Blog

Qeveria e Suedisë njoftoi më 29 maj për paketën më të madhe të saj të ndihmës ushtarake që i ka ofruar Ukrainës që kur Rusia nisi pushtimin e paprovokuar të fqinjit të saj.

Paketa, e 16-ta që nga nisja e luftës, është në vlerë prej 1.3 miliard dollarësh.

Ndihma suedeze përfshin avionë vëzhgues dhe të kontrollit, me qëllim që të forcohen aftësitë e mbrojtjes ajrore të Ukrainës, tha Qeveria suedeze përmes një njoftimi më 29 maj.

Që nga nisja e pushtimit rus të Ukrainës në shkurt të vitit 2022, Suedia i ka ofruar ndihmë ushtarake Ukrainës në vlerë prej 4.1 miliardë dollarësh.

Pas nisjes së luftës në Ukrainë, Suedia si dhe Norvegjia, braktisën politikën e tyre të mosangazhimit ushtarak duke u anëtarësuar në aleancën ushtarake perëndimore të NATO-s./REL/

UNFPA dhe Këshilli për Zhvillim të Qëndrueshëm kanë bërë lansimin e projektit “Më shumë zgjedhje: Politikat e përgjegjshme gjinore për familjen për sektorin privat në Kosovë – Faza 2”, raporton Ekonomia Online.

Kryetari i Kuvendit të Kosovës, Glauk Konjufca, theksoi se sot po zyrtarizohet nisja e fazës së dytë të një projekti me rëndësi të madhe.

Kreu i legjislativit, tha se agjenda e drejtë është agjenda e bazuar mbi principin e ndarjes së barabartë në familje.

“Ndarja e pabarabartë e punës në kurriz të grave dhe vajzave ua merr kohën që u takon, e që është këputje e karrierës, kreativitetit e prodhimit”, ka thënë Konjufca.

Ndërsa, deputetja e Lëvizjes Vetëvendosje, Fatmire Mulhaxha-Kollçaku, tha se qeveria aktuale është duke punuar në zgjidhjen e barazisë gjinore, njohjen e punës së gruas në familje dhe ndryshimin e legjislacionit të lidhur me këto çështje.

“Sot dua të theksoj se kjo ngjarje i dedikohet ditës ndërkombëtare të familjes. UNFPA është partner i vazhdueshëm, meqë edhe emri i tij si i tillë prej shtyllës kryesore siç është familja. Duke lehtësuar dhe rishpërndarjen e barrës në familje, e dimë se gratë shpenzojnë tri orë më shumë në ditë në kujdes ndaj familjes. Ligji i ri i punës do të përfshijnë këtë barazinë, pushimin prindëror dhe natë të kujdestarisë. Aktualisht jam pjesë e një qeverie që promovon vlera barazie, ku kemi shtuar shtesat për femijë, sigurimi i bursave për vajzat në teknologji dhe informacion përmes buxhetit ka filluar edhe zbatimi i planit për banim social dhe rritjen e qendrave publike për kujdes ndaj fëmijëve”, theksoi ajo.

Mulhaxha-Kollçaku tha se sipas agjendës së qeverisë, aktuale janë duke u ndryshuar disa ligje.

“Projekti që po e lajnsojmë sot nuk do ishte e mundur pa ndihmën e miqëve tanë, fondi i kombit amerikan dhe atij austriak. Direktiva rrjedh nga agjenda globale për pranimin e përfshirjes sociale në të cilën jemi të kushtuar ne si Kuvend, po e provojmë rëndësinë qe ka ky projekt. Institucionet tona kanë treguar vendosmëri për adresimin e çështjeve problematike si pabarazia gjinore në tregun e punës dhe balancinë punë-jetë, ajo qe mbetet ende sfidë është implementimi që kërkon bashkëpunim mes institucioneve publike dhe atyre private, e kam bindjen që ky projekt do shërbej si inkurajim për gjithë punonjësit t’i zbatojnë këto politika në vendin e punës prej së cilave fitimi është i dyanshëm”, shtoi Mulhaxha-Kollçaku.

Ndërsa, Sandra Horina, shefe e zyrës austriake për zhvillim, tha se janë të lumtur me përkushtimin politik për që të ndiqen reforma legjislative në këtë fushë.

“Ne jemi mbledhur këtu për shkak se ekziston 20% e grave të këtij vendi marrin pjesë në bendin e punës ndërsa në rajon 40%, e për dallim në Kosovë populli jeton 60% në zona rurale, e dimë që politika familjare ndikojnë në ato zona të ndikuara nga varfëria. Ato gra duhet të marrin vendim nëse duan të marrin pune ose të kujdesen për familjen, shpresojmë që me këtë projekt do ecim para ne këtë drejtim. 7 kompani kanë qenë, një prej tyre është gjirafa dhe disa t’i dalënderoj për politikat e tyre ndaj familjes”, tha Horina.

