ATV

Blog

  • BE-ja thërret takim për dinarin në Bruksel, Bislimi thotë se nuk shkon

    BE-ja thërret takim për dinarin në Bruksel, Bislimi thotë se nuk shkon

    Përgatiti: Fatlum Jashari

    Për të diskutuar çështjen e dinarit serb në Kosovë, Bashkimi Evropian ka kërkuar mbajtjen e një takimi në Bruksel javën e ardhshme.

    Teksa tregoi se Përfaqësuesi i Posaçëm i BE-së për Dialogun, Miroslav Lajcak, e ka caktuar takimin dhe temën në agjendë pa dakordim paraprak me të dyja palët, zëvendëskryeministri Besnik Bislimi tha se nuk do të shkojë në Bruksel.

    “Ka një kërkesë nga Brukseli që të mbahet një takim javën e ardhshme për çështjen e rregullimit të transferit të monedhave nga Serbia për në Kosovë, por ky nuk është takim ku duhet të shkojë kryenegociatori për arsye se çështja e dinarit nuk është pjesë e dialogut. Unë shkoj atëherë kur bisedohet për marrëveshjen. Do të shohim se kush do të shkojë”, tha Bislimi.

    Paraprakisht, në Çagllavicë, në një diskutim për zhvillimin ekonomik për serbët në Kosovë, zëvendëskryeministri Bislimi njoftoi se pas BQK-së, Qeveria do të ndërmarrë masa tranzitore për ndikimin e rregullores te komuniteti serb.

    “Në ditët në vijim, Qeveria do të dalë me 10 masa, me të cilat do të tregojmë se si do të kujdesemi që qytetarët të mos dëmtohen në këtë fazë kalimtare, por fazë që më pas do të garantonte zbatimin plotësisht të formalizimit të sistemit të pagesave”, tha Bislimi.

    Më 1 Shkurt, hyri në fuqi rregullorja e re e BQK-së, e cila njeh euro si valutë të vetme për pagesa. Më 7 Shkurt, një automjet nga Serbia, që transportonte miliona dinarë, nuk u lejua të hynte në Kosovë.

    Më 12 Shkurt, Banka Qendrore prezantoi periudhën tremujore kalimtare dhe masat lehtësuese, të cilat SHBA-ja i vlerësoi të pamjaftueshme duke kërkuar shtyrjen e zbatimit të vendimit dhe një zgjidhje të përkohshme.

    Në këtë fazë nuk ka qartësi se si do të vijohet me pagesat me dinarë, të cilat pjesëtarë të komunitetit serb i përfitojnë nga skemat pensionale dhe sociale të Serbisë.

  • Aliu: Hapet thirrja për aplikim për bashkëfinancimin e projekteve në komuna

    Aliu: Hapet thirrja për aplikim për bashkëfinancimin e projekteve në komuna

    Ministria e Mjedisit, Planifikimit Hapësinor dhe Infrastrukturës ka hapur thirrjen publike për bashkëfinancimin e projekteve nëpër komuna në vlerë prej 17 milionë euro.

    Për këtë thirrje, ka njoftuar Ministri Liburn Aliu, i cili ka treguar kriteret për përzgjedhjen e projektit.

    “Aplikimit tuaj ju lutem që t’i bashkangjitni projektin me paramasë e parallogari dhe të tregoni nëse mund të participoni në financimin e tij”, ka thënë ai.

    Bashkëfinancimi vlen për të gjitha komunat e vendit. Kërkesat do të shqyrtohen në pjesën e parë të muajit mars, derisa në pjesën e dytë të muajit mars do të nënshkruhen memorandumet.

    Ndërkohë, në fillim të muajit prill do të dërgohen për miratim në Qeverinë e Kosovës.

