ATV

Blog

  • 25 vjet nga masakra e Rezallës

    25 vjet nga masakra e Rezallës

    Sot mbushen 25 vjet nga masakra në Rezallës së Skenderajt, ku ushtria dhe policia serbe ekzekutoi 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.

    Një pjesë e trupave u gjenden në Rudnicë të Rashkës dhe iu dorëzuan familjarëve. Më 5 prill 1999 serbët rrethuan shtëpitë e këtyre familjeve dhe pushkatuan pothuajse të gjithë burrat dhe djemtë e rinj.

    Nga masakra serbe në Rezallë kanë shpëtuar vetëm tre persona. Kjo masakër konsiderohet si një ndër masakrat më të pamëshirshme gjatë luftës në Kosovë.

  • Sot fillon regjistrimi i popullsisë, ja çfarë duhet të dinë qytetarët

    Sot fillon regjistrimi i popullsisë, ja çfarë duhet të dinë qytetarët

    Agjencia e Statistikave të Kosovës sot nis procesin e regjistrimit të popullsisë në vend, e cila do të zgjasë deri më 17 maj. Pjesëmarrja në regjistrim kërkohet me ligj, teksa në rast refuzimi mund të penalizohen në shumën nga 30 euro-2.000 euro për person.

    ASK ka bërë të ditur se informacioni i mbledhur gjatë regjistrimit të popullsisë do të shërbejë si bazë për vendimmarrje kritike, që prek çdo aspekt të jetës, nga kujdesi shëndetësor, arsimi, zhvillimi i infrastrukturës e deri te ndarja e burimeve dhe planifikimi i politikave.

    Por, çfarë duhet të dinë qytetarët rreth projektit të regjistrimit të popullsisë ReKos 2024?

    Për t’u siguruar që qytetarët të kenë qasje për projektin e regjistrimit të popullsisë dhe të jenë të përgatitur mirë për disa detaje më specifike nga fushat kryesore, më poshtë janë dhënë disa sqarime për qytetarët. Ky informacion synon të ndihmojë në bërjen e procesit sa më të qartë dhe gjithëpërfshirës.

    Qëllimi i regjistrimit

    Regjistrimi ndihmon në kuptimin e ndryshimeve demografike, planifikimin e shërbimeve publike si: shkollat dhe spitalet, ofrimin e shërbimeve të ndryshme nga komunat, transportin, ndarjet buxhetore, ndarjen dhe kufizimet e personelit shtetëror në një zonë ose komunë, si dhe për planifikimet në të ardhmen. Është thelbësore për formësimin e së ardhmes së komuniteteve dhe kombit. Një Regjistrim i saktë siguron përfaqësim dhe shpërndarje të drejtë të fondeve qeveritare.

    Data dhe kohëzgjatja e regjistrimit të popullsisë

    Regjistrimi i Popullsisë fillon më 5 prill dhe pritet të përfundojë më 17 maj 2024. Nga data 5 prill deri më 10 prill 2024 punonjësit (regjistruesit) e regjistrimit do t’i vizitojnë zonat tuaja të banimit dhe banesat/shtëpitë më shumë për t’i shpërndarë materialet si: fletëpalosjen, letrën informuese dhe për t’u njoftuar me Zonën Regjistruese. Gjatë kësaj periudhe mund të zhvillohet ndonjë intervistë me ndonjë ekonomi familjare. Nga data 10 prill 2024 do të fillojë regjistrimi i përgjithshëm.

    Si të merrni pjesë? Personalisht: intervista duhet të zhvillohet në objektin e banimit të ose në afërsi  të banesës/shtëpisë së respodentit (qytetarit). Intervista mund të zhvillohet në: banesë/shtëpi, hyrje, korridor, në një lokal afër banesës/shtëpisë, nëse ka një kopsht, terasë, ballkon ose vende të ngjashme.

    Sa zgjatë intervista?

    Varësisht prej numrit të anëtarëve të ekonomisë familjare, moshës dhe gjinisë, pritjet janë që intervista në një ekonomi familjare me 4 anëtarë të zgjasë rreth 30 minuta.

    Kush duhet t’i jep të dhënat?

