ATV

Blog

  • Von Cramon kërkon që Gjermania të sjellë më shumë trupa në Kosovë

    Von Cramon kërkon që Gjermania të sjellë më shumë trupa në Kosovë

    Eurodeputetja Viola Von Crammon që është edhe raportuesja për Kosovën në Parlamentit Europian, ka shpërndarë në platformën X një njoftim të Qeverisë britanike ku thuhet se Londra do ta shtojë prezencën ushtarake në Kosovë edhe me 200 trupa tjera.

    Ajo ka thënë se këtë duhet ta bëjë edhe Gjermania, e cila sipas Von Cramon, duhet të prijë me vendosjen e trupave në Kosovë.

    “Vendim i rëndësishëm për të vendosur 200 trupa luftarakë britanikë për ta përforcuar KFOR’in -NATO’n në terren. Gjermania duhet të prijë me vendosjen e trupave për të siguruar paqen, dhe për t’i mbrojtur në Kosovë aty ku KFOR’i dhe NATO janë jetikë” ka shkruar eurodepuetja gjermane.

    Aktualisht Bundeswehri ka 85 ushtarë në Kosovë por sipas mediave gjermane në bazë të vendimit për zgjatjen e mandatit të tyre numri i ushtarëve mund të rritet deri në 400.

  • Petritsch për zhvillimet në veri: Kriza më e rrezikshme që nga shpallja e pavarësisë

    Petritsch për zhvillimet në veri: Kriza më e rrezikshme që nga shpallja e pavarësisë

    Diplomati austriak Wolfgang Petritsch duke iu referuar zhvillimeve të fundit në veri ka vlerësuar që kjo të jetë kriza më e rrezikshme që nga shpallja e pavarësisë së Kosovës në vitin 2008.

    Petritsch që për një kohë ishte i dërguar i posaçëm i Bashkimit Evropian për Kosovën në një intervistë për Demostat ka theksuar se gjërat lehtë mund të dalin jashtë kontrollit dhe sipas tij “të shkatërrohet gjithçka që është arritur në dialogun Kosovë-Serbi në dhjetë vitet e fundit”.

    “ Ajo që na duhet tani është një përpjekje e re e Brukselit për të rikthyer të dyja palët në tryezën e bisedimeve”

    “Normalizimi është i një rëndësie thelbësore, sepse do të krijonte parakushtet për përparim ekonomik. Kjo është ajo që njerëzit duan, jam i sigurt. Ka shumë qytetarë të rinj dhe të talentuar që lënë shtëpitë e tyre për të emigruar në vende më paqësore, si Austria, Gjermania dhe Zvicra. Por Evropa dëshiron të shohë prosperitet dhe jo konflikt në vendet e ish-Jugosllavisë. Epoka e luftërave ka përfunduar. Tani duhet të rindërtojmë ekonominë dhe të garantojmë një jetë më të mirë për qytetarët”, deklaroi ai.

    Duke folur për hapat që duhet të ndërmarrë bashkësia ndërkombëtare për të qetësuar tensionet e reja që erdhën pas sulmit terrorist në Banjskë ku u vra polici Afrim Bunjaku, Petritsch u shpreh “Komuniteti ndërkombëtar, veçanërisht BE-ja dhe SHBA-ja, duhet t’i detyrojnë të dyja palët të kthehen në dialog”.

    “Këtë vit kemi parë një përparim në Bruksel dhe Ohër. Tani është koha për të zbatuar atë që është rënë dakord në ato takime. Propozimi gjermano-francez mbetet udhërrëfyesi më i mirë për uljen e tensioneve. Shpresoj se Parisi dhe Berlini do të kthehen në rolin e tyre për të mbështetur aktivisht BE-në në përpjekjet e saj për normalizimin e marrëdhënieve midis Beogradit dhe Prishtinës. Nuk ka plan tjetër që do të ishte i suksesshëm, pohon Petrich.

  • Forcat speciale të Policisë së Kosovës tërhiqen nga Banjska e Zveçanit

    Forcat speciale të Policisë së Kosovës tërhiqen nga Banjska e Zveçanit

    Pjesëtarët e njësisë speciale të Policisë së Kosovës janë tërhequr nga fshati Banjskë i Zveçanit dhe tani do të zëvendësohen me pjesëtarë të njësitit intervenues, raporton mediumi serb, Kossev, duke cituar zëvendëskomandantin i Policisë për rajonin e veriut, Veton Elashani.

