Blog

Lëvizja Vetëvendosje ka kujtuar ngjarjen tragjike të 20 vjetëve më parë kur tre fëmijët në Çabër të Mitrovicës humbën jetën në lumin Ibër.

“20 vjet më parë, në Çabër të Mitrovicës, buzë lumit Ibër, tre fëmijë, Egzon Deliu, Avni Veseli, dhe Florent Veseli po luanin duke ndjekur shota të egra. Fillimisht një serb që po korrte tallën aty fillon t’i fyej, e më pas një grup tjetër serb që i bashkohen atij me sharje, ndërsejnë qentë e tyre drejt fëmijëve të cilët të frikësuar fillojnë të ikin dhe hyjnë në lumin Ibër duke humbur tragjikisht jetën e tyre”.

Kjo ngjarje e përshkruar si më lart, Vetëvendosje thotë se është shkruar asokohe edhe në raportin e prokurorit amerikan të UNMIK-ut, Robert Dean, por, shton, për të nuk është ndarë kurrë drejtësi.

Vetëvendosje akuzon policinë e UNMIKU-ut dhe KFOR-it për mosreagim kur protestuesit paqësorë e shqiptarët u gjuajtën me armë nga kriminelë në pjesën veriore.

“Kjo vrasje e tre fëmijëve preku secilin qytetar duke rezultuar në organizimin e protestës paqësore me datë 17 Mars. Qytetarët shqiptarë dolën te ura e lumit Ibër në Mitrovicë për të parë serbët e organizuar në pjesën tjetër të cilët filluan të shtijnë me armë zjarri ndaj protestuesve, dhe ndaj shqiptarëve që ende jetonin në pjesën veriore. Policia e UNMIK-ut dhe e KFOR-it, vetëm kishte vëzhguar situatën dhe nuk kishte provuar ta ndalë dhunën e t’i arrestojë kriminelët serb që kishin shtënë mbi protestuesit paqësor. Kështu, pas vrasjes së fëmijëve dhe qytetarëve të paarmatosur në protestë, në mbarë vendin vërshuan protestat që kërkonin drejtësi. Në këto ngjarje që pasuan, e që u quajtën “Trazira të Marsit”, 19 qytetarë mbetën të vdekur, prej tyre 11 shqiptarë”.

Vetëvendosje thotë se do të kërkojë drejtësinë e munguar për këto krime.

“Data 16 mars, shënon një ditë e zezë për Mitrovicën dhe gjithë Kosovën. Drejtësia për ngjarjen tragjike, vrasjen e tre fëmijëve e më pas edhe e qytetarëve të tjerë, ende nuk është vënë. Ne nuk do e harrojmë kurrë dhe do të kërkojmë përherë vendosjen e drejtësisë për këto krime”.

Për të bërë homazhe në nderim e kujtim të tre fëmijëve që humbën jetën tragjikisht sot në Çabër ishte një delegacion i Lëvizjes VETËVENDOSJE! i prirë nga Sekretari Organizativ, Alim Rama së bashku me deputetë, aktivistë e anëtarë të Qendrës sonë në Mitrovicë, thotë VV në një njoftim në Facebook.

Ministri i Financave, Punës dhe Transfereve, Hekuran Murati, ka thënë se ka nisur programi i trajnimeve për instalues të paneleve solare.

Përmes një postimi në Facebook, Murati ka thënë se ky trajnim ka nisur në Ferizaj, ndërsa këtë drejtim do ta ofrojnë edhe Qendrat e Aftësimit Profesional në qytete tjera.

“Në Ferizaj shënuam fillimin e programit të ri të trajnimeve për Instalues të Paneleve Solare.  Bashkë me ndryshimet e kërkesave në trendet globale, duhet të përgatisim edhe fuqinë punëtore me aftësitë e nevojshme. Nga tani e tutje, me mbështetjen e UNDP-së, Qendrat e Aftësimit Profesional në Prishtinë, Ferizaj, Prizren, Mitrovicë e Gjakovë do të ofrojnë këtë drejtim për të gjithë ata që duan të bëhen pjesë integrale e një procesi transformues drejt energjisë së gjelbër. Falenderoj Drejtoreshën e APRK-së, znj. Namani Rexha, dhe shefin e zyrës së UNDP-së në Kosovë, z. Queirós, bashkë me ekipet e tyre për angazhimin në realizimin e këtij projekti”, ka shkruar Murati në Facebook.