    Të dhënat rekomandohet të merren nga secili anëtarë i moshës madhore (mbi 16 vjet) nëse ata/ato janë të pranishëm gjatë intervistës. Në raste të tjera, një anëtar i ekonomisë familjare mund t’i jep të dhënat.

    Si zhvillohet intervista?

    Intervista zhvillohet ballë për ballë. Pasi të jetë prezantuar regjistruesi, duke ju informuar mbi qëllimin e regjistrimit dhe çfarë do të regjistrohet, përcaktohet vendi dhe zhvillohet intervista.

    Me çfarë pajisje grumbullohen të dhënat?

    Të dhënat grumbullohen përmes tabletëve.

    A mund të kem qasje se si po plotësohen pyetjet?

    Gjate plotësimit të pyetjeve, respodenti (qytetari) mund të shikojë se si po plotësohen të gjitha fushat në aplikacion, si dhe mund ta shikojë çdo përgjigje që jep.

    Si identifikohen punonjësit e regjistrimit?

    Regjistruesit janë të pajisur me një jelek identifikues, çantë, ID dhe Autorizim.

    Informacioni i kërkuar në regjistrim

    Pyetjet e zakonshme që parashtrohen në Regjistrim janë aplikuar edhe në ReKos 2024. Pyetësorët janë në harmoni me rekomandimet ndërkombëtare, duke përfshirë rekomandimet nga UNECE dhe Eurostat. Pyetësorët e regjistrimit janë publikuar në ueb faqen e ASK-së dhe secili qytetar ka qasje për pyetjet që do të parashtrohen për qytetarët. Për qasje më të detajuar rreth Regjistrimit dhe për t’u informuar, luteni ta vizitoni ueb faqen e Agjencisë së Statistikës së Kosovës: https://ask.rks-gov.net/Rekos

    Kush regjistrohet?

    Të gjithë qytetarët, që në periudhën ndërmjet 5 prillit deri më 17 maj 2024 qëndrojnë në Kosovë duhet të regjistrohen. Më pas, ASK-ja në bazë të kriterit të popullsisë së zakonshme rezidente do ta bëjë klasifikimin e personave rezidentë dhe jo rezidentë (gjatë kësaj periudhe mund të ketë numër të caktuar që regjistrohen, por që mund të jenë: turistë, punëtorë me punë te përkohshme nga shtetet e tjera, vizitë, ndonjë aktivitet kulturor a sportiv, kryesisht nga shtetet e tjetra).

    Regjistrimi i diasporës

    Për popullsinë e lindur në Kosovë ose kanë prejardhje nga Kosova, por që jetojnë jashtë Kosovës për më shumë se 12 muaj (ka një vendbanim-shtetet tjetër rezident) ata regjistrohen përmes një aplikacioni online (www.ediaspora.rks-gov.net) gjatë gjithë periudhës së Regjistrimit.

    Në çfarë gjuhe zhvillohet intervista?

    Intervista zhvillohet në gjuhën që e flasin komunitetet. Në ReKos 2024 gjuhët në program/aplikacion që do të mund të parashtrohen pyetjet janë: shqip, serbisht, anglisht dhe turqisht.

    Dokumentacioni i nevojshëm

    Nuk nevojiten dokumentet për t’i verifikuar disa përgjigje që kërkohen në pyetësor, si: pronësia, qiraja, verifikimi i adresës ose të ardhurat. Meqenëse numri personal duhet dhënë për çdo anëtar të familjes është mirë që të përgatiten më parë (skanohen ose printohen) numrat personal të çdo anëtari të familjes. Numri personal gjendet në pasaportë, letërnjoftim si dhe në ekstraktin e lindjes (ekstrakti mund të shkarkohet pa pagesë në eKosova).

    A duhet të jepen të dhënat e plota dhe të sakta?

    Të dhënat që kërkohen në pyetësor për te gjitha fushat janë obligative të plotësohen dhe në bazë të Ligjit për Regjistrimin e Popullsisë, të dhënat duhet të jenë të sakta, pasi ato do të verifikohen nga burimet e tjera dhe çdo mospërputhje mund të jetë pjesë për ndëshkim.

