Një person është plagosur në Prishtinë, pasi janë shkrepur armët.
Sipas dyshimeve të para një person është plagosur në këmbë me kallashnikov në garazhin e shtëpisë.
Siç raporton Gazeta Sinjali, i plagosur është shtetas rumun, dhe është plagosur në objektin ku ai banon.
Drejtoria për Hetimin e Krimeve Ekonomike dhe Korrupsionit në Policinë e Kosovës kanë hyrë sërish në ambientet e Bankës së Kursimeve Postare në Mitrovicën e Veriut.
Siç raporton medium serb Kossev, Policia e Kosovës bashkë me patrullat dhe oficerët e EULEX-it janë duke qëndruar në hapësirat e Shërbimit të Pagesave për të kontrolluar një kasafortë.
Sipas zëvendësdrejtorit të Policisë në veri, kasaforta në fjalë nuk ishte kontrolluar më parë për shkak se nuk kishte çelës.
Kujtojmë se Policia e Kosovës, së bashku me Administratën Tatimore të Kosovës, pas një aksioni të hënën e 20 majit, mbyllën gjashtë njësi të kësaj banke serbe.
Kryetari i Kuvendit të Kosovës, Glauk Konjufca, ka vlerësuar se përfaqësuesi i lartë i BE-së për Politikë të Jashtme dhe Siguri, Josep Borrell, duhet ta pasqyrojë realitetin në raport me aksionin e Policisë së Kosovës, e cila javën e kaluar mbylli gjashtë filiale të “Bankës Postare Kursimore” të Serbisë në pjesën veriore të vendit të banuara me shumicë serbe.
Zëdhënësi i Bashkimit Evropian, Peter Stano, njoftoi në një konferencë për media të martën se raporti i Borrell, në dorën e të cilit është largimi i masave ndëshkuese, akoma nuk është finalizuar, ndërsa shtoi se operacioni i fundit policor në Veriun e Kosovës do të ndikojë “negativisht” në këtë çështje.
Për Konjufcën, institucionet kosovare në këtë rast vetëm e ka zbatuar ligjin, andaj ai ka vlerësuar si jo të drejtë që një çështje e tillë të ndikojë negativisht në largimin e masave ndëshkuese të BE-së të vendosura Kosova në qershorin e vitit të kaluar
“Do të ishte mirë që kur Borrell ta shkruaj raportin të thotë që këto institucione ishin banka të paligjshme të Serbisë në Kosovë. Ato ishin banka të Serbisë në Republikën e Kosovës, si të tilla nuk mendoj se janë të lejueshme dhe duhet të trajtohen si e thotë ligji, ligji thotë që ato duhet mbyllur’, ka thënë ai në një prononcim për media.
Dhomat e Specializuara të Kosovës (DhSK) në Hagë ia kanë vazhduar masën e paraburgimit ish-kreut të Ushtrisë Çlirimtare të Kosovës, Hashim Thaçi.
Kjo pasi trupi gjykues konstatoi se ekziston rreziku i pengimit të procesit gjyqësor.
Në dokumentin publik thuhet se vendimi është marrë më 24 maj.
“Që nga vendimi më i fundit i paraburgimit, nuk ka pasur zhvillime që zvogëlojnë faktorët që mbështesin nevojën dhe arsyeshmërinë e paraburgimit. Në të vërtetë, ecuria e vazhdueshme e gjyqit përmes dëshmisë së të gjashtëdhjetë e pestë (65th) dëshmitarë dhe zhvillimet e tjera në këtë rast konfirmojnë në mënyrë të prerë domosdoshmërinë e paraburgimit”, është thënë nga DhSK-ja në vazhdimin e paraburgimit për Thaçin.
Ndryshe, Zyra e Prokurorit të Specializuar, më 30 shtator 2022, ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
Kabineti qeveritar i Gjermanisë, nën udhëheqjen e kancelarit të Olaf Scholz, ka miratuar vendimin për zgjatjen edhe për një vit të mandatit të ushtarëve që shërbejnë në kuadër të misionit të KFOR-it.
Njoftimi u dha nga Ministria Federale e Mbrojtjes së Gjermanisë.
Kjo ministri thekson se ky vendim vjen pas ngritjes së tensioneve mes Kosovës dhe Serbisë.
“Ushtarët e dislokuar aktualisht përfshijnë rreth 210 të një kompanie operative gjermane që do të vendosen në terren për një vit në të ashtuquajturën Komanda Rajonale Perëndimore. Kompania e re synon të zëvendësojë forcat austriake dhe të trajnohet për të kontrolluar trazirat”, thuhet në njoftim.
Bundeswehr-i gjerman është prezent në Kosovë që nga 12 qershori 1999.
