procesin në të cilin janë dhe të luajnë ‘poker’ me letrat që u janë shpërndarë. Dhe për të mbajtur parasysh këtë vizion që punon drejt marrëdhënies së normalizimit, duke punuar drejt zbatimit komplet dhe të plotë të [marrëveshjes së] Ohrit dhe aneksit të zbatimit të saj nga të dyja palët që është pritshmëria jonë, zbatimi i plotë nga të gjithë, është rruga përpara, e sjell Kosovën shumë më afër këtij vizioni që ne ndajmë për integrim të plotë në strukturat evropiane dhe euroatlantike”, tha Hovenier, dy ditë pasi kryeministri i Kosovës, Albin Kurti, drejtoi akuza ndaj Lajçakut, që e cilësoi si ndërmjetësues të njëanshëm.

    Ai theksoi se ShBA-ja dhe vendet transatlantike e mbështesin paqen dhe angazhohen për të, sikurse bën në Bosnje dhe në Kosovë, porse shtoi se njerëzit e rajonit duhet të jenë udhëheqës në avancimin e vziionit të tyre.

    “Unë kam qenë dëshmitar i dorës së parë i fuqisë, kapacitetit të aleancave transatlantike dhe strukturave evropiane dhe partneriteteve që ne ndërtuam së bashku kur mobilizuam forcat tona për t’i dhënë fund spastrimit etnik apo dhunës në Bosnje apo këtu në Kosovë. Herë pas here, pa pushim, Aleancat Translatike, angazhimi diplomatik, veprimet e NATO-s, aktiviteti dhe vendimet e BE-së janë dëshmuar në elementë thelbësorë dhe të rëndësisë kritike të angazhimit të diplomacisë dhe sigurisë në ndjekjen e paqes. Por ne nuk mund ta arrijmë këtë, ne mund ta mbështesim atë, ne mund ta lehtësojmë atë, por njerëzit e rajonit duhet të jenë udhëheqës në shikimin dhe avancimin e vizionit të tyre dhe ne jemi të gatshëm të qëndrojmë plotësisht në mbështetje të një vendi të fuqishëm dhe kuptimplotë”, tha Hovenier.

    Ambasadori amerikan theksoi se e ardhmja e Ballkanit Perëndimor mbetet në institucionet evropiane dhe transatlantike.

    “Procesi zyrtar i anëtarësimit në BE është duke u zhvilluar për Shqipërinë, Malin e Zi, Maqedoninë e Veriut dhe Serbinë. Këto janë ndryshime. Dhe ndërsa sfida kryesore aktuale për arritjen e këtij vizioni të një Evrope krejtësisht të lirë dhe në paqe, që përfshin Ballkanin Perëndimor në opinionet tona, padyshim që lufta brutale e gjithanshme që Putin po bën tani për Ukrainën, siç e thashë tashmë në fjalim, Ballkani Perëndimor mbetet një element thelbësor, jo vetëm kritik, por absolutisht thelbësor i vizionit. Evropa nuk është e tërë pa Ballkanin Perëndimor, duhet të jemi të qartë. Pra, ndërsa ky rajon është qartësisht pjesë qendrore e Evropës, sot jam po aq i sigurt sa kam qenë ndonjëherë se e ardhmja e Ballkanit Perëndimor mbetet në institucionet evropiane dhe transatlantike”, vijoi ai.

    Edhe pse sfidat e sigurisë dhe politike sot nuk ndihen si në epokën e Millosheviqit, Hovenier theksoi se një dështim për të arritur marrëdhënie të normalizuara mes Kosovës dhe Serbisë është dhe mbetet pengesë e madhe për avancimin e rajonit.

    “Qëllimi i SHBA-së mbetet shumë, shumë i qartë, kjo marrëveshje aktuale, kjo përpjekje për të avancuar marrëdhëniet e normalizuara është një hap i përkohshëm drejt një qëllimi eventual të njohjes reciproke mes këtyre dy vendeve, kjo duhet të ndodhë, nuk mund të keni paqe të qëndrueshme pa të. Por një dështim për të avancuar, një dështim për të arritur marrëdhënie të normalizuara është dhe mbetet një pengesë e madhe për avancimin e këtij rajoni në institucionet evropiane dhe euroatlantike me të gjitha pasojat shoqëruese, jo vetëm për Kosovën dhe Serbinë, por për rajonin.

