Qeveria e Kosovës ka miratuar Projekt-udhëzimit Administrativ për Parandalimin dhe Ndalimin e Formave të Rrezikshme të Punës së Fëmijëve në Kosovë, raporton Ekonomia Online.
Ministrja e Drejtësisë, Albulena Haxhiu ka thënë se në këtë udhëzim administrativ specifikohet në mënyrë të qartë punët të cilat janë të rrezikshme për fëmijët dhe sektorët që atyre iu ndalohet që të punojnë.
“Specifikon në mënyrë të qartë të gjitha format e rrezikshme të punës të cilat janë të ndaluara për fëmijët dhe nuk e rrezikojnë shëndetin e tyre. Ky udhëzim administrativ adreson punët që konsiderohen e rrezikshme si në vijim: puna gjatë orarit të natës, ngritja dhe bartja e peshave të rënda, puna në thellësi nën sipërfaqet e tokës, ekspozimi në temperaturat ekstreme, ekspozimi ndaj radio aktivitetit… Sektorët me rrezikshmëri të lartë në të cilët ndalohet puna e fëmijëve që janë specifikuar në këtë udhëzim administrativ janë puna në eksploatimin e pasurive natyrore, punë në deponi të mbeturinave, puna në hoteleri, klubeve të natës, lojëra të fatit…”, ka thënë ajo.
Policia në Ferizaj ka shqiptuar 5 mijë e 551 gjoba për kundërvajtje gjatë muajit mars, ndërsa ka hequr 112 patentë shoferë për drejtuesit që kanë shkaktuar kundërvajtje më të rënda në komunikacion, ku parashihet masa mbrojtëse heqje e patentë shoferit.
Disa nga kundërvajtjet e shkaktuara në komunikacionin rrugor:
– Tejkalim i shpejtësisë, 1798 gjoba
– Mos përdorimi i rripit të sigurisë, 613 gjoba
– Përdorimi i telefonit gjatë ngasjes, 406 gjoba
Xhamat e errët , vendosja e foljes ose materialit tjetër, 206 gjoba
– Drejtimi i mjetit pa patentë shofer, 192 gjoba
– Skadimi i afatit të regjistrimit të automjetit, 148 gjoba
– Tejkalim në vijë të plotë, apo vend të ndaluar, 49 gjoba
– Kyçja e pa rregullt në rrugën kryesore, 17 gjoba
– Tejkalim i kolonës së automjeteve, 9 gjoba
– Mjetet pjesëmarrëse në trafik pa sinjalizim të duhur ndriçues, 5 gjoba
– Drejtimi i automjetit nën ndikimin e alkoolit, 4 gjoba
– Mos respektimi i këmbësorëve, 3 gjoba
– Të tjera, 2101 gjoba
“Policia Rajonale e Ferizajt do të vazhdojë me aktivitete të shtuara, me synim parandalimin e aksidenteve në komunikacionin rrugor dhe apelon tek shoferët që të bëjnë kujdes”, thuhet në njoftimin e policisë.
Qeveria e Kosovës ka miratuar Marrëveshjen Kornizë Ushtarake ndërmjet Qeverisë së Republikës së Kosovës dhe Qeverisë së Republikës së Turqisë.
Ministri i Mbrojtjes Ejup Maqedonci, ka thënë se kjo marrëveshje parasheh ndër të tjera bashkëpunimin me Turqinë në stërvitje dhe edukim ushtarak, shkëmbim të inteligjencës ushtarake, operacione paqeruajtëse dhe humanitare.
“Kjo marrëveshje parasheh bashkëpunimin në këto fusha, stërvitje dhe edukim ushtarak, shkëmbim të inteligjencës ushtarake, operacione paqeruajtëse dhe humanitare”, ka thënë ai.
Një Raphael Varane “i shkatërruar” ka folur për tronditjet në kokë në futboll, me yllin e Manchester United që e ka këshilluar të birin e tij që mos ta godasë topin me kokë.
Varane, i cili ka pësuar tronditje në kokë në ndeshjet me Kombëtaren e Francës dhe Real Madridin, theksoi mungesën e të kuptuarit rreth lëndimeve të kokës në futboll, raporton KosovaPress.