    “Ata u zëvendësuan nga një njësi tjetër – njësia intervenuese dhe tani do të shohim se do të ketë më pak policë”, tha Elshani.

    “Rrugët janë duke u pastruar dhe shpresojmë që jeta dalëngadalë të kthehet në normalitet”, tha Elshani.

  • ​ETEA: Mbi 70% e nxënësve nuk kanë arritur të sigurojnë të gjitha tekstet shkollore

    ​ETEA: Mbi 70% e nxënësve nuk kanë arritur të sigurojnë të gjitha tekstet shkollore

    Mbi 70 për qind e nxënësve ende edhe pas përfundimit të muajit të parë të vitit të ri shkollor nuk kanë arritur të sigurojnë të gjitha tekstet shkollore. Klasat e para qëndrojnë më së miri, ndërkohë që komuna e Vushtrrisë ka numrin më të madh të nxënësve që kanë arritur të sigurojnë librat. Kështu thuhet në analizën statistikore për furnizim me tekstet shkollore dhe mbarëvajtjen e procesit mësimor nga organizata ETEA. Në publikimin e këtij raporti, u tha se ka të dhëna shqetësuese ku tregojnë se 4.3 për qind e mësimdhënësve konsiderojnë se neglizhenca e prindërve ka lënë fëmijët pa libra.

    Autori i këtij hulumtimi, Agon Ahmeti tha se qëllimi i këtij raporti është që të sigurohen dhe ofrohen të dhëna objektive për institucionet relevante qeverisëse të arsimit. Ai bëri të ditur se janë hartuar pyetësor dedikuar mësimdhënësve të nivelit fillor nga klasa e parë deri në të pestën.

    Ai shtoi se ky raport është përfshirë në nivel vendi, përjashtuar në komunat me shumicë serbe.

    “Janë 17 mijë e 99 mësimdhënës në nivelin parafillor, fillor dhe të mesëm të ultë. Dhe në bazë të kësaj të dhëne, bazuar në kritere dhe udhëzime shkencore rekomandohet dhe kërkohet që të nxjerrën të dhëna reprezentative në 367 respondentë. Gjithmonë po flasim për një nivel të besueshmërisë prej 95 për qind të këtyre të dhënave. Gjithsesi marrë parasysh komunikimin me mësimdhënës dhe interesin e tyre, ne kemi pranuar deri më 22 shtator 506 respondentë, mbi bazën e të cilave është hartuar ky raport për të cilin po flasim sot. Hulumtimi shtrihet në nivel vendi dhe se përjashtohen komunat me shumicë serbe, duke pasur parasysh se këto komuna operojnë në kurrikulë serbe”, deklaroi ai.

    Tutje, Ahmeti theksoi se kjo analizë tregon se ka mësimdhënës që mendojnë se vetëm 10 për qind e mësimdhënësve janë të pajisur me tekste shkollore.

    “E gjetura kryesore e këtij raporti ka të bëjë me pajisjen e nxënësve me të gjitha tekstet shkollore dhe sipas të dhënave që kemi mbledhur nga mësimdhënësit nga Kosova del që në nivel të Kosovës mbi 70 për qind e nxënësve ende edhe pas përfundimit të muajit të parë të vitit shkollor nuk kanë arritur të sigurojnë të gjitha tekstet shkollore. Nga kjo kuptojmë se vetëm 29,4 për qind e mësimdhënësve kanë deklaruar se 100 për qind e nxënësve në Kosovë kanë siguruar tekstet shkollore. Në ndërkohë 42.3 për qind deklarojnë se janë të pajisur me gjitha tekstet shkollore. Rreth 15 për qind e mësimdhënësve thonë se rreth 81 deri në 90 për qind e nxënësve në klasat e tyre kanë arritur që të pajisen me të gjitha tekstet shkollore, ndërsa pjesa tjetër që përfaqëson një shifër prej 12.7 për qind janë më pak 80 për qind të nxënësve nëpër klasë që kanë arritur të pajisen me tekste shkollore”, shtoi Ahmeti në konferencë për media.