    Mosdhënia e të dhënave të sakta është vepër e dënueshme dhe dënimi është nga 30 euro deri 2.000 euro.

    Në cilat pyetje mund të mos përgjigjem?

    Në pyetjet rreth: përkatësisë etnike, religjionit dhe gjuhës që flisni mund të mos jepni përgjigje dhe nuk ka dënime.

    Privatësia dhe konfidencialiteti Të dhënat tuaja personale janë të mbrojtura me Ligjin për Regjistrimin e Popullsisë, Ligjin për Statistikat Zyrtare dhe Ligjin për Mbrojtjen e të Dhënave Personale. Të dhënat do të anonimizohen dhe do të përdoren vetëm për analiza statistikore.

    Detyrimet ligjore

    Pjesëmarrja në regjistrim kërkohet me ligj. Komunikoni qartë këtë dhe refuzimi nënkupton se ju mund të penalizoheni në shumën nga 30 euro-2.000 euro për person.

  • Edhe takimi i tretë në Bruksel, pa marrëveshje për dinarin

    Edhe takimi i tretë në Bruksel, pa marrëveshje për dinarin

    Përgatiti: Haris Ademi

    As në takimin e tretë në Bruksel, të enjten, Kosova dhe Serbia nuk kanë arritur marrëveshje për çështjen e dinarit.

    Kryenegociatorët Besnik Bislimi dhe Petar Petkoviq e kanë fajësuar njëri-tjetrin për mungesë të vullnetit për të gjetur zgjidhje. Kurse ndërmjetësuesi nga Bashkimi Evropian, Miroslav Lajcak, tha se janë kapërcyer disa boshllëqe mes propozimeve të të dyja palëve. Ndërsa, do të ketë një takim të katërt, pas rreth dy javësh.

    Këtë herë, BE-ja ka dhënë një propozim të vetin, për të cilin Bislimi tha se është pajtuar vetëm Kosova.

    “Duke parë pamundësinë e arritjes së një kompromisi, Lajçak ka nxjerrë një propozim të konsoliduar, për të cilën ne besojmë se është konstruktiv dhe në rrugën e duhur për të gjetur zgjidhje, e cila më së shumti i shkon për shtati qytetarëve serbë në Kosovë, por në të njëjtën kohë respekton Rregulloren e BQK-së. Pala serbe nuk ka qenë e gatshme të reflektojë këtë propozim dhe ka kërkuar kohë shtesë”, tha Bislimi.

    Kryenegociatori kosovar, madje, e akuzoi atë serb se e luajti rolin e avokatit të Bankës Postare Serbe, duke kërkuar licencimin e saj.

    Në anën tjetër, Petkoviq tha se ishte konstruktiv.

    “Ne përsëritëm edhe një herë qëndrimin dhe propozimin tonë, i cili është i balancuar dhe nënkupton një zgjidhje kompromisi. Nga ana tjetër, nuk kishte vullnet të mjaftueshëm nga ana e Prishtinës”, tha Petkoviq.

    Takimi i ardhshëm në Bruksel, i katërti me radhë për dinarin, sipas Bislimit, do të jetë i fundit për këtë temë, prandaj duhet arritur marrëveshje. Kurse Petkoviq tha se kjo çështje do të zgjidhej, po të ishte themeluar Asociacioni i Komunave me Shumicë Serbe.

    Meqë, takimet e deritashme kanë rezultuar pa sukses, Lajcak shkroi në X se planifikon t’i vazhdojë diskutimet për rregulloren e Bankës Qendrore, bazuar në idetë e BE-së për kompromis.

  • Kryeministri, vizita të shpeshta të bashkëpartiakëve dhe injorim kryetarëve të “Opozitës”

    Kryeministri, vizita të shpeshta të bashkëpartiakëve dhe injorim kryetarëve të “Opozitës”

    Përgatiti: Fatlum Jashari

    Në vizitën e bujshme në katër komunat në veri të vendit, kryeministri Albin Kurti takoi vetëm dy kryetarët nga partia e tij.

    Ai nuk tregoi se pse nuk i takoi dy kryetarët tjerë, anëtarë të Partisë Demokratike.