Kurse, Visare Mujko-Nimani, shefe e zyrës se UNFPA-së në Kosovë, tha se duke adresuar normat e ndryshme shoqërore mund të ç’rrenjosim sterotipet mes burrit dhe gruas brenda familjes.

“Gratë shpenzojnë tri herë më shumë se burrat në kujdesin familjar. Për fat të mirë qeveria e njeh rëndësinë e harmonizimit të kësaj çështje, vlerësojmë lartë përgjigjen pozitive të Kuvendit ndaj kësaj çështje, me këtë harmonizim forcohen lidhjet e kosovës me kornizën evropiane”, tha ajo.

Në hollin e Kuvendit u shfaq një ekspozitë e ndërlidhur me temën e trajtuar në këtë projekt.

Ministria e Arsimit, Shkencës, Teknologjisë dhe Inovacionit (MAShTI) ka ndarë 150 mijë euro për hulumtime shkencore për profesorët universitar. Nga kjo shumë, stafi akademik i universiteteve publike mund t’i fitojë nga 10 mijë euro për secilin grand që paraqesin.

Ministrja Arbërie Nagavci thotë se MAShTI është e përkushtuar që ta rrisë prodhimin shkencor në Kosovë. Për këtë, ajo tha se ka marrë një varg masash e veprimesh, duke synuar që ta bëjë hulumtimin pjesë të kulturës së punës në universitetet publike.

“Të gjithë profesorët që kanë kontratë të rregullt pune me universitetet publike si staf akademik mund të fitojnë 10 mijë euro grant për ta aplikuar hulumtimin në procesin e punës. Thirrja për aplikim në këto grante tashmë është publikuar, dhe qëndron e hapur deri sa të jepen 15 grante 10 mijë Euro secili”, deklaroi ministrja Nagavci.

Ajo me këtë rast i fton profesorët e universiteteve publike, të aplikojnë me ide kreative dhe të guximshme për mësimdhënie të bazuar në hulumtim. “Ju siguroj se 15 më të mirët prej jush do ta fitojnë grantin me 100% meritokraci”, ka shkruar ministrja e Arsimit.

Granatimet dhe sulmet ajrore izraelite kanë vrarë të paktën 37 persona, shumica të strehuar në tenda, jashtë qytetit jugor të Gazës, Rafah, gjatë natës dhe të martën, thanë dëshmitarët, punëtorët e emergjencës dhe zyrtarët spitalorë.

Sulmet u kryen në të njëjtën zonë ku ndodhën sulmet ajrore që shkaktuan një zjarr vdekjeprurës ditë më parë në një kamp të të zhvendosurve palestinezë, raporton Associated Press.

Zjarri në kamp nxiti zemërim ndërkombëtar, përfshirë edhe të disa prej aleatëve më të ngushtë të Izraelit, lidhur me zgjerimin e ofensivës ushtarake në Rafah.

Ushtria izraelite sugjeroi se zjarri i së dielës në kampin me tenda u shkaktua nga shpërthimet dytësore, potencialisht nga armët e militantëve palestinezë. Ushtria izraelite tha se shkaku i zjarrit ende është duke hetuar, por zëdhënësi i ushtrisë, Daniel Hagari, tha të martën se municionet izraelite që u përdorën – që ushtria tha se janë përdorur për të shënjestruar dy luftëtarë të Hamasi, grupit palestinez të shpallur organizatë terroriste nga Shtetet e Bashkuara dhe Bashkimi Evropian – ishin të vogla sa të ishin burimi i zjarrit.

Sulmi i Izraelit në Rafah, i nisur më 6 maj, shtyu më shumë se 1 milion persona të largoheshin nga qyteti, tha të martën agjencia e Kombeve të Bashkuara që ndihmon refugjatët palestinezë. Shumica e tyre veçse janë zhvendosur disa herë për shkak të luftës mes Izraelit dhe Hamasit, që nisi pothuajse tetë muaj më parë.

Sulmet e ditëve të fundit kanë goditur zona në perëndim të Rafahut, ku ushtria izraelite nuk ka urdhëruar civilët që të evakuohen. Trupat tokësore izraelite dhe tanket janë duke operuar në lindje të Rafahut, në pjesët qendrore të qytetit dhe përgjatë kufirit Gaza-Egjipit.

Granatimet mbrëmje e së hënës dhe në orët e para të së martës në perëndim të Rafahut vranë të paktën 16 persona, tha Mbrojtja Civile palestineze dhe Gjysmëhëna e Kuqe palestineze. Shtatë nga të vrarët ishin në tenda, rreth 200 metra nga vendi i sulmit të së dielës.

