Legjenda e muzikës shqipe, Sabri Fejzullahu ka lansuar projektin e ri muzikor.
Kënga i është dedikuar të gjithë çifteve që do ta kurorëzojnë dashurinë me martesë.
“Dashni” është lansuar me një videoklip dhe të plotë mund ta dëgjoni në linkun më poshtë.
Kujtojmë që Sabriu është njëri nga këngëtarët më të kërkuar nga publiku.
Përgatiti: Sara Shehu
Në nëntor të 2023-tës, me vendim të Komunës së Prishtinës, filluan renovimet në disa Qendra të Mjekësisë Familjare.
Ndërkaq, brenda kësaj jave, renovimet kanë filluar edhe në QMF-në e Lagjes “Kalabria”.
Shërbimet mjekësore, banorët e këtyre dy lagjeve po i marrin në QMF-në në Dardani. Mirëpo, sipas tyre, stafi mjekësor nuk po i merr shpeshherë parasysh.
“Pak më herët isha në QMF në Dardani për një shërbim mjekësor, por më kthyen mbrapa, pasi punëtorët më thonë se nuk munden të më ofrojnë shërbime pasi që nuk jam banor i Dardanisë, domethënë shkova kot, e këtu shumë keq që është mbyllur QMF-ja vetëm për renovime, sepse këtu ka fëmijë të sëmurë, të moshuar”, tha Armend Metaj, pacient.
“Në QMF në Dardani isha po nuk kishte as staf mjekësor, pra mjekët nuk ishin aty për të na ofruar shërbime mjekësore, i njëjti hall ka qenë edhe në Kalabri”, tha Muhamet Metaj, pacient.
Mirëpo, ankesat e pacientëve prapa kamerave i kanë mohuar në Qendrën e Mjekësisë Familjare në Dardani.
Ndërsa, drejtori i Shëndetësisë në Prishtinë, Izet Sadiku, e ka konfirmuar për ATV-në, se ekziston marrëveshja me punëtorët shëndetësorë në QMF të Dardanisë, që derisa të përfundojnë renovimet në objektin në Kalabri, banorët të trajtohen aty.
Sidoqoftë, sipas të dhënave zyrtare, Komuna e Prishtinës ka një kontratë 3-vjeçare me një kompani private për të realizuar renovime në të gjitha Njësitë e Kujdesit Parësor Shëndetësor.
Presidentja e Kosovës, Vjosa Osmani, ka kërkuar nga komunat e Kosovëë të japin kontribut më të madh për të eleminuar dhunën mbi baza gjinore.
Vjosa Osmani në takim me Këshillin e Kryetarëve të Asociaionit të Komunave tha se është e domosdoshme që viktimat e dhunës mbi baza gjinore të jenë të përkrahura nga niveli lokal.
Presidentja Vjosa Osmani tha se parkrah kërkesën e komunave për buxhet shtesë që të rritet siguria në qendrat për punë social.
Në anën tjetër, kryetari i Asociacionit të Komunave të Kosovës, Agim Aliu, kritikoi qeverinë për mungesë bashkëpunimi, pasi tha se kërkesat e tyre nuk po trajtohen.
Pas fjalimeve hyrëse takimi i presidentes Osmani me kryetarët po vazhdon i mbyullur për media.
Lidhja Demokratike e Kosovës ka nënshkruar marrëveshje të garimit me Partinë Shqiptare Demokristiane të Kosovës për garën e ardhshme për zgjedhjet parlamentare të Republikës së Kosovës.
Kryetari i Lidhjes Demokratike të Kosovës, Lumir Abdixhiku ka theksuar se ky bashkëpunim është i zgjatur për 34 vitet e kaluara dhe frytet e një bashkëpunim të tillë lidhen me të gjitha arritjet historike të popullit të Kosovës për këto tre dekada e gjysmë.
“Sot së bashku me bashkëpunëtorët e LDK-së e nënshkruam marrëveshjen e garimit të përbashkët mes LDK-së dhe PSHDK-së në garën e ardhshme për zgjedhje parlamentare në Republikën e Kosovës. Ndjehemi të gjithë mirë, sepse është një ditë e veçantë për LDK-në, por edhe për bashkimin e madh të spektrit të djathtë brenda listës zgjedhore së LDK-së. Për bashkim është natyror, është autokton, origjinal i LDK-së, është një bashkëpunim i zgjatur për 34 vitet e kaluara dhe frytet e një bashkëpunim të tillë lidhen me gjitha arritjet historike të popullit të Kosovës për këto tre dekada e gjysmë”, tha Abdixhiku.
