ATV

Blog

  • Serwer për sulmin terrorist në veri: Në komunat me shumicë serbe në Kosovë, asgjë nuk ndodh pa dijeninë e Beogradit

    Serwer për sulmin terrorist në veri: Në komunat me shumicë serbe në Kosovë, asgjë nuk ndodh pa dijeninë e Beogradit

    Policia e Kosovës dhe forcat e NATO-s në veriun me shumicë serbe të vendit penguan një rebelim të armatosur gjatë fundjavës. Një polic i Kosovës dhe katër terroristë u vranë dhe disa u arrestuan. Por shumica duket se kanë ikur, tha për peacefare.net Daniel Serwer, profesori në Shkollën e Studimeve të Avancuara Ndërkombëtare të Universitetit Johns Hopkins në Uashington.

    Sipas tij, Serbia dhe përfaqësuesit e saj politikë të Listës Serbe në Kosovë shpallën ditë zie.

    Ai thotë se kjo konfirmon mbështetjen e tyre për rebelimin. “Burrat e gjelbër” duket se kanë gjetur një strehë të sigurt në Serbi.

    “Presidenti serb Vuçiq më pas u takua me ambasadorin rus Aleksandar Bocan Harchenko. Vuçiq është ankuar për “spastrim brutal etnik” në Kosovë, për të cilin nuk ka asnjë provë”, tha ai.

    Serwer ka hedhur dyshimet e tij rreth sulmit terrorist që ndodhi në veri të dielën. Thotë se në komunat me shumicë serbe në Kosovë, asgjë nuk ndodh pa dijeninë e Beogradit.

    “Ne nuk kemi as konfirmim se Vuçiq ka urdhëruar një rebelim të armatosur. Por një nga qytetet e tij në veri të Kosovës ishte i përfshirë. Gjëra të tilla nuk ndodhin pa dijeninë e Beogradit. Vuçiq mund ta kishte ndaluar paraprakisht ose ta dënonte më pas. Ai nuk e bëri asnjërën”.

    Sipas Serwer-it, ky incident është konfirmim se Vuçiq nuk ka ndërmend të normalizojë marrëdhëniet me Kosovën.

    Dialogu ndërmjet Beogradit dhe Prishtinës me këtë qëllim është mbulesë për qëllimin e tij real. Ai kërkon ndarjen e katër komunave në veri me shumicë serbe. Ai do të preferonte një ndarje de jure dhe shpreson se suksesi i Rusisë në aneksimin e pjesëve të Ukrainës do ta konfirmojë këtë qëllim.

    “Por ai, tani për tani, do të pajtohej për një administratë de facto të veçantë, në formën e një Bashkësie të Komunave me shumicë serbe”

    Sipas Serwerit, Prishtina ka treguar se policia e saj, me mbështetjen e NATO-s, mund të merret me një grup të armatosur rëndë prej disa dhjetëra militantë të vendosur.

    “Por është gjithashtu e qartë se forca të blinduara serbe mund të lëvizin lehtësisht në Kosovë. Është më pak se 40 kilometra nga pikëkalimi më i afërt kufitar serb në Mitrovicën veriore, ndoshta një orë me makinë me tanke”, pohon Serwer duke shtuar se diplomatët amerikanë dhe evropianë besojnë se Serbia nuk do të tentojë një veprim të tillë për shkak të pasojave politike.

    “Por Vuçiq e di më mirë. Ai po përpiqet të bindë botën se serbët po pastrohen etnikisht nga Kosova. Kjo mund të mbështesë pretendimin se tanket e tij po mbrojnë civilët. Prandaj ai vazhdimisht pretendon, pa prova, se po bëhet një spastrim i tillë etnik, siç bëri në takimin me ambasadorin rus.

  • Mbahet tryeza e rrumbullakët për Ditën Kombëtare të Boshnjakëve

    Mbahet tryeza e rrumbullakët për Ditën Kombëtare të Boshnjakëve

    Zëvendëskryeministrja për Çështje të Pakicave dhe Drejtat e Njeriut, Emilija Rexhepi, organizon sot nga ora 10:00 tryezën e rrumbullakët me rastin e Ditës Kombëtare të Boshnjakëve.

