Blog

Drejtoria Rajonale e Policisë në Pejë, gjatë vikendit të shtunën dhe të dielën ka sekuestruar 17 motoçikleta në kuadër të implementimit tё planit operativ “Motoçiklistët kundërvajtës”.

“Me datë 01/02.06.2024 nga njësitet e DRP Pejё, janё sekuestruar: Shtatëmbëdhjetë (17) motoçikleta tё llojeve tё ndryshme, ndërsa pёr kundërvajtësit janё lёshuar fletёgjoba pёr kundёrvajtjet: mos posedimi i lejёs pёr vozitje, mos posedimi i kategorisё pёrkatёse, ngasje e mjetit pa regjistrim dhe kundёrvajtje tjera”, thuhet në njoftimin e policisë.

Policia në Pejë ka bërë me dije se ky plan do tё vazhdoj tё implementohet edhe nё ditët nё vijim.

“Aktivitete dhe detyra të shumta policore, që janë të planifikuara në kuadër të Drejtorisё Rajonale tё Policisё në Pejë, do të vazhdojnë në mënyrë intensive në ditët në vijim, pa asnjë tolerim ndaj secilit kundërvajtës. Drejtoria Rajonale e Policisë ne Pejë, apelon tek te gjithë pjesëmarrësit ne komunikacion te respektojnë rregullat dhe shenjat e komunikacionit”, thuhet në njoftim.

Në kudër të zbatimit të strategjisë nacionale për luftimin dhe parandalimin e etheve hemorragjike krime kongo përkatësisht marrjen e masave preventive, Komuna e Malishevës është duke vazhduar me dezinsektimin e zonave endemike.

Sipas njoftimit të kësaj komune dezinsektimi gjatë kësaj fundjave është zhvilluar në qytetin e Malishevës, përkatësisht hapësirat më të frekuentuara dhe periferia e qytetit. Ndërsa është paralajmëruar se dezinsektimi do të vazhdoj edhe ditët në vijim, në zonat tjera.

“Shtabi komunal për menaxhimin e situatës me EHKK në Komunën e Malishevës, kërkon nga organet kompetente në nivel të vendit, që të marrin masat e nevojshme, sipas strategjisë nacionale për luftimin dhe parandalimin e EHKK, përkatësisht të bëhet repelimi i kafshëve, ndërsa Ministria e Shëndetësisë të aktivizoj Këshillin Ndërministror dhe të merret më seriozisht me menaxhimin e situatës me EHKK, jo vetëm në Komunën e Malishevës”, thuhet në njoftim.

Kujtojmë që në territorin e Komunës së Malishevës, që nga paslufta, e deri në vitin 2013, si pasojë e virusit që shkakton ethe hemorragjike, e që kryesisht bartet nga rriqra tek njeriu, kanë humbur jetën 18 qytetarë.

Policia e Kosovës ka bërë me dije se në një parking një veturë me targa vendore ka goditur tre këmbësor.

Rasti sipas policisë ka ndodhur më 2 qershor në rrugën Pejë-Prishtinë.

“Raportohet se në një parking, një veturë me targa vendore të cilën e drejtonte i dyshuari mashkull kosovar, ka goditur tre këmbësor që ishin afër një autobusi të parkuar”, thuhet në njoftim.

Si pasoje e aksidentit lëndime trupore kanë pësuar tre persona.

Derisa me vendim të prokurorit i dyshuari është dërguar në mbajtje.

Në vazhdën e ekspozimit të zonave të ndryshme turistike, kryeministri i Shqipërisë, Edi Rama të hënën ka publikuar pamje të plazhit Tushemisht në liqenin e Pogradecit.

Kryeministri shqiptar ka shkruar se plazhi është i gatshëm për sezonin veror.

“Mirëmëngjes dhe me plazhin ranor në Tushemisht të Pogradecit, ku gjithçka është gati për këtë sezon veror për të mirëpritur edhe më shumë turistë buzë liqenit, ju uroj një javë të mbarë”, ka shkruar Rama.