I lumtur me këtë bashkëpunim është shprehur edhe kryetari i PShDK-së, Zef Morina, i cili ka thënë se për këtë parti sot është ditë feste. Ndërsa ka shtuar se presin fitore në zgjedhjet e ardhshme.
“Sot veç e vazhduam bashkëpunimin me LDK-në, bashkëpunim i cili është qe 30 vite. Ka filluar me presidentin Rugova dhe po vazhdon me kryetarin Abdixhiku. Për PShDK-në është një festë sot, sepse do të jetë një ringritje për demokristianët, dhe PShDK dhe LDK si parti të djathta duhet të ecin bashkë përpara, fitore e jona gjithsesi do të jetë e arritshme me LDK-në, shpresojmë të kemi fitore”, ka thënë Morina.
Bashkimi Evropian është duke shqyrtuar edhe si t’i qaset dialogut për normalizimin e marrëdhënieve mes Kosovës dhe Serbisë, por edhe kandidatët potencialë për ta ndërmjetësuar atë.
Prej se është konfirmuar se përfaqësuesi i tashëm i posaçëm i BE-së në këtë dialog, Mirosllav Lajçak, është emëruar ambasador i BE-së në Zvicër, ku duhet të nisë mandatin më 1 shtator, kanë nisur edhe spekulimet se kush do të jetë pasardhës i tij.
Por, burimet diplomatike në BE thonë për Radion Evropa e Lirë se “më e rëndësishme se kush do të jetë në këtë post, është se çfarë qasjeje do të kenë BE-ja dhe strukturat e saj të reja – që do të dalin pas zgjedhjeve evropiane – ndaj këtij procesi.
Sipas burimeve diplomatike, edhe zgjedhja e pasardhësit të Lajçakut, në një mënyrë, është e lidhur me zgjedhjet evropiane, që do të bëhen këtë verë.
Këto burime thonë se përfaqësuesi i lartë i BE-së për politikë të jashtme dhe siguri, Josep Borrell, nuk do të jetë ai që do ta emërojë pasardhësin e Lajçakut në postin e të dërguarit të posaçëm për dialogun mes Kosovës dhe Serbisë, por se kjo do t’i lihet shefit apo shefes së ardhshme të politikës së jashtme të BE-së.
“Ne jemi tash në një fazë ku po qarkullojnë emra të kandidatëve potencialë për pasardhës të Lajçakut në rolin e ndërmjetësuesit në dialog. Por, do të presim që, së pari, të emërohet përfaqësuesi i lartë i BE-së për politikë të jashtme dhe siguri për mandatin e ardhshëm pesëvjeçar. Pasi që ai është edhe udhëheqës i dialogut në nivel të lartë, është logjike që të ketë mundësi të vendosë se kë duhet ta emërojë në rolin e të dërguarit të posaçëm për dialog“, thotë një diplomat i BE-së.
Emërimi i përfaqësuesit të lartë është një proces që mund të zgjatet, sepse lidhet me emërimet në postet e tjera udhëheqëse të BE-së, për të cilat duhet të ketë një balancë mes grupimeve partiake në BE dhe mes vendeve anëtare.
Menjëherë pas përfundimit të zgjedhjeve për Parlamentin Evropian, që do të zhvillohen nga data 6 deri më 9 qershor, udhëheqësit e vendeve anëtare do të tentojnë të merren vesh për emërimin e presidentit të Komisionit Evropian. Për këtë, duhet ta kenë shumicën e kualifikuar në Këshillin Evropian. E, pasi të merren vesh për këtë pozitë, duhet ta zgjedhin presidentin e Këshillit Evropian dhe përfaqësuesin e lartë.
Për këtë qëllim, BE-ja do t’i mbajë dy samite – një të jashtëzakonshëm dhe joformal më 17 qershor dhe një formal më 27 dhe 28 qershor.
“Synim do të jetë që e tërë paketa të dakordohet mes liderëve të vendeve anëtare para fundit të qershorit. Kjo do t’i mundësonte Parlamentit Evropian që t’i konfirmonte këto emërime në seancën e korrikut. Përndryshe, do të duhej të kalonin në seancat e vjeshtës dhe kjo do të krijonte vonesa“, thotë një diplomat i BE-së.
Nëse Ursula von der Leyen, presidentja e tashme e Komisionit Evropian, e fiton edhe një mandat në këtë post – e ajo është favorite pasi është kandidate e grupit më të madh politik në Parlamentin Evropian, i njohur si EPP – atëherë pritjet janë që presidenti i Këshillit Evropian, si pasardhës i Charles Michelit, të jetë nga radhët e liberalëve.