    Në Kosovë, sipas regjistrimit të fundit të vitit 2011, jetojnë rreth 27 mijë boshnjakë. Për ditën e tyre kombëtare ata zgjodhën 28 shtatorin, datën kur në Sarajevë u kthye emri kombëtar boshnjak.

  • Clark për armatimin e gjetur në Banjskë: Veprim i koordinuar me forcat speciale serbe

    Clark për armatimin e gjetur në Banjskë: Veprim i koordinuar me forcat speciale serbe

    Ish-komandanti i lartë i NATO-s, Gjenerali Wesley Clark, në një intervistë për Zërin e Amerikës, ka folur për sulmin terrorist në veri.

    Më poshtë pjesë nga intervista:

    Zëri i Amerikës: Si i komentoni ngjarjet që ndodhën të dielën e kaluar në veri të Kosovës afër fshatit Banjskë?

    Wesley Clark: Para së gjithash, është një tragjedi për të gjitha palët dhe është një problem real për qendrueshmërinë në Ballkan. Duhet të përbëjë shqetësim për Bashkimin Evropian dhe NATO-n, ndërsa dalin në pah detajet e incidentit. Ajo që është më shqetësuese për mua është se pas incidentit, rezultoi se kishte një grumbullim të madh armësh në manastirin serb. Kjo ka ndodhur edhe më parë.

    Zëri i Amerikës: Autoritetet e Kosovës pretendojnë se një nga sulmuesit është Milan Radoiçiq, nënkryetar i partisë më të madhe dhe më me ndikim të serbëve të Kosovës, që ka lidhje të ngushta me partinë serbe në pushtet. Ai është gjithashtu nën sanksionet e SHBA-së dhe Britanisë së Madhe. Si e shihni këtë?

    Wesley Clark: Kjo është një dëshmi e mëtejshme e përfshirjes së qeverisë serbe. Incidenti tregon për rrezikshmërinë që mund të ketë zbatimi i marrëveshjes për Asociacionin, të mbështetur nga Shtetet e Bashkuara dhe Bashkimi Evropian. Incidenti është tregues i një lidhje me Serbinë, vendosjen e një shteti policor ushtarak që mund të përbëjë një rrezik të konsiderueshëm shkatërrimi brenda Kosovës.

  • Ministri Murati nënshkruan Projektin për Qeverisje Dixhitale

    Ministri Murati nënshkruan Projektin për Qeverisje Dixhitale

    Sot mbahet ceremonia e nënshkrimit të Projektit për Qeverisje Dixhitale.

    Bëhet e ditur se projekti do të nënshkruhet nga ministri i Financave, Punës dhe Transfereve, Hekuran Murati dhe drejtori i Bankës Botërore për Kosovë dhe Maqedoni, Massimiliano Paoluçi.

  • Kurti dhe Gërvalla takuan ambasadorët dhe diplomatët e huaj, kërkojnë të dënohen veprimet e Serbisë

    Kurti dhe Gërvalla takuan ambasadorët dhe diplomatët e huaj, kërkojnë të dënohen veprimet e Serbisë

    Kryeministri i Kosovës, Albin Kurti, së bashku me zëvendëskryeministren dhe ministre e Punëve të Jashtme dhe Diasporës, Donika Gërvalla Schwarz, kanë pritur dje në një takim të përbashkët ambasadorët dhe diplomatët e akredituar të misioneve diplomatike në Republikën e Kosovës.

    Temë qendrore e këtij takimi ishte sulmi terrorist i datës 24 shtator mbi Policinë e Kosovës në fshatin Banjskë të Zveçanit, nga i cili u vra në krye të detyrës, rreshteri i Policisë, tash Heroi i Kosovës, Afrim Bunjaku.