    Derisa bashkëpartikëve u shkuan më shpesh, në tre vjet, në organizime e vizita të ndryshme, jo pak herë pushteti qendror la jashtë e nuk ftoi udhëheqësit lokalë.

    Pasi tregoi se këtë shqetësim e kanë diskutuar në takime me kryetarët, drejtori Asociacionit të Komunave të Kosovës, Sazan Ibrahimi, e vlerësoi të gabuar praktikën që po ndjek Qeveria.

    “Në disa raste, delegacione të ndryshme nga niveli qendror shkojnë në vizita nëpër komuna pa e njoftuar kryetarin e komunës. Dhe, më duhet të theksoj se të gjithë kryetarët e komunave, pa marrë parasysh përkatësinë e tyre partiake, e kanë vullnetin që të takohen me nivelin qendror, sepse është rast dhe mundësi e mirë për t’ia elaboruar në detaje problemet me të cilat kryetarët e komunave po ballafaqohen”, tha Ibrahimi.

    Krahas ndarjes së hises për investime, në Iniciativën për Progres përmendën rëndësinë e qartësimit të veprimeve, si kryeministër dhe kryetar partie.

    “Një vërejtje nga raporti i progresit, më konkretisht kemi pasur vërejtje si shtet në atë se granti i performancës nuk ndahet në nivelin e duhur, siç e dimë edhe granti i performancës shkon direkt për investime kapitale te komunat. Andaj nuk ka pasur ndarje të barabartë”, tha Qëndrim Ilazi nga Iniciativa për Progres.

    Teksa foli për rëndësinë e vullnetit të dyanshëm për takime, njohësi i qeverisjes lokale Qëndrim Arifi theksoi se nga mungesa e bashkëpunimit vuajnë qytetarët.

    “Historikisht është bërë ky dallim, madje jo vetëm në vizita, por edhe në shpërndarjen e mjeteve dhe investimeve që është shumë më e rëndësishme sesa një vizitë, them kështu, krejt formale. Për fat të keq këtë avaz e ka vazhduar edhe Qeveria Kurti, posaçërisht kjo vërehet me vizitën e djeshme në komunat veriore”, tha Arifi.

    Kryetarë të komunave, anëtarë të partive opozitare në pushtetin qendror, janë ankuar vazhdimisht për shpërfillje dhe ndarje jo të drejtë të buxhetit.

  • Lindja e katërnjakëve, e rrallë në Kosovë

    Lindja e katërnjakëve, e rrallë në Kosovë

    Përgatiti: Sara Shehu

    Në vitin 1996 u regjistrua një rast i lindjes së pesënjakëve nga një nënë kosovare, që ishte rasti i vetëm i tillë në Kosovë. 28 vjet pas, një rast i ngjashëm, me katërnjak, ndodhi të mërkurën, në Klinikën Obstetrike Gjinekologjike të Qendrës Klinike Universitare të Kosovës.

    Drejtori i klinikës, Zef Ndrejaj, thotë se rastet e tilla janë të rralla në vendin tonë.

    “Katërnjakët janë lindje të rralla, 1 rast në 700 mijë lindje, rasti i fundit ka qenë një pesënjak nga Vushtrria para luftës, këto janë shumë të rralla… Me binjakë dhe trinjakë kemi shpesh, p.sh. 3-4 raste, por me katërnjak s’kemi pasur vitin e kaluar… Katërnjakët kanë lindë me pesha të vogla dhe kanë mbijetu”, tha Ndrejaj.

    Më tej Ndrejaj thotë se 26-vjeçarja nga Podujeva bashkë me katërnjakët, tre djem e një vajzë, tashmë gëzojnë shëndet të mirë dhe se po vazhdojnë të jenë në mbikëqyrje të stafit mjekësor në klinikën e Neonatologjisë.

    “Rasti është shtri në kliniken tonë në javën e 26-të të shtatzënisë, ka qëndru në klinikë 6 javë. Operacioni ka ndodhur me prerje cezariane, tani është e shtrirë në klinikën e neonatologjisë dhe kanë gjendjen e mirë shumë bebat dhe nëna. Shtatzania ka ndodhë me proces natyral me rrugë natyrore, ka raste kur nëna kryen pa operacion lindjet por për shkak të komplikimeve është më mirë me operacion në mënyrë që bebat të nxirren në mënyrë të duhur”, tha Ndrejaj.