Pra, vetëm pasi të konfirmohet se kush do të jetë përfaqësues i lartë i BE-së për politikë të jashtme dhe siguri, do të emërohet edhe pasardhësi i Lajçakut si ndërmjetësues i dialogut Kosovë-Serbi. Kjo, në rastin më të mirë, mund të ndodhë gjatë verës.
Burimet diplomatike në BE nuk presin të ketë vakum, sepse, sipas tyre, nëse pasardhësi i tij nuk do të jetë i emëruar deri në fund të gushtit, Lajçakut do t’i zgjatet mandati për disa muaj.
Në mesin e kandidatëve që janë përmendur deri tash si pasardhës të mundshëm të tij është ish-presidenti i Sllovenisë, Borut Pahor. Vetë ai dhe Ministria e Jashtme e Sllovenisë kanë konfirmuar se ka interes për këtë post.
Por, duket se në strukturat e BE-së është duke u kërkuar një profil tjetër i politikanit, që do ta merrte rolin për të vazhduar ndërmjetësimin e dialogut.
Në mesin e kandidatëve potencialë, nga burimet diplomatike në BE përmenden edhe ish-ministri i Jashtëm i Finlandës, Pekka Haavisto, dhe diplomati danez, Peter Sorensen, të cilët kanë edhe përvojë nga rajoni i Ballkanit Perëndimor.
Burimet e BE-së thonë se, kushdo që të jetë në atë post dhe pa marrë parasysh se kush do të jetë përfaqësues i lartë i BE-së për politikë të jashtme dhe siguri, do të duhet të insistojë në zbatimin e të gjitha marrëveshjeve që Kosova dhe Serbia kanë arritur deri më tash në dialog.
Ky, në fakt, ka qenë vazhdimisht edhe qëndrim i vendeve anëtare të BE-së, edhe i partnerëve ndërkombëtarë, si Shtetet e Bashkuara të Amerikës dhe Britania e Madhe.
Burimet nuk mohojnë se ka një dozë zhgënjimi me mungesën e progresit më të madh në procesin e deritashëm të dialogut. Por, vetë BE-ja, përgjegjësinë për këtë ua lë palëve në dialog.
Kosova dhe Serbia janë në bisedime për normalizimin e marrëdhënieve nga viti 2011.
Procesi, i ndërmjetësuar nga Bashkimi Evropian dhe i mbështetur nga Shtetet e Bashkuara, ka nisur fillimisht për çështje teknike, për të kaluar më pas në nivel politik.
Nga dhjetëra marrëveshjet e arritura deri më tash, shumica nuk janë zbatuar.
Nën Lajçakun, në vitin 2023, është arritur edhe Marrëveshja drejt normalizimit të marrëdhënieve, e cila u bë e njohur si Marrëveshja e Ohrit, por edhe ajo ka mbetur kryesisht e pazbatuar./REL/
Gresa Caka-Nimani është zgjedhur edhe për një mandat Kryetare e Gjykatës Kushtetuese të Kosovës.
Në njoftimin nga Kushtetuesja, thuhet se ajo mori votat e mjaftueshme nga gjyqtarët e kësaj Gjykate.
“Në seancën administrative të mbajtur më 5 qershor 2024, në përputhje me Nenin 114, pika 5, të Kushtetutës së Republikës së Kosovës, gjyqtarët e Gjykatës Kushtetuese të Kosovës kanë rizgjedhur kryetaren aktuale të Gjykatës, znj. Gresa Caka-Nimani, për një mandat të dytë në krye të Gjykatës Kushtetuese”, thuhet në njoftimin e gjykatës.
Kreu i ekzekutivit, Albin Kurti, përmes një video-mesazhi u është drejtuar bashkatdhetarëve që jetojnë nëpër shtete anëtare të Bashkimit Evropian e që kanë të drejtë vote.
Këtë të diel, më 9 qershor, në 27 vende anëtare të Bashkimit Evropian do të mbahen zgjedhjet evropiane, e sipas kryeministrit të Kosovës, Albin Kurti, të njëjtat mbase janë më të rëndësishmet që prej zgjedhjeve të para evropiane të vitit 1979.
Kreu i ekzekutivit u është drejtuar bashkatdhetarëve që jetojnë nëpër shtete anëtare të Bashkimit Evropian e që kanë të drejtë vote.
Në mesazhin e Kurtit theksohet vlera pse kësaj radhe zgjedhjet janë aq të rëndësishme dhe përcaktuese për të ardhmen e Evropës.