    Disa nga shkaqet që kanë ndikuar që fëmijët të mos sigurohen me libra, siç tha Ahmeti, janë mungesa e teksteve shkollore në librari të qyteteve dhe sigurimi i mjeteve përmes platformës “eKosova”.

    “Sipas të dhënave del se klasat e para qëndrojnë më së miri, me gjithsej 42,6 për qind të mësimdhënësve të cilët thonë se 100 për qind e fëmijëve në klasat e tyre kanë arritur që të sigurojnë tekstet shkollore. Ndërsa, më së dobëti qëndrojnë klasat e pesta me 16,7 për qind të mësimdhënësve të cilët deklarojnë se kanë arritur të sigurojnë tekstet shkollore nxënësit e klasave të tyre. Raporti gjen se sa më të rritur të jenë fëmijët, aq më dobët qëndrojnë me sigurimin e teksteve shkollore. Krahasimet janë bërë edhe mes komunave dhe në bazë të këtyre krahasimeve del që komuna e Vushtrrisë prin me nxënës që kanë arritur të pajisen me të gjitha tekstet shkollore, ndërsa pasohet nga Komuna e Prishtinës dhe dy komuna të tjera që janë ajo e Mitrovicës dhe e Skenderajt”, përfundoi Ahmeti.

    Në konferencën për media, Ahmeti theksoi se ky raport ka edhe të dhëna shqetësuese.

    “Ky raport gjen një të dhënë shqetësuese ku 4,3 për qind e mësimdhënësve konsiderojnë se neglizhenca e prindërve ka lënë fëmijët pa libra edhe një muaj pas fillimit të vitit të ri shkollor”, tha ai më tej.

    Edhe Taulant Gashi nga organizata “ETEA” u shpreh se më shumë se gjysma e mësimdhënësve konsiderojnë se vendimi i ministrisë ka pasur ndikim negativ në procesin mësimor.

    Gashi: 45,5 për qind e mësimdhënësve konfirmojnë se kanë punuar bazuar në plan-programit të tyre.
    (Video)
    “Sipas të dhënave që ETEA nxjerrë nga hulumtimi në fjalë del që 45,5 për qind e mësimdhënësve konfirmojnë deklarativisht se kanë punuar bazuar në plan-programit të tyre. Në anën tjetër deri në 14 për qind nuk e ndjekin fare plan-programin sepse e lidhin me mungesën e teksteve shkollore. Derisa 40,5 për qind punojnë me plan program, por konstatojnë që fëmijët ngecin të ndjekin orën mësimore, duke bërë kështu që 54,5 për qind të shkollave në Kosovë punojnë në mënyrë të pa sistemuar”, shtoi ai.

    Bazuar në hulumtimin e “ETEA”, rreth 70 për qind e mësimdhënësve mendojnë që vitin e ardhshëm duhet të vijohet me praktikën e furnizimit me tekste shkollore. /kp

  • ​Stano: Policia e Kosovës ka mandat për hetime, Serbia të bashkëpunojë pa kushtëzime

    ​Stano: Policia e Kosovës ka mandat për hetime, Serbia të bashkëpunojë pa kushtëzime

    Bashkimi Evropian është deklaruar të hënën se autoritetet e Kosovës në këtë rast, policia ka mandat për t’i hetuar sulmet e 24 shtatorit në Banjskë të Zveçanit, ndërsa Serbia është e obliguar të bashkëpunojë pa kushtëzime.

    Zëdhënësi i Bashkimit Evropian, Peter Stano, ka folur rreth përgjegjësisë që e ka marrë tashmë ish-nënkryetari i Listës Serbe, Millan Radoiçiq për sulmin, dhe a do të ndihmojë Bashkimi Evropian që ai të ekstradohet në Kosovë. Stano theksoi se blloku evropian pret bashkëpunim të plotë, transparent dhe pa kushte nga Serbia, në mënyrë që të sqarohet jo vetëm se kush e ka përgatitur dhe kryer sulmin terrorist, por edhe kush qëndron prapa tyre.