SHBA-ja dhe aleatët e tjerë të Izraelit e kanë paralajmëruar kundër një ofensive në shkallë të plotë në këtë qytet. SHBA-ja e konsideron një ofensivë të tillë si “vijë të kuqe”, duke thënë se do të bënte që Uashingtoni të ndalte furnizimin me armë sulmuese për Izraelin.

Sulmet e fundit në Rafah vijnë pasi javën e kaluar Gjykata Ndërkombëtare e Drejtësisë urdhëroi Izraelin që të ndalë ofensivën në Rafah. Vendimi i GJND-së është pjesë e rastit të ngritur nga Afrika e Jugut, e cila e akuzon Izraelin se po kryen gjenocid kundër palestinezëve në Gazë.

Lufta nisi pasi Hamasi sulmoi jugun e Izraelit më 7 tetor, duke vrarë 1.200 persona dhe duke rrëmbyer 250 të tjerë.

Izraeli u kundërpërgjigj me sulme ajrore, tokësore dhe detare, duke vrarë më shumë se 36.000 persona, sipas Ministrisë së Shëndetësisë në Gazë. Ky institucion nuk bën dallimin mes luftëtarëve dhe civilëve të vrarë.

OKB-ja ka thënë se rreth 80 për qind e popullsisë prej 2.3 milionë banorësh e Gazës janë zhvendosur dhe disa pjesë të territorit po përballen me uri.

Luftimet në Rafah po ashtu e kanë bërë pothuajse të pamundur për grupet humanitare të dërgojnë ndihma në jug të Gazës./REL/

Avokati Sokol Mëngjesi është qëlluar këtë mëngjes nga disa persona të paidentifikuar, në rrugën “Pjetër Bogdani” në kryeqytet.

Incidenti ndodhi rreth orës 08:30 në kopshtin 31. Autorët, që paraprakisht dyshohet se ishin tre, e qëlluan 34-vjeçarin me sende të forta në kokë. Avokati u dërgua me urgjencë në Spitalin e Traumës.

Nuk dihen ende rrethanat e ngjarjes, ndërsa policia ka nisur kërkimet për identifikimin dhe më pas kapjen e autorëve.

Mëngjesi ushtron profesionin e avokatit prej vitesh, ndërkohë që ka zgjedhur të bëjë mbrojtjen e ish-kryeministrin Sali Berisha, në betejën ligjore me drejtësinë, pasi që prej dhjetorit të vitit të kaluar u la në arrest shtëpie pas hetimeve për privatizimin e ish-Kompleksit Sportiv, Partizani.

Bashkëpunimi në fushën e mbrojtjes dhe sigurisë dhe forcimi i partneritetit mes dy shteteve në ngritjen e kapaciteteve ushtarake të Kosovës ishin temat kryesore në takimin që ministrja e Punëve të Jashtme dhe Diasporës, Donika Gërvalla, bashkë me Kryetaren e Grupit Parlamentar të Miqësisë Kosovë-Kanada, Mimoza Kusari-Lila patën me John McKay, Kryetar i Komisionit të Përhershëm për Mbrojtje Kombëtare në Parlamentin e Kanadasë, në kuadër të vizitës zyrtare në Kanada.

Avancimi i statusit të Kosovës në anëtare e asociuar në Asamblenë Parlamentare të NATO-s, përgatitja dhe profesionalizmi i ushtrisë së Kosovës, i arritur si rezultat i bashkëpunimit me shtetet anëtare të NATO-s dhe sipas standardeve të tyre ushtarake, ishin po ashtu pjesë e diskutimit mes Gërvallws dhe deputetit federal, John McKay.

Krahas aspekteve të mbrojtjes dhe sigurisë, gjatë këtij takimi Gërvalla e njoftoi Kryetarin McKay rreth progresit të arritur nga Republika e Kosovës në fushën e demokratizimit të vendit, sundimin e ligjit, lirinë e shprehjes, respektimin e të drejtave të njeriut dhe zhvillimin ekonomik.

Avancimi i statusit të Kosovës në Asamblenë Parlamentare të NATO-s, po shihet nga Lidhja Demokratike e Kosovës si kontribut i dhënë nga i gjithë spektri politik në vend, e jo vetëm nga Qeveria Kurti, raporton Ekonomia Online.

Madje, deputeti i kësaj partie, Anton Quni, ka thënë për Ekonomia Online, se integrimi i Kosovës në Aleancën Veri-atlantike, është artikulim që nga ish-presidenti i ndjerë, Ibrahim Rugova.

“Kjo çështje është ngrit shumë vite para luftës, që nga artikulimi që e ka bërë presidenti historik Ibrahim Rugova, gjithnjë është ripërsërit gjatë okupimit kur e kemi arritur lirinë, e po ashtu edhe kur u shpall pavarësia e Kosovës, do të thotë është meritë e tërë spektrit, të gjitha personaliteteve, të gjithë qytetarëve të Kosovës dhe duhet ta përshëndesim të gjithë së bashku”, tha Quni.