    Ambasadori amerikan u shpreh se janë duke punuar shumë për të ndihmuar Kosovën dhe Serbinë, që të kenë të ardhme të qëndrueshme dhe të begatë. Sipas tij, ShBA-ja pret që ta sheh Kosovën “të zërë vendin e saj të merituar, si një vend i mesëm i vogël i Ballkanit Perëndimor, vend që njihet nga i gjithë komuniteti ndërkombëtar për atë që është, një shtet plotësisht i pavarur dhe sovran, kjo është e padiskutueshme.”

  • ​Gjuha e urrejtjes në rritje, Konjufca: Politikanët nuk janë shembull i mirë

    ​Gjuha e urrejtjes në rritje, Konjufca: Politikanët nuk janë shembull i mirë

    Politikanët nuk kanë arritur të jenë shembull i mirë i luftimit të gjuhës së urrejtjes, tha kryeparlamentari Glauk Konjufca. Sipas tij, përgjegjësia bie mbi secilin përfaqësues politik që ta dënojë gjuhën e urrejtjes. Konjufca deklaroi se Kuvendi është në procedurën e hartimit të Kodit të Etikës, e cila sipas tij do të ndihmojë për krijimin e praktikave demokratike të komunikimit. Kështu tha ai në konferencën “Gjuha e urrejtjes në diskursin publik”, ku mes tjerash u nënvizua se gjuha e urrejtjes në Kosovë është në rritje.

    Konjufca tha se gjuha e urrejtjes është një fenomen global, i cili po sfidon në çdo shtet të botës.

    “Fatkeqësisht, ekzistojnë raste të shumta kur edhe politikanët nuk kanë arritur të jenë shembull i mirë i luftimit të gjuhës së urrejtjes në diskursin publik dhe ta ofrojnë atë shembull, atë model që duhet dhe kjo është një model i cili promovon një gjuhë që promovon veçoritë e secilit individ, vlerat e tij, e sidomos të grupeve shoqërore, grupeve etnike, të grupeve identitare të ndryshme racore, fetare, seksuale e kështu me radhë. Një prej formave më të shprehura e dekurajimit për përfshirjen publike dhe politike, sidomos në grupet më të cenueshme shoqërore, pra është gjuha e urrejtjes. Konsiderohet që përgjegjësia bie mbi secilin përfaqësues politik që jo vetëm ta dënojmë gjuhën dhe e cila nxit urrejtje, por edhe të ftojmë mbështetësit dhe qytetarët për tolerancë dhe mirëkuptim, pavarësisht dallimeve që i kemi”, deklaroi Konjufca.

    Pavarësisht legjislacionit, kryeparlamentari shtoi se përvoja e deritashme ka dëshmuar nevojën për përforcimin e mekanizmave.

    “Kuvendi i Kosovës është në procedurën e hartimit të Kodit të Etikës, ne ende si Kuvend nuk e kemi Kodin e Etikës. Jemi duke e përpiluar atë. Dhe kjo ma merr mendja që më shumë do të ndihmojë përfaqësuesve të popullit për krijimin e praktikave demokratike të komunikimit. Dhe që ato të jenë më të kontrolluara, më të standardizuara dhe që të mos lejojmë përdorimin e shprehjeve të tilla, të cilat më vjen keq do të mund t’i keni dëgjuar edhe në Parlamentin e Kosovës”, u shpreh ai.

    Shefi i Zyrës së BE-së në Kosovë, Tomas Szunyog tha se gjuha e urrejtjes i prek më së shumti grupet e ndjeshme dhe se ky fenomen është i njëjtë me terrorizmin.

    “Për BE-në gjuha e urrejtjes dhe krimi i urrejtjes janë krime serioze sepse ndikojnë shumë në të drejtat fondamentale të individëve, të shoqërisë në përgjithësi dhe minojnë edhe vet themelin e shoqërisë tonë. Komisioni ka përfshirë edhe gjuhën e urrejtjes dhe krimin e urrejtjes në zgjerimin e krimeve të BE-së dhe që nga 2021 në dhjetor, gjuha e urrejtjes dhe krimi i urrejtjes do të jenë në të njëjtën grup të krimeve sikurse edhe terrorizmi, trafikimi me qenie njerëzore, drogat e paligjshme, trafikimi i armëve e kështu me radhë. Gjuha e urrejtjes i prek më së shumti ata më të ndjeshmit, komunitetin LGBTI, rom, ashkali, egjiptas dhe komunitetet tjera joshumicë, si dhe vajzat, gratë nga të gjitha komunitetet, persona me pa aftësi dhe çfarëdo grupi tjetër që ndihet sikur në disavantazh apo i margjinalizuar”, u shpreh Szunyog.