    “E kemi parë qartë se çfarë tha zotri Radojiçiq për përfshirjen e tij në ngjarjet shumë fatkeqe të 24 shtatorit dhe Bashkimi Evropian ishte shumë i qartë, e tha Përfaqësuesi i Lartë, dhe pastaj ne e përsëritëm disa herë. Të gjitha faktet duhet të vërtetohen. Kjo duhet të hetohet në mënyrë të duhur dhe në këtë kontekst presim bashkëpunim të plotë dhe të pakushtëzuar nga Serbia, kjo është shumë e rëndësishme. Në pjesën e dytë të pyetjes dhe sa i përket hetimeve, etj., e kam përsëritur edhe shumë herë se ne nuk po e bëjmë angazhimin tonë në lidhje me këtë sulm terrorist përmes mediave. Jemi në kontakt me partnerët dhe shkëmbejmë mendimet dhe qëndrimet tona, por sa i përket pjesës së dytë të pyetjes suaj, EULEX-it nuk i nevojitet një zëdhënës specifik nga autoritetet e palës tjetër. EULEX-i ka zyrën e vet për shtyp dhe zyra e shtypit ka reaguar shumë qartë se cili është roli i EULEX-it dhe cili është mandati i EULEX-it. Mandati i EULEX-it është monitorimi i situatës dhe ofrimi i ndihmës për policinë e Kosovës sipas kërkesës. Mandati i EULEX-it nuk përfshin hetime”, tha Stano në një konferencë për media online.

    Sa i përket masave të BE-së ndaj Serbisë, ai tha se duhet parë rezultatin përfundimtar të hetimit në Banjskë.

    “Çdo ditë zbulon diçka të re. Çdo ditë sjell një tjetër provë. Kemi thënë vazhdimisht se nuk po komentojmë çfarë sjell e përditshmja. Ne duhet të shohim rezultatin përfundimtar të hetimit, hetim të duhur, të plotë, duke sqaruar të gjithë kontekstin, të gjitha rrethanat rreth sulmit terrorist dhe ngjarjeve të ngjashme. Dhe këtu presim bashkëpunimin e plotë dhe të pakushtëzuar të Serbisë në këtë drejtim. Kjo është shume e rëndësishme. Bashkimi Evropian e tha shumë qartë, ne e thamë më 19 shtator dhe e kemi përsëritur shumë herë më pas, Bashkimi Evropian është i gatshëm të caktoj masa edhe ndaj Serbisë, nëse shtetet anëtare vendosin që kanë informacion të mjaftueshëm, fakte të mjaftueshme dhe se ata do të reagojnë në momentin e zgjedhjes së tyre”, theksoi ai.

    Për më tepër ai nuk ka lënë asnjë dyshim se mandatin për ta hetuar rastin e Banjskës e kanë autoritetet e Kosovës.

    “Asnjëherë nuk po diskutojmë publikisht për procedurat në vazhdim. Pra, siç ka qenë rasti me masat ndaj Kosovës, i kemi shpallur pasi janë marrë vesh dhe pasi ka pasur konsensus se si të veprohet nga ana e BE-së, kështu është edhe në vlerësimin e situatës tani. Shtetet anëtare, kur të ndiejnë se ka ardhur koha, do të marrim një vendim se çfarë po ndodhte në veri të Kosovës më 24 shtator dhe si dëshiron të reagojë BE-ja në mënyrë unanime, sepse kjo është ajo që ne bëjmë, ne reagojmë në unitet dhe unanimitet. Kjo ka ndodhur në Kosovë, kështu që sigurisht që hetimi është kompetencë e policisë së Kosovës me të cilën kemi bashkëpunim shumë të mirë. Policia e Kosovës është në kontakte shumë të ngushta me misionin tonë EULEX, EULEX-i po jep mbështetje brenda mandatit të tij me kërkesë të policisë së Kosovës, por të gjithë ata që mund të kontribuojnë në sqarimin e asaj se çfarë ka ndodhur, rrethanat, si ka ndodhur dhe kush, jo vetëm e ka ekzekutuar këtë sulm brutal, por edhe kush qëndron pas këtij sulmi, çdo kontribut për këtë është i mirëpritur. Dhe këtu e përsëris se presim bashkëpunim të plotë transparent dhe të pakushtëzuar edhe nga Serbia”, theksoi Stano.