Deputeti i Lidhjes Demokratike të Kosovës (LDK), Besian Mustafa, konsideron se raportet ndërmjet Qeverisë Kurti me Shtetet e Bashkuara të Amerikës dhe Bashkimit Evropian janë dëmtuar, raporton Ekonomia Online.

Zyrtarja e lartë e PDK-së, Vlora Citaku, ka thënë se në një kohë kur bota po përballet me sfida të mëdha, Kosovën janë duke e udhëhequr një kastë avanturierësh.

Ajo thotë se në një kohë kur kërkohet stabilitet dhe parashikueshmëri, Kosova ka një qeveri pa ide, pa vizion dhe të papërgjegjshme.

Sipas Çitakut, Kosova asnjëherë s’ka qenë në një situatë të tillë në 25 vite liri dhe thotë se zgjedhjet e parakohshme janë domosdoshmëri. Ajo thotë se Kosova është më e rëndësishme se egot e kryeministrit Albin Kurti.

Reagimi i plotë:

Në një kohë kur bota po përballet me turbulenca të mëdha, Kosova po udhëhiqet nga një kastë avanturierësh.

Në kohën kur qytetarët tanë kanë nevojë për stabilitet e parashikueshmëri, Kosova ka në krye një qeveri të papërgjegjëshme, pa ide e pa vizion.

Konfrontimet e hapura tashmë me aleatët tanë na kanë sjellur në një teren tërësisht të pashkelur nga ne tash e 25 vite.

Pa projekte konkrete e pa vizion, si në planin e brendëshëm, si në politikën e jashtme.

Mbajtja sa më parë e zgjedhjeve parlamentare tashmë është jo vetëm kërkesë, por domosdoshmëri.

Kosova është më e madhe dhe më e rëndësishme se egoja e Kurtit.

Kryeministri i Republikës së Kosovës, Albin Kurti, mbrëmë mori pjesë në shënimin e Ditës Kombëtare të Irlandës të organizuar nga Ambasada e Irlandës në Kosovë. Në po të njëjtën ditë Irlanda feston edhe festën e Shën Patrikut, i cilësuar ndryshe si shenjtori mbrojtës i shtetit të Irlandës.

Në këtë festë të dyfishtë, duke e cilësuar si një nderë të madh që ndodhet aty për të festuar, Kryeministri Kurti u shpreh se Kosova dhe Irlanda kanë pasur gjithmonë marrëdhënie miqësore që nga shpallja e pavarësisë së Republikës së Kosovës. Ai nënvizoi faktin që Irlanda ishte ndër vendet e para që njohu shtetin dhe shtetësinë tonë, qysh dymbëdhjetë ditë pas shpalljes së pavarësisë.

Kryeministri Kurti e cilësoi fuqizimin e marrëdhënieve dypalëshe ndërmjet Kosovës dhe Irlandës si një nga bekimet e vitit 2024. Në më pak se dy muaj u realizuan dy vizita shtetërore bilaterale. Fillimisht vizita e Kryeministrit të Irlandës, Leo Varadkar në Prishtinë më 10 janar, dhe vizita e Kryeministrit Kurti në Dublin më 29 shkurt dhe 1 mars. Në këto takime, kryeministri veçoi se janë pajtuar që ta intensifikojnë bashkëpunimin në një numër fushash, sidomos në sektorin e teknologjisë, për të mirën e qytetarëve të të dy vendeve.

“Ne në Kosovë e vlerësojmë dhe e çmojmë partneritetin tonë me Irlandën”, tha kryeministri. Ai shtoi se në një kohë kur kërcënimet e terrorizmit dhe agresioni në rajon janë në rritje, integrimi i Kosovës në institucionet Euro-Atlantike është më i rëndësishëm se asnjëherë më parë për paqen, sigurinë dhe të drejtat e njeriut në Ballkanin Perëndimor. Në këtë drejtim, kryeministri iu shpreh veçanërisht mirënjohës kryeministrit irlandez, Varadkar për mbështetjen e tij të zëshmen për aplikimin tonë për anëtarësim në Këshillin e Evropës dhe Bashkimin Evropian.

Në fjalën e tij para të pranishmëve, ai gjithashtu foli edhe për historinë e rëndësishme të Ditës së Shën Patrikut.