    Sipas tij, raportet rregullative të Kosovës kanë ndërmarrë masat e duhura për të adresuar gjuhën e urrejtjes.

    Me këtë rast, kryetari Glauk Konjufca ka përmendur edhe rastet kur është hasur gjuhë e urrejtjes në librat shkollor, për çka tha se janë dëshmi që nuk ka pasur kontroll e as cilësi para se të njëjtat të publikohen.

    Për këtë foli edhe Avokati i Popullit, Naim Qelaj ku tha se janë analizuar 47 teksteve shkollore, ku është vërejtur në masë të madhe gjuha e urrejtjes.

    “Nëse i referohemi një analize të thjesht të diskursit të komunikimit publik sot në vendin tonë, unë mund të konstatoj se gjuha e urrejtjes në baza diskriminuese ndaj grave, personave LGBTI është në rritje dhe kjo kryesisht mbi bazën e seksit, gjinisë, identitetit gjinor të tyre. E kjo rritje vërehet dukshëm siç u tha edhe nga kryetari i Kuvendit, në rrjete sociale, si platforma që lehtësojnë qasjen gjithëpërfshirëse të secilit dhe mundësinë të lehtë për të shprehur, pamenduar për pasojat që mund t’i ketë ajo që komentojnë në këto platforma”, tha Qelaj.

    Tutje, ai theksoi se janë në fazën përfundimtare të analizimit të gjuhës në diskursin publik, ku siç tha ai, është vërejtur gjuhë e urrejtjes nga deputetët në debatet parlamentare për Kodin Civil.

    E drejtoresha e Nismës së të Rinjve për të Drejtat e Njeriut “YIHR”, Marigona Shabiu tha se qytetarët janë vazhdimisht dëshmitarë të një kulture fyese të debatit në Kuvend.

    “Një gjuhë e tillë është kërcënim për vet demokracinë dhe të drejtat e njeriut. Historia ka treguar që gjuha e urrejtjes është një akt në serinë e akteve që shpesh herë rezulton në krime më të madh të urrejtjes dhe si e tillë përbën rrezik për çdo shoqëri dhe qytetar. Rrezikshmëria e gjuhës së urrejtjes si një akt shumëfishohet kur ajo instrumentalizohet dhe përdoret nga vetë zyrtarët e liderët shtetëror, që bartin pushtet institucional. Fatkeqësisht ne jemi dëshmitar të këtij fenomeni në vazhdimësi në Kosovë. Fillojmë me Kuvendin e Republikës së Kosovës, në këtë institucion që supozohet të jetë forum për promovimin e barazisë, lirisë së gjithëpërfshirjes, kemi dëgjuar të përdoret gjuhë e urrejtjes si diskriminuese, ashtu edhe pezhorative ndaj komuniteteve dhe individëve më të cenueshëm të shoqërisë tonë”, përfundoi ajo.

    Edhe Shabiu ka përmendur seancën e 16 marsit ku është debatuar për Kodin Civil, ku tha se ka krijuar ndjenjë të frikës dhe pasigurisë për komunitetin LGBTI.Sipas saj, personat e njëjtë nuk po ndëshkohen dhe vazhdojnë të mbajnë pozita. /KP

  • “Gjuha e urrejtjes në diskursin publik”, Szunyog: Hyn në të njëjtin grup me terrorizmin

    “Gjuha e urrejtjes në diskursin publik”, Szunyog: Hyn në të njëjtin grup me terrorizmin

    Është mbajtur konferenca e nivelit të lartë me për “gjuhën e urrejtjes në diskursin publik”, ku shefi i BE-së në Kosovë, Tomas Szunyog, tha se çfarëdo lloji i urrejtjes është e papërputhshme me vlerat themelore të Bashkimit Evropian.

    Szunyog tha se për BE-në, gjuha e urrejtjes është krim serioz, pasi sipas tij, ndikon shumë në të drejtat fundamentale të individëve, shoqërisë dhe e minojnë vetë themelin e shoqërisë kosovare.