Në përgjigje të trazirave të vitit 2023 dhe situatës së paqëndrueshme në veri të Kosovës, NATO ka bërë thirrje për përforcime për forcat e sigurisë së KFOR-it.
Misioni është të krijojë dhe të mbajë një mjedis të sigurt në Kosovë për vendosjen e rendit civil të paqes dhe të garantojë sigurinë dhe rendin publik.
KFOR-i gjithashtu ofron ndihmë humanitare në situata emergjente, promovon kthimin e refugjatëve dhe personave të zhvendosur dhe mbështet organizatat ndërkombëtare të ndihmës në punën e tyre.
Aktualisht në Kosovë ka një prezemcë prej 290 ushtarësh gjermanë.
Tani i mbetet në dorë Bundestagut të votojë për këtë vendim.
Kryetari i Kuvendit, Glauk Konjufca, e ka vlerësuar si të paqëllimshëm, moskordinimin e Qeverisë me presidenten Vjosa Osmani, rreth çështjes së anëtarësimit të Kosovës në Këshillin e Evropës, raporton Ekonomia Online.
Pas letrës që ministrja e Punëve të Jashtme, Donika Gërvalla, i kishte dërguar KiE-së, se do ta dërgojnë në fund të majit një draft-statut për Asociacionin, kishte reaguar presidentja Osmani, për mos koordinim me të.
Por, sipas kreut të legjislativit, përplasja ka ardhur për shkak se e para e shtetit ka qenë jashtë vendit dhe qeveria, përkatësisht MPJD-ja, nuk kanë arritur ta informojnë Osmanin me kohë.
“Kuvendi, Presidenca, unë e kam kuptuar këtë si një pamundësi që të njoftohet presidentja për çdo hollësi nga ana e Ministrisë së Jashtme, e kjo mua kam hamendësua që ka mundur me ndodh për shkak të vizitës që ajo e kishte në ShBA e për shkak të largësisë me siguri. Jo çdo hollësi e cila ndryshonte çdo minutë, në ditën e votimit të Këshillit të Ministrave për Këshill të Evropës mund të ndahet dhe koordinohet, pra unë nuk shoh mosvullnet nga ana e Qeverisë dhe Ministrisë së Punëve të Jashtme që të bëj diçka te qëllimshme kundër Presidentes. Ka qenë thjeshtë teknikisht një largësi e madhe gjë që ka pamundësi që ndryshimet çdo minutë që i ka bërë Qeveria e Kosovës, të arrijnë të krijojnë atmosferën që Kosova të hynte në agjendë, nuk ka mundur t’i ndaj të gjitha me Presidencën, dhe Presidenca e ka pas reagimin e saj. E keni parë e ky reagim vjen me siguri si pasojë e asaj që ata kane menduar që çdo hollësi do duhej të ishte ndarë”, theksoi Konjufca.
Kreu i Kuvendit ka folur edhe për kritikat që shefi i EULEX-it ia bërë institucionit që ai drejton për mos kalimin e raportit vjetor për vitin 2022 të institucionit të Avokatit të Popullit.
“Kjo ka ndodh për shkak se mazhoranca konstatoi që raporti ishte i paplotë, deputet kishin secili vërejtjet e tyre në përgjithësi një numër i madh i deputetëve nga ana e mazhorancës herë pas here e kanë kritikuar institucionin e avokatit të popullit. Unë dua të rezervohem nga ajo, nga mendimet e mia për avokatin e popullit sepse këtë deklaratë po e jap në cilësinë e kryetarit të parlamentit. Zyra e avokatit është e ndarë prej institucioneve tjera, është zyrë e pavarur e cila do duhej ta kryente punën e vet, por në anën tjetër edhe gjithçka që kemi, mendoj që duhet të dëgjohet më mirë prej avokatit të popullit edhe kur ne japim kritika si deputet po prej institucioneve të Republikës së Kosovës”, tha Konjufca.
Partia Demokratike e Kosovës ka njoftuar se kryetari i kësaj partie, Memli Krasniqi, mban sot konferencë për media.
Në njoftimin e PDK-së thuhet se konferenca do të nisë në orën 14:30.
“Kryetari i Partisë Demokratike të Kosovës, Memli Krasniqi, mban sot (e mërkurë), konferencë për media.Vendi: Partia Demokratike e Kosovës. Koha: 14:30″, thuhet në njoftim.
Tyson Fury dhe Oleksandr Usyk do të zhvillojnë rimeçin e tyre, pas duelit të parë të zhvilluar këtë muaj.
Ndeshja e Tyson Furyt me Oleksandr Usyk do të zhvillohet më 21 dhjetor në Riad, ka njoftuar kryetari i Autoritetit të Përgjithshëm të Argëtimit të Arabisë Saudite, Turki Alalshikh.
