ATV

Blog

  • Yll Limani mysafir në natën e tetë të protestës “Jo në emrin tim”

    Yll Limani mysafir në natën e tetë të protestës “Jo në emrin tim”

    Këngëtari Ylli Limani do të jetë mysafir i mbrëmjes në ditën e tetë të protestës “Jo në emrin tim”, që mbahet sonte, më 23 shtator, nga ora 21:00, në sheshin “Skënderbeu” në Prishtinë.

    Para protestuesve do të flasin këngëtarja Leonora Jakupi dhe gazetari e veterani i luftës çlirimtare, Resul Sinani.

    Në program janë edhe organizatori i protestës, Çlirim Haziri, studentet Aolta Bajrami dhe Alma Ramaj si dhe aktivisti Arianit Elshani.

    Yll Limani mysafir në natën e tetë të protestës “Jo në emrin tim”

    Protesta kundërshton vendimin e Gjykatës Speciale në Hagë ndaj ish-krerëve të UÇK-së.

  • Helikopteri rus hyn në hapësirën ajrore të Polonisë, qëndron 42 sekonda – aktivizohen avionët luftarakë

    Helikopteri rus hyn në hapësirën ajrore të Polonisë, qëndron 42 sekonda – aktivizohen avionët luftarakë

    Një helikopter ushtarak rus i tipit Mi-8 ka hyrë për pak çaste në hapësirën ajrore të Polonisë, pasi ka kaluar nga enklava ruse e Kaliningradit, njoftoi të mërkurën Komanda Operative e ushtrisë polake.

    Sipas autoriteteve polake, helikopteri ka qëndruar 42 sekonda brenda hapësirës ajrore të Polonisë, duke depërtuar deri në rreth 300 metra në territorin ajror të vendit.

    Pas incidentit, Polonia ka aktivizuar aeroplanët luftarakë, ndërsa forcat dhe mjetet e mbrojtjes ajrore në tokë janë vendosur në gatishmëri.

    Komanda Operative e Ushtrisë Polake ka deklaruar se, bazuar në vlerësimin e saj, natyra e incidentit tregon se Rusia po teston sërish gatishmërinë e mbrojtjes ajrore polake.

    Polonia, si anëtare e NATO-s, ka rritur nivelin e gatishmërisë ndaj incidenteve të mundshme në hapësirën e saj ajrore që lidhen me luftën e Rusisë në Ukrainë.

    Incidenti ndodh në një periudhë kur vendet e krahut lindor të NATO-s po monitorojnë nga afër lëvizjet ajrore pranë kufijve të tyre.

  • Gjini takon ambasadorin britanik, diskutojnë për vendimin në Hagë dhe situatën politike

    Gjini takon ambasadorin britanik, diskutojnë për vendimin në Hagë dhe situatën politike

    Kreu i Aleancës, Ardian Gjini, ka takuar ambasadorin e Mbretërisë së Bashkuar në Kosovë, Jonathan Hargreaves, me të cilin ka diskutuar për situatën politike pas vendimit të Dhomave të Specializuara në Hagë, si dhe zhvillimet kushtetuese e politike në Kosovë.

    Gjini ka bërë të ditur se gjatë takimit e ka njoftuar ambasadorin britanik se Aleanca mbetet konsistente në mbrojtjen e interesit shtetëror dhe demokracisë.

    Ai ka shprehur gjithashtu mirënjohje për rolin dhe angazhimin e ambasadorit Hargreaves, si dhe për mbështetjen e vazhdueshme të Mbretërisë së Bashkuar ndaj Kosovës.

    “E njoftova se Aleanca mban konsistencën e saj në mbrojtje të interesit shtetëror dhe demokracisë.Ambasadorin Hargreaves e falënderova për rolin e tij aktiv dhe mbështetjen e vazhdueshme të Mbretërisë së Bashkuar ndaj Kosovës.”, thuhet tutje në njoftim.

  • Deputeti i Aleancës: U dështoi loja pushtetarëve

    Deputeti i Aleancës: U dështoi loja pushtetarëve

    Deputeti i Aleancës, Burim Ramadani, ka reaguar pas vendimit të Gjykatës Kushtetuese lidhur me konstituimin e Kuvendit, duke thënë se vendimi i saj rrëzoi veprimet e ndërmarra nga Vetëvendosja gjatë periudhës nga 8 gushti deri më 13 shtator.