    Ndërsa, ministri Punëve të Brendshme, Xhelal Sveçla dhe drejtori i Policisë së Kosovës kanë prezantuar të dielën dëshmi të reja, për siç theksuan ata të patjetërsueshme për lidhjen e shtetit serb dhe presidentit Aleksandër Vuçiq me sulmin terrorist në fshatin Banjksë të Zveçanit.

    Në orët e para të mëngjesit të 24 shtatorit, e diel, është vrarë rreshteri i Policisë së Kosovës, Afrim Bunjaku, ndërsa janë plagosur edhe policë të tjerë nga një sulm terroristësh serbë në Banjskë të Zveçanit. /kp

  • Fondacioni Golden Eagle sot fillon fushatën 5 lekë për bamirësi në Shqipëri

    Fondacioni Golden Eagle sot fillon fushatën 5 lekë për bamirësi në Shqipëri

    Fondacioni Golden Eagle njofton që nga sot deri me datën 31 dhjetor do të zhvillojë fushatë bamirësie në Shqipëri.Ky aktivitet përkrahet nga Kompania Frutex ku për çdo kanaqe Golden Eagle të shitur 5 lekë dedikohen për bamirësi.

    Synimi i fondacionit është grumbullimi i 250,000 euro me të cilat do të përkrahen familjet në nevojë brenda territorit të Shqiperisë.

    Prezentimin e rasteve mund ta bëni përmes emailit zyrtar të fondacionit: [email protected], dhe përzgjedhja do të bëhet nga komisioni i fondacionit i cili do të bëjë përzgjedhjen e rasteve me më prioritet, natyrisht brenda mundësive bugjetore të fondacionit.

  • Kryeministri kroat: Sulmi në veri s’ka ndodhur rastësisht, duhet reagim më i fortë ndërkombëtar

    Kryeministri kroat: Sulmi në veri s’ka ndodhur rastësisht, duhet reagim më i fortë ndërkombëtar

    Kryeministri i Kroacisë, Andrej Plenkoviç ka dënuar sulmin nga një grup terrorist serb në veri të Kosovës, ku mbeti i vrarë rreshteri policor, Afrim Bunjaku.

    Duke kërkuar reagim të fortë ndërkombëtar, Plenkoviç tha se armatimi i rëndë i grupit kriminal tregon se i njëjti ka qenë i planifikuar dhe që nuk ka ndodhur rastësisht.

    Kryeministri kroat në konferencë për medie së bashku me homologun e tij shqiptar, Edi Rama, i cili po qëndron për vizitë zyrtare në Kroaci tha se incidenti i 24 shtatorit në Kosovë është shumë serioz dhe sinjal i që tregon se ka forca që duan të destabilizojnë Kosovën dhe tërë situatën në Evropën juglindore.

    “Kroacia e dënon me forcë vrasjen e pjesëtarit të Policisë së Kosovës nga grupe të armatosura të cilat kanë qenë të armatosur në formë të tillë, duke e bërë të qartë se këtu bëhet fjalë për operacion paraprakisht të planifikuar. Me pajisje të tilla dhe numër të madh njerëz nuk është diçka që ka ndodhur rastësisht. Si i tillë ne konsiderojmë se kjo ngjarje është një incident shumë serioz dhe sinjal i fortë që tregon se ka forca që duan të destabilizojnë Kosovën, raportet Kosovë-Serbi dhe tërë situatën në hapësirën Evropën juglindore”, theksoi ai.

    Ai shtoi se Bashkimi Evropian dhe NATO duhet të kenë reagim të qartë për sulmin në veri të Kosovës dhe të përkrahin institucionet kosovare.

    Sipas tij, Serbia mori mesazhe të qarta nga komuniteti ndërkombëtar për dërgimin e ushtrisë në kufirin me Kosovën.

    “Gjithashtu reagimi i komunitetit ndërkombëtar, këtu mendoj për BE-në, NATO-në dhe përfaqësuesit ndërkombëtar të tjerë që veprojnë në Kosovë duhet të jenë të qarta dhe të forta. Duhet të përkrahin institucionet e Kosovës para se gjithash pasi bëhet fjalë për territor të Kosovës. Në anën tjetër duhet të bëjnë përpjekje maksimale për të parandaluar çfarëdo lloj eskalimi të gjendjes. Kemi dëgjuar mesazhe të qarta nga aktorët global që i kanë dërguar Serbisë që të tërhiqen menjëherë forcat që i kanë dërguar drejt kufirit të Kosovës. Kjo tregon se komuniteti ndërkombëtar është i interesuar për paqe për normalizim të raporteve për të vendosur një situatë që negociatat me ndërmjetësim evropian të vazhdojnë më tutje”, shtoi kryeministri kroat.