Usyk doli fitimtar nëpërmjet vendimit të ndarë kur rivalët u takuan në fillim të këtij muaji për t’u bërë kampioni i parë i padiskutueshëm i peshave të rënda që nga Lennox Lewis në 1999.
Ishte publikuar mirë në fillim të luftës se kontrata Fury-Usyk përfshinte një klauzolë rimeçi.
Duke shkruar në mediat sociale të mërkurën, Alalshikh tha: “Revanshi… është planifikuar tani më 21 dhjetor 2024 gjatë sezonit të Riadit. Bota do të shikojë përsëri një tjetër luftë historike. Përkushtimi ynë ndaj tifozëve të boksit vazhdon. Shpresojmë që t’ju pëlqejë”.
Presidenti i Turqisë, Recep Tayyip Erdogan, kritikoi ashpër Kombet e Bashkuara dhe i bëri thirrje “botës islamike” të reagojë pas sulmeve të fundit vdekjeprurëse izraelite në Gazë.
“OKB-ja nuk mundet ta mbrojë as stafin e vet. Çfarë po prisni që të veproni? Shpirti i OKB-së është i vdekur vdekur në Gazë”, tha Erdogan para ligjvënësve të partisë së tij, AKP, më 29 maj.
Deklaratat e Erdoganit vijnë në ditën kur Këshilli i Sigurimit i OKB-së do të takohet për të diskutuar për sulmet e fundit të Izraelit në një kamp në Rafah.
Sulmi i fundit në një kamp në perëndim të Rafahut të martën la të vrarë 21 persona, sipas zyrtarëve të Mbrojtjes Civile në Gazën e udhëhequr nga Hamasi, grupi palestinez i shpallur organizatë terroriste nga Shtetet e Bashkuara dhe Bashkimi Evropian.
Po ashtu, të dielën u vranë dhjetëra persona në një kamp në Rafah.
Presidenti turk po ashtu kritikoi shtetet me shumicë myslimane për dështim që të marrin një veprim të përbashkët sa i përket sulmeve izraelite.
“I kam disa fjalë që dua t’ia them botës islamike: çfarë po prisni që të merrni një vendim të përbashkët”, tha Erdogan.
“Izraeli nuk është vetëm kërcënim për Gazën, por për gjithë njerëzimin”, shtoi ai.
Sipas presidentit turk, asnjë shtet “më nuk është i sigurt pasi që Izraeli nuk respekton ligjin ndërkombëtar”, duke përsëritur akuzën e tij se Izraeli po kryen “gjenocid” në Gazë.
Që kur ka nisur lufta në Gazë mes Izraelit dhe Hamasit, Erdogan vazhdimisht ka kritikuar Izraelin për veprimet në këtë territor palestinez.
Erdogan po ashtu ka thënë se nuk e konsideron Hamasin organizatë terroriste dhe sipas tij, por sipas tij është një grup luftues për çlirimin dhe mbrojtjen e tokave palestineze./REL/
Deputeti nga radhët e Lidhjes Demokratike të Kosovë, Avdullah Hoti ka deklaruar se mosemërimi për gati një vit i një anëtari nga sindikatat në Bordin e Trustit Pensional është shkelje ligjore, që nuk duhet të kaloj pa dhënë përgjegjësi nga shkelësit e ligjit.
Ish-ministri Hoti ka shkruar në Facebook se të drejtat sindikale në Kosovë janë nëpërkëmbur nga Qeveria Kurti në vazhdimësi.
“Mos emërimi për gati një vit i anëtarit nga sindikatat në Bordin e Trustit Pensional është shkelje ligjore, që nuk duhet të kaloj pa dhënë përgjegjësi nga shkelësit e ligjit. Të drejtat sindikale në Kosovë janë nëpërkëmbur nga Qeveria Kurti në vazhdimësi. Reagimi i fundit i IKD-së është dëshmi shtesë për këtë. Një anëtar i Bordit të Trustit të Kursimeve Pensionale, i cili përfaqëson punëtorët dhe vjen nga sindikatat, nuk u emërua asnjëherë. Fillimisht, Trusti u la pa bord për disa muaj, ku për pasojë miliarda euro mbetën pa menaxhim adekuat. Kur u emërua bordi para gati një viti, nuk u përfshi edhe anëtari nga sindikatat. Arsyet që u dhanë për këtë ishin se asnjëri nga aplikantët nuk i plotësonte kushtet ligjore. Nga ajo kohë nuk është rishpallur konkursi”, ka shkruar ai.
Ai ka shtuar se: “Kjo neglizhencë nuk ka si të mos jetë e qëllimshme”.