  • Ministri Maqedonci pritet në takim nga homologu finlandez, Antti Hakkanen

    Ministri Maqedonci pritet në takim nga homologu finlandez, Antti Hakkanen

    Më ftesë të Ministrisë së Mbrojtjes së Republikës së Finlandës, ministri i Mbrojtjes, Ejup Maqedonci, ka qëndruar në Finlandë, ku është pritur në takim nga ministri i Mbrojtjes, Antti Hakkanen.

    Sipas një komunikate thuhet se në këtë takim, ministri Maqedonci e njoftoi homologun e tij finlandez rreth zhvillimeve të fundit të sigurisë në regjionin e Ballkanit Perëndimor, me theks të veçantë rreth sigurisë në Republikën e Kosovës dhe kërcënimeve me të cilat po ballafaqohet vendi ynë. Gjithashtu, ai e informoi rreth zhvillimit të kapaciteteve të mbrojtjes dhe nevojës për mbështetje nga partnerët në këtë kohë kur demokracia dhe siguria globale po cenohet nga qasja hegjemoniste e akterëve autokratik.

    Nga ana e tij, ministri Hakkanen theksoi se Finlanda do të vazhdojë të mbështesë fuqishëm integrimin e Kosovës në Bashkimin Evropian dhe anëtarësimin në NATO, si dhe shprehu gatishmërinë e tij dhe të Ministrisë së Mbrojtjes së Finlandës për të thelluar bashkëpunimin me Republikën e Kosovës, në fushën e mbrojtjes dhe sigurisë.

    Gjatë takimit, ata diskutuan edhe për nevojën e vazhdimit të mbështetjes së luftës së drejtë të popullit të Ukrainës si dhe mundësitë për bashkëpunimin në mes të vendeve tona në fushën e industrisë së mbrojtjes. Gjatë vizitës në Ministrinë e Mbrojtjes së Finlandës, ministri Maqedonci zhvilloi takime edhe me Drejtuesit e Drejtorisë së Politikave të Mbrojtjes dhe Burimeve Materiale.

    Po ashtu, ministri Maqedoni dhe delegacioni i tij në MM, vizituan edhe Qendrën e Eksellencës së NATO-s dhe BE-së për kërcënimet hibride (Hybrid CeO), ku me drejtoreshën e kësaj Qendre diskutuan mundësitë e bashkëpunimit të ndërsjellë, me qëllim përballimin me kërcënimet hibride.

  • Vdekja e 4-vjeçares, Vitia: Cilido që ka mundur të jetë përgjegjës në sistemin shëndetësor, duhet të ketë masa, pa vonesë

    Vdekja e 4-vjeçares, Vitia: Cilido që ka mundur të jetë përgjegjës në sistemin shëndetësor, duhet të ketë masa, pa vonesë

    Pas vdekjes së vajzës 4-vjeçare nga Gjakova, ka reaguar edhe ministri i Shëndetësisë, Arben Vitia.

    Vitia përmes një shkrimi në Facebook, ka thënë se janë të njoftuar për pretendimet e prindërve në raport me trajtimin e 4-vjeçares nga ana e mjekëve, duke shtuar se kushdo që është përgjegjës në sistemin shëndetësor duhet të ketë masa, pa vonesë.

    “Humbja e jetës së vajzës 4 vjeçare nga Gjakova na ka prekur të gjithëve. Jemi informuar për përvojën që kanë pasur prindërit nga deklarimet e tyre publike. Për cilindo që ka mundur të jetë përgjegjës në sistemin shëndetësor duhet të ketë masa, pa vonesë. I bëj thirrje organeve të hetimit që sa më parë rasti të hetohet në çdo detaj. Ngushëllime të sinqerta familjes dhe të afërmve!”,  ka shkruar ai.