    Ai përmendi edhe diskutimet joformale që po ndodhin në Bashkimin Evropian për t’i vendosur masa ndëshkuese Serbisë, të ngjashme sikur që janë ndërmarrë ndaj Kosovës.

    “Bëhet fjalë për masat të cilat Komisioni Evropian mund t’i ndërmarrë. Bëhet fjalë për disa prej programeve të Bashkimit Evropian, masa të tilla që janë ndërmarrë edhe ndaj Kosovës para sa muajsh. Prandaj një diskutim i thellë do të vazhdojë”, theksoi ai.

    Në anën tjetër, kryeministri i Shqipërisë Edi Rama, tha se vrasja e rreshterit policor në Kosovë dhe zija kombëtare në Beograd janë të dënueshme dhe të papranueshme.

    Ai shtoi se edhe shfaqja e ushtrisë serbe në kufirin me Kosovën vetëm nxit tensione, andaj edhe mirëpriti tërheqjen e tyre.

    Ndërkaq nënvizoi se Bashkimi Evropian duhet të marrë masa ndëshkuese ndaj Serbisë për këtë veprim.

    “Vrasja e një efektivi të Policisë së Republikës së Kosovës nga një grup kriminal i armatosur deri në dhëmbë dhe i veshur ushtarakisht në territorin e Republikës së Kosovës dhe zija kombëtare e shpallur në Beograd për anëtarët e këtij grupi që u eliminuan nga forcat e sigurisë së Kosovës janë të pajustifikueshme, të papranueshme dhe janë të dënueshme në të gjitha nivelet. Ky është qëndrimi ynë dhe pa diskutim që duke qenë promotorë të dialogut të normalizimit të paqes përfundimtare që kalon nga njohja përfundimtare e Republikës së Kosovës…Shfaqjet e ushtrisë serbe në kufirin me Kosovën të cilat vetëm nxisin tensione dhe rrisin frymën e ndasive të cilat ne duhet t’i kurojmë. Është pozitive që ushtria serbe filloi të zmbrapset dhe tërhiqet. Por është shumë negative që ushtria serbe përdoret për shfaqje të tilla që nuk i shërbejnë interesave afatgjata”, theksoi Rama.

    Po ashtu në kuadër të kësaj vizite zyrtare të Ramës në Zagreb, Kroacia iu shtua sot listës së shteteve me të cilat Shqipëria, gjegjësisht Ministria e Financave dhe Ekonomisë, ka nënshkruar marrëveshje për njohjen reciproke të kontributeve të sigurimeve shoqërore, në mënyrë që qytetarët shqiptarë, kudo ku ata jetojnë e punojnë të mos humbasin asnjë ditë pune për përfitimin e pensionit./KosovaPress/

  • Dëshmitari thotë se gjatë luftës nuk ka takuar e as njohur ndonjë person me emrin Pjetër Shala

    Dëshmitari thotë se gjatë luftës nuk ka takuar e as njohur ndonjë person me emrin Pjetër Shala

    Në Dhomat e Specializuara të Kosovës (DhSK) në Hagë, në gjykimin ndaj Pjetër Shalës, po vazhdon dhënien e dëshmisë dëshmitari Bedri Dervishaj, i cili duke u përgjigjur në pyetjet e mbrojtjes së Shalës, tha se gjatë luftës as nuk e ka takuar dhe as nuk e ka njohur ndonjë person me emrin Pjetër Shala.

    Këtë deklarim, Dervishaj e bëri duke u përgjigjur në pyetjet e avokatit Mohamed Hedi Aouini në lidhje me Pjetër Shalën, raporton “Betimi për Drejtësi”.

    Ai tha se nuk ka takuar as njohur një person me emrin Pjetër Shala gjatë luftës dhe se as në Brigadën 128 nuk ka njohur ndonjë person me atë emër.