Deputeti i LDK-së, Anton Quni, shtoi se avancimi i statusit të Kosovës në AP të NATO-s, është një mundësi e mirë për sigurinë nacionale.

“Është përshëndetur nga i tërë spektri politik i Kosovës, po ashtu edhe nga Lidhja Demokratike e Kosovës, nga fakti se tani edhe zëri jonë do të dëgjohet në Asamblenë e Përgjithshme të NATO-s. Është një mundësi e mirë që të gjitha çështjet që kanë të bëjnë me sigurinë nacionale, jo vetëm në Kosovë por edhe në rajon, të trajtohen në raporte bilaterale, por edhe në tërësi me autoritetet dhe përfaqësuesit e NATO-s, për të gjitha çështjet që na takojnë ne, por edhe vetë organizatën politiko-ushtarake të NATO-s”, theksoi Quni për Ekonomia Online.

Të hënën, Asambleja Parlamentare e NATO-s votoi me shumicë votash pro avancimit të statusit të Kosovës nga vëzhguese, në anëtare të asociuar.

Asambleja Parlamentare e NATO-s është themeluar në 1955, i cili mbledh të gjithë deputetët e vendeve anëtare të NATO-s, por edhe vendeve partnerë të NATO-s.

AP e NATO-s, përbëhet nga 281 delegatë nga 32 vendet anëtare të Organizatës Veri-atlantike.

Në aktivitete të saj marrin pjesë edhe delegatë nga 9 vende të asociuara, 4 vende të asociuara mesdhetare, si dhe 8 delegacione vëzhguese parlamentare.

Anëtarët e asociuar mund të paraqesin rezoluta dhe ndryshime në rezoluta. Gjithashtu, mund të shërbejnë si raportues specialë të asociuar në komitete, për të paraqitur perspektivat e tyre në raportet NATO-Asamble Parlamentare.

Megjithatë, ata nuk kanë të drejtë të votojnë për raportet, rezolutat apo udhëheqjen e Asamblesë dhe as nuk kontribuojnë në buxhetin e saj.

Aktualisht, anëtare të asocuara janë nëntë, në mesin e tyre edhe Serbia dhe Bosnje e Hercegovina.

Rreth orës 4 të mëngjesit zjarri ka përfshirë një nga dhomat e Spitalit të Përgjithshëm në Pejë.

Lajmi është bërë i ditur nga vet Spitali.

Sipas njoftimit zyrtar, zjarri ka rënë në katin e katërt, si pasojë e një defekti në sistemin elektrik.

“Mbrëmë rreth orës 4 të mëngjesit të sotëm ka pasur një zjarr në katin e IV-të, të Spitalit të Përgjithshëm në Pejë. Pjesëtarët e sigurimit kanë intervenuar menjëherë në shuarjen e zjarrit dhe po ashtu janë njoftuar Policia dhe Zjarrfikësit. Dyshohet se zjarri është shkaktuar si pasojë e një defekti në sistemin elektrik. Me intervenimin e shpejtë është ndalur përhapja e zjarrit, por një dhomë ku kanë qenë pajisjet e Teknologjisë Informative është djegur dhe tani jemi në proces të konstatimit të dëmit”, bën të ditur Spitali i Pejës.

Tutje në njoftim thuhet se shërbimet ndaj pacientëve kanë vazhduar dhe po vazhdojnë të jepen si gjithnjë dhe puna po vazhdon normalisht.

“Sa i përket data bazës dhe të dhënave tjera të gjitha janë të ruajtura ngase janë të lidhura me sisteme tjera informative dhe asnjë e dhënë apo data bazë nuk është humbur. Shërbimet ndaj pacientëve kanë vazhduar dhe po vazhdojnë të jepen si gjithnjë dhe puna po vazhdon normalisht, ndërsa ekipet e shërbimeve teknike janë duke u marrë me pastrimin dhe riparimet e nevojshme në dhomën e djegur dhe ambientet tjera të katit të IV të bllokut Kirurgjik”, thuhet në njoftim.

Një grua në Shtime i ka thënë policisë se është sulmuar fizikisht nga i dyshuari mashkull kosovar.

Kjo sipas viktimës ka ndodhur për shkak të një fjalosjeje.

“DHUNË NË FAMILJE- Shtime / 28.05.2024 – 16:30. Viktima femër kosovare ka njoftuar policinë se pas një fjalosje është sulmuar fizikisht nga i dyshuari kosovar’, thuhet në raportin policor.

Policia njoftoi tutje, se i dyshuari është arrestuar dhe pas intervistimit me vendim të prokurorit është dërguar në mbajtje.