  • Osmani me ambasadorët e QUINT-it flasin për dinarin dhe për zgjedhjet në katër komunat në veri

    Osmani me ambasadorët e QUINT-it flasin për dinarin dhe për zgjedhjet në katër komunat në veri

    Presidentja e Kosovës, Vjosa Osmani, priti sot në takim shefin e Zyrës së BE-së në Kosovë, Tomas Szunyog, ambasadorin e Francës në Kosovë, Olivier Guérot, ambasadorin e Italisë, Antonello De Riu dhe zv.ambasadorin e Gjermanisë, Mathias Conrad me të cilët u diskutuan zhvillimet aktuale në fushën e politikës dhe atë të sigurisë.

    Në njoftim thuhet se gjatë takimit u diskutua lidhur me përgatitjet që po bëhen për mbajtjen e zgjedhjeve në katër komunat në veri të vendit, në përputhje me legjislacionin në fuqi.

    “Presidentja ritheksoi se e drejta për të kërkuar largimin e kryetarëve nëpërmjet nënshkrimeve është e drejtë që u takon qytetarëve dhe se tani pret që në KQZ të kryhen të gjitha procedurat e nevojshme në përputhje me ligjin dhe udhëzimin administrativ në fuqi”, thuhet në komunikatë.

    Në takim me ambasadorët, Presidentja Osmani ka theksuar nevojën imediate të heqjes së masave të BE-së ndaj Kosovës, të cilat janë të padrejta dhe krijojnë mungesë ekuilibri në dialog, si dhe njëkohësisht theksoi se Kosova ka ndërmarr hapa konkret në përputhje me planin e dakorduar për këtë çështje. Heqja e masave, theksoi ajo, do të krijonte atmosferë shumë më pozitive për vazhdimin e dialogut parimor ku të dyja palët do të trajtoheshin të barabarta.

    Më tej në njoftim thuhet se gjatë takimit ajo ritheksoi se për fat të keq Serbia nuk po përballet me përgjegjësi për nxitjen e sulmit ndaj ushtarëve të KFOR-it në maj e as për sulmin e agresionit kundër Kosovës në shtator të vitit të kaluar.

    “Kjo situatë, sipas saj, mund ta nxisë Serbinë që t`i shtojë veprimet destabilizuese në rajon”, thuhet në njoftim.

    Në fund thuhet se një pjesë e takimit iu kushtua edhe çështjes së zbatimit të Rregullores së BQK-së, me ç’rast Presidentja ritheksoi se është me rëndësi që nuk po kërkohet që kjo rregullore të shfuqizohet, por thjesht që të punohet në një plan tranzicioni për zbatim të saj e cila merr parasysh edhe shqetësimet e të gjithë qytetarëve që mund të afektohen nga një vendim i tillë.

    “Duke ritheksuar rëndësinë e zbatimit të Kushtetutës në çdo cep të Kosovës, Presidentja ka shtuar se suksesi në këtë drejtim është i lidhur edhe me nivelin e bashkëpunimit me aleatët tanë të cilët kanë qenë gjithnjë mbështetësit më të fuqishëm të pavarësisë, sovranitetit dhe sigurisë së shtetit tonë”.

  • Vajzat U17/ Kosova pëson humbje nga Finlanda

    Vajzat U17/ Kosova pëson humbje nga Finlanda

    Kombëtarja e Kosovës në konkurrencën e vajzave e grupmoshës nën 17-vjeç ka zhvilluar sot ndeshjen e parë në kuadër të kualifikimeve për Kampionatin Evropian 2024, që po mbahen në Portugali.

    Kosova, e cila ndodhet në Grupin 2 të Ligës A, pësoi humbje me rezultat të thellë ndaj kombëtares së Finlandës, me rezultat 5:0.

    Finlandezet e siguruan epërsinë me të filluar ndeshja, me ç’ rast në minutën e shtatë përmes Todoshchenko shënuan golin e parë.

    Me të filluar pjesa e dytë, përkatësisht në minutën 48 u akordua penallti për finlandezet, por gjuajtjen e Olivia Ulenius e priti portierja Leyla Gërvalla.

