Blog

Oficeri i Ushtrisë Federale të Gjermanisë, Dietrich Klaus Jensch, para disa ditësh ka dëshmuar në Dhomat e Specializuara të Kosovës, në Hagë.

E duket se ky dëshmitar është atashe ushtarak në Beograd, bazuar në faqen zyrtare të ambasadës gjermane atje.

Gjatë dëshmisë së tij, oficeri gjerman tha se nuk e dinte se janë vrarë më shumë se 10 civilë në Kosovë nga forcat serbe dhe dokumenteve të publikuara online nga Qeveria serbe.

Ai në Hagë dëshmoi për ngjarjet e qershorit 1999 në Prizren.

Jensch gjatë dëshmisë së tij, ndër të tjera, ka thënë se gjatë një operacioni të KFOR-it në Kosovë, personat me uniforma me flamuj gjermanë janë kapur duke vjedhur, teksa ka shtuar se ka pasur edhe plaçkitje nga ushtarët e ushtrisë jugosllave.

Kryetari i Lidhjes Demokratike të Kosovës (LDK), Lumir Abdixhiku, ka pritur në takim ambasadorin e Italisë në Kosovë, Antonello De Riu.

Në një njoftim të LDK-së në Facebook, thuhet se Abdixhku ka njoftuar ambasadorin italian rreth qëndrimeve të kësaj partie karshi situatës politike në vend.

Gjithashtu, gjatë takimit, Abdixhiku e ka ritheksuar nevojën për integrimin e Kosovës në institucionet euroatlantike.

“Kryetari Abdixhiku e njoftoi ambasadorin De Riu rreth qëndrimeve të LDK-së karshi situatës dhe zhvillimeve politike në vend. Gjatë takimit kryetari Abdixhiku po ashtu ritheksoi nevojën e vazhdueshme për integrimin e Kosovës në institucionet euroatlantike.

Po ashtu u diskutua për thellimin e bashkëpunimit ndërmjet vendeve tona, ndërsa kryetari Abdixhiku shprehu mirënjohjen e tij për mbështetjen që Italia i ka dhënë Kosovës në të gjitha proceset”, thuhen në njoftim.

Asociacioni i Gazetarëve të Kosovës, ka kërkuar që Kuvendi ta përmirësojë projektligjin për Komisionin e Pavarur për Media pas “qortimit të ashpër nga ana e Këshillit të Europës”.

AGK ka treguar se cilat janë pikat kryesore të kritikuara nga KiE në prjektligjin për KPM-në.

AGK: Kuvendi ta përmirësojë projektligjin për KPM-në pas qortimit të ashpër nga KiE

Asociacioni i Gazetarëve të Kosovës, ka kërkuar që Kuvendi ta përmirësojë projektligjin për Komisionin e Pavarur për Media pas “qortimit të ashpër nga ana e Këshillit të Europës”.

AGK ka treguar se cilat janë pikat kryesore të kritikuara nga KiE në prjektligjin për KPM-në.

“Aspektet kryesore të kritikuara nga Këshilli i Europës janë: ndryshimi i projektligjit për KPM-në pa koncept dokument në kundërshtim me rregulloren e qeverisë, mënyrën e definimit dhe rregullimit të mediave online, ndryshimet rrënjësore në përbërjen, emërimin, mandatin dhe shkarkimin e anëtarëve të KPM-së, largimin e kufizimit ligjor që në të kaluarën ia pamundësonte partive politike dhe bashkësive fetare hapjen e televizioneve dhe radiove dhe mungesën e transparencës gjatë nismës legjislative”, thuhet në postimin e AGK-së.