Lidhja Demokratike e Kosovës (LDK), ka akuzuar Qeverinë Kurti për numrin e lartë të kontratave njëburimore. Sipas LDK-së, dikastere të ndryshme kanë dhënë 780 kontrata të tilla në vlerë prej 209 milionë euro, raporton Ekonomia Online.

Me këtë rast, LDK-ja ka ftuar Prokurorinë e Shtetit që t’i hetojë këto kontrata.

Deputeti i Lidhjes Demokratike të Kosovës (LDK), Besian Mustafa, ka deklaruar se vlera totale e këtyre kontrata kapin shifrën e 209 milionë euro.

“Vetëm 2,5 % të këtyre kontratave janë si vazhdim i kontratave të mëhershme. 97.5% e tyre janë të reja, të kësaj Qeverie. Këto janë kontratat ku nuk lejohet konkurrenca e lirë, negocimi bëhet në katër sy nga zyrtarët e ministrisë apo vetë ministrat dhe përfaqësuesit e kompanisë. Të enjten, kemi ftuar seancë të jashtëzakonshme për këtë temë. Të zënë ngushtë dhe të paaftë për ballafaqim edhe ministrat e deputetët e VV-së lëshuan sallën”, tha Mustafa në konferencën për media të shtunën.

Mustafa ka paraqitur kontratat që secila ministri i ka nënshkruar, sipas tij.

“Në Ministrinë e Ekonomisë kemi për këtë periudhë 151 kontrata të tilla në vlerë 124 milionë e 606 mijë euro. Në MPB kemi 33 kontrata të dakorduara në katër sy në vlerë 25 milionë e 772 mijë. Në MI kemi 69 kontrata me 10 milionë e 570 mijë. Në MKRS 56 kontrata në vlerë 4 milionë e 763 mijë. Në MD kemi 13 kontrata n vlerë 4 milionë e 95 mijë”, ka deklaruar ai.

Ndërsa, kontrata të tenderëve njëburimorë janë bërë në përgjithësi në nivelin qendror, ka theksuar Mustafa, teksa ka paraqitur edhe këtu shifrat e tyre.

“Në përgjithësi në nivelin qendror kemi trend të kontratave me negocim të drejtpërdrejt. Kontrata për sigurimin e objekteve në vend se të ishin kontrata me konkurrencë të lirë, kemi 74 kontrata në vlerë 9 milionë e 539 mijë. Kontrata për ekspertë apo konsulentë 35 kontrata, 1 milion e 464 mijë. Kontrata për vetura me qira, katër kontrata 434 mijë”, ka theksuar ai.

E anëtari i kryesisë, Visar Azemi, tha se Korporata Energjetike e Kosovës është burimi më i madh i kontratave njëburimore. Sipas tij, aty janë dhënë 106 kontrata të tilla në vlerë prej 100 milionë euro.

“Për tri vite i dha 781 tenderë me negocim të drejtpërdrejtë vlera e të cilëve është plot 209 milionë euro. Pa asnjë procedurë konkurruese e tenderuese iu kanë dhënë tenderë dhe kontrata është interesante se ndër vite ka shkuar duke u rritur kjo vlerë pra duke filluar me 30 milionë euro në vitin e parë, ka ikur vlera në 70 milionë euro në vitin e dytë për të përfunduar në 119 milionë euro në vitin e tretë por ko masakër financiare ka ndodhur me të madhe në KEK. Për ta kuptuar më mirë se këto kontrata njëburimore janë mekanizëm për hajninë nga ky pushtet mjafton të shihni se nga 200 milionë euro që janë vjedh në tenderë me negocim rreth 100 milionë euro janë dhënë vetëm nga KEK-u, pra gjysma e këtyre tenderëve dhe shumës janë dhënë nga KEK-u, pra janë 106 kontrata njëburimore”, u shpreh Azemi.

“Në këtë ndërmarrje kryeshefi i secilës Nagip Krasniqi u arrestua dhe është në paraburgim si i dyshuar për keqpërdorim dhe korrupsion 13 tenderë me negocim direkt janë dhënë vetëm një biznesi. Një biznes tjetër i vetëm veç muhabet pa procedurë e konkurrencë ka përfituar 15 milionë euro vetëm për një tenderë se gjithë kjo është një tentim për ta mbuluar hajninë dhe korrupsionin e kësaj Qeverie e tregon më së miri fakti se kush po përfiton më së miri nga këto tenderë”, tha tutje Azemi.