    Megjithatë, vetëm një minutë më vonë Finlanda e gjeti rrugën e golit përmes Laura Oksanës.

    Përzgjedhësja Sanije Krasniqi, në minutën e 60-të bëri dy zëvendësime, duke futur në lojë Viola Nuhajn dhe Loela Ahmetin, në vend të Albonita Statovcit dhe Elona Pacit, por as me këtë ndryshim, Kosova nuk arriti ta ndalë kundërshtarin.

    Kështu, në minutën e 71-të Finlanda realizoi golin e tretë përmes Jelena Todoshchenkos, e cila shënoi hat-trick në këtë takim, pasi realizoi edhe në minutën e 76-të për 4:0. Ndërkohë, rezultatin përfundimtar 5:0 e vendosi Bella Aalto, në minutën e 77-të.

    Ndeshjen e radhës Dardanet e zhvillojnë të shtunën nga ora 12:00, ku i pret një sfidë edhe më e vështirë kundër Portugalisë nikoqire.

  • Prodhuesit britanikë të armatimeve BAE Systems, fitime rekord nga luftërat në Ukrainë e Izrael-Gaza

    Prodhuesit britanikë të armatimeve BAE Systems, fitime rekord nga luftërat në Ukrainë e Izrael-Gaza

    Shtimi i shpenzimeve në armatime të nxitura nga lufta në Ukrainë dhe konflikti Izrael-Gaza i ka sjellë fitime rekord prodhuesve britanikë të armëve ‘BAE Systems’ vitin e kaluar, teksa rritje e mëtejshme pritet dhe në vitin në vijim.

    Kompania e listuar në bursën FTSE 100 regjistronte fitime në 2.7 miliardë paundë pa llogaritur interesin, nga shitjet e armëve në rreth 25.3 miliardë paundë në vitin 2023, shkruan e përditshmja The Guardian.

    Aksionet e kompanive të armatimeve në përgjithesi janë rritur në dy vitet e fundit pas nisjes së luftës së Rusisë në Ukrainë në shkurt 2022 teksa qeveritë kanë rivlerësuar planet e tyre të shpenzimeve ushtarake.

    Lufta brutale në Lindjen e Mesme e nisur më 7 tetor ishte një tjetër faktor, e nxitur nga sulmi i papritur i Hamas brenda Izraelit ku raportohet se u vranë rreth 1000 izraelitë, çka u pasua më një fushatë të gjerë bombardimesh nga ushtria izraelite në Gaza, ku kanë humbur jetën më shumë se 25 000 palestinezë.

    Ndërkohë grupi britanik BAE Systems shton fitimet e saj teksa ka zgjeruar interesat dhe në ndërtimin e nëndetëseve, tankeve dhe avionëve luftarakë, përveç armëve e municioneve.

    Kreu i saj Charles Woodburn, tha se prodhuesi priste rritje të mëtejshme biznesi në vitet në vijim.

    “Mungesa e stabilitetit në Evropë dhe në Lindjen e Mesme, ashtu si dhe në pjesë të tjera të botës ka sjellë në fokus rolin tonë në mbrojtje të sigurisë kombëtare”, tha ai sot për gazetarët.

    “Megjithse shumica e volumit të shitjeve vjen nga programe ekzistuese para konfliktit në Ukrainë, porosi të reja kanë ardhur për blinda të rëndë dhe municione”.

    BAE është krijuar në 1999 nga shkrirja e grupeve Marconi Electronic Systems dhe kompanisë shtetërore britanike të aeronautikës British Aerospace, e Hawker Siddeley.

    Grupi është përfshirë dhe në kontratën e fundit për ndërtimin e nëndetëseve bërthamore për Australinë, për të cilën Franca u ankua se i takonte asaj, si dhe një seri pajisjesh të luftës ajrore për Italinë, Japoninë e Britaninë.

    Ëoodburn tha se ishte i kënaqur me vlerësimet në bursën e Londrës.