Kandidati i Frontit për Ndryshim, Arbër Pajaziti, ka shpallur fitoren si kryetar i Bujanocit, pas zgjedhjeve që u zhvilluan të dielën, raporton EO.

Përmes një shkrimi në rrjetin social Facebook, Pajaziti, ka falënderuar gjithë votuesit e Frontit për Ndryshim, të cilët i besuan rrugës së tyre.

“Faleminderit qytetarë të komunës së Bujanocit. Faleminderit plot 3371 herë për të gjithë ju që votuat Frontin për Ndryshim, që besuat në këtë rrugë e cila shpie drejt një të ardhme më të mirë. Faleminderit për 10.800 shqiptarë të komunës së Bujanocit që votuan për njërën nga 4 listat tona si motra në këto zgjedhje. Faleminderit Ju që përshkuat me mijëra kilometra nga vende të ndryshme të Evropës për të dhënë votën në atdheun tuaj. Bashkëvendas që punoni përkohësisht në Kosovë, faleminderit për mundin e treguar”, ka shkruar Pajaziti.

Pajaziti ka falënderuar edhe rivalët e tyre politik, për frymën demokratike gjatë fushatës, por edhe ditën e zgjedhjeve.

“Ju komisionerë, Ju ishit heronjtë tanë. Aktivistë dhe simpatizantë, angazhimi i Juaj është për çdo lëvdatë dhe meriton falënderime të panumërta. Falënderime edhe për rivalët tanë, të cilët si gjatë fushatës, ashtu edhe në ditën e zgjedhjeve, zgjodhën frymën demokratike të veprimit. Bashkombas të dashur, me këtë fitore na obliguat që të krijojmë një shumicë të re qeverisëse në Bujanoc. Atë edhe do ta bëjmë. Shumë shpejt. S’kemi kohë për të humbur, sepse na presin shumë punë. Vota e juaj është një amanet për të bërë një Bujanoc ndryshe. Gjithmonë në shërbinin tuaj!”, ka theksuar ai.

Një person është gjetur i shtrirë në rrugët e Mitrovicës me lëndime në kokë.

Viktima është dërguar në spitalin e Mitrovicës, ku mjeku kujdestar ka konstatuar vdekjen e tij.

“Raportohet se viktima mashkull kosovar është gjetur i shtrirë në trotuar me lëndime në kokë. Viktima është dërguar në spitalin e Mitrovicës, ku mjeku kujdestar ka konstatuar vdekjen e viktimës. Në vend ngjarje kanë dalë njësitet përkatëse. Me vendim të prokurorit trupi i pa jetë dërgohet në IML për obduksion”, thuhet në raportin e policisë.

Ndërkaq në raportin 24 orësh, vdekja është cilësuar si e dyshimtë.

Bashkësia Islame e Kosovës ka njoftuar se sot janë nisur 351 besimtarë, nga Prishtina, Lipjani, Fushë Kosova e Obiliqi, drejt haxhit.

“Sot, herët në mëngjes, nga Aeroporti Ndërkombëtar “Adem Jashari” në Prishtinë, 351 besimtarë nga Prishtina, Lipjani, Fushë Kosova dhe Obiliqi, janë nisur drejt vendeve të shenjta për ta kryer haxhin.”

Sot pritet të udhëtojnë edhe grupe tjera.

“Ky ishte grupi i tretë që udhëtoi. Sipas udhëheqësve të Haxhit në Kryesinë e Bashkësisë Islame të Kosovës, çdo gjë sa i përket fluturimeve është duke shkuar sipas planit të paraparë. Sot pritet që të udhëtojnë edhe grupet e tjera të besimtarëve, për të plotësuar kështu numrin prej 1576 besimtarë, që do ta kryejnë haxhin këtë vit nga Kosova.”