Blog

Përgatiti: Nora Luta

Lista me emrat e të vrarëve në burgun e Dubravës është e gjatë.

Dhe secili nga 109 të burgosurit që u vranë gjatë një operacioni masiv të forcave serbe në maj të 1999-s, janë përfshirë në aktakuzën e Prokurorisë Speciale, e cila e ngarkon për krime lufte 65-vjeçarin nga Istogu, Gavrilo Milosavleviç.

Milosavleviç akuzohet se individualisht dhe në bashkëkryerje me forcat serbe, në cilësinë e zyrtarit, në këtë burg mori pjesë në këto vrasje dhe plagosjen e 108 personave të tjerë.

Operacioni i forcave serbe kishte zgjatur nga 19 deri më 24 maj të 1999-s. Më 22 maj, në ditën e masakrës rreth 1 mijë të burgosur ishin urdhëruar të dalin te vendi i quajtur “Fusha e Sportit”.

Sipas organit të akuzës, disa roje kishin shkuar edhe në qelinë ku ishte i vendosur Ukshin Hoti, fati i të cilit ende nuk dihet, duke e fajësuar atë për bombardimet e NATO-s.

Për veprimet që akuzohet se i kreu para 23 vjetësh, Gavrilo Milosavleviç thotë se nuk ndihet fajtor.

Mbrojtja e Milosavlevicit, i cili është në paraburgim që nga dhjetori i vitit të kaluar, ka kërkuar një masë alternative, duke shprehur gatishmëri edhe për pagesë për dorëzani.

Kërkesa e Vasicit është kundërshtuar nga Prokuroria Speciale, e cila ngriti aktakuzë ndaj klientit të tij, në fund të muajit nëntor.

PSRK-ja është duke hetuar edhe persona të tjerë të dyshuar për përfshirje në masakrën e Dubravës, gjatë së cilës u vranë 160 persona, e mbetën të plagosur më shumë se 300.

Përgatiti: Sara Shehu

Ka mbi 3 mijë banorë, por fshati Koshare në Komunën e Ferizajt ende nuk ka Qendër të Mjekësisë Familjare.

Planet për ndërtimin e qendrës kishin filluar qysh në vitin 2021, duke u renditur në projektet e Kornizës Afatmesme Buxhetore të Komunës për vitet 2022-2024.

Megjithatë, drejtori i Shëndetësisë në Ferizaj, Kemajl Emini, thotë se ka arsye përse ndërtimi nuk filloi.

“Ne kemi projekt për Koshare QMF në investime kapitale për vitin 2024, janë ndarë 50 mijë euro, vonesat në punime kanë qenë për shkak të stafit mjekësor s’ka pasë mjaftueshëm, është destinuar përmes kuvendit komunal edhe prona”, tha Emini.

Mungesën e qendrës, më së shumti e vuajnë banorët të cilët duhet të udhëtojnë së paku 7 kilometra deri tek QFM-ja më e afërt.

“Ky fshat ka më shumë se 500 shtëpi dhe mbi 3000 banorë e oshtë koxha problem se për çdo rast që kanë probleme me shëndet po duhet me shku n’qendër me marr e kjo po iu kushton edhe në rrugë shtrenjtë, komuna na ka thane se s’kanë financim edhe staf mjekësor”, tha kryetari i fshatit Koshare, Sadik Qerimi.

Kritika për situatën në këtë fshat kanë edhe aktivistë të shoqërisë civile. Nëpërmes një përgjigje me shkrim, Mexhit Ramusa, i cili monitoron në vazhdimësi çështjen e investimeve të kujdesit parësor shëndetësor në këtë komunë, thotë se Komuna e Ferizajt, ndër vite, ka mungesë të investimeve, në zhvillimin dhe modernizimin e infrastrukturës shëndetësore.

Situatë e njëjtë si në Koshare, është edhe në fshatin Rakaj.

Përgatiti: Arian Hajdaraj

Në seancë erdhi me vonesë, andaj vendimin e gjykatës ndaj personave që e kishin sulmuar fizikisht, Valon Syla e dëgjoi në këmbë e krejt në fund të sallës.

Të akuzuarit, vëllezërit Kenan e Okan Hasani dhe Lum Dervishi, që nuk qenë prezent në shpalljen e aktgjykimit, për veprën penale “Lëndim i Lehtë Trupor”, u dënuan me nga dy vjet burgim, duke iu llogaritur koha që kanë qëndruar në paraburgim që nga muaji prill.

“Lum Dervishi, Kenan Hasani dhe Okan Hasani dënohen me nga 2 vjet burgim efektiv…”, tha kryetarja e trupit gjykues, Violeta Namani.

Për gazetarin Syla, që paraqitjen në gjykatë si viktimë e sulmit fizik nuk e ka për herë të parë, vendimi u konsiderua i drejtë.

“Kosova pra ka shpresë, kur secili prej nesh e kryen detyrën e vet dhe e ka përnime”, tha Syla.

Në seancën e 21 gushtit, tre tashmë të dënuarit, kishin refuzuar të ngrihen në këmbë, duke deklaruar se, sipas tyre, është jashtë rregullave fetare.
Megjithatë, sipas Valon Sylës, ata kishin ofruar para në këmbim të faljes.
“Kanë ardhë persona kështu që i kanë çu, demek t’i jepim kaq pare veç me i falë, po natyrisht që kom refuzu…”, tha Syla.

Sipas dosjes së prokurorisë, më 11 prill rreth orës 23:00 tre personat, të ndikuar nga ideologjitë ekstreme radikale të islamit, kishin sulmuar gazetarin Valon Syla në afërsi të një lokali në lagjen “Bregu i Diellit”.