    Ai shtonte se BAE Systems nuk do të bëjë si kompani të tjera që po listohen në bursën e SHBA, pasi biznesi po ecën mire dhe qeveria e ndalon të bjerë në pronësi të huaj. /tch

  • Vdekja e 4 vjeçares, QKUK: Ka pasur infeksion të shkallës së lartë

    Vdekja e 4 vjeçares, QKUK: Ka pasur infeksion të shkallës së lartë

    Qendra Klinike Universitare e Kosovës ka dalë me një sqarim lidhur me vdekjen e 4 vjeçares e cila vdiq të hënën në Qendrën Emergjente të QKUK-së, kishte pësuar infeksion akut të rëndë të shkallës së lartë – sepsë.

    Në një reagim të Shërbimit Spitalor Klinik Universitar thuhet se pacientja ishte pranuar të dielën në mesditë nga Spitali i Gjakovës “Isa Grezda”.

    Sipas njoftimit, pacientja ishte pranuar “me parametra vital dhe me gjendje mjaftë të rënduar shëndetësore”.

    QKUK-ja ka thënë se në Qendrën Emergjente janë kryer të gjitha procedurat.

    “Në Qendrën Emergjente të QKUK-së, kryhen të gjitha analizat laboratorike dhe ato diganostike – radiologjike, thirrën në konsultë edhe mjekët e lëmenjve përkatëse. Pas të gjitha konsultave, vendoset për trajtim të mëtejmë në Repartin Intensiv në Klinikën e Pediatrisë, me diagnozë të punës Sepsë (infeksion akut i rëndë i shkallës se lartë). Përkundër të gjitha masave reanimatore të ekipeve të mjekëve të Klinikës së Pediatrisë, për shkak të gjendjes së rënduar shëndetësore, fëmija ndërron jetë me datë 19 shkurt 2024”, thuhet në njoftim.

    SHSKUK-ja ka thënë se ka kërkuar raporte të detajuara nga Spitali në Gjakovë dhe QKUK-ja.

    Ky institucion ka apeluar që të mos ketë spekulime për rastin deri në rezultatet e hetuesisë, për të cilat është shprehur se do t’i marrë parasysh për veprime të mëtejme.

  • Qeveria pritet të prezantojë dhjetë masa për fazën e tranzicionit

    Qeveria pritet të prezantojë dhjetë masa për fazën e tranzicionit

    Zëvendëskryeministri i Kosovës, Besnik Bislimi, tha se Qeveria e Kosovës shpejt do të prezantojë dhjetë masa lidhur me mënyrat se si qytetarët të mos dëmtohen gjatë “fazës kalimtare” të zbatimit të vendimit, që ndalon përdorimin e dinarit serb për kryerjen e pagesave.

    Që nga 1 shkurti, në Kosovë ka hyrë në fuqi rregullorja e Bankës Qendrore të Kosovës që parasheh euron si valutën e vetme në Kosovë për kryerjen e pagesave me para të gatshme.

    Gjatë një tryeze me temën “Zhvillimi ekonomik për serbët në Kosovë”, Bislimi tha se janë të vetëdijshëm për vështirësitë që mund të krijojë rregullorja e BQK-së te serbët në Kosovë.

    “Ne jemi të vetëdijshëm që në afat të shkurtër zbatimi i kësaj mase mund të krijojë vështirësi për një pjesë të qytetarëve të cilët kanë marrë dhe vazhdojnë të marrin mbështetje financiare nga Republika e Serbisë. Banka Qendrore [e Kosovës] ka nxjerrë një varg aktivitetesh dhe masash përmes së cilave synon ta zbusë këtë ndikim”, tha Bislimi.

    “Por, në ditët në vijim edhe Qeveria e Kosovës do të dalë me një listë prej dhjetë masash përmes së cilave ne do të tregojmë se si do të kujdesemi që qytetarët të mos dëmtohen në këtë fazë kalimtare, por fazë e cila do të garantonte pastaj zbatimin në plotëni të sistemit të pagesave”, tha ai.

