Blog

Presidentja e Republikës së Kosovës, Vjosa Osmani, ka udhëtuar për në Finlandë.

“Me ftesë të qeverisë finlandeze, Presidentja Osmani krahas krerëve shtetëror nga vende të tjera të botës do të marrë pjesë në varrimin e ish-presidentit të Finlandës dhe kryenegociatorit për statusin e Kosovës, Martti Ahtisaari.

Në delegacionin shtetëror të Presidentes do të jetë edhe ish-Presidenti Fatmir Sejdiu” ka bërë të ditur Presidenca.

Funerali i presidentit Ahtisaarit do të mbahet më 10 nëntor.

Ahtisaari ka qenë i dërguar i posaçëm i Kombeve të Bashkuara për Kosovën, i ngarkuar për organizimin e negociatave të procesit të statusit të Kosovës. Mbi planin që ai hartoi, u shpall edhe pavarësia e Kosovës më 17 shkurt 2008.

Kompanitë serbe janë duke eksportuar mallra të dypërdorshme në Rusi, të cilat janë cak i sanksioneve të Perëndimit për shkak se përdoren në armatimin rus në Ukrainë –përkundër zotimit të presidentit serb, Aleksandar Vuçiq, se vendi i tij nuk do të shërbejë si përçues i anashkalimit të sanksioneve të Shteteve të Bashkuara (SHBA) dhe Bashkimit Evropian (BE).

Mallrat e dypërdorshme mund të përdoren si për qëllime ushtarake, ashtu edhe për qëllime civile.

Në mesin e atyre që kanë pranuar mallra të tilla nga Serbia në Rusi është edhe furnizuesi i Teknologjisë Informative i cili u godit nga sanksionet amerikane në shtator. Kjo u shpjegua nga Uashingtoni si një përpjekje për ta privuar presidentin e Rusisë, Vladimir Putin, nga “pajisjet, teknologjia dhe shërbimet për të cilat ai ka nevojë për ta kryer luftën e tij barbare në Ukrainë”, ka gjetur një hulumtim i REL-it, transmeton KosovaPress.

Të dhënat doganore nga baza e të dhënave e tregtisë ndërkombëtare, të analizuara nga REL-i, tregojnë se kompanitë serbe kanë dërguar mallra të sanksionuara të dypërdorshme në Rusi prej se Putini e nisi pushtimin e plotë të Ukrainës në shkurt 2022.

Dërgesat e analizuara nga reporterët përfshijnë llojet e elektronikëve dhe pajisjeve të tjera të kategorizuara si të “prioritetit të lartë” nga Shtetet e Bashkuara dhe Bashkimi Evropian, për shkak të përdorimit të tyre në armatimin rus që është gjetur në fushëbetejat ukrainase.

 

Katër nxënës janë arrestuar dje nga policia gjermane, pasi disa mësues të dy shkollave në Hamburg, u kërcënuan rëndë.

Policia atyre u ka konfiskuar dy armë lodër dhe ka arrestuar katër fëmijë ata janë të moshave minore dy nxënës janë 12-vjeçare, një 13-vjeçar dhe një 14-vjeçare.

Një nga 12-vjeçarët dhe 13-vjeçari dyshohen se kanë kërcënuar me armë një mësuese në një klasë në një shkollë rrethi në Blankenese.

400 policë ishin angazhuar në detyrë, ndërsa edhe një helikopter ishte aktiv me orë të tëra.

Në mbrëmje u bë e ditur se kishte një situatë të ngjashme kërcënimi në shkollën Mendelssohnstrasse në rrethin Bahrenfeld.

Mësohet se atje është kërcënuar edhe një mësues. Situata në të dyja shkollat ​​ka qenë sërish e qetë mbrëmjen e së mërkurës. Raportohet se askush nuk u lëndua, raporton BILD.

Kampioni i Kosovës, Ballkani e zhvillon sot ndeshjen e radhës në fazën e grupeve të Ligës së Konferencës, të katërtën me radhë në grupin C.

Skuadra e trajneri Ilir Daja luan në udhëtim te Astana në Kazakistan, skuadër e cila po ashtu ka tri pikë pas tri ndeshjeve sikur edhe Ballkani, raporton KosovaPress.

Vetëm fitorja do ta mbanë Ballkanin në garë për të kërkuar një vend që dërgon na fazën e eliminimit direkt, në të kundërtën gjërat do të komplikoheshin tej mase.

Ndeshja do të nis nga ora 16:30 dhe zhvillohet në stadiumin “Astana Arena”.

Sulmet ajrore izraelite e kanë goditur edhe të enjten qytetin e Gazës, teksa ushtarët janë përballur lagje për lagje me militantët e grupit palestinez Hamas.

Ndërkohë, mijëra palestinezë janë të dëshpëruar dhe në kërkim të sigurisë, derisa largohen prej shtëpive të tyre në pjesën veriore të Gazës së rrethuar.

Pas më shumë se një muaji të bombardimeve masive, qindra mijëra njerëz po përballen me “situatë të rëndë humanitare” në zonat e luftimeve në Gazë dhe kanë mbetur pa ujë dhe ushqime të mjaftueshme, kanë thënë Kombet e Bashkuara.

Ministri izraelit i Mbrojtjes, Yoav Gallant, ka thënë të mërkurën se forcat e tij janë duke “ashpërsuar rrethimin” në qytetin e Gazës.

Izraeli i ka shpallur luftë Hamasit, pas sulmit të grupit në tokën e tij më 7 tetor, duke i vrarë 1.400 njerëz, kryesisht civilë, dhe duke regjistruar sulmin më të keq në historinë e Izraelit.