    Ramadani ka theksuar se Kushtetuta nuk mund të trajtohet si dokument këshillues, ndërsa afatet kushtetuese, sipas tij, duhet të respektohen.

    Ai ka thënë se Gjykata Kushtetuese ka konstatuar se Kuvendi është konstituuar pas skadimit të afatit 30-ditor dhe se ka përcaktuar edhe pasojat kushtetuese të këtij tejkalimi.

    Portimi i plotë:

    U dështoi loja pushtetarëve!

    Le ta mësojnë këta pushtetarët: Kushtetuta nuk është cope letre këshilluese dhe afatet kushtetuese nuk janë dekor.

    Gjykata Kushtetuese konstatoi qartë se Kuvendi është konstituuar pas skadimit të afatit 30 ditësh. Madje, edhe përcaktoi pasojat kushtetuese të këtij tejkalimi.

    Deri më 6 tetor ose zgjedhet Presidenti ose shkohet në zgjedhje.

    Një dështim total i lojës së pushtetarëve!

    Krejt çka kanë bërë nga 8 gushti e deri më 13 shtator, Gjykata ua hodhi poshtë!

  • Kushtetuesja vendos për ankesat e PDK-së: Konstituimi i Kuvendit ishte me vonesë, formimi i Qeverisë s’është antikushtetues

    Kushtetuesja vendos për ankesat e PDK-së: Konstituimi i Kuvendit ishte me vonesë, formimi i Qeverisë s’është antikushtetues

    Gjykata Kushtetuese ka dhënë verdiktin për kërkesat e PDK-së lidhur me konstituimin e Kuvendit dhe zgjedhjen e Qeverisë.

    Kushtetuesja ka konstatuar se konstituimi i Kuvendit dhe formimi i Qeverisë janë në përputhje me Kushtetutën. Po ashtu, Gjykata ka përcaktuar se afati për zgjedhjen e presidentit është deri më 6 tetor.

    Gjykata ka konstatuar se Kuvendi i Kosovës është konstituuar pas kalimit të afatit kushtetues prej 30 ditësh, por ka thënë se kalimi i 30-ditëshit për konstituim ka për pasojë fillimin e rrjedhjes së afateve kushtetuese për zgjedhjen e presidentit, kur posti i presidentit është vakant dhe për zgjedhjen e Qeverisë.

    “Të konstatojë që Kuvendi i Republikës së Kosovës është konstituuar pas kalimit të afatit tridhjetë (30) ditor, të përcaktuar në paragrafin 1 të nenit 66 [zgjedhja dhe mandati] të Kushtetutës së Republikës së Kosovës. Të konstatojë që kalimi i afatit tridhjetë (30) ditor për konstituimin e Kuvendit të Republikës së Kosovës, të përcaktuar në paragrafin 1 të nenit 66 [zgjedhja dhe mandati] të Kushtetutës së Republikës së Kosovës, ka për pasojë fillimin e rrjedhjes së afateve kushtetuese për zgjedhjen e Presidentit të Republikës së Kosovës, kur posti i presidentit është vakant dhe për zgjedhjen e Qeverisë së Republikës së Kosovës sipas neneve 86 [zgjedhja e Presidentit], 95 [zgjedhja e Qeverisë] dhe nënparagrafëve 1 dhe 3, paragrafit 1 të nenit 82 [shpërndarja e Kuvendit] të Kushtetutës së Republikës së Kosovës”, thuhet në njoftimin e Gjykatës.

    Gjykata ka kërkuar gjithashtu që deputetët të zgjedhin sa më shpejt nënkryetarin e Kuvendit nga radhët e grupit të dytë më të madh parlamentar.

    “iv. të konstatojë që deputetët e Kuvendit të Republikës së Kosovës duhet që sa më parë të zgjedhin nënkryetarin e Kuvendit të Republikës së Kosovës nga radhët e grupit të dytë më të madh parlamentar, në pajtim me paragrafin 3 të nenit 67 [zgjedhja e kryetarit dhe nënkryetarëve] të Kushtetutës së Republikës së Kosovës;”

    Sa i përket qeverisë së zgjedhur më 13 shtator, gjykata ka konstatuar se vendimi për zgjedhjen e saj nuk është në kundërshtim me nenin 95 të kushtetutës.