Postimi i Asociacionit të Gazetarëve të Kosovës:

Kuvendi të përmirësojë projektligjin për KPM-në pas qortimit të ashpër nga ana e Këshillit të Europës

Këshilli i Europës ka përgatitur një opinion ligjor për projektligjin për Komisionin e Pavarur për Media (KPM) dhe ka konfirmuar që disa aspekte të projektligjit nuk janë në përputhje me standardet më të mira europiane. Opinioni ligjor që mban datë 24 maj 2024 dhe është përgatitur për nevoja të Komisionit për Media të Kuvendit të Kosovës dhe konfirmon në tërësi shqetësimet tona të ngritura publikisht përmes konferencës për shtyp të mbajtur më 1 shkurt 2024.

Aspektet kryesore të kritikuara nga Këshilli i Europës janë: ndryshimi i projektligjit për KPM-në pa koncept dokument në kundërshtim me rregulloren e qeverisë, mënyrën e definimit dhe rregullimit të mediave online, ndryshimet rrënjësore në përbërjen, emërimin, mandatin dhe shkarkimin e anëtarëve të KPM-së, largimin e kufizimit ligjor që në të kaluarën ia pamundësonte partive politike dhe bashkësive fetare hapjen e televizioneve dhe radiove dhe mungesën e transparencës gjatë nismës legjislative.

Ne shprehim keqardhjen tonë për qortimin që i është bërë shtetit të Kosovës nga ana e Këshillit të Europës, institucion ky në të cilin Kosova synon të anëtarësohet. Qortimi është rezultat i tendencës së qeverisë dhe shumicës parlametare për të kontrolluar mediat dhe rregullatorin e mediave (KPM) përmes këtij projektligji dhe refuzimit të qëllimshëm të Zyrës së Kryeministrit për të përfshirë industrinë e medias dhe shoqërinë civile në fazat e hershme të nismës legjislative.

Mediat online që publikojnë video

Sipas opinionit, definicioni i ri i shërbimeve mediale audiovizuale online i paraparë në projektligjin për KPM-në është problematik, sepse bashkon të gjitha llojet e mediave në një grup dhe si i tillë është i panevojshëm. Draftligji ia ndryshon kuptimin “shërbimeve të mediave audio vizuele” që është menduar me ligjet e Bashkimit Europian, duke shtuar kështu lloje të reja të mediave, prandaj edhe duhet të largohet.

Sipas KiE-së, mediat online që publikojnë video nuk duhet të rregullohen njëjtë sikur televizionet dhe radiot dhe atyre mund t’iu kërkohet të regjistrohen në KPM vetëm nëse për to ka përfitime si për shembull: qasje në fonde publike, mbëshetetje apo akreditim i gazetarëve.

Opinioni i KiE-së konfirmon qartë shqetësimin e ngritur nga ne se licensimi apo regjistrimi i mediave online që publikojnë video, i shoqëruar me obligimin për të kërkuar leje nga KPM-ja për ndryshimin e pronësisë dhe mundësinë e gjobitjes deri në 40,000 euro nuk është në pajtim me standardet europiane.
Përbërja, mandati dhe shkarkimi i anëtarëve të KPM-së

Sipas opinionit ligjor, propozimi që zgjedhja e kryetarit të KPM-së, të bëhet nga Kuvendi mund të rrisë ndikimin politik në KPM dhe një gjë e tillë nuk është në pajtim me standardet europiane dhe ato rajonale.

Tutje, në lidhje me mandatin katër vjeçar të anëtarëve të KPM-së, opinioni i referohet qëndrimeve të zyrës së Bashkimit Europian në Kosovë dhe Organizatës për Siguri dhe Bashkëpunim Europian (OSCE), të cilat kishin ngritur shqetësim se një gjë e tillë do reflektonte me ndikim politik. Në lidhje me rritjen e numrit të anëtarëve nga shtatë në 11, në opinion thuhet se mbetet e paqartë se përse është propozuar një gjë e tillë. Aty përmenden shembujt e rregullatorëve në Irlandë, Holandë dhe Itali ku rregullatorët përbëhen nga tre deri në maksimum nëntë anëtarë. Këshilli i Europës rekomandon që në vend se të rritet numri i anëtarëve, duhet të rritet stafi civil i KPM-së dhe kompetencat e zyrës ekzekutive.