    Vetëm gjatë vitit 2023 në këtë klinikë janë regjistruar 11 lindje të trinjakëve dhe 225 lindje me binjakë.

    Megjithatë, Ndrejaj shprehet i shqetësuar me rënien e numrit të lindjeve që nga paslufta e tutje. Bazuar në statistikat e menaxhmentit të klinikës Obstetrike Gjinekologjike në QKUK, gjatë vitit 2023 në të gjitha spitalet publike të Kosovës janë kryer gjithsej 8 mijë e 100 lindje, prej tyre me prerje cezariane janë 3 mijë e 10.

    Shqetësues mbetet edhe numri i ulët i punëtorëve shëndetësorë në Klinikën e Gjinekologjisë, ku në repartin e lindjeve punojnë vetëm 5 mami dhe më shumë se 20 infermierë.

  • Rihapet shqyrtimi gjyqësor ndaj ish-deputetit të LDK-së, Shkumbin GashiI

    Rihapet shqyrtimi gjyqësor ndaj ish-deputetit të LDK-së, Shkumbin GashiI

    Përgatiti: Nora Luta

    Shfaqja e këtyre fotografive, në fjalën përfundimtare nga Prokuroria Speciale në rastin e ish-deputetit të LDK-së, Shkumbin Gashi dhe Sylë Balaj, ka bërë që të rihapet shqyrtimi gjyqësor në këtë rast.

    Para se ta japë verdiktin rreth akuzave për manipulim me vota në zgjedhjet parlamentare të vitit 2021, Gjykata Themelore e Prishtinës për të vërtetuar kohën dhe vendin e shkrepjes së tyre ka urdhëruar Agjencinë e Forenzikës për verifikim.

    Për të sqaruar edhe disa paqartësi rreth provave, gjykata do ta ftojë për të dëshmuar edhe një zyrtar të Komisionit Qendror të Zgjedhjeve.

    Në fotografitë që janë kontestuar nga mbrojtja, Prokuroria Speciale pretendon
    se shihet i akuzuari Balaj bashkë me katër të dënuar duke plotësuar vota.

    Sipas PSRK-së, ish-deputeti Gashi dhe Balaj abuzuan me të dhënat e 71 bashkatdhetarëve në Austri, duke mbushur fletëvotimet pa pëlqimin e tyre në favor të rezultatit zgjedhor të Gashit.

    Përveç tyre, në këtë rast akuzoheshin edhe Kastriot Balaj, Shpetim Shala, Milot e Dardan Blakaj, të cilët e kanë pranuar fajësinë dhe janë dënuar me burgim me kusht.

    Ndërsa, procedura ishte veçuar ndaj Kushtrim Gjevukajt, pasi akuzohej për veprën penale “Kanosja”.

  • Përfundon aksioni për konfiskimin e banesës dhe restorantit të Radojçiqit në Veri

    Përfundon aksioni për konfiskimin e banesës dhe restorantit të Radojçiqit në Veri

    Ka përfunduar aksioni për konfiskimin e banesës dhe restorantit të kryeterroristit Milan Radojçiq.

    Këtë e ka konfirmuar zëvendësdrejtori i Policisë për rajonin e veriut, Veton Elshani.

    Po, aksioni ka përfunduar pas orës 17:00”, tha Elshani.

    Pak më parë ministrja e Drejtësisë, Albulena Haxhiu, ka publikuar listën e aseteve të Radojçiqit që janë konfiskuar dhe sekuestruar deri tani.

  • Ndahen 9 milionë euro për rinovimin e stadiumit të Gjakovës

    Ndahen 9 milionë euro për rinovimin e stadiumit të Gjakovës

    Ministri i Kulturës, Rinisë dhe Sportit, Hajrulla Çeku, ka njoftuar për ndarjen e nëntë milionë eurove për rinovimin e stadiumit të qytetit të Gjakovës.