    “Komisioni ka përfshirë gjuhën e urrejtjes në zgjerimin e krimeve të BE-së dhe që nga 2021-ta, gjuha e urrejtjes dhe kthimi i urrejtjes do të jenë në të njëjtin grup të krimeve sikurse terrorizmi, trafikimi me qenie njerëzore, trafikimi i armëve e kështu me radhë”.

    “Gjuha e urrejtjes i prek ata më të ndjeshmit, komunitetin LGBTQ+, romët, ashkalinjë, egjiptianë dhe komunitetet e tjera joshumicë, vajzat, gratë nga të gjitha komunitetet, personat me aftësi të kufizuara dhe të gjitha grupet e tjera që ndihen sikurse është në disavantazh apo i margjinalizuar me pjesën tjetër të shoqërisë”, tha Szunyog, njofton Klankosova.tv.

    Më tej, ai tha se raportet rregullative të Kosovës kanë ndërmarrë masat e duhura për ta adresuar gjuhen e urrejtjes në Kosovë, teksa bëri ftesë që e njëjta të bëhet edhe në raportet e tjera vjetore.

  • Muja për Lajçakun: Hoqi pikën 14, Kosova e ka bërë pjesën e saj – Serbia jo

    Muja për Lajçakun: Hoqi pikën 14, Kosova e ka bërë pjesën e saj – Serbia jo

    Deputeti i Vetëvendosjes mbrojti në studion e Debatit në A2 CNN, qëndrimin e kryeministrit Albin Kurti, në lidhje me akuzat e këtij të fundit ndaj ndërmjetësit europian në dialogun Kosovë-Serbi, Miroslav Lajçak, i cili sipas tij favorizon Beogradin.

    Armedn Muja tha se ka pak dallime mes draftit serb dhe atij të ndërmjetësit. Sipas tij nga 139 marrëveshjet, “Lajçak ka marrë një nga ato dhe vetëm pjesërisht duke hequr pikën 14 që i shkon në favor Kosovës dhe duke e bërë asociacionin në qendër”.

    Sipas tij në Kosovë është mbushur kupa nga përpjekjet e ndërmjetësit. “Në Kosovë është mbushur kupa nga përpjekjet e ndërmjetësit, se vazhdimisht Kosovës i ofrohen udhërrëfyes, të themelojë asociacionin dhe pastaj të shohim dhe kjo ka degraduar nga ndërmjetësi i BE. As marrëveshja e 2013 nuk thoshte që asociacioni ishte në qendër. Pse nuk zbatohet pika 14 e marrëveshjes? Prisja që në Kosovë të dilnin edhe nga e djathta jonë dhe të thoshin pse nuk është listuar neni 4?”.

    I pyetur se çfarë do të ndodhë me dialogun pas kësaj, Muja theksoi se nuk është qëllimi i dialogut ruajtja e dialogut, por bashkëpunimin, integri i dhe arritja e marrëveshjes.

    “Ky dialog daton nga 8 shtatori 2010 dhe BE është bërë ndërmjetës pas rezolutës së Asamblesë së OKB. Kosova nuk ka opsionin të zgjedhë ndërmjetësit, por të mbrojë interesat. Nuk është qëllimi i dialogut ruajtja e dialogut. Qëllimi i dialogut është bashkëpunimi mes palëve, promovimi i integrimit europian dhe arritja e marrëveshjes që shkon në të mirë të njerëzve. Ajo që kemi parë është që kur Kosova tenton të avancojë në objektiva. Detyrë e Kosovës është të përgjigjet në çdo rast kur ndërmjetësi e fton, por t’i artikulojë qartë kur e shikon që dialogu po kushtëzohet mbi qëndrimet e Serbisë. Kemi tendencë të vetëfajësimit të vazhdueshëm. Studiot televizive e kanë bërë asociacionin në qendër”.

    I pyetur për zgjedhjet në veri, deputeti i Vetëvendosjes theksoi se Kosova e ka bërë pjesën e saj, kurse Serbia jo, ndërsa pret nga ndërkombëtarët heqjen e masave ndëshkuese.

    “Kosova po ushtron sovranitetin, zgjedhjet u pranuan ndërkombëtarisht dhe çdo gjë që është kërkuar nga Kosova është zbatuar. Masat janë të kthyeshme dhe presim që kjo të bëhet. Kosova ka ndërmarrë hapat e depërshkallëzimit, por pala serbe nuk e ka bërë këtë gjë. Në planin e sekuencimi nuk kishte hapa konkretë se kur do të pranohet Kosova në organizata, prandaj Kosova insiston që këto të jenë komponentë. Ndërmjetësi na thotë të zbatojmë asociacionin”.