Në fund, sipas opinionit propozimi që kryetari i KPM-së të shkarkohet nëse nuk aprovohet raporti vjetor i këtij institicioni është tejet problematik dhe është mjet arbitrar, sipas së cilit Kuvendi mund të shkarkojë dhe zëvëndësojë gjithë përbërjen e KPM-së bazuar në kritere të padefinuara dhe një gjë e tillë nuk është në pajtim me standardet europiane.

Hapja e televizioneve dhe radiove nga partitë politike dhe bashkësitë fetare

Largimi i nenit që ndalonte licensimin e televizioneve dhe radiove nga partitë politike është një kthim prapa në standardet tashmë të vendosura në Kosovë. Duke iu referuar disa instrumenteve ndërkombëtare, opinioni rekomandon fuqishëm që të rikthehet neni që ua ndalonte partive politike të drejtën e hapjes së televizioneve dhe radiove.

Në lidhje me bashkësitë fetare, opinioni citon një rekomandim të Këshillit të Europës sipas së cilit, shtetet duhet të përcaktojnë korniza ligjore që ua ndalojnë grupeve të fuqishme politike, ekonomike apo fetare që të fitojnë dominim në media dhe të ushtrojnë presion në to.

Mungesa e konsultim dhe përfshirje së shoqërisë civile në draftimin e ligjit

Sipas opinionit ligjor, është e paqartë deri në çfarë mase janë konsultuar akterët kryesorë gjatë draftimit dhe nëse ka pasur shpjegime për pranimin ose jo të vërejtjeve të tyre. Opinioni përmend standardet e Këshillit të Europës në lidhje me konsultimet, sipas së cilave standarde shtetet dhe autoritetet publike gjatë draftimit të legjislacionit duhet të lejojnë pjesëmarrje të plotë të mediave dhe shoqërisë civile, të organizojnë dëgjime publike dhe konsultime, të ftojnë dhe dëgjojnë të gjithë akterët, të lejojnë kohë të mjaftueshme për t’u përgjigjur, të publikojnë rezultatet e konsultimeve dhe të ofrojnë sqarime për pranimin ose mos pranimin e rekomandimeve nga aketërt e jashtëm.

Si praktikë e mirë përmendet Grupi Punues në Mal të Zi, i përbërë nga 25 përfaqësues të cilët kishin punuar në ndryshimet e ligjeve për media për 2 vjet, duke zhvilluar më shumë se 25 takime. Mirëpo, meqenëse është vonë për të krijuar një grup punues, opinoni ligjor rekomandon që definicioni i shërbimeve audio-vizuele të kthehet siç kanë qenë fillimisht me draftligjin e parë [pa mediat online që publikojnë video] dhe ndryshimi i këtij aspekti të bëhet në një fazë më të vonshme.

Ne përshëndesim bashkëpunimin dhe gatishmërinë e Këshillit të Europës, Bashkimit Europian dhe OSBE-së që të ofrojë ekspertizë ndërkombëtare dhe shpresojmë që do të ketë vullnet politik për përmirësimin e projektligjit deri në atë masë sa të jetë plotësisht në përputhje me standardet me të mira europiane.
Rikujtojmë Qeverinë dhe Parlamentin që Kosova ka shënuar rënie alarmante në Indeksin e Reporerëve Pa Kufij për 19 rënie, dhe se nisma për të ndryshuar Projektligjin e KPM-së ka kontribuar në këtë rënie.

Asociacioni i Gazetarëve të Kosovës – AGK
Flutura Kusari, juriste e të drejtës së medias

Petkoviq: Pranimi i Kosovës si anëtare e asociuar e NATO-s është një shpërblim tjetër për terrorin ndaj serbëve

Kryenegociatori i Serbisë në dialogun me Kosovën, Petar Petkoviq tha se pranimi i Kosovës si anëtare e asocuar në Asamblenë Parlamentare të NATO-s “e ekspozoi të gjithë politikën e standardeve të dyfishta të Perëndimit”.