Ai tregoi incidente specifike, të tilla si gjatë ndeshjes së Francës në Kupën e Botës 2014 kundër Nigerisë, ku luajti gjatë gjithë ndeshjes pavarësisht se pësoi një tronditje. Varane zbuloi se si ai luajti në modalitetin “autopilot” pas incidentit, duke theksuar rreziqet e mosnjohjes dhe trajtimit të menjëhershëm të lëndimeve në kokë.
Në një intervistë me “L’Equipe”, Varane tha:
“Unë e mbarova ndeshjen por unë isha në modalitetin ‘autopilot’. Nëse dikush do më fliste asokohe, nuk e di nëse do të isha i aftë të ktheja përgjigjen”.
Sidoqoftë, ai nuk guxoi të mungoj në çerekfinalen e Kupës së Botës kundër Gjermanisë, të cilën Franca e humbi 1:0.
“Nuk isha në gjendje normale kështu që po më monitoronin. Kisha humbur peshë sepse isha i dehidratuar, nuk isha në formën më të mirë por luajta sepse ishte një çerekfinale e Kupës së Botës”, tha Varane.
Varane ka pasur probleme të tilla edhe te United, klub ky i cili ua ka ndaluar lojtarëve ta godasin topin më shumë se 10 herë me kokë në stërvitje, gjë kjo e cila nuk mund të kontrollohet më pas në një ndeshje zyrtare. Kjo e ka shtyrë Varanen që ta paralajmërojë të birin e tij shtatë vjeçar që mos ta godasë topin me kokë.
“Djali im shtatë vjeçar luan futboll, dhe unë e kam këshilluar që të mos e godasë topin me kokë. Edhe nëse nuk shkakton traumë të menjëhershme, e dimë që në aspektin afatgjatë, tronditjet e shpeshta do të kenë efekte negative. Nuk e di nëse do të jetojë 100 vite, por e di se e kam shkatërruar trupin tim. Si futbollistë që luan në nivelin më të lartë, ne jemi të mësuar me dhimbje, jemi më shumë si ushtarë, djem të fortë, simbol i forcës fizike, por këto simptoma janë gati të padukshme”, tha Varane.
Kryeministri i Kosovës, Albin Kurti në mbledhjen e qeverisë të mbajtur të martën ka thënë se për herë të parë në procesin e regjistrimit të popullsisë do të jetë edhe një formular në të cilin do të mund të regjistrohen dëmet e shkaktuara gjatë luftës, raporton Ekonomia Online.
Ai ka përmendur edhe funksionalilzimin e Institutit për Dokumentimin e Krimeve të Luftës, për të cilin tha se janë hapur edhe pozita të reja të punës. Me këtë rast, ai ftoi qytetarët që të aplikojnë për këtë konkurs dhe të dorëzojnë dëshmitë e tyre në këtë Institut.
“Në për ditë i kujtojmë sakrificat e këtyre familjeve. Në mbledhjen e kaluar për të dokumentuar me saksi të gjitha kurimet me qenë se shpeshherë kemi shpërputhje të të dhënave, kemi funksionalizuar Instituti për Dokumentimin e Krimeve të Luftës për të cilin tashme janë hapur 25 pozita, atëherë ju bëjë thirrje ekspertëve që të aplikojnë. Krahas thirrjes për të deponuar dëshmi, i bëjë thirrje qytetarë që të përgjigjen pozitivisht thirrjes për regjistrim të popullsisë. Për herë të parë në regjistrim e popullsisë është përfshirë formulari për regjistrimin e dëmeve të luftës”.
“Ky regjistrim që fillon të premten do të na siguroj edhe një evidencë të se kaluarës. Kemi mundësuar gjykimin në mungesë të kriminelëve të luftës. I bëjë thirrje sistemit të drejtësisë për adresim me urgjencë i krimeve të kryera gjatë luftës, me kalimin e kohës jemi duke i humbur dëshmitarët”, ka thënë ai.
Kryeministri i Kosovës, Albin Kurti, i ka bërë thirrje sistemit të drejtësisë që të adresojnë me urgjencë krimet e luftës.
Ai para kabinetit qeveritar, në mbledhjen e së martës, tha se krimet e luftës asnjëherë nuk vjetërsohen, por sipas tij është e rëndësishëm që të njëjtat të adresohen sa më shpejtë, pasi dëshmitarët po vjetërsohen dhe po vdesin.
Kurti bëri të ditur se vetëm gjatë tre muajve të parë të këtij viti policia e Kosovës ka intervistuar 169 dëshmitarë të krimeve të luftës.