    Duke debatuar me të, kryeredaktori i Telegraf Muhamet Hajrullahu, tha se publiku në Kosovë nuk e ka të qartë sesi do të vazhdojë ky dialog, ndërsa janë 3 çështje pa përgjigje.

    “Janë 3 çështje që publiku nuk ka përgjigje. Jam me ju për ligjshmërinë dhe kushtetushmërinë, por publiku në Kosovë dhe unë nuk e kam të qartë sa do të vazhdojë ky dialog. Ky dialog po e lë Kosovën në stanjacion, jo ta avancojë Kosovën. As ka pasur njohje apo përfaqësim e aplikim në organizata. Unë do të doja të ishim anëtar i secilës organizatë rajonale dhe këtë nuk mund ta bëjmë pa miqtë perëndimorë dhe këta miq nuk po e përkrahin Kosovën”.

  • Komuna e Prishtinës del me udhëzues për legalizim të ndërtimeve, paralajmëron rrënime

    Komuna e Prishtinës del me udhëzues për legalizim të ndërtimeve, paralajmëron rrënime

    Komuna e Prishtinës ka njoftuar se ka përgatitur një udhëzues mbi procesin e legalizimit të ndërtimeve, që do të ndihmojë me informata konkrete rreth procesit dhe hapat që duhet të ndiqen për të legalizuar ndërtimet.

    Përmes një postimi në faqen zyrtare, Komuna ka paralajmëruar të gjithë ata që s’aplikojnë për legalizim, se do të përfshihen në listën e rrënimit.

    Tutje, thuhet se Komuna mund të bëjë rrënimin e ndërtimit pa asnjë kompenzim.

    Udhëzuesin mund ta gjeni duke klikuar në këtë link.

  • Komisioni për mbikëqyrjen e AKI-së diskuton planin e punës me dyer të mbyllura

    Komisioni për mbikëqyrjen e AKI-së diskuton planin e punës me dyer të mbyllura

    Komisioni për Mbikëqyrjen e Agjencisë së Kosovës për Inteligjencë është mbledhur të mërkurën për të shqyrtuar Planin e Punës së Komisionit për sesionin vjeshtor 2023, raporton EO.

    Diskutimet janë duke u mbajtur pa pranin e medieve, ato janë lejuar që të marrin vetëm pamje në fillim të takimit.

    Rendi i ditës:

    1. Miratimi i rendit të ditës;
    2. Miratimi i Procesverbalit të mbledhjes të komisionit, të mbajtur më 12.07.2023
    3. Shqyrtimi i Raportit të Punës së Komisionit për sesionin pranveror të vitit 2023
    4. Shqyrtimi dhe miratimi i Draft Planit të Punës së Komisionit për sesionin vjeshtor të vitit 2023
    5 . Të ndryshme

  • Specialja refuzon 9 kërkesa për statusin e viktimave pjesëmarrëse në çështjen Thaҫi dhe të tjerët

    Specialja refuzon 9 kërkesa për statusin e viktimave pjesëmarrëse në çështjen Thaҫi dhe të tjerët

    Dhomat e Specializuara të Kosovës (DhSK) në Hagë, i kanë refuzuar si të parakohshme nëntë kërkesa për statusin e viktimave pjesëmarrëse në gjykimin ndaj Hashim Thaçit, Kadri Veselit, Rexhep Selimit dhe Jakup Krasniqit.

    Kjo është bërë e ditur nga faqja zyrtare e DhSK-së, në të cilin njoftim thuhet se trupi gjykues ka marrë këtë vendim më 19 shtator, raporton ‘‘Betimi për Drejtësi’’.

    E gjithë kjo, me arsyetimin se afati kohor për dorëzimin e këtyre kërkesave ka skaduar më 15 shkurt.

    “Trupi gjykues refuzoi të merrte në konsideratë bazueshmërinë e këtyre kërkesave pasi afati kohor për dorëzimin e tyre në këtë çështje skadoi më 15 shkurt dhe nuk ishte treguar asnjë arsye e pranueshme për t’i konsideruar ato si të vlefshme siç parashihet në Rregullën 9 (5) (b)”, thuhet në njoftim.

    Megjithatë, po në këtë njoftim thuhet se trupi gjykues vuri në dukje se Zyra për Pjesëmarrjen e Viktimave mund të ridorëzojë raportin me disa informacione shtesë.