Ai e akuzon Perëndimin se “edhe një herë e shpërbleu fëmijën e vet”.

“Cilat janë sanksionet perëndimore ndaj Prishtinës, gjatë së cilës e ashtuquajtura Kosovë merr liberalizimin e vizave, merr pjesë në të gjitha tubimet ndërkombëtare dhe avancon drejt disa organizatave ndërkombëtare?”, tha Petkoviq.

Ai shkoi edhe më tej, duke thënë se kohët e fundit Perëndimi “po ushtron presion të fortë ndaj Serbisë dhe popullit serb, sepse është e qartë se një Serbi e fortë me Aleksandar Vuçiqin në krye është gjemb në sytë e shumë fuqive perëndimore”.

Shefi i politikës së jashtme të BE-së, Josep Borrell, ka thënë se është i tmerruar nga raportimet se Izraeli ka vrarë dhjetëra persona në Rafah, përfshirë fëmijë të vegjël.

“I tmerruar nga lajmet që dolën nga Rafah mbi sulmet izraelite që vranë dhjetëra persona të zhvendosur, përfshirë fëmijë të vegjël. Unë e dënoj këtë në termat më të ashpër”.

“Nuk ka vend të sigurt në Gaza. Këto sulme duhet të ndalen menjëherë. Urdhrat e GjND-së dhe DNH-ja duhet të respektohen nga të gjitha palët”, ka shkruar Borrelli në platformën “X”.

Horrified by news coming out of #Rafah on Israeli strikes killing dozens of displaced persons, including small children. I condemn this in the strongest terms.

There is no safe place in Gaza. These attacks must stop immediately. ICJ orders & IHL must be respected by all parties.

— Josep Borrell Fontelles (@JosepBorrellF) May 27, 2024

Kryetari i Sindikatës së Pavarur të Sektorit Privat, Jusuf Azemi, në një konferencë për media ka thënë se punëtorët e sigurimit fizik, ata të mirëmbajtjes dhe higjienës marrin paga minimale prej 292 eurove, raporton Ekonomia Online.

Ai ka thënë se qershori do të jetë muaj i protestave.

“Muaji qershor do të jetë muaj i protestave dhe grevave nëse nuk ulemi të bisedojmë. Jemi të fokusuar të ngrisim pagat sepse jemi në një pozicion që nuk kemi qenë para dy tri vitesh”, ka thënë Azemi.

Kosova është fokusuar në investimet në energjinë e ripërtëritshme në kuadër të transformimit energjetik.

Kështu kanë deklaruar përfaqësues të Qeverisë së Kosovës, në panelin “Transformimi i sistemit energjetik – nevoja për rritjen e biznesit”, i cili u mbajt në kuadër të Forumit për Investime të Qëndrueshme, raporton Ekonomia Online.

Anila Beqa, këshilltare e ministre së Ekonomisë, ka thënë në këtë panel se kanë shënuar progres në këtë drejtim, meqë strategjia e energjisë ka kaluar tashmë edhe në Parlamentin e Kosovës, vitin e kaluar.

Ajo tha se kanë përcaktuar disa caqe që ndërlidhen me dekarbonizimin e sektorit energjetik.