    Në adresimin e tyre para diplomatëve ndërkombëtarë, Kurti dhe Gërvalla, i njoftuan diplomatët ndërkombëtarë mbi zhvillimet më të fundit sa i përket situatës së sigurisë në vend, prezantuan qëndrimet zyrtare të Republikës së Kosovës ndaj këtij sulmi terrorist dhe njëherazi kërkuan, që komuniteti ndërkombëtar të dënojë fuqishëm veprimet destabilizuese të institucioneve shtetërore të Serbisë në Republikën e Kosovës.

    Gjatë takimit të njëjtë, Kurti dhe Gërvalla, theksuan se Qeveria dhe institucionet e Republikës së Kosovës edhe një herë kanë dëshmuar profesionalizëm dhe maturi, duke treguar se janë në shërbim të të gjithë qytetarëve pa dallim dhe paralelisht me këtë angazhimin e tyre për garantimin e integritetit territorial, sigurisë, ligjshmërisë dhe kushtetutshmërisë.

    Në përfundim të takimit, Kryeministri Kurti dhe Zëvendëskryeministrja Gërvalla kanë ripërsëritur qëndrimin se institucionet e Republikës së Kosovës janë të përkushtuara për të bashkëpunuar ngushtë dhe bashkërenduar veprimet ndërmjet Qeverisë së Republikës së Kosovës dhe shteteve partnere, aleate dhe mike për të siguruar paqe dhe siguri në vend dhe rajon.

  • Maqedonia e Veriut thotë se do të vazhdojë të mbështesë Ukrainën

    Maqedonia e Veriut thotë se do të vazhdojë të mbështesë Ukrainën

    Maqedonia e Veriut do të vazhdojë të mbështesë Ukrainën pasi ajo i shërben mbrojtjes së Evropës, tha presidenti i vendit, Stevo Pendarovski, në fjalimin e tij në konferencën e 26-të “SHBA-Karta e Adriatikut” në Shkup.

    Pendarovski tha se lufta e Rusisë ndaj Ukrainës solli sfida për arkitekturën e sigurisë së Evropës dhe Maqedonia e Veriut e ka dënuar “pushtimin e paligjshëm” që nga fillimi.

    Ai tha se Maqedonia e Veriut mbështet plotësisht dhe kontribuon me kapacitetet e saj përpjekjet e NATO-s për të forcuar krahun e saj lindor, raportoi Anadolu Agency.

    “Është e vërtetë që lufta në Ukrainë mund të zgjatë, por ne jemi të gatshëm të vazhdojmë të ndihmojmë sepse besojmë se mbrojtja e Ukrainës është mbrojtja e rendit parimor evropian dhe ndërkombëtar”, tha presidenti.

    Pendarovski argumentoi se lufta e Ukrainës përsëriti nevojën që BE të fokusohet në integrimin me vendet e Ballkanit Perëndimor, një “proces që do të forcojë më tej stabilitetin, sigurinë, demokratizimin e rajonit tonë, sepse NATO dhe Bashkimi Evropian janë të dy korridoret për të ardhmen e parashikueshme dhe të begatë”.

    “Karta SHBA-Adriatik” u formua në vitin 2003 për t’u mundësuar vendeve në Evropën Juglindore që të ndjekin dhe në fund të marrin anëtarësimin e plotë në NATO.

  • Osmani kërkon që me SHBA-në të përgatitet draft-statuti për Asociacionin

    Osmani kërkon që me SHBA-në të përgatitet draft-statuti për Asociacionin

    Presidentja e Kosovës, Vjosa Osmani, tha se Kosova duhet që së bashku me Shtetet e Bashkuara të përgatisë draftin për statutin e Asociacionit të komunave me shumicë serbe.

    Në një intervistë për Radio Televizionin e Kosovës, Osmani tha se Marrëveshja drejt normalizimit të raporteve – që Kosova dhe Serbia arritën më herët gjatë vitit – nuk “është perfekte” për Kosovën, por është obligim ndërkombëtar.

    Ajo tha se ende ka dyshime se si mund të zbatohen në praktikë disa pjesë të saj, duke përmendur nenin 7 dhe 10. Neni 7 flet për sigurimin e një niveli të duhur të vetëmanxhimit për komunitetin serb, në përputhje me marrëveshjet e arritura më parë në kuadër të dialogut. Ndërkaq, neni tjetër kërkon që palët të zbatojnë të gjitha marrëveshjet e arritura në dialog, përfshirë atë për Asociacionin.