Ngjarjes i kishin paraprirë disa postime satirike të gazetarit, lidhur me imamin e një xhamie në Prizren.

Përgatiti: Arton Hamiti

I pari që hodhi beton në gurthemel ishte kryeministri Albin Kurti. Nga një lopatë material ndërtimor e hodhën edhe ministrja e Arsimit, Arbërie Nagavci, e kryetari i Prishtinës, Përparim Rama.

Por, ka kaluar me shumë se një vit dhe ndërtimi i çerdhes pranë gjimnazit “Eqrem Çabej” në kryeqytet, as që ka filluar.

Fajet që punimet nuk nisën as pas 400 ditësh nga vendosja e gurthemelit, sipas ministres Arbërie Nagavci, i ka Komuna e Prishtinës. Sipas Nagavcit, edhe pse bëri kërkesë për ndërtimin e çerdhes, Komuna nuk arriti ta sigurojë lejen e ndërtimit.

Teksa Komuna e Prishtinës nuk ka kthyer përgjigje, televizioni mëson se në kohën e aplikimit për lejen ndërtimore, dokumentacioni nuk ka qenë i kompletuar.
Ndryshe, çerdhja që planifikohet të ndërtohet në lagjen “Kolovica” kap vlerën e 743 mijë euro.

Përgatiti: Driton Sadiku

Dy javë nga djegia e zyrave, Instituti i Mjekësisë Ligjore ende nuk ka një raport final mbi atë se çfarë është djegur.

Krejt çka dihet është se dëshmi nuk kishte, por vetëm dokumente të ndryshme.

“Zjarri ka përfshirë zyrat ku janë dëmtuar dokumente, nuk ka pasur dëshmi nëpër zyra. Janë dëmtuar dokumente që lidhen me autopsinë, ekzaminime, dokumente personale, dokumente të administratës, d.m.th. krejt çka gjendet në zyrën e një mjeku ligjor”, tha u.d. i drejtorit të IML-së, Ditor Haliti.

Shumica prej tyre edhe mund të kthehen, pasi siç thotë u.d. i drejtorit, Ditor Haliti, janë të ruajtura edhe në mënyrë elektronike.

“Një pjesë e dokumentacionit ka fotografi, të cilat janë të ruajtura nëpër servera të ndryshëm, të cilat mund t’i nxjerrim përsëri, dhe sigurisht që mjekët një pjesë të dosjeve i kanë të ruajtura edhe nëpër USB apo kompjuterë privatë”, tha Haliti.

Haliti thotë se ende nuk është vërtetuar nëse mustaqet e Adem Jasharit dhe gishti i Isa Boletinit, kanë qenë brenda zyrave në kohën kur u përfshinë nga zjarri.
Raport zyrtar nuk ka as mbi shkaktarët e zjarrit, ndonëse dyshimet janë te rryma.

Detaje shtesë nuk dhanë as nga prokuroria themelore.

“Ju njoftojmë se rasti gjendet në fazën e grumbullimit të provave, andaj çdo informatë e dhënë në këtë fazë, do të mund ta cenojë integritetin e procedurës”, thuhet në përgjigjen nga Prokuroria Themelore në Prishtinë.

Ndryshe, kjo është hera e dytë që Instituti i Mjekësisë Ligjore përfshihet nga zjarri.

Në mars të këtij viti, zjarr pati në dhomat ku ruhen provat e vdekjeve të dyshimta, vrasjeve apo rasteve të tjera që janë nën hetim.

Gratë e mbijetuara nga dhuna do të ndihmohen me masa të veçanta për punësim.

Nëpërmjet masës së punësimit të prezantuar nga Qeveria, 70 për qind e pagës së tyre për gjashtë muaj do të subvencionohet.

“Ajo çfarë duhet të bëjnë është të drejtohen në Zyrën e Punësimit në komunën e tyre përkatëse. Pas regjistrimit, këshilltarët e punësimit do të sigurohen se ato ndërmjetësohen në biznese të regjistruara, të cilat ofrojnë pozitat të lira të punës”, tha kryeministri i Kosovës, Albin Kurti.

Pavarësimi ekonomik, sipas ministres së Drejtësisë, Albulena Haxhiu, mund të ndikojë që të dhunuarat të mos heshtin më.

“Sfida më e madhe e tyre është mungesa e një vendi të punës sikurse edhe e strehimit. Dhe sot lansohet masa për punësimin e të mbijetuarave të dhunës, ndërsa ne urojmë shumë shpejt që Gjykata Kushtetuese të japë vendimin edhe për Ligjin për Byronë për Konfiskimin e Pasurisë së Pajustifikueshme”, tha Haxhiu.

Ministri i Financave, Hekuran Murati, ka thënë se identiteti i grave që aplikojnë, do të ruhet me konfidencialitet të plotë.

“Përmes një procesi të mirë dizajnuar, që ka marrë kohë derisa e kemi gjetur atë mënyrën se si ta ruajmë edhe konfidencialitetin, por edhe identitetin e këtyre grave duke e ditur që biznese të caktuara, apo pjesëtarë të tjerë të shoqërisë nëse e kuptojnë që kemi të bëjmë me një grua, e cila është viktimë e dhunës në familje, mund të ketë pra edhe më tej raste ku mund të ketë keqtrajtim apo abuzim, apo sjellje ndoshta që nuk do të bëhej në një rast tjetër”, tha Murati.

Lansimi i kësaj mase është bërë në kuadër të “16 Ditëve të Aktivizmit Kundër Dhunës me Bazë Gjinore”. /atvlive.tv