“Aty përfshinë 32 për qind të rënies në emetime të gazrave dhe rënie në konsumin të energjisë e cila do të jetë prej burimeve të ripërtëritshme. Këto caqe nuk mund të arrihen pa përfshirjen e sektorit privat. Për me qenë në gjendje për të arritur këto caqe ne kemi zgjedhur qasjen e balancit të kërkesës dhe ofertës dhe do t’i përmend disa masa qe i kemi ndërmarr si qeveri. Kemi parashikuar një lloj miksi të kapaciteteve solare dhe të erës që do të inaugurohen deri në vitin 2025. Jemi duke punuar më dizajnimin e ankandit solar, po punojmë në dizajnimin e ankandit të erës që do të lansohet në tetor të këtij viti, jemi duke folur për 150 megavat kapacitet, po punojmë me USAD-in dhe IFC-në të cilët do të na ndihmojnë në dizajnimin e këtij plani dhe tërheqjen e ofertuesve serioz. Ky projekt do të jetë shumë i rëndësishëm sa i përket bashkëpunimit të investitorëve ndërkombëtarë dhe lokal. Do të lansojmë këtë proces në dy llote. Të dyja nga 75 megavat, do të japim shanse atyre projekteve që të jenë pjesë e këtij ankandi dhe do t’i japim kohë investitorëve që nuk i kanë të dhënat t’i grumbullojnë ato dhe të ofertojnë pas një viti”, ka thënë ajo.

Ndërsa, ekspert i Lartë i Energjisë dhe përfaqësues i Sekretariatit të komunitetit të Energjisë në Vjenë, Arben Kllokoqi, ka theksuar se janë disa caqe ambicioze që duhet të arrihen dhe reflektohen në ligj.

Ai tha se objektivat për energji, për emetim të gazrave, për energji të ripërtritshme, janë obligime të cilat Kosova i ka marr përsipër.

“Të gjitha këto do të finalizohen në planin kombëtar për energji dhe klimë, planë i cili integron të gjitha strategjitë sektoriale në një. Duhet të jetë një draft shumë i ri konsoliduar nga autoritet e Kosovës, pra jo vetëm nga Ministria e Ekonomisë. Pra ne si Sekretariat i kemi dhënë disa rekomandime qeverisë dhe presim që deri në qershor që këto plane për të gjitha palët kontraktuese duhet të jenë të hartuara dhe të finalizuar. Këto plane vijnë nga të ashtuquajtura rregullore për qeverisje, që është një rregullore tjetër që është pjesë e Komunitete të Energjisë, faktikisht Kosova është ligjërisht e obliguar që të ketë rregullore që përcakton pesë rregullore. Pra kjo është njëra dhe në anën tjetër e kemi edhe ligjin për ndryshime klimatike, i kemi të gjitha politikat klimatike të cilat duhet të jenë të përfshira në ligj dhe ligji është finalizuar në Kosovë kjo është një lajm i mirë dhe një arritje tjetër e rëndësishme”, tha Kllokoqi.

Sipas tij, ligji për energjinë e ripërtëritshme është finalizuar edhe kjo është arritje e rëndësishme, porse tani prioritete do të jenë që së pari të përfundojë plani me rekomandimin e planit të Sekretariatit të Energjisë.

Ndërkohë, Valentine Lassala, menaxhere e lartë për çështjet publike në kompaninë AKUO Energy, e ka quajtur lajm të mirë se në ditët e sotme të gjithë e kuptojnë se mund të prodhojnë energji elektrike të lirë, siç është ajo me erë.

“Ajo çka na bindë të punojmë me Kosovës, mendoj se sot një gjë është thelbësore që bizneset ndërkombëtare të dinë që ta kenë qartësinë e kornizës rregullative sepse këtë e presin bizneset që të vijnë dhe ta kenë bashkëpunimin e qeverisë në këtë aspekt. Kosova ka dalë që të ketë progres, shihet se po punon. Qysh nga nëntori i viti të kaluar ju me keni dhënë një broshurë të vogël me planin dy vjeçar të tenderëve, të shumës së investimeve, të teknologjisë që do të përdoret, ju faktikisht ma keni dhënë planin e Kosovës për dy vite, duket shumë e thjesht, por është shumë e qartë dhe këtë e presin bizneset. Është e mahnitshme ajo çka ka bërë Kosova dhe dëshmia është këtu”, ka thënë ajo.

Forumi i Parë i Investimeve të Qëndrueshme, organizuar nga Këshilli i Investitorëve Evropianë (EIC) ka nisur të hënën dhe do të vazhdojë punimet edhe të martën.