    Shteti serb ndan miliona euro për serbët në Kosovë pasi ua paguan atyre – përmes një sistemi paralel – rrogat, pensionet dhe ndihmën shtesë.

    Në vende të caktuara në Graçanicë, qytetarët serbë më 20 shkurt nuk kanë mundur të marrin ndihmën sociale dhe shtesat për fëmijë në postë, që punon sipas sistemit serb, sepse punonjësit u kanë thënë se nuk kanë para për t’i paguar këto shtesa.

    Po ashtu, më 21 shkurt një grup i mësimdhënësve në Mitrovicë të Veriut protestuan para Kursimores së Postës së Serbisë, pasi nuk morën pagat.

    Beogradi e ka kritikuar ashpër rregulloren e BQK-së, duke e interpretuar si synim të Qeverisë së Kosovës për dëbim të serbëve.

    Rregullorja e BQK-së është kritikuar edhe nga faktori ndërkombëtar që ka thënë se vendimi është marrë pa konsultime paraprake dhe pa marrë për bazë ndikimin te komuniteti serb.

    Shtetet e Bashkuara kanë kërkuar që Kosova të shtyjë zbatimin e vendimit, duke argumentuar se mospërmbushja e kësaj kërkese veçse ka ndikuar te cilësia e raporteve mes Uashingtonit dhe Prishtinës.

    BQK-ja ka thënë se vendimi do të zbatohet përmes një faze tranzitore jo më të gjatë se tre muaj./REL

  • ​Marrëdhënie të veçanta: Putin i dhuron makinë luksoze Kim-it të Koresë së Veriut

    ​Marrëdhënie të veçanta: Putin i dhuron makinë luksoze Kim-it të Koresë së Veriut

    Presidenti rus, Vladimir Putin, i ka dhuruar liderit të Koresë së Veriut Kim Jong Un një makinë luksoze të prodhimit rus.

    Media shtetërore e Phenianit tha se limuzina iu dorëzua ndihmësve kryesorë të Kim të dielën.

    Zëdhënësi i Kremlinit, Dmitry Peskov, më vonë konfirmoi dhuratën, duke thënë se ishte një Aurus, veturë luksoze me përmasa të plota të llojit të përdorur nga vetë zoti Putin.

    Dy vendet e izoluara ndërkombëtarisht kanë krijuar marrëdhënie të ngushta që nga pushtimi i Ukrainës nga Rusia.

    Koreja e Veriut mendohet se po furnizon Rusinë me artileri, raketa dhe raketa balistike për luftën, pavarësisht sanksioneve ndërkombëtare ndaj të dy vendeve. Të dyja palët mohojnë shkeljen e sanksioneve.

    Putin e mirëpriti Kim në Kozmodromin Vostochny në Lindjen e Largët Ruse shtatorin e kaluar, i cili ishte udhëtimi i tij i parë jashtë vendit në katër vjet.

    Kim Jong-un besohet të jetë një entuziast i makinave dhe se ka një koleksion të automjeteve të huaja luksoze.

    Motra e Kim, Yo Jong tha se “dhurata shërben si një demonstrim i qartë i marrëdhënieve të veçanta personale midis liderëve të lartë” të dy vendeve, në komentet e cituara nga agjencia shtetërore e lajmeve të Koresë së Veriut KCNA.

    Por Ministria e Jashtme e Koresë së Jugut tha se dhurata shkeli sanksionet e Këshillit të Sigurimit të OKB-së kundër Koresë së Veriut, të cilat ndalojnë furnizimet e disa kategorive të automjeteve, përfshirë makinat luksoze.

    Si Rusia ashtu edhe Koreja e Veriut kanë treguar se Putin do të vizitojë Phenianin në të ardhmen e afërt. /BBC/