“Për të dokumentuar me saktësi të gjitha krimet, meqenëse shpeshherë kemi shpërputhje të të dhënave nga burime të ndryshme, kemi funksionalizuar Institutin e krimeve të kryera gjatë luftës në Kosovë, për të cilën tashmë janë hapur 25 pozita…Me strukturën e re të miratuar tashmë në Policinë e Kosovës e kemi ngritur në nivel të drejtorisë së hetimeve të krimeve të luftës me 41 hetues. Pra më shumë se qind për qind ngritje e zyrtarëve përkatës. Derisa gjatë vitit 2023 hetuesit e krimeve të luftës i kanë intervistuar 191 dëshmitarë me rritjen e numrit të hetuesve vetëm në këta muajt e parë të vitit 2024 janë intervistuar 169 dëshmitarë të krimeve të luftës. Kemi mundësuar gjykimin në mungesë të krimeve të luftës, gjatë këtij mandati kemi bërë ndryshimet e nevojshme ligjore që kriminelët e luftës të përballen me drejtësi. Andaj nga këtu i bëj thirrje sistemit të drejtësisë për adresim me urgjencë për rastet e krimeve të kryera gjatë luftës. Këto krime nuk vjetërsohen, por dëshmitarët janë gjithnjë edhe më të moshuar”, tha ai.
Krahas kësaj, Kurti bëri thirrje qytetarëve që të përgjigjen pozitivisht regjistrimit të popullsisë, që pritet të fillojë me 5 prill.
“Krahas thirrjes për të deponuar sa më shumë dëshmi për krimet e kryera kudo në Kosovë, në institutin e themeluar, i bëj thirrje qytetarëve të Kosovës që t’i përgjigjen pozitivisht regjistrimit të popullsisë. Nuk kemi mangësi vetëm te shpërputhja e të dhënave, por edhe mungesa e tyre. Për herë të parë në këtë regjistrim të popullsisë është përfshirë edhe pyetësori i dëmeve nga lufta 1998-1999 në ekonomitë familjare…Ky regjistrim që fillon të premten me datë 5 prill, përveç që do të na jep një pasqyrë të së tashmes do të na siguroj edhe një evidencë të së kaluarës. Të mos kemi të dhëna të ndryshme për fakte të njëjta dhe mos të keni mungesë të dhënave për ato që i dina sepse i kemi jetuar dhe familjarët vazhdojnë t’i vuajnë edhe sot e kësaj dite”, përfundoi ai.
Zëdhënësi i Bashkimit Evropian (BE), Peter Stano, ka thënë të martën se Kosova duhet ta zbatojë urgjentisht detyrimin shumëvjeçar për themelimin e një Asociacioni të komunave me shumicë serbe në vend dhe paralajmëroi se ajo do të përballet me pasoja në rrugën e saj drejt BE-së, nëse dështon ta bëjë këtë.
Ai tha se themelimi i Asociacionit është detyrim për Kosovën dhe “kjo është përsëritur disa herë nga Bashkimi Evropian në nivelin më të lartë, atë të liderëve evropianë”.
Kosova dhe Serbia arritën marrëveshje për Asociacionin më 2013 dhe më pas më 2015 mbi parimet për themelimin e tij.
Por, më 2015, Gjykata Kushtetuese e Kosovës gjeti se marrëveshja nuk është në harmoni të plotë me Kushtetutën.
Në fund të vitit të kaluar, bashkësia ndërkombëtare ua paraqiti palëve një draft për statutin që do të kishte ky asociacion. Palët, fillimisht, thanë se e pranojnë në parim, por nuk kanë bërë asnjë hap përpara.
Stano e përsëriti se themelimi i Asociacionit lidhet me përparimin e Kosovës në synimin e saj për t’u bërë pjesë e bllokut.
“Nëse Kosova nuk është në gjendje të japë rezultate në këtë drejtim, atëherë nuk do të shihet si sinjal pozitiv se ajo dëshiron të lëvizë në rrugën drejt normalizimit të marrëdhënieve [me Serbinë], që tash është i lidhur me përparimin e Kosovës në rrugën drejt BE-së”, shtoi ai.
Bashkimi Evropian, Shtetet e Bashkuara të Amerikës dhe Britania e Madhe vazhdojnë të ngulin këmbë se Kosova është e detyruar ta themelojë Asociacionin.