    “v. të konstatojë që vendimi [nr. 11-v-007] i 13 shtatorit 2026 i Kuvendit të Republikës së Kosovës për zgjedhjen e Qeverisë së Republikës së Kosovës nuk është në kundërshtim me nenin 95 [zgjedhja e Qeverisë] të Kushtetutës së Republikës së Kosovës;”

    Në vendim përcaktohet edhe afati për zgjedhjen e presidentit. Sipas gjykatës, afati 60-ditor ka filluar më 8 gusht 2026 dhe përfundon më 6 tetor 2026.

    “vi. të konstatojë që afati gjashtëdhjetë (60) ditor për zgjedhjen e Presidentit të Republikës së Kosovës, sipas nënparagrafit 3, paragrafit 1 të nenit 82 [shpërndarja e Kuvendit] të Kushtetutës së Republikës së Kosovës ka filluar më 8 gusht 2026 dhe përfundon më 6 tetor 2026;”

    Gjykata ka refuzuar kërkesën për masë të përkohshme dhe ka urdhëruar komunikimin e aktgjykimit me palët dhe publikimin e tij në gazetën zyrtare.

    Në fund, gjykata ka përcaktuar se aktgjykimi hyn në fuqi në ditën e publikimit të tij nga Gjykata Kushtetuese.

    “x. të konstatojë që ky aktgjykim hyn në fuqi në ditën e publikimit të tij nga gjykata Kushtetuese e Republikës së Kosovës.”/Telegrafi/

  • 6 tetori, afati i fundit për zgjedhjen e Presidentit

    6 tetori, afati i fundit për zgjedhjen e Presidentit

    Gjykata Kushtetuese ka konstatuar se afati 60-ditor për zgjedhjen e Presidentit të Republikës së Kosovës ka filluar më 8 gusht 2026 dhe përfundon më 6 tetor 2026.

    Ky afat përcaktohet në bazë të nënparagrafit 3 të paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës.

    Sipas njoftimit të Gjykatës Kushtetuese, afati kushtetues për zgjedhjen e Presidentit ka nisur të rrjedhë më 8 gusht dhe përfundon më 6 tetor 2026.

    “TË KONSTATOJË që afati gjashtëdhjetë (60) ditor për zgjedhjen e Presidentit të Republikës së Kosovës, sipas nënparagrafit 3, paragrafit 1 të nenit 82 [Shpërndarja e Kuvendit] të Kushtetutës së Republikës së Kosovës ka filluar më 8 gusht 2026 dhe përfundon më 6 tetor 2026”, thuhet në njoftimin e Gjykatës Kushtetuese.

  • Donjeta Sadiku siguron medaljen evropiane, synon finalen

    Donjeta Sadiku siguron medaljen evropiane, synon finalen

    Boksierja kosovare Donjeta Sadiku ka siguruar medalje në Kampionatin Evropian, pasi ka triumfuar bindshëm në çerekfinale.

    Sadiku ishte përballë holandezes Maud van der Toorn, ndaj së cilës shënoi fitore të pastër 5:0, duke siguruar kështu kalimin në gjysmëfinale dhe medaljen evropiane në kategorinë deri në 60 kilogramë.

    Por rrugëtimi i saj nuk ndalet këtu. Për një vend në finale, Sadiku do të përballet me rusen Kristina Kuluhova, e cila garon për Serbinë.

    Kjo do të jetë një tjetër përballje mes dy boksierëve që tashmë njihen mirë. Sadiku e kishte mposhtur Kuluhovën edhe në finalen e Lojërave Mesdhetare “Taranto 2026”.

    Tani, boksierja kosovare do të kërkojë ta përsërisë suksesin dhe të sigurojë një tjetër fitore ndaj Kuluhovës, që do ta dërgonte në finalen e Kampionatit Evropian dhe do ta mbante në garë për medaljen e artë.

    Sadiku tashmë e ka të garantuar medaljen, ndërsa synimi i radhës është finalja.