Një sindikatë që përfaqëson shumë shoferë gjermanë të trenave dhe operatori kryesor kombëtar hekurudhor kanë rifilluar negociatat në një mosmarrëveshje të ashpër mbi orët e punës dhe pagat dhe janë optimistë se do të arrijnë një rezultat javën e ardhshme, ka bërë të ditur të shtunën kompania shtetërore.

Sindikata GDL ka thirrur shoferët e Deutsche Bahn në grevë në mënyrë të përsëritur në mosmarrëveshjen që ka zgjatur për muaj të tërë. Një largim të martën përkoi me një grevë të ekuipazhit të kabinës në Lufthansa në një mosmarrëveshje të veçantë, duke shtuar përçarje për udhëtarët, raportoi AP.

Pika kryesore e mosmarrëveshjes është kërkesa e GDL që orari i punës të reduktohet nga 38 në 35 orë në javë, pa ulje page. Disa operatorë më të vegjël privatë që operojnë shërbime rajonale kanë rënë dakord me kërkesën.

Në një përpjekje të mëparshme për të bashkuar të dy palët, ishte ofruar një reduktim nga 38 në 36 orë pune në javë deri në vitin 2028, por detajet e propozimit të tyre nuk e kënaqën GDL-në.

Të shtunën, Deutsche Bahn ka thënë se tani ka rifilluar bisedimet me sindikatat, të cilat i përshkroi si “intensive, por konstruktive”.

“U arrit një mirëkuptim për shumë çështje. Të dyja palët janë të sigurta se do të jenë në gjendje të arrijnë një marrëveshje në javën e ardhshme. GDL do të përmbahet nga greva të mëtejshme deri atëherë”, thuhet në një deklaratë të Deutsche Bahn.

Bashkimi Evropian kërkon që në Serbi të sigurohet liria e shprehjes si e drejtë themelore dhe të mos dënohen ata që protestojnë kundër madhërimit të kriminelëve të luftës.

Kështu tha zëdhënësja e Komisionit Evropian për çështje të zgjerimit, Ana Pisonero, në një përgjigje për Radion Evropa e Lirë lidhur me dënimin me burg të një aktivisteje në Serbi për shkak se kishte hedhur vezë në një mural të gjeneralit Ratko Mlladiq, i dënuar nga Tribunali i Hagës për krime lufte dhe gjenocid.

“Drejtësia duhet të sigurojë përgjegjësi për krimet e luftës, e jo të dënojë ata që protestojnë kundër madhërimit të kriminelëve të luftës”, tha Pisonero.

“Liria e shprehjes është e drejtë themelore në BE, e cila duhet të mbrohet. Çfarëdo mase e heqjes së lirisë apo çfarëdo sanksionimi penal duhet të jetë i justifikuar dhe proporcional. Një masë e tillë e vendosur në bazë të shprehjes së qëndrimeve politike është problematike dhe i nënshtrohet kufizimeve të prera sipas nenit 10 të Konventës Evropiane për të drejtat e njeriut”, shton ajo.

Aktivistja Aida Qoroviq me kolegen e saj, Jelena Jaqimoviq, ishin arrestuar në Serbi në ditën që shënon luftën kundër fashizmit sepse kishin hedhur disa vezë në një mural kushtuar të dënuarit për krime lufte, Ratko Mlladiq.

Kjo aktiviste ishte dënuar fillimisht me 850 euro gjobë që është dashur ta paguajë deri me 14 dhjetor të vitit 2023. Në vendimin e gjykatës thuhej se Aida Qoroviq e kishte shkelur ligjin për rendin publik sepse “kishte hedhur vezë në drejtim të një ndërtese banimi”, dhe se kishte fyer policët kur ata po zbatonin detyrat e tyre.

Qoroviq tha për Radion Evropa e Lirë më 14 mars se ka një afat prej tetë ditësh gjatë së cilit duhet të lajmërohet për të kryer dënimin në burgun “Padinska skela”, ku do të duhej të qëndrojë për tre muaj.

Bashkimi Evropian disa herë ka tërhequr vërejtjen se në Serbi edhe nga niveli më i lartë, vihen në dyshim krimet e luftës, madhërohen kriminelët dhe mohohet gjenocidi. Blloku evropian po ashtu ka thënë se një sjellje e tillë nuk është në përputhje me synimin e shprehur nga Serbia se dëshiron të integrohet në BE dhe as me frymën e ndërtimit të raporteve të mira ndërfqinjësore në rajon./REL/