Blog

Kryetari i Aleancës për Ardhmërinë e Kosovës, Ramush Haradinaj, e ka quajtur Qeverinë Kurti arrogante dhe se për këtë do t’i ndëshkojnë qytetarët në zgjedhjet e ardhshme, raporton EO.

Në një deklarim për media, kreu i AAK-së, ka folur edhe për koalicionin me Nisma Socialdemokrate, teksa shprehet i hapur edhe për koalicion me partitë tjera.

“Ne synojmë jemi të hapur për koalicion. Marrëveshja me Nismën është e koncentruar që të gjithë ata që dëshirojnë me u bashku ketë koalicioni mos mu ndi të ardhur po me u ndi si në shtëpinë e vet, nuk presim askënd ne punojmë angazhohemi por jemi të hapur këto deklarimet e pushtetit janë thjesht e arrogancës së tyre, arroganca e mashtrimit ju ka bërë punë mashtrimi”, u shpreh Haradinaj.

Hipokrizinë e kësaj Qeverie, Haradinaj e sheh edhe në shpenzueshmërinë e parasë publike dhe “xhipat e zi”. Thotë se gjatë vizitës në përvjetorin e 25-të në Reçak, udhëheqësit e shtetit shkuan me mbi 20 xhipa.

“Unë isha në Reçak para tre ditësh, ju siguroj mbi 20 xhipa të zi kanë qenë këta pushtetit që kanë ardhë. 20 xhipa një pas një për me shku në Reçak nëse e merrni vetëm këtë shembull pastaj e zbërtheni këtë në hipokrizi të mashtrimeve. Vërtet ky vetëbesim i tyre buron nga arroganca, se qytetari i duron i toleron ja u anon mashtrimin po edhe mundet me qenë ndryshe qytetari ashtu si ju ka jep njëherë besimi mundet me ja marr ka pasur edhe në të kaluarën raste kur qytetari i ka ndëshku mund të i ndëshkoj edhe këta”, u shpreh Haradinaj.

Ndërsa mungesën e një termocentrali të ri, fajtor sipas Haradinajt është shefi i ekzekutivit. Fajtor e bën edhe për refuzimin e gazsjellësit amerikan.

“Shihni faturat e energjisë nuk ka qytetarë të Kosovës që nuk e dinë që Kurti është iniciatori dhe shkaktari kryesor që s’kemi një termocentral me qymyr 500 megavat energji të prodhuar në Kosovë do të ishte në kosto të lirë 18 euro ka qenë e paraparë megavati maksimum 60 njëkohësisht nuk ka qytetar i Kosovës që Kurti e ka refuzu gazin amerikan gazsjellësin. Nuk ka qytetarë në Kosovë që kolegët e afërm të Kurtit si rasti i zotëri (Martin) Berisha që ishte ndërmjetës për me ble energji edhe paret që i nxjerrke ai s’po dihet ku kanë përfundu pastaj nuk ka qytetarë të Kosovës që nuk e dinë që kur u arrestu drejtori i KEK-ut”, u shpreh Haradinaj.

Me propozimin e Grupit Parlamentar të Partisë Demokratike të Kosovës dhe me mbështetjen e deputetëve tjerë opozitarë, deputeti Ferat Shala ka propozuar Rezolutën për uljen e çmimit të energjisë elektrike dhe heqjen e bllok tarifave.

Shala ka kërkuar që të miratohet kjo rezolutë, e cila përmban pesë pika:

1. I rekomandon Zyrës së Rregullatorit për Energji (ZRRE), që brenda afatit të arsyeshëm kohor të anuloj vendimin për shtrenjtimin e çmimit të energjisë elektrike dhe të marrë vendim për uljen e çmimit të saj në harmoni me rrethanat socio-ekonomike dhe nivelin e çmimit të energjisë në tregun ndërkombëtar, respektivisht në bursat respektive ndërkombëtare;
2. I rekomandon Zyrës së Rregullatorit për Energji (ZRRE), brenda afatit të arsyeshëm kohor të marrë vendim për anulimin – heqjen e bllok tarifës për kalkulimin e shpenzimeve të energjisë elektrike për konsumatorët familjarë;
3. I rekomandon Zyrës së Rregullatorit për Energji (ZRRE) ndërmarrjen e masave në raport me Kompaninë Kosovare për Furnizim me Energji Elektrike (KESCO), për të siguruar trajtimin efektiv dhe të barabartë të konsumatorëve që kanë parashtruar ankesa ndaj faturave të energjisë elektrike për muajin dhjetor 2023 dhe ankesave eventuale të konsumatorëve në vitin 2024.
4. Obligon Qeverinë e Republikës së Kosovës për marrjen e masave, veprimeve e vendimeve për krijimin e parakushteve financiare për anulimin e menjëhershëm të vendimit për shtrenjtimin e energjisë elektrike dhe lehtësimin e barrës financiare për konsumatorët familjarë të energjisë elektrike;
5. Kërkon nga Zyra për Rregullatorin e Energjisë dhe Qeveria e Republikës së Kosovës, që në afat sa më të shkurtër kohor të njoftoj Kuvendin për përmbushjen e pikave 1, 2, 3 dhe 4 të kësaj rezolute.