    “Mendoj që zgjidhja është si vijon: Ne duhet të ulemi me SHBA-në, të përgatisim draftin tonë, draftin e Republikës së Kosovës. Fillimisht [vetëm me SHBA-në], unë mendoj se kështu është zgjidhja, të ulemi me partnerët tanë në SHBA, të prezantojmë para sekretarit amerikan të Shtetit [Antony Blinken] draftin tonë, i cili është në përputhje me Kushtetutën e Kosovës, në përputhje me vendimin e Gjykatës Kushtetuese, në përputhje me letrën [e ish-shefes së diplomacisë së BE-së, Federica] Mogherinit që garanton se nuk do të ketë kompetenca ekzekutive dhe në përputhje me qëndrimin e shkruar amerikan në opinionin [e shkruar] nga [këshilltari i lartë i DASH-it, Derek] Chollet dhe [i dërguari i Uashingtonit për Ballkanin Perëndimor, Gabriel] Escobar që sqarojnë që një trup i tillë do të jetë një trup koordinues, pa kompetenca ekzekutive”, tha Osmani.

    Kosova dhe Serbia kanë arritur marrëveshjen për Asociacionin më 2013 dhe më pas më 2015 marrëveshjen për parimet për themelimin e tij. Por, më 2015 Gjykata Kushtetuese e Kosovës gjeti se marrëveshja nuk ishte në harmoni të plotë me aktin më të lartë juridik dhe kërkoi që ajo të harmonizohej përmes akteve nënligjore.

    Për jetësimin e marrëveshjes për Asociacionin e komunave me shumicë serbe në Kosovë, aktualisht ekzistojnë katër draft-statute dhe draft-vizione: Draft-statuti i Ekipit Menaxhues, draft-vizioni i kryeministrit të Kosovës, Albin Kurti, draft-statuti i kryeministrit të Shqipërisë, Edi Rama, dhe draft-statuti për Asociacionin i hartuar nga organizata gjermane Friedrich-Ebert-Stiftung (FES).

    Shtetet e Bashkuara dhe Bashkimi Evropian vazhdimisht i kanë kërkuar Kosovës që të formojë Asociacionin, që është edhe kërkesa kryesore e Beogradit.

    Qeveria e Kosovës druan se një asociacion njëetnik do të mund të cenonte funksionalitetin e shtetit. Por, SHBA-ja insiston se nuk do të lejojë që Asociacioni t’i ngjasojë entitetit të Republikës Sërpska në Bosnje e Hercegovinë.

    BE-ja dhe SHBA-ja po ashtu kanë kërkuar nga Kosova dhe Serbia të zbatojnë menjëherë Marrëveshjen drejt normalizimit.

    Kjo marrëveshje, prej 11 nenesh, mes tjerash parasheh edhe një nivel të vetëmenaxhimit për komunitetin serb në Kosovë dhe njohje të ndërsjellë të simboleve shtetërore, ndërsa kërkon nga Prishtina dhe Beogradi që t’i zbatojnë, po ashtu, të gjitha marrëveshjet e mëhershme të dialogut.

    Gjatë intervistës, Osmani foli edhe për dialogun për normalizimin e raporteve me Serbinë. Ajo tha se për të pasur sukses ky proces – që lehtësohet nga BE-ja dhe mbështetet nga SHBA-ja – duhet një përfshirje direkete të Uashingtonit.

    “Unë nga fillimi e kam thënë që nuk shoh sukses pa përfshirjen direkte dhe pa rolin e udhëheqjes së SHBA-së në këtë proces. Këtë e dëshmon edhe historia. Në çdo proces në Ballkanin Perëndimor, në veçanti në Kosovë, në qoftë se SHBA-ja nuk e merr rolin udhëheqës është problem që të kemi sukses në të ardhmen”, tha Osmani.