Militantët i kanë marrë edhe mbi 240 pengje, duke përfshirë edhe foshnja dhe persona të moshuar.

I zotuar se do ta shkatërrojë Hamasin, Izraeli është hakmarrë me bombardime të vazhdueshme dhe ofensivë tokësore, e cila sipas autoriteteve palestineze i ka vrarë mbi 10.500 njerëz, shumica prej tyre fëmijë.

“Ne kemi humbur shtëpitë tona, ne i kemi humbur fëmijët tanë. Ku është komuniteti global?”, ka pyetur Nouh Hammouda, një prej palestinezëve sa ka qenë duke ikur.

Kryeministri izraelit Benjamin Netanyahu, e ka kundërshtuar vazhdimisht mundësinë e armëpushimit, derisa të lirohen pengjet e marra prej Hamasit.

Sipas disa burimeve të lidhura me Hamasin, janë duke u zhvilluar bisedime për lirim të 12 pengjeve, përfshirë gjashtë amerikanë, në këmbim të tri ditëve armëpushim.

Zëdhënësi për Siguri Kombëtare i Shteteve të Bashkuara, John Kirby, ka thënë se Uashingtoni “e ka një mënyrë të komunikimit me Hamasin”, mirëpo dhënia e më shumë hollësive mund ta dëmtojë procesin.

Ndonëse luftimet intensifikohen, në anën tjetër kanë nisur diskutimet se si do të jetë e ardhmja e Gazës, pasi të përfundojnë luftimet.

Netanyahu ka thënë këtë javë se Izraeli do të jetë përgjegjës për “sigurinë e përgjithshme” të territorit.

Kirby ka thënë të mërkurën se diçka e tillë mund të ndodhë për një periudhë kohore.

Izraeli e ka pushtuar Gazën në luftën gjashtëditore të vitit 1967 dhe është tërhequr nga ky territor më 2005. Dy vjet më vonë, Hamasi e ka marrë kontrollin e rajonit dhe Izraeli i ka vënë bllokadë të ashpër.

Në periudhë afatgjatë, Sekretari amerikan i Shtetit, Antony Blinken ka sugjeruar se Autoriteteti Palestinez – i cili ushtron autonomi të kufizuar vetëm në disa pjesë të Bregut të pushtuar Perëndimor – duhet ta rimarrë kontrollin në Gazë.

“Duhet të ketë udhëheqësi palestineze dhe Gaza të jetë e unifikuar me Bregun Perëndimor nën Autoritetin Palestinez”, ka thënë Blinken të mërkurën, duke e përsëritur qëndrimin e SHBA-së për zgjidhje me dy shtete.

Mirëpo zyrtari i lartë i Hamasit Ezzat al-Reshq ka marrë tjetër qëndrim.

“Të gjitha fuqitë e botës bashkë, nuk do të mund t’i aplikojnë kushtet dhe kukullat e tyre” te palestinezët, ka thënë ai përmes një mesazhi në Telegram.

Shefi i Kombeve të Bashkuara për të Drejta të Njeriut, Volker Turk, e ka dënuar Izraelin për bombardimet dhe urdhrat për palestinezët që të ikin prej veriut të Gazës.

“Ndëshkimet kolektive të Izraelit ndaj civilëve palestinezë përbëjnë po ashtu krim lufte, ashtu sikurse evakuimi i detyrueshëm i civilëve”, u ka thënë ai gazetarëve në pikën kufitare Rafah me Egjiptin, rrugën e vetme për largim prej Gazës, që nuk kontrollohet prej Izraelit.

Të mërkurën janë arrestuar dy vetë në Pejë, pasi që të njëjtit dyshohen për veprën penale “Blerje dhe posedim të substancave narkotike”.

Sipas raportit 24-orësh të Policisë, të njëjtëve iu janë gjetur 18,907 euro para kesh në shtëpitë e tyre.

“Pejë / 13.07.2023 – 06:30. Pas hetimeve te zhvilluara, në lidhje me rastin është raportuar se me 08.11.2023 janë arrestuar dy të dyshuar meshkuj kosovarë dhe gjatë kontrollit në shtëpitë tyre si prova materiale janë gjetur dhe sekuestruar: 18 907 € kesh para, 1.7 gram narkotike e llojit Kokainë, 43 shishe qelqi Raki, një telefon, një pistoletë,  63 copë fishekë të kalibrave të ndryshëm dhe pajisje për pastrimin e armës. Pas intervistimit me vendim të prokurorit njëri prej tyre është dërguar në mbajtje ndërsa i dyshuari tjetër është liruar. Rasti në procedurë hetimore”, thuhet në raport.

Sot në vendin tonë parashihet të mbajë mot kryesisht me vranësira dhe reshje shiu.

Temperaturën minimale për ditën e sotme do ta mbajë Ferizaj me 2 gradë Celsius, ndërsa atë maksimale Peja me 15 gradë Celsius.

Edhe dita e nesërme do të jetë me kushte të njëjta atmosferike. Temperaturën minimale për ditën e nesërme do ta mbajnë qyteti i Pejës, Gjakovës dhe Prishtinës dhe me nga 7 gradë Celsius, ndërsa atë maksimale Mitrovica me 19 gradë Celsius.

Ndërkohë, në Shqipëri do të ketë mot i vranët dhe me shi. Temperaturën minimale do e ketë Korça me 3 gradë Celsius, ndërsa ajo maksimale do të jetë në Lezhë, Durrës dhe Tiranë me nga 20 gradë Celsius. /atvlive.tv/

Parashikimin e plotë të motit, për rajon dhe Evropë mund ta gjeni në videon e mëposhtme: