Blog

Aktivistja mjedisore suedeze Greta Thunberg u largua nga gjykata e Westminster Magistrates në Londër të mërkurën, e akuzuar për një shkelje të rendit publik për një protestë mjedisore në qendër të Londrës muajin e kaluar.

Aktivistja 20-vjeçare u kap nga policia më 17 tetor kur ajo, së bashku me dhjetëra demonstrues bllokuan hyrjet e një hoteli ku organizohej një konferencë për naftë dhe gaz.

Protesta synonte të tërhiqte vëmendjen ndaj shqetësimeve mjedisore dhe ndikimit të konferencave të tilla në ndryshimet klimatike. /AA

Grupi Parlamentar i Lidhjes Demokratike të Kosovës (LDK), ka mbajtur tryezë me temën “Projekt-buxheti i Republikës sё Kosovës pёr vitin 2024”. Aty u tha se buxheti për vitin 2024 nuk përbën zhvillim ekonomik, ndërsa ngritjen e koeficientit të pagave nuk e konsideron rritje për shkak të inflacionit.

Shefi i deputetëve të kësaj partie, Arben Gashi, tha se ndonëse jemi në vitin e fundit të kësaj Qeverie, nuk ka pasur asnjë projekt madhor zhvillimor.

“Nëse u kthemi Ligjit të buxhetit të vitit të kaluar, mund të them se ka sjellë shumë probleme sidomos për qeverisjen lokale ku shumë komuna kanë pasur probleme t’i shpenzojnë të hyrat vetanake deri në fund. Ka pas një qasje tendencioze ndaj komunave dhe është e papranuar. Ne si GP kemi kundërshtuar këtë dhe na u ka dashtë që të përballemi me një ‘luftë parlamentare’, që këto të hyra vetanake t’u kthehen komunave”.

“Mungojnë projektet zhvillimore dhe ideja se si të qeveriset vendi. Jemi në vitin e fundit të kësaj Qeverie dhe nuk kemi asnjë projekt madhor zhvillimor, kryesisht është marrë me çështje social”, u shpreh Gashi.

Deputeti i LDK-së, Avdullah Hoti, tha se kur kanë qeverisur ata 36% e buxhetit është shpenzuar për investime kapitale. Duke komentuar rritjen e koeficientit për 5 euro, s’është reale veç mashtrim.

“Këtë buxhet duhet ta analizojmë. Masivisht ka shkuar në subvencione. Një vit normal siç kemi qenë ne, 36 për qind është shpenzuar në investime kapitale ndërsa tani kemi rritje të subvencioneve. Rritja e koeficientit prej 5 euro nga 105 në 110 euro, nuk përbën rritje reale. Vlerësimet tona janë se kjo rritje është më e vogël se sa rritja e inflacionit”, deklaroi tutje Hoti.

E deputetja Hykmete Bajrami, kritikoi Qeverinë për ndarjen e mjeteve për komunat. Tha se Komuna e Shtimes ka më shumë mbështetje se sa Komuna e Prishtinës, raporton EO.

Kritika për mospërkrahje nga niveli qendror pati edhe kryetari i Kryeqytetit, Përparim Rama.

Kryetari i Aleancës Kosovare të Bizneseve, Agim Shahini, ndonëse tha se ka rritje të buxhetit ka rritje edhe të varfërisë.

“Kjo tregon injorancën e dialogut me sektorin privat. AKB mendon që dy gjëra nuk janë në përputhje. Nëse e shikojmë buxhetin, atëherë e shohim se gjithçka është rritur si zhvillimi ekonomik e investimet kapitale, por nëse e shohim në stofra atëherë e shohim se është rritur varfëria”.

“Si është e mundur që kur të rritet buxheti, rritet edhe varfëria. Kosova mbetet me pagën minimale më të ulët në rajon. Sipas parashikimeve tona, mund të ikin më shumë se 105 mijë qytetarë dhe gatishmëria për ta lëshuar vendin është më shumë se sa për të qëndruar”, u shpreh Shahini.

Ditën e sotme, Kryeministri i Republikës së Kosovës, Albin Kurti, mirëpriti në takim ambasadorin e ri të Shqipërisë në Kosovë, Petrit Malaj.

Kryeministri Kurti e përgëzoi ambasadorin për detyrën e re. Ai vlerësoi marrëdhëniet vëllazërore mes dy shteteve tona, duke theksuar rëndësinë e thellimit dhe avancimit të bashkëpunimit tonë. Biseduan për rajonin e Ballkanit Perëndimor, ku bashkëpunimi midis shteteve duhet të jetë i bazuar në demokraci e siguri, në orientimin dhe vlerat e NATO-s dhe BE-së.

Kryeministri Kurti veçoi marrëveshjet mes Republikës së Kosovës dhe Republikës së Shqipërisë, zbatimi i të cilave forcon marrëdhëniet tona dhe i sjellë qytetarët më pranë njëri-tjetrit. Ato kanë ndikim të drejtpërdrejtë e pozitiv në jetën e tyre, të bizneseve e më gjerë.

Marrëdhëniet dypalëshe ndërmjet Republikës së Kosovës dhe asaj të Shqipërisë, kanë sjellë nënshkrimin e gjithsejtë 184 marrëveshjeve, protokolleve e memorandumeve.

Ndërkaq, ambasadori Malaj shprehu përkushtimin e tij për të çuar më tej marrëdhëniet tona të shkëlqyera. Ai theksoi që ndihet i nderuar dhe i lumtur që do të shërbejë në Kosovë.

Duke i uruar suksese në këtë angazhim të ri, Kryeministri Kurti e falënderoi ambasadorin Malaj për takimin e bisedën e frytshme.

Presidentja e vendit, Vjosa Osmani ka takuar presidentin e Portugalisë, Marcelo Rebelo de Sousa.

Në 15-vjetorin e vendosjes së marrëdhënieve diplomatike, Osmani tha se Portugalia është shtet jashëzakonisht miqësor, për të cilin tha se “na ofron angazhimi i përbashkët për paqe, stabilitet dhe progres të vazhdueshëm”.

“Në 15-vjetorin e vendosjes së marrëdhënieve diplomatike, ishte kënaqësi të takoj sërish Presidentin e Portugalisë, Marcelo Rebelo de Sousa.Një shtet jashtëzakonisht miqësor me të cilin na afron angazhimi i përbashkët për paqe, stabilitet dhe progres të vazhdueshëm.”, tha Osmani.

Shërbimet e komunikimit në Gaza do të ndalen totalisht në orët e ardhshme mes një mungese të rëndë karburanti, paralajmëroi të mërkurën autoriteti rregullator palestinez i telekomunikacionit.

“Numërimi mbrapsht ka filluar për ndalimin e të gjitha shërbimeve të komunikimit dhe internetit në Rripin e Gazës”, tha në një deklaratë Laith Daraghmeh, kryeshefi Ekzekutiv i Autoritetit Rregullativ të Telekomunikacionit.

Ai shtoi se janë duke u zhvilluar kontakte me institucionet ndërkombëtare “për të siguruar hyrjen e sasive të karburantit të nevojshëm për funksionimin e shërbimit të komunikimit”.

Të dielën, ministri palestinez i Komunikimeve, Yitzhak Sidr paralajmëroi se të gjitha shërbimet e komunikimit dhe të internetit do të ndalojnë në Rripin e Gazës deri të enjten për shkak të mungesës së karburantit.

Izraeli ka ndaluar dërgesat e karburantit në Rripin e Gazës pas një sulmi ndërkufitar nga Hamasi më 7 tetor. Ndërsa sulmi izraelit në Rripin e Gazës hyri në ditën e tij të 40-të, të paktën 11.320 palestinezë janë vrarë, duke përfshirë mbi 7.800 gra dhe fëmijë, dhe më shumë se 29.200 të tjerë janë plagosur, sipas shifrave të fundit nga autoritetet palestineze.

Mijëra ndërtesa, duke përfshirë spitale, xhami dhe kisha, janë dëmtuar ose shkatërruar në sulmet e pamëshirshme ajrore dhe tokësore të Izraelit në enklavën e rrethuar që nga muaji i kaluar. Ndërkohë, numri i të vdekurve izraelitë është rreth 1.200, sipas shifrave zyrtare. /AA

Ministri i Mbrojtjes, Ejup Maqedonci ka pritur në takim shefin e Shtabit të Forcave të Armatosura të Republikës së Shqipërisë, gjeneral major Arben Kingji, duke thënë se bashkë janë më të fortë.

Në këtë takim është diskutuar rreth situatës aktuale të sigurisë, si dhe mundësisë së thellimit të bashkëpunimit bilateral ndërmjet forcave të të dyja vendeve në disa fusha ushtarake.

“Me këtë rast, shpreha mirënjohje time të thellë për Forcat e Armatosura të Republikës së Shqipërisë, për kontributin e veçantë të tyre në zhvillimin dhe avancimin e aftësive dhe kapaciteteve operacionale të FSK-së, veçanërisht në fushën e arsimimit dhe stërvitjes”, ka shkruar Maqedonci.

Maqedonci ka ritheksuar rëndësinë e jashtëzakonshme që ka mbështetja direkte nga ana e Ministrisë së Mbrojtjes së Republikës së Shqipërisë dhe FARSH, si shtet anëtar i NATO-s, duke pasur parasysh përvojën e madhe në procesin e integrimeve euroatlantike, si dhe në ngritjen dhe zhvillimin e operacionalitetit ushtarak në përgjithësi.

Ministri i Mbrojtjes është shprehur se në takim janë dakorduar që të vazhdojnë bashkëpunimin e ngushtë për të garantuar mbrojtjen e interesave kombëtare.

Një 37-vjeçare në Sarandë dyshohet se ka nxitur vajzën e saj të mitur për të kryer marrëdhënie seksuale me disa persona, për të përfituar para.

Ndaj E. M., 37 vjeçe, banuese në Sarandë ka nisur hetimi në Prokurori.