    Presidentja sërish akuzoi Serbinë për “orkestrimin” e sulmit ndaj Policisë së Kosovës në Banjskë të Zveçanit më 24 shtator.

    Ajo tha se armët që janë gjetur janë të njëjta që përdoren nga ushtria serbe.

    “Plan i Serbisë, që ka qenë shumë më i madh sesa u realizua sepse ka qenë për një sulm të përmasave shumë më të mëdha sepse armatimi që është zënë ka qenë diku armatim për 400 persona”, tha ajo.

    Osmani tha se pasi të përfundojnë hetimet dhe, siç u shpreh, të vërtetohet se Serbia ka gisht në këtë ngjarje, BE-ja duhet të vendosë masa të ashpra ndaj Beogradit.

    Policia e Kosovës u sulmua nga një grup i maskuar dhe i armatosur, teksa forcat e rendit po tentonin të largonin barrikadat që ishin vendosur në një rrugë në fshatin Banjskë të Zveçanit – një prej katër komunave në veri, të banuara me shumicë serbe.

    Grupi i armatosur më pas u strehua në manastirin e Banjskës, prej ku gjatë gjithë të dielës u përlesh me policinë.

    Policia dhe ministri i Punëve të Brendshme, Xhelal Sveçla, kanë thënë se udhëheqës dhe pjesëmarrës i këtij sulmi ishte Millan Radoiçiq, nënkryetar i Listës Serbe – partisë kryesore të serbëve në Kosovë që gëzon mbështetjen e Beogradit zyrtar.

    Si pasojë e sulmit është vrarë një polic i Kosovës dhe tre sulmues të dyshuar.

    Kosova e ka bërë përgjegjëse Serbinë për sulmin, ndërsa Beogradi zyrtar serbët e Kosovës.

    Shtetet e Bashkuara dhe Bashkimi Evropian kanë dënuar ashpër sulmin dhe kanë kërkuar që përgjegjësit të përballen me drejtësinë. /REL

  • Fox News: Inteligjenca amerikane sugjeron se sulmuesit në Banjskë janë të lidhur me forcat e Serbisë dhe Rusisë

    Fox News: Inteligjenca amerikane sugjeron se sulmuesit në Banjskë janë të lidhur me forcat e Serbisë dhe Rusisë

    Një analizë e Inteligjencës amerikane ka dëshmuar lidhjen mes kriminelëve që kryen sulmin terrorist ndaj Policisë së Kosovës në Banjskë me autoritetet shtetërore në Serbi dhe Rusi. Siç raporton Fox News, s’mund të eliminohet mundësia që edhe organizata terroriste “Wagner” të ketë pasur gisht në sulm.

    Ekspertja e Inteligjencës ushtarake amerikane, Rebekah Koffler, ka theksuar se mundësia e përfshirjes së Serbisë dhe Rusisë në sulmin terrorist është lehtë të paramendohet nisur nga fakti se asnjëra nga këto nuk e njohin Kosovën dhe se të dyja synojnë destabilizimin e rajonit, transmeton gazeta online Reporteri.net.

    “Analiza paraprake e inteligjencës sugjeron se personat e përfshirë në përleshjen vdekjeprurëse pranë fshatit Banjska në veri të Kosovës më 24 shtator, ishin të lidhur me forcat speciale serbe dhe inteligjencën ushtarake ruse. Sulmuesit u dukën të trajnuar profesionalisht dhe disa prej tyre flisnin serbisht dhe rusisht. Dhe, ndonëse prania e mercenarëve të Wagner nuk mund të konfirmohej, nuk e përjashtoj mundësinë e pjesëmarrjes së tyre në këto ngjarje të fundit”, tha Koffler për Fox News Digital.

    Policia e Kosovës konfiskoi në Manastirin e Banjskës dinamit, granata dore, raketahedhës dhe mina, që u përkisnin terroristëve

    Madje, sipas saj, ka zëra që thonë se Serbia dhe Rusia po synojnë që ta nisin një konflikt madhor mes serbëve dhe shqiptarëve, kështu për ta justifikuar prezencën e forcave të tyre në Kosovë, kinse si “ndërmjetësues të paqes”.