Bashkimi Evropian ka kërkuar nga Serbia që të lejojë vizitat e zyrtarëve të Kosovës në tri komunat në jug të Serbisë, të cilat paralajmërohen në përputhje me marrëveshjen e arritur në dialogu rreth vizitave të ndërsjella. Blloku ka kërkuar që Kosova të respektojë në të njëjtën mënyrë këtë marrëveshje.

Reagimi i BE-së vjen pasi ministrit të Punëve të Brendshme të Kosovës, Xhelal Sveçla, në fillim të janarit iu refuzua leja për të vizituar Luginën e Preshevës – komunat jugore në Serbi: Preshevë, Medvegjë dhe Bujanoc.

“Vizita e ministrit të Punëve të Brendshme të Kosovës, Xhelal Sveçla, në Serbi ishte paralajmëruar në përputhje me marrëveshjen e dialogut rreth vizitave zyrtare. Prandaj, Serbia është dashur ta lejojë dhe ajo [vizit;] të realizohej”, u tha në një përgjigje të Peter Stano, zëdhënës i BE-së për punë të jashtme dhe siguri.

Stano tha po ashtu se “BE-ja vazhdon të bëjë ftesë për të dyja palët që në tërësi, dhe pa kushtëzime, të zbatojnë të gjitha marrëveshjet e arritura në dialog, përfshirë edhe marrëveshjet për vizitat zyrtare dhe lirinë e lëvizjes”.

“Të gjitha mospajtimet duhet të zgjidhen përmes dialogut. BE-ja mbetet e gatshme t’ua lehtësojë palëve diskutimet për të gjetur zgjidhje”, tha zëdhënësi i BE-së.

Kamberi e dënon vendimin e Serbisë për t’ia ndaluar ministrit Sveçla vizitën në Preshevë
Më 4 janar, Sveçla kishte planifikuar që të vizitonte Luginën e Preshevës. Por, vizita nuk u lejua që të zhvillohej nga autoritetet e Serbisë.

Edhe në të kaluarën ka pasur raste kur Serbia, por edhe Kosova, kanë refuzuar që të japin leje për vizita zyrtare në shtetet përkatëse.

Më 27 nëntor të vitit 2021 autoritetet në Serbi kishin refuzuar kërkesën e katër ministrave për vizitë dyditore në Luginë të Preshevës.

Më herët, Kosova po ashtu kishte refuzuar vizitën në Kosovë e shefit të Zyrës për Kosovën në Qeverinë serbe, Petar Petkoviq.

Në të gjitha këto raste, BE-ja gjithmonë i kishte kritikuar palët për refuzimin e dhënies së lejeve për vizita, duke u kërkuar atyre që të lejojnë vizita të tilla në bazë të marrëveshjes së arritur për vizita të ndërsjella zyrtare.

Sipas aranzhimeve mes Kosovës dhe Serbisë për vizitat zyrtare, të arritura nën ndërmjetësimin e BE-së, këto vizita duhet të paralajmërohen përmes zyrtarëve ndërlidhës. Ndërkaq, autoritetet e shteteve përkatëse duhet t’i autorizojnë ato./REL/

Komisioni Qendror i Zgjedhjeve (KQZ), të enjten ka marrë vendim për pezullimin e partisë politike, Partia Rome e Bashkuara e Kosovës (PREBK) pasi nuk ka mbajtur kuvendin e saj zgjedhor sipas afatit ligjor.

Afati i fundit për mbajtjen e kuvendit/konventës zgjedhore për PREBK ka qenë data 6 janar 2024, raporton Ekonomia Online.

Sipas vendimit të KQZ-së, PREBK obligohet që ta mbajë kuvendin e saj zgjedhor në një afat shtesë prej 45 ditësh dhe nëse kjo nuk arrihet, atëherë sipas rregullores për regjistrimin dhe funksionimin e partive politike, KQZ merr vendim për çregjistrim nga regjistri i partive politike në Kosovë.

Sipas Ligjit Nr. 08/L-288 për Zgjedhjet e Përgjithshme në Republikën e Kosovës, të gjitha partitë politike të regjistruara janë të obliguara që të mbajnë kuvendin zgjedhore brenda 6 muajve nga data e regjistrimit të partivë dhe pastaj së paku çdo 48 muaj.

Anëtari i KQZ-së nga radhët e Lëvizjes Vetëvendosje, Sami Kurteshi, tha se ky vendim është diskriminim, pasi shkelje të ngjashme ka pasur edhe nga partitë tjera.