    I pyetur se a ka dëgjuar gjatë luftës për nofkën “Ujku”, dëshmitari mohoi të ketë dëgjuar për këtë nofkë, por se për të kishte dëgjuar paslufte.

    Sipas tij, me nofkën “Ujku” ka qenë një person, i cili ishte me Ramush Haradinajn.

    Dëshmitari tha se për Pjetër Shalën ka dëgjuar përmes televizionit.

    Në pjesën me të madhe të sesionit të paradites, dëshmitari është pyetur për ndërtesën ku ai ka shkuar për të marrë injeksion, hapësirën e saj dhe personat që ka takuar aty.

    Lidhur me këtë, dëshmitari tha se ka kaluar kohë e gjatë dhe nuk i kujtohet saktësisht.

    Më pastaj, dëshmitarit i janë paraqitur disa foto të një objekt, ku dëshmitari ka thënë se në këtë ndërtesë te hyrja ka marrë injeksionin.

    Ai ka shtuar se hapësira ku ka marrë injeksionin ka qenë 2 metra me 1 metër, ku në të kanë qenë dy karrige dhe një çantë me barna dhe ka takuar një doktor.

  • Erdogan: Turqia nuk pret më asgjë nga BE-ja

    Erdogan: Turqia nuk pret më asgjë nga BE-ja

    Presidenti i Turqisë, Recep Tayyip Erdogan, tha më 1 tetor se vendi i tij “nuk pret më asgjë nga Bashkimi Evropian, i cili na ka lënë të presim në derën e tij për 40 vjet”.

    “Ne i kemi mbajtur të gjitha premtimet që ia kemi bërë BE-së, ndërsa ata nuk e kanë përmbushur pothuajse asnjë zotim”, tha ai para fillimit të sesionit të ri parlamentar në Ankara.

    Erdogani shtoi se nuk e ka ndër mend të “tolerojë kërkesa të reja, apo kushte në procesin e anëtarësimit” të Turqisë në bllok.

    Zemërimi i Erdoganit e ka burimin edhe nga një vendim i Gjykatës Evropiane për të Drejtat e Njeriut, e cila e kritikoi Turqinë të enjten e kaluar për dënimin e një mësimdhënësi pas tentim-puçit më 2016, mbi bazat se ai e kishte shkarkuar një aplikacion të koduar për dërgimin e mesazheve të ndërlidhur me puçistët e dyshuar.

    Vendimi i gjykatës se të drejtat e Yuksel Yalcinkayas janë shkelur mund ta krijojë një precedent të fuqishëm, në një kohë kur gjykata me bazë në Strasburg ka para vetes mijëra raste të ngjashme.

    Turqia e fajëson një grup të udhëhequr nga kleriku fetar turk me vendbanim në Shtetet e Bashkuara, Fetullah Gulen, për puçin e dështuar për ta rrëzuar Erdoganin nga pushteti, duke pretenduar se aplikacioni i mesazheve i quajtur ByLock, ishte përdorur për ta bashkërenduar komplotin.

    Erdogani tha më 1 tetor se vendimi i gjykatës së Strasburgut “ishte goditja e fundit”.

    “[Turqia] nuk do t’ia kthejë shpinën luftës kundër këtij grupi tradhtarësh”, tha ai. /rel

  • Gazetari gjerman: Vuçiq në CNN sonte, interesante ta dëgjojmë si flet kur nuk i kontrollon pyetjet

    Gazetari gjerman: Vuçiq në CNN sonte, interesante ta dëgjojmë si flet kur nuk i kontrollon pyetjet

    Gazetari gjerman, Michael Martens tha se do të jetë interesante për ta dëgjuar presidentin serb Aleksander Vuçiq si e përshkruan situatën në një vend ku nuk mund t’i kontrollojë pyetjet.

    Martens këtë e tha pasi Vuçiq pritet të jetë i ftuar sot në CNN.

    “Dje më thanë se presidenti serb Aleksandar Vuçiq pritet të jetë sot në CNN. Do të jetë interesante ta dëgjojmë se si do e përshkruajë situatën në një ambient ku nuk mund t’i kontrollojë pyetjet”, ka shkruar ai në platëforën “X”.