    “As Rusia dhe as Serbia, të cilët janë aleatë të vendosur, nuk e njohin pavarësinë e Kosovës. Është qëllimi i tyre afatgjatë për ta ndryshuar situatën. Ka indikacione se Rusia dhe Serbia po punojnë së bashku për të ndezur një tjetër konflikt masiv serbo-shqiptar, në mënyrë që të krijojë justifikim për dislokimin e forcave serbe si për të siguruar “paqe dhe stabilitet”.

    KFOR-i, misioni paqeruajtës i NATO-s që vepron në Kosovë që nga viti 1999, kohë më parë ka hedhur poshtë nocionin se njësitë Wagner ishin në Kosovë dhe se raportimet e tilla janë përgjithësisht të paverifikuara ose dezinformata.

    Policia e Kosovës patrullon pas incidentit me armë zjarri në fshatin Banjskë, Kosovë, 27 shtator 2023.

    Mirëpo, Koffler konsideron se një narrativë e tillë nuk është “larg mendsh”. Kjo pasi, sipas saj, Putini mund të synojë që përmes Vuçiqit ta heq vëmendjen e Uashingtonit dhe forcave të NATO-s nga Ukraina.

    “Do të ishte në përputhje me doktrinën ruse të përshkallëzimit anësor nëse Putini do ta ndihmonte Vuçiqin të drejtonte një fushatë destabilizuese në Kosovë për ta larguar vëmendjen e forcave të Uashingtonit dhe NATO-s nga Ukraina. Ajo që Putini ka më shumë frikë është vendosja e forcave të NATO-s në Ukrainë”.

    Për ambasadorin e Kosovës në ShBA, Ilir Dugolli, lidhja e Serbisë me kriminelët që kryen sulmin terrorist është e pashmangshme.

    “Nuk ka dyshim se Beogradi është plotësisht përgjegjës për nxitjen dhe sponsorizimin sistematik të dhunës kundër institucioneve demokratike të Kosovës”, tha për Fox News Digital ambasadori i Kosovës në ShBA, Ilir Dugolli.

    Sipas tij, fakti që dokumentet e Radojçiqit u sekuestruan në vendngjarje dhe disa të dyshuar u strehuan në Serbi, tregon përfshirjen e autoriteteve serbe që refuzojnë të dorëzojnë ata që ekzekutuan sulmin.

    Megjithatë, shkruan tutje Fox News, perspektiva e ambasadorit serb në ShBA, Marko Gjuriq, është ndryshe. Gjuriq pretendon se është Kryeministri Albin Kurti ai i cili duhet të mbajë përgjegjësi të plotë për sulmin.

    “Gjakderdhja në veri të Kosovës është një tragjedi që mund dhe duhej të parandalohej. Politikat e papërgjegjshme të Albin Kurtit kanë krijuar terrenin për tragjedinë e sotme”, citohet të ketë pretenduar Gjuriq.

    Ndërsa, në një fjalim televiziv drejtuar serbëve, presidenti serb Aleksandar Vuçiq dënoi dhunën dhe hodhi poshtë kategorikisht pretendimin e Kurtit se sulmuesit ishin sponsorizuar nga Beogradi, në vend të kësaj duke thënë se serbët që kryen sulmin ishin nga Kosova. /Reporteri.net/

  • Biserko: Në veri po provokohej konflikt që të hynte ushtria serbe e të ndahej Kosova

    Biserko: Në veri po provokohej konflikt që të hynte ushtria serbe e të ndahej Kosova

    Kryetarja e Komitetit të Helsinkit për të Drejtat e Njeriut në Serbi, Sonja Biserko, në një intervistë për CdM, ka thënë se sulmi në veri të Kosovës mund të pritej, duke pasur parasysh sjelljen e Beogradit në muajt e fundit.