  • Kosova dhe ShBA-ja forcojnë partneritetin në mbrojtje, synohet avancimi i kapaciteteve të FSK-së

    Kosova dhe ShBA-ja forcojnë partneritetin në mbrojtje, synohet avancimi i kapaciteteve të FSK-së

    Punëtoria vjetore M2M në Kosovë ritheksoi partneritetin e fuqishëm ndërmjet Kosovës dhe Shteteve të Bashkuara të Amerikës në fushën e mbrojtjes, si dhe rolin e rëndësishëm të Gardës Kombëtare të Ajovës.

    Kështu deklaron Ministria e Mbrojtjes, në njoftimin e saj për organizimin e punëtorisë.

    Gjatë punëtorisë u diskutuan prioritetet e përbashkëta dhe hapat konkretë për avancimin e kapaciteteve dhe bashkëveprimin e Forcës së Sigurisë së Kosovës me partnerët.Ministri i Mbrojtjes, Ejup Maqedonci, theksoi se do të fokusohen për të shndërruar planet e përbashkëta në veprime konkrete.

    “Së bashku, po ndërtojmë një Forcë më të aftë, profesionale, moderne dhe të ndërveprueshme me partnerët tanë. Fokusi ynë mbetet i qartë: t’i shndërrojmë planet e përbashkëta në veprime konkrete dhe ta avancojmë partneritetin tonë në një nivel të ri”, u shpreh ministri.

  • Daku: Objektivi ynë është vendi i parë në grup, synojmë Euro 2028

    Daku: Objektivi ynë është vendi i parë në grup, synojmë Euro 2028

    Sulmuesi i Kombëtares së Shqipërisë, Mirlind Daku, ka folur sot, të mërkurën, në konferencën zyrtare për media të mbajtur në “Shtëpinë e Futbollit”, ku ka komentuar grumbullimin e kuqezinjve, konkurrencën në repartin ofensiv dhe objektivat e skuadrës.

    Daku u shpreh i lumtur që është pjesë e Kombëtares, duke theksuar se është gjithmonë një nder të përfaqësosh Shqipërinë. Sulmuesi kuqezi tha se synon të japë maksimumin nëse i jepet mundësia për të luajtur, ndërsa objektivi kryesor i skuadrës mbetet fitimi i ndeshjeve dhe sigurimi i vendit të parë në grup.

    “Si gjithmonë, është nder të jesh pjesë e Kombëtares. Për këto arsye ftohemi edhe ne sulmuesit, për të shënuar gola dhe shpresoj që ta vazhdoj këtë cikël të ri. Të shënojmë gola, por më e rëndësishmja është të fitojmë dhe t’i kalojmë sa më mirë këto katër ndeshje”, u shpreh Daku.

    Sa i përket konkurrencës në sulm, 27-vjeçari e konsideron atë pozitive për skuadrën. Ai vlerësoi paraqitjet e lojtarëve të tjerë ofensivë, duke theksuar se një konkurrencë e shëndetshme ndihmon Kombëtaren të ketë në dispozicion futbollistë në formën e tyre më të mirë.

    “Është mirë kur ka konkurrencë brenda skuadrës. Edhe çunat që kanë ardhur vijnë pas një fillimi shumë të mirë të sezonit, kanë shënuar gola dhe kjo është gjë e mirë. Na duhet të kemi lojtarë që janë në momentin e tyre. Unë do të pres momentin tim dhe, nëse do të më jepet mundësia, do të jap më të mirën”, deklaroi sulmuesi.

    Daku u ndal edhe te objektivat e Kombëtares, duke lidhur synimin për vendin e parë në grup me rrugëtimin drejt Euro 2028. Sipas tij, kuqezinjtë duhet të fokusohen maksimalisht te ndeshjet e ardhshme, të cilat i konsideron tepër të rëndësishme.

    “Vetë fakti që ne synojmë vendin e parë flet për Euro 2028. Rruga në Nations League na çon drejt Euro 2028. Për ne objektivi kryesor është të jemi të parët dhe të vazhdojmë ato dy ndeshje që janë si finale”, tha Daku.

    Sulmuesi shqiptar gjithashtu bëri të ditur se është në gjendje të mirë fizike dhe 100 për qind i gatshëm për të dhënë kontributin e tij për Kombëtaren. Ai sqaroi se mungesa e aktivizimit me ekipin e ri nuk ka ardhur për shkak të ndonjë dëmtimi, por është vendim i trajnerit.