    Të enjten është nënshkruar marrëveshja mes MKRS-së dhe Komunës së Gjakovës, përmes së cilës “ne kemi zotuar gjithë buxhetin e nevojshëm për përfundimin e stadiumit, ndërsa komuna ka për obligim zhvillimin e procedurave të prokurimit, punët ndërtimore si dhe mbikëqyrjen teknike”.

    “Futbollistët dhe qytetarët e kësaj komune dhe më gjerë do të kenë stadiumin e merituar, me kushte të dinjitetshme për të zhvilluar aktivitetet sportive dhe ndjekur ndeshjet e ekipeve të preferuara”, ka shkruar Çeku në Facebook.

    Stadiumi i Gjakovës është në mesin e stadiumeve që do të jenë nikoqirë të Lojërave Mesdhetare në vitin 2030.

    MKRS-ja ka njoftuar edhe për rinovimin e stadiumit “Fadil Vokrri” në Prishtinë e atë të Gjilanit, që gjithashtu do të presin Lojërat Mesdhetare 2030.

  • ​Themelohet komisioni hetimor për subvencionimin e teksteve shkollore

    ​Themelohet komisioni hetimor për subvencionimin e teksteve shkollore

    Kuvendi i Kosovës, pas debatit mbi katër orësh ka themeluar sot Komisionin Hetimor Parlamentar për procesin e subvencionimit të blerjes së teksteve shkollore dhe mjeteve mësimore për nxënësit e nivelit të Arsimit fillor dhe Arsimit të Mesëm të Ulët për vitin shkollor 2023/2024.

    Pro themelimit të komisionit votuan 61 deputetë, ndërsa 4 sosh ishin kundër.

    Kryesues i komisionit do të jetë deputeti i AAK-së, Shemsedin Dreshaj.

  • ​Takimi për dinarin, Bislimi: Pala serbe nuk ka vullnet për kompromis

    ​Takimi për dinarin, Bislimi: Pala serbe nuk ka vullnet për kompromis

    Kryenegociatori i Kosovës Besnik Bislimi ka folur sot për media në Bruksel pas takimit me palcën serbe me ndërmjetësimin e Bashkimit Evropian ku temë diskutimi ishte zgjidhja e problemit të përdorimit të dinarit.

    Bislimi ka thënë se pala serbe nuk brengoset për qytetarët e saj dhe se nuk ka treguar vullnet për arritjen e një kompromisi. AI shpreson se një gjë e tillë do të arrihet pas dy javësh, në të kundërtën do të jetë pala serbe ajo që do të mbetet fajtor për bllokimin e gjetjes së një zgjidhjeje.

    “Asnjëra nga ne nuk është pjesë e BQK-së dhe ne nuk mund të marrim vendime dhe të diskutojmë mbi përfshirjen e diçka që s’është pjesë e asaj fushëveprimtarie dhe po ashtu e bëmë të qartë se diçka që nuk është legale në Kosovë nuk mund të jetë pjesë e zgjidhjes. Lajçak ka kuptuar se nuk ka vullnet nga pala serbe për të ecur përpara për të arritur kompromisin. AI na e dha propozimet e tija që ishin ide ekzistuese të konsoliduara. KY propozim është konstruktiv, për të ecur në qasje të drejtë, sidoqoftë nga pala serbe, askush prej tyre nuk ka kompetencë për të marrë vendime dhe për t’u kthyer prapa, dhe ne do të kemi takim pas dy javësh, por atyre iu është bërë e qartë se do të jetë takimi i fundit dhe duhet të reflektojnë ose ata do të mbesin fajtor për bllokimin e zgjidhjes,” ka thënë Bislimi.

    Ndryshe, emisari i BE-së për dialogun, Miroslav Lajçak, pas takimitme ekipet negociuese të Kosovës dhe Serbisë në Bruksel, ka theksuar se është diskutuar për të gjetur një zgjidhje të përkohshme për personat që atakohen nga rregullorja e BQK-së, e cila ndalon dinarin.

    “Ia dolëm të mbushim disa boshllëqe mes propozimeve të të dyja palëve.Kam në plan t’i vazhdoj diskutimet tona së shpejti bazuar në idetë e BE-së për kompromis”, ka shkruar ai në X.