“Së pari ato ndodhin në rrethana ku një luftë e drejtpërdrejt po ngjanë mu në Evropë, në Ukrainë pas agresionit rus. Kjo luftë u nis prej një ideologjie fashiste nga Kremlini i Putinit… Së dyti i keni parasysh ndasitë që ekzistojnë brenda BE-së dhe përbrenda vendeve anëtare, përmes këtyre ndasive, Rusia duke u mbështetur gjithashtu në disa rryma politike ekstremiste ose liderë në pushtet të këtyre vendeve, ka ushtruar me vite një ndikim dëmtues. Qëllimi i Rusisë dhe aleatëve të saj evropianë jashtë dhe brenda Be-së është i qartë: dobësimi i BE-së, dobësimi i projektit të zgjerimit të BE-së dhe të NATO-s, ndërsa ndaj neve, veçanërisht në Kosovë synohet pengesa e çdo perspektive integruese. Kështu që së treti, Kosova si vend aplikoi për anëtarësim në BE dhe si vend që ka për qëllim strategjik kryesor integrimin në BE dhe në NATO, nuk mund të mos marrë pjesë e të mos kontribuojë në çfarëdo forme në ruajtjen e këtyre organizatave dhe vlerave demokratike që ndajmë me to”, ka thënë Kurti.
Sipas tij, vota e bashkatdhetarëve në zgjedhjet për Parlamentin e ri Evropian duhet të jetë kontributi kundër rreziqeve që e kërcënojnë kohezionin dhe unitetin e BE-së.
“Prandaj vota juaj në zgjedhjet për Parlamentin e ri Evropian të 9 qershorit duhet të jetë përgjigja jonë, kontributi ynë kundër rreziqeve që e kërcënojnë kohezionin dhe unitetin e BE-së”.
Zyra e UNICEF-it në Kosovë, në bashkëpunim me Ambasadën e Suedisë në Kosovë dhe partnerin implementues “PEN,” shënoi Ditën Botërore të Mjedisit, ku të pranishëm 100 ambientalistë të rinj bën thirrje për veprim të menjëhershëm nga vendimmarrësit dhe akterët tjerë në mbrojtje të mjedisit, raporton EO.
Shënimi i Ditës Botërore të Mjedisit u pasua nga një ekspozitë e heshtur e organizuar nga 100 të rinj, duke nxjerrë në pah çështje urgjente, si ndotja e ajrit, shpyllëzimi, mbeturinat, përmbytjet dhe valët e të nxehtit. Secili instalacion në ekspozitë barte një mesazh prekës, duke kërkuar veprime të menjëhershme në mbrojtje të planetit tonë. Ekspozita ishte një paraqitje në realitet e shprehjes “një fotografi sa një mijë fjalë,” pasi që vuri në pah shqetësimin e të rinjve për gjendjen aktuale të mjedisit. Për më tepër, mundësoi edhe një platformë fuqizuese për të rinjtë që t’i ndajnë përvojat e tyre personale për ndotjen e ajrit dhe çështjet tjera mjedisore. Të rinjtë u bën thirrje bashkëmoshatarëve të tyre, shoqërisë kosovare, institucioneve lokale dhe kombëtare që të ndërmarrin veprime të menjëhershme që së bashku t’i zvogëlojnë emetimet e gazeve serrë.
Kryetari i Prishtinës, Përparim Rama, tha se janë duke punuar përmirësimin e kushteve më të mira për qytetarët. Ai tha se ambienti i pastër është një mision që po përmbushet nga komuna që ai e drejton.
“Kryeqyteti është duke krijuar politika dhe vizioni ynë është në përputhje të zhvillimit të qëndrueshëm dhe më mbrojtje të mjedisit. Jemi duke ndërmarr hapa për zona për këmbësor që të stimulohet ecja dhe transporti alternativ. Po ashtu, edhe zgjerimi i rrjetit të ‘Termokos’ që është një nga faktor për ruajtje të ambientit. Ju keni pa edhe projekte të ndryshme të cilat lidhin zonat në kryeqytet për një qasje lë lehtë dhe të sigurt. Janë iniciativa të ndryshme sikurse edhe ardhja e autobusëve të rinj, të cilat do të ndikojnë në përdorin sa më shumë të trafikut urban. Ambienti i pastër është një është një mision i cili po përmbushet nga Komuna e Prishtinës”, tha Rama.