    “Unë jam 100% i gatshëm për Kombëtaren, kam qenë gjithmonë. Me ekipin e ri nuk kam luajtur, por nuk vij pas ndonjë dëmtimi. Është zgjedhja e trajnerit për të vazhduar me lojtarët që ka pasur”, u shpreh ai.

    Në fund, Daku foli edhe për përshtypjet e para nga trajneri Maran, duke vlerësuar mënyrën se si po përfshihen të gjithë lojtarët në skuadër. Sipas tij, secili futbollist po e ndjen rëndësinë që ka brenda grupit.

    “Tani po ndjejmë se secili lojtar ka rëndësinë e vet në skuadër dhe kjo më ka bërë të ndihem mirë. Për të tjerat, presim ndeshjet”, përfundoi Mirlind Daku.

    Kombëtarja shqiptare synon të shfrytëzojë ndeshjet e radhës për të avancuar drejt objektivave të saj, me vendin e parë në grup si një prej synimeve kryesore.

  • UNICEF në Kosovë nënshkruan partneritete me gjashtë komuna për përmirësimin e jetës së fëmijëve

    UNICEF në Kosovë nënshkruan partneritete me gjashtë komuna për përmirësimin e jetës së fëmijëve

    UNICEF në Kosovë ka nënshkruar Memorandume Mirëkuptimi me gjashtë komuna të Kosovës, me synim përmirësimin e shërbimeve dhe mirëqenies së fëmijëve, adoleshentëve dhe të rinjve.

    Marrëveshjet janë nënshkruar me komunat e Prishtinës, Fushë Kosovës, Graçanicës, Obiliqit, Prizrenit dhe Mitrovicës së Jugut.

    Sipas UNICEF-it, këto partneritete janë pjesë e zbatimit të Programit të UNICEF Kosovo 2026–2030 dhe synojnë që zotimet e përbashkëta të përkthehen në veprime konkrete në nivel lokal.

    Përmes bashkëpunimit me komunat, UNICEF-i synon të kontribuojë në ofrimin e shërbimeve sociale cilësore dhe gjithëpërfshirëse për fëmijët, me fokus të veçantë te grupet më të cenueshme.

    “Për fëmijët, cilësia e shërbimeve lokale mund të përcaktojë nëse një politikë shndërrohet në një mundësi reale në jetën e tyre. Përmes këtyre partneriteteve, duam të punojmë krah për krah me komunat, duke përdorur më mirë të dhënat, duke investuar në mënyrë më efektive në fëmijët dhe duke forcuar shërbimet nga të cilat fëmijët dhe familjet varen çdo ditë,” tha Veronika Vashchenko, Shefe e UNICEF-it në Kosovë.

    UNICEF-i vlerëson se komunat kanë rol të rëndësishëm në ofrimin e shërbimeve që ndikojnë drejtpërdrejt në jetën e fëmijëve, pasi një pjesë e madhe e tyre planifikohen, financohen dhe ofrohen në nivel lokal.

    Në kuadër të partneriteteve, UNICEF-i dhe komunat do të bashkëpunojnë në planifikimin dhe buxhetimin e bazuar në nevojat e fëmijëve, përmirësimin e përdorimit të të dhënave dhe dëshmive, rritjen e koordinimit ndërmjet sektorëve dhe shtimin e investimeve në fëmijë.

    Bashkëpunimi parasheh edhe rritjen e pjesëmarrjes së fëmijëve, adoleshentëve dhe të rinjve në proceset vendimmarrëse në nivel lokal.

    Partneritetet do të përqendrohen gjithashtu në përmirësimin e qasjes së barabartë në shërbime cilësore në fusha si kujdesi shëndetësor parësor dhe imunizimi, edukimi në fëmijërinë e hershme, arsimi dhe zhvillimi i aftësive.

    Në fokus do të jenë edhe angazhimi i të rinjve dhe mundësitë për punësim, si dhe shërbimet për mbrojtjen e fëmijëve dhe mbrojtjen sociale, përfshirë parandalimin dhe reagimin ndaj dhunës ndaj fëmijëve. /Telegrafi/