    Vendimin e plotë në gjuhën angleze mund ta gjeni: KËTU.

    Ndryshe, së fundmi është pranuar një viktimë tjetër që të marrë pjesë në proces gjyqësor, ku deri më tash numri total i viktimave në këtë çështje ka arritur 141.

    Ndryshe, gjatë muajit prill ka filluar gjykimi derisa në seancën e 3 prillit, Zyra e Prokurorit të Specializuar (ZPS) dhe mbrojtësi i viktimave kanë paraqitur deklarimet hyrëse dhe pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.

    Më 4 prill mbrojtja e Thaçit, Veselit dhe Selimit kanë dhënë fjalën hyrëse derisa më 5 prill mbrojtja e Krasniqit ka dhënë fjalën hyrëse.

    Më 11 prill ka filluar paraqitja e provave të Prokurorisë ku dëshmitarja e parë e mbrojtur e Prokurorisë, ka dhënë dëshminë e saj më 11 prill, 12 prill, 13 prill dhe më 17 prill.

    Më 17 prill ka filluar dëgjimi i dëshmitarit të dytë, po ashtu i mbrojtur, i cili ka vazhduar dhënien e dëshmisë edhe më 18 prill, 19 prill dhe 20 prill, ku ka përfunduar dhënien e dëshmisë edhe dëshmitari i tretë, kurse më 10 maj ka filluar dhënien e dëshmisë dëshmitari i katërt, dëshmia e të cilit përfundoi më 17 maj.

    Tutje, dëshmitari i pestë ka filluar dëshminë më 17 maj dhe e përfundoi më 22 maj, ku filloi dëshminë dëshmitari i gjashtë i cili përfundoi dëshminë më 23 maj, në të njëjtën ditë me dëshmitarin e shtatë.

    Kurse, më 12 qershor ka filluar dëshminë e tij dëshmitari i tetë, i cili përfundoi dëshminë e tij më 14 qershor, ndërkaq me 15 qershor ka përfunduar dëshmia e dëshmitarit i nëntë.

    Më 19 qershor ka përfunduar dëshminë dëshmitari i dhjetë, në ditën ku ka filluar dëshminë dëshmitari i 11-të i cili e ka përfunduar dëshminë e tij më 20 qershor. E më 10 korrik ka filluar dëshminë dëshmitari i 12-të, i cili ka përfunduar dëshminë më 11 korrik, në seancën ku ka filluar dëshminë Rrustem Mustafa, ish-komandat i zonës operative të Llapit.

    Mustafa ka vazhduar dhënien e dëshminë së tij në seancën e 12, 13, 14, 17 dhe 18 korrikut.

    Ndërsa dëshmitari i 14-të me radhë, Francis Ladwidge, oficeri britanez që shërbeu në Kosovë filloi dëshminë po më 18 korrik dhe e mbaroi më 19 korrik, ku nisi dëshminë dëshmitari i 15-të, i cili e përfundoi më 20 korrik.

    Kurse, më 14 gusht filloi dhënien e dëshmisë dëshmitari i 16-të, e që e përfundoi më 16 gusht dhe më 17 gusht përfundoi dëshminë dëshmitarja e 17, Dragica Bozhaniq.

    E dëshmia e dëshmitarit të 18-të ka filluar më 28 gusht dhe ka mbaruar më 29 gusht, në ditën kur filloi dëshminë dëshmitari i 19-të, i cili përfundoi dëshminë më 30 gusht.

    Më 4 shtator përfundoi në të njëjtën ditë dëshminë dëshmitari i 20-të, kurse pa masa mbrojtëse, dëshmitari i 21-të, Agim Idrizi filloi të dëshmojë, i cili përfundoi dëshminë më 5 shtator, ku edhe filloi dëshmia e zyrtarit nga organizata ndërkombëtare “Human Rights Watch”, të Frederick Abrahams, i cili përfundoi më 11 shtator.

    Më 11 shtator ka përfunduar edhe dëshmia e dëshmitarit të 23-të, ndërkaq më 12 shtator ka filluar të dëshmojë dëshmitari i 24-të.

    Në të njëjtën ditë ka filluar dëshminë dëshmitari i 25-të Douglas Young, ish-oficer i ushtrisë britanike, i cili ka përfunduar dëshminë më 14 shtator.

    Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.

    Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.

    Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.

    Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020