“Ky është rasti i disa partive që pezullohet për këtë, një rast e kemi pas me të njëjtat kushte dhe nuk e kemi pezulluar dhe dua ta theksoj se jemi duke bërë diskriminim në rrethana të njëjta për kushte të ndryshme. Kjo është rast klasik i diskriminimit”, u shpreh ai.

Dy nga trembëdhjetë minatorët e lënduar të mërkurën në horizontin e njëmbëdhjetë të minierës së Trepçës në Stantërg, janë në gjendje relativisht të mirë dhe vazhdojnë të mbeten nën kujdesin mjekësor në spitalin ‘Sami Haxhibeqiri’ të Mitrovicës.

Burim Gashi, oftalmolog, ka bërë të ditur për KosovaPress se që nga dita e djeshme deri më sot, ka ndryshime pozitive tek këta dy pacientë.

Sipas tij, ata kanë pësuar djegie të syve me acid, ndërsa u shpreh optimist se brenda javës do të lirohen nga spitali.

“Gjendja është relativisht e mirë. Njëri është pak më keq, tjetri më lehtë. Prej ditës së djeshme deri sot, ka ndryshime për të mirë… Djegie të kornesë dhe syrit me acid… Gjendjen po e përcjellim, në bazë të gjendjes që pash sot, besoj se brenda javës pacientët lirohen. Kjo nuk është definitive, por varësisht prej gjendjes, reagimeve”, ka thënë Gashi.

Ka nisur subvencionimi i energjisë elektrike për familjet e cënueshme, njofton ministri i Financave, Hekuran Murati.

Ai njofton se 40,620 familje që janë kualifikuar në grupin e parë, do të përfitojnë nga subvencionimi i energjisë elektrike.

Tutje, ministri bën të ditur se subvencionimi do të bëhet direkt në faturë, i ndarë në 6 këste mujore, duke filluar nga fatura e janarit.

“Subvencionimi bëhet në kuadër të pilotimit të Programit për Mbështetjen e Familjeve të Cënueshme, që mbështetet financiarisht nga Bashkimi Evropian 🇪🇺.

Komisioni zbatues ka shqyrtuar të gjitha aplikacionet e familjeve që kanë aplikuar online. Gjithashtu, me automatizëm janë shqyrtuar sipas kritereve të njëjta edhe familjet që në të kaluarën kanë përfituar nga skema e vjetër mbështetëse, meqenëse të dhënat e tyre i kemi pasur në databazë.

Të gjitha familjet që janë miratuar nga Komisioni zbatues e që kanë përfituar nga subvencionimi, këtë do të mund ta shohin në faturat e tyre të energjisë elektrike.

Vlen të theksohet se gjatë shqyrtimit Komisioni ka hasur në numër të konsiderueshëm të aplikacioneve që kanë përmbajtur gabime dhe ka qenë e pamundur që këto aplikime të shqyrtohen. Në lidhje me këtë, aplikuesit do të pranojnë një email me udhëzimin se si të riaplikojnë me të dhëna të sakta.

Gjithashtu, kanë qenë edhe rreth 10 mijë aplikacione që nuk kanë përmbushur kriterin e të ardhurave për t’u konsideruar si familje e cënueshne – kanë pasur të ardhura që kanë tejkaluar nivelin mesatar prej 150 euro/muaj/anëtar. Këta aplikues do të pranojnë një email që i njofton për refuzimin e aplikimit.

Do të ketë edhe një grup të dytë të aplikimeve që do të shqyrtohen, dhe aplikimi është i hapur deri më datën 31 janar 2024, në platformën eKosova, tek:

>Shërbime

>Grante dhe Subvencione

>Aplikimi për subvencionim të energjisë elektrike për familjet e cenueshme

Qeveria për të gjithë!”, shkruan Murati.

Votimi në Parlamentin Evropian për rezolutën për Serbinë është paralajmëruar për mbledhjen e ardhshme plenare e cila është caktuar për 08 shkurt në mesditë.

Debati i mbrëmshëm në PE do të shërbejë si bazë për shkrimin e tekstit të rezolutës, e cila do të negociohet nga grupet parlamentare në periudhën e ardhshme, për të arritur një tekst të dakorduar, transmeton Paparaci.

Debati për zgjedhjet në Serbi dhe votimi i kësaj rezolute u caktuan me kërkesë të deputetëve socialdemokratë, të të Gjelbërve dhe të deputetëve Renew në Parlamentin Evropian dhe përkundër kundërshtimit të Partisë Popullore Evropiane.

Raportuesi i PE për Serbinë dhe anëtari i PE Vladimir Bilcik kishte kërkuar që rezoluta të mos votohet para se të publikohet raporti zyrtar i misionit vëzhgues të ODIHR për zgjedhjet në Serbi, mirëpo propozimi i tij nuk ishte miratuar.