Ambasadori i Suedisë në Kosovë, Jonas Westerlund, tha se ka vizituar Prevallën javën e kaluar derisa theksoi rëndësinë e një ambienti të pastër.
“Atje njerëzit bënin piknik dhe më është kujtuar fëmijëria në Suedi kur kemi qenë fëmijë që bënim piknikë të tilla. Falënderoj UNICEF-in për punën dhe të gjithë që punojnë për një ambient të pastër”, tha ai.
Shefi i UNICEF-it në Kosovë, Benjamin Fischer, tha se ajri në Prishtinë është i ndotur e sidomos dimrit, duke shtuar se është e rëndësishme të punohet në këtë drejtim.
“UNICEF-i, ka një impakt të rëndësishëm, por rreth 99 foshnja në botë vdesin për shkak të ajrit jo të pastër, kjo është alarmante. Klimaksi po ndryshon fëmijët, duhet të gjejmë zgjidhje dhe jam i lumtur që sot jemi këtu. Inkurajoj secilin njeri që të marrë masa për një ambient sa më të pastër, të kontribuojë për tjerët por edhe veten”, tha ai.
Ministrja e Drejtësisë, Albulena Haxhiu, i ka dalë në mbrojtje shefes së deputetëve të Lëvizjes Vetëvendosje, Mimoza Kusari-Lilës pas bisedës telefonike me kriminelin serb, Milan Radojiçiq, raporton EO.
Sipas Haxhiut, kjo situatë është përpjekje e tërheqjes së vëmendjes nga dështimi për rrëzimin e Qeverisë Kurti, ndërsa kritikon opozitën për mosdakordim rreth mënyrës për të shkuar në zgjedhje.
“Një opozitë që një terrorist qe ka bërë sulm terrorist në Republikën e Kosovës nuk po kërkojnë asnjëherë nga Serbia që ta dorëzojnë atë, nuk kanë kërkuar nga partnerët ndërkombëtar t’i bëjnë presion Serbisë që t’i dorëzoj terroristet, jo vetëm Radojiçiqin. Tash paskan kërkuar hetim ndaj Mimoza Kusarit, unë mendoj qe kjo është një përpjekje për të larguar vëmendjen nga një dështim spektakolar që e patën, për rrëzim të qeverisë apo shkuarje në zgjedhje. Opozita duhet të jetë e bashkuar por ju e keni parë, njëra kërkon dorëheqje të qeverisë e tjetra shpërndarje të Kuvendit”, u shpreh Haxhiu.
Është hapur edicioni i 24-t i Panairit të Librit në Prishtinë. Tema e sivjetme është “Përgjigjja është libri”, ndërsa do të jetë i hapur për vizitorë çdo ditë nga 9:00 deri në orën 21:00 të dielën kur përfundon ky edicion, raporton Ekonomia Online.
Kryetari i Shoqatës së Botuesve të Kosovës, Edon Zeneli, ka deklaruar se në panair pritet të marrin pjesë rreth 100 botues nga Kosova, Shqipëria, Maqedonia e Veriut dhe diaspora.
Ai ka thënë se janë rreth dy mijë tituj të rinj. Zeneli ka shprehur pritjet që Panairin ta vizitojnë rreth 40 mijë vizitorë.
“Sot puna e netëve të vona e redaktorëve e mundi i madh i botuesve është materializuar në mjetin magjik të quajtur libër afrohet te lexuesi. Falënderoj përkrahësit e panairit MKRS-në, MAShTI-n, sot ndihmohen botuesit e shkrimtarët. Falënderoj botuesit që punojnë për të formuar njerëzit e shoqërinë, uroj që ky panair të jetë festë për ju dhe ne”, tha Zeneli.
Ministri i Kulturës, Rinisë dhe Sportit, Hajrullah Çeku, e konsideroi kënaqësi me pa numrin e lexuesve dhe librat e rinj që tashmë janë shtuar në këtë panair.
“Përgëzime për ekipin e panairit, ta gëzojnë dhe shijojmë panairin”, tha Çeku.
Ministrja e Arsimit, Arbërie Nagavci, përgëzoi për moton e panairit të këtij viti, duke shtuar se është pozitive shtimi i numrit të librave për përmirësim në arsim.
Drejtoresha e Kulturës në Kryeqytet, Sibel Halimi, tha se panairi i librit është një simbol i përpjekjeve tona të përbashkëta për të krijuar mendime të reja, ku kulturat na bashkohen.
“Është një mundësi për të mbështetur talentet e rinj ta shfrytëzojmë këtë moment për të lexuar më shumë dhe ndarë njohuritë tona”, tha Halimi.