Stano theksoi se çështja e themelimit të Asociacionit vazhdimisht diskutohet në takimet me palët.
Megjithatë, ai tha se në takimin e kësaj javë në nivel të kryenegociatorëve të Kosovës dhe Serbisë, çështja kryesore do të jetë gjetja e një zgjidhjeje për dinarin e ndaluar serb në Kosovë.
Ai tha se bisedimet e javës së kaluar shënuan përparim dhe se ato do të vazhdojnë të enjten e 4 prillit në Bruksel.
Përdorimi i dinarit për pagesa me para të gatshme në Kosovë u ndalua më 1 shkurt, kur Banka Qendrore e Kosovës e futi në fuqi një rregullore të re e cila përcaktoi euron si valutën e vetme zyrtare në vend.
Kjo çështje, pos që zemëroi Serbinë, nxiti mospajtime edhe mes Qeverisë së Kosovës dhe bashkësisë ndërkombëtare, pasi komuniteti serb në Kosovë, prej vitesh, merr pagesa në dinarë nga buxheti i Serbisë.
Diplomatë perëndimorë i kërkuan Kosovës që ta pezullojë rregulloren, për t’iu dhënë kohë qytetarëve të prekur që të përshtaten me praktikën e re. /REL/
“Pa luftë këta kurrkushi s’kishin qenë, mësuesa e badigarda”, ka qenë deklarata e aktorit Enver Petrovcit, e cila ka ngjallur reagime të shumta në publik.
Aktori Petrovci është shfaqur i përlotur derisa po tregonte një histori me një ushtarë të UÇK-së.
“Jam plakë, jam ligë”, thotë Petrovci, derisa shton se deklarata e tij është nxjerrë nga konteksti.
“Tash edhe po më godasin, kur se kam përmend aty UÇK-në, hiç, hiç, hiç. Edhe besom, askush 99 për qind të këtyre, e kam parë përmes shikimeve, asnjëri prej këtyre 99 për qind se kanë parë origjinalin”, ka thënë Petrovci në Top Channel.
Aktori Enver Petrovci në emisionin “Show i së Premtës me Adelina Ismajlin”, ka përdorur gjuhë përçmuese ndaj ish-udhëheqësve të UÇK-së, teksa thuri lëvdata për Kryeministrin Albin Kurti.
Sipas Petrovcit, Kurti ka lexuar libra që nga mosha dy-tre vjeçare, ndërsa për ish-udhëheqësit tjerë të shtetit thotë se erdhën rastësisht në shprehje duke u shprehur – sipas aktorit – se “lufta i ka bërë këta”.
“Unë menoj se Albini është ai që është, e nuk është mirë. Sepse Albini s’fulliratë hiç. Ky është ky që është. Kshtu mendoj, kështu mendoj. Ky është shumë i meçëm, jom i sigurt ma shumë ka lexu ky se sa krejt parlamenti bashkë. Ai nuk lexon tash se është bë Kryeministër. Ky ka lexu prej kur është dy vjeç e gjysmë. Nejse mos ta teproj. Kur i ka bë gjashtë vjeç. Këta tjertë i ka lind koha. Lufta i ka ba këta. Këta kurgjo s’kishin qenë, po mos të kishin qenë në luftë. Kishin qenë do mësuesa do badigarda. Kurgjo s’kishin qenë hiç. Kishin kalu afër nesh… në televizion s’kishin mujt me hi. Këta i ka bë koha. Albini u bë vetë” – ka thënë Petrovci.
Ish-kryeministri i Malit të Zi, Dritan Abazoviq ka deklaruar se Bashkimi Evropian duhet ta ndryshojë qasjen në ndërmjetësimin e dialogut ndërmjet Kosovës dhe Serbisë. Ai në një intervistë për ‘Euroactiv’ ka thënë se “BE-ja duhet të jetë më konkrete”.
“Nëse e kemi gjithmonë këtë lloj politike shumë të butë, do të flasim për të njëjtën gjë edhe pas 10 apo 20 vitesh. Kjo është një fatkeqësi sepse ne kemi humbur tashmë 20 vjet”, tha Abazoviq.
Ai ka shfaqur besimin se Kosova dhe Serbia “duan të shohin një marrëveshje përfundimtare” dhe “të tregojnë se ne nuk jemi më një rajon konflikti, por një rajon mirëkuptimi”.