    “Grafiti ‘Kur të kthehet ushtria në Kosovë’ si njoftim ka vërshuar jo vetëm Beogradin, por edhe brendësinë e Serbisë. Më pas ishte fjalimi i presidentit Aleksandar Vuçiq në Asamblenë e Përgjithshme, toni dhe mesazhi i tij – e gjithë kjo tregon se diçka është duke u përgatitur. Beogradi ka qenë gjithmonë transparent në synimet e tij, si në vitet 1990 kur u nis për të shkatërruar Jugosllavinë”, shpjegon qartë Biserko.

    Ajo ka thënë se po bëhet gjithnjë e më e qartë se ka pasur një skenar për të provokuar një konflikt që më pas ushtria serbe të hyjë “për të mbrojtur popullin serb në veri dhe në këtë mënyrë të bëhet realitet ndarja e Kosovës”.

    “Ky operacion, pavarësisht se kush është drejtpërdrejt përgjegjës për të në Beograd, ka kaluar një vijë të kuqe që Perëndimi nuk mund ta tolerojë. Kjo situatë nuk është provokuar nga Kurti, siç komentojnë shumica në Beograd. Përkundrazi, ai tregoi pjekuri dhe policia e Kosovës tregoi profesionalizëm”, ka thënë Biserko për CdM.

    Ndonëse, siç shton ajo, Vuçiq po përpiqet të mbrohet dhe të kalojë përgjegjësinë te serbët e Kosovës, të cilët sipas saj, gjithsesi janë pengjet e tij, duke pretenduar se ai nuk e kontrollon Kosovën. Sipas saj të gjitha informacionet tregojnë se Beogradi ishte i implikuar.

    Sipas Biserkos, Rusia gjithashtu ka një interes për krijimin e tensioneve dhe hapjen e pikave kritike në mënyrë që të largojë një pjesë të vëmendjes nga Ukraina. Është indikative, thekson ajo, se të nesërmen Vuçiq priti ambasadorin rus për t’u ankuar se Kurti po përgatitë “spastrimin etnik të serbëve”.

    Ajo ka theksuar se edhe komuniteti ndërkombëtar është përgjegjës për tolërimin e gjatë të sjelljes së presidentit Vuçiq dhe kërcënimeve të tij ndaj fqinjëve të tij, “të cilat janë të përditshme dhe që pashmangshmërisht çuan në konflikt”.

    Qeveria e Serbisë në një seancë të jashtëzakonshme e shpalli 27 shtatorin Ditë zie lidhur me ngjarjet tragjike në Kosovë.

    Të dielën e 24 shtatori në Banjskë të Zveçanit u vra një polic e u plagosen tre të tjerë nga sulmues të armatosur serbë.

  • Hyseni përgëzon institucionet: Situata të dielën është menaxhuar për mrekulli

    Hyseni përgëzon institucionet: Situata të dielën është menaxhuar për mrekulli

    Ish-koordinatori për dialog, Skender Hyseni, në emisionin CONTEXT në ATV, ka përgëzuar institucionet e vendit për menaxhimin e situatës të ngjarjeve që ndodhën të dielën në veri të vendit.

    “Si një akt i veçuar nga rrjedha e gjithë kontekstit Kosovë – Serbi, ngjarjet e së dielës, po them hiqe atë moment zie të humbjes së një jete të një qytetari të ndershëm të Kosovës, është menaxhuar për mrekulli. Unë këtu nuk kam fjalë tjera përpos fjalë përgëzimi për gjithë zinxhirin komplet edhe të institucioneve të rendit e të ligjit, por edhe menaxhimin politik të kësaj situate të dielën. Deklarimet politike të matura, të faktuara bindshëm dhe nuk kam si të mos i përgëzoj të gjithë pa përjashtim”, tha Hyseni.

    Ai tha se edhe BE-ja ka informacion të bollshëm për ta kualifikuar si duhet ngjarjen që ndodhi në veri të vendit dhe për të bërë veprimet e duhura.

    “Përtej asaj që tha Stano, unë besoj që BE-ja ka informacion të mjaftueshëm për ta kualifikuar si duhet dhe për të bërë veprimet e duhura në pajtim. Në linjë me informacionin që e kanë, jam i sigurt se e kanë të bollshëm”, tha Hyseni. /atvlive.tv