Ajo është kallëzuar nga vajza e saj 15-vjeçare, ndërsa ende nuk dihen detaje të tjera lidhur me rastin./Top Channel

Gjykata Supreme e Mbretërisë së Bashkuar e ka hedhur poshtë një plan kontrovers qeveritar për t’i dërguar migrantët në Ruandë, duke e konsideruar atë si të paligjshëm.

Ky vendim konsiderohet si kthim mbrapa për planet e kryeministrit britanik Rishi Sunak.

Paneli prej pesë personash në gjykatën më të lartë britanike ka qenë në linjë me vendimin e Gjykatës së Apelit, e cila ka thënë se kjo politikë specifike nuk ka qenë në përputhje me traktatet ndërkombëtare të cilat i ka nënshkruar Britania.

Gjyqtarët kanë thënë se pajtohen me vlerësimin e Apelit që vendimi ka rrezikuar me përballje të refugjatëve me persekutim.

“Duke i analizuar të dhënat, ne pajtohemi me ato përfundime”, është thënë në vendim prej 56 faqesh.

Konservatorët e partisë së Sunakut kanë insistuar që skema e Ruandës është kyçe për luftim të imigrimit ilegal që bëhet prej Kanalit anglez, me anije të vogla.

Mirëpo vendimi i së mërkurës i jep fund një sage të nisur në prill të vitit të kaluar, kur Britania e ka nënshkruar një marrëveshje me Ruandën për të dërguar migrantë pa dokumente në qendra të përkohshme në atë shtet.

Ky vendim është debatuar gjatë mes partive në Britani.

Sunak ka thënë se vendimi “nuk përbën rezultatin që kemi dashur” dhe që Qeveria “do t’i shqyrtojë hapat e radhës” derisa ministrat në Kigali të pranojnë vendimin që Ruanda nuk është vend i sigurt i shteteve të botës së tretë./REL/

Akademia e Kosovës për Siguri Publike (AKSP) ka shënuar të mërkurën “Ditën e informimit për komunitetet”, raporton Ekonomia Online. Në këtë ceremoni ka marrë pjesë, kryeministri Albin Kurti, i cili tha se Akademia e Sigurisë Publike sjellë dije në punën e secilit për sigurinë e qytetarëve.

Sipas tij, profesionalizimi i kësaj Akademie është i rëndësishëm për mbrojtjen e kufijve. Ai më pas ka numëruar punët e Policisë, duke thënë se janë organizuar mbi 1 000 operacionale policore, janë shkatërruar mbi 100 grupe kriminale  dhe janë arrestuar mbi  3 mijë e 800 persona.

“Më vjen mirë që jam sot këtu në Vushtrri e cila luan një rol të rëndësishëm që qytetarët e Kosovës të ndihen të sigurt. Profesionalizimi i kësaj Akademie dhe i stafit të përkushtuar është i rëndësishëm për mbrojtjen e kufijve tanë”.

“Nga fillimi i mandatit tonë qeverisë janë organizuar mbi 1 000 operacionale policore, janë shkatërruar mbi 100 grupe kriminale  dhe janë arrestuar mbi  3 mijë e 800 persona”.

“Është e domosdoshme që të gjitha komunitetet që janë të përfaqësuara në Kosovë të kontribuojnë në institucionet tona”.

Ministri i Punëve të Brendshme, Xhelal Sveçla, tha se dyert e institucioneve të sigurisë mbesin gjithmonë të hapura për të gjithë pjesëtarët e komuniteteve që jetojnë në Kosovë. Kjo me qëllim, që siç tha ai për rrugëtimin e përbashkët për forcimin e shtetit.

“Institucionet tona të sigurisë kanë gjithmonë dyert e hapura për ata e ato që duan të jenë faktor në ofrimin e sigurisë. Në historinë e themelimit të institucioneve tona dhe në ngritjen e kapaciteteve tona  pjesë e pandashme është kontributi nga të gjitha komunitetet. Diversiteti është vlerë. Jam i lumtur që kemi pjesëtarë nga të gjitha komunitetet në të gjitha nivelet”.

“Akademia për Siguri Publike ka ngritur gjenerata të tëra që sot janë pjesë e institucioneve. Ky takim i përbashkët është një mundësi e mirë e njoftimit tuaj me punën e institucioneve të sigurisë dhe me mundësinë e bashkimit tuaj me ne në këtë rrugëtim të përbashkët në forcimin e shtetit tonë. Radhët tona mirëpresin secilin prej jush”.

Ministri për Kthim dhe Komunitete, Nenad Rashiqi, tha se të rinjtë e të gjitha komuniteteve e kanë vendin në institucionet e vendit, sidomos në ato të sigurisë, raporton EO.

“Kjo shkollë, kjo Akademi mua më simbolizon një fillim një bashkëpunim për të gjithë, për një përparim për një zhvillim dhe për të ardhmen”.

“Pasi jemi në këtë vend nuk e di se ku do te ishte vendi më i përshtatshëm për ju rini që të jeni këtu. Çka do të thotë për mua kjo Akademi është besueshmëri, zgjedhje ardhmëri”.