Megjithatë, Abazoviq, ka pranuar se ajo nuk do të jetë e lehtë për t’u arritur.
Ndërkaq, duke folur për votën kundër të Malit të Zi ndaj anëtarësimit të Kosovës në KiE, në Komisionin për çështje politike dhe demokraci në Asamblenë Paralamentare të Këshillit të Evropës, Abazoviq theksoi se ky zhvillim është një ‘realitet i ri’.
Abazoviq tha se vota kundër Kosovës në KiE do të ishte “e pamundur nën mandatin e tij”.
“Ne ishim shumë të qartë në politikën tonë të jashtme. Ajo ishte 100% e harmonizuar me politikën e jashtme të Bashkimit Evropian”, tha tutje ai.
Në lidhje me zgjerimin e BE-së, Abazoviq tha se integrimi i Ballkanit Perëndimor është kyç.
“Nuk është diçka që është një favor për ne; por investim në sigurinë dhe të ardhmen e Evropës dhe të kujtdo që dëshiron ta shohë Evropën si një superfuqi – një Evropë e bashkuar me të gjitha vendet tona”, shtoi Abazoviq.
Aleanca Veri-Atlantike NATO ka realizuar një dokumentar me sfidat dhe sukseset përgjatë 75 viteve të ekzistencës së saj.
NATO si aleanca më e suksesshme politiko-ushtarake në botë, përgjatë 75 viteve, ka arritur të përballojë sfidat, të zgjerojë rolin dhe misionin e saj dhe madje të rritet ndjeshëm në përmasa.
Nga dita e themelimit në 1949 deri në përforcimin e Evropës Lindore në 2022, ky dokumentar eksploron momentet që përcaktojnë Organizatën sot, përmes syve dhe përvojave personale të njerëzve që kanë parë këto momente kryesore nga perspektiva unike e brenda sa , si ish-stafi i NATO-s.
Aty përmendet se gjatë Luftës së Ftohtë, NATO e pengoi me sukses Bashkimin Sovjetik nga agresioni kundër Evropës Perëndimore. Në vitet 1990, NATO ndihmoi për t’i dhënë fund konflikteve etnike në Ballkanin Perëndimor, dhe kur Rusia nisi pushtimin e saj brutal, në shkallë të plotë të Ukrainës në vitin 2022, NATO dërgoi trupat në Evropën Lindore, duke siguruar aleatët për sigurinë e tyre, ndërsa pengonte agresionin e mëtejshëm nga Rusia.
Ndër misionet e suksesshme të intervenimit të NATO-s përmendet edhe ndërhyrja në Kosovë për të parandaluar gjenocidin e vazhdueshëm të kryer kundër popullit të Kosovës. Aty potencohet se misioni paqeruajtës në kuadër të NATO-s, KFOR sot vazhdon të ofrojë siguri për të gjithë qytetarët e Kosovës.
Njëzet e katër marsi i sivjetmë shënoi 25-vjetorin e fillimit të sulmeve ajrore të Organizatës së Traktatit të Atlantikut Verior, e njohur gjerësisht si NATO, kundër objektivave ushtarake dhe policore jugosllave në territorin e Kosovës, raporton gazeta online Reporteri.net.
Bombardimet e aleancës ushtarake perëndimore ndaj Jugosllavisë, që përbëhej nga Serbia dhe Mali i Zi, nisën pas dështimit të negociatave të vitit 1999 për zgjidhjen e konfliktit në Kosovë, teksa pala serbe refuzoi nënshkrimin e një marrëveshjeje për paqe në Rambuje.
Bombardimet, që zgjatën 78 ditë, u ndërprenë më 10 qershor 1999, me miratimin e Rezolutës 1244 të Këshillit të Sigurimit të Kombeve të Bashkuara, që parashihte administrimin e Kosovës nga një mision i OKB-së.
Ndërhyrja e NATO-s në Kosovë mundësoi edhe kthimin e më shumë se 800 mijë refugjatëve në shtëpitë e tyre.
Intervenimi i NATO-s shënoi fillimin e fundit të regjimit serb mbi Kosovën.
Vite më vonë, më 17 shkurt 2008, shpalli pavarësinë e saj.
Aktualisht, në Kosovë janë rreth 4.700 trupa të NATO-s, përfshirë forcën rezervë, në kuadër të misionit paqeruajtës, KFOR./Reporteri.net/
