Blog

Mbi 100 pasagjerë dhe 23 anëtarë të ekuipazhit në anijen turistike Ruby Princess, në pronësi të kompanisë Princess Cruises, janë prekur nga një shpërthim i dyshuar i norovirusit, njoftoi Qendra Amerikane për Kontrollin dhe Parandalimin e Sëmundjeve (CDC).

Sipas autoriteteve amerikane, kjo është hera e tretë gjatë këtij viti që në anijet e kësaj kompanie raportohet një shpërthim i tillë, raporton The Guardian.

Anija u nis më 12 qershor nga San Francisko drejt Alaskës dhe Kanadasë, ndërsa udhëtimi përfundoi më 2 korrik.

Në bord ndodheshin 3.032 pasagjerë dhe 1.144 anëtarë të ekuipazhit. CDC u njoftua për situatën pasi numri i të prekurve kaloi pragun prej 3 për qind të pasagjerëve.

Pas kthimit në San Francisko, anija iu nënshtrua një procesi të plotë dezinfektimi, ndërsa personat e infektuar u izoluan për të parandaluar përhapjen e mëtejshme të virusit.

Norovirusi është një virus shumë ngjitës që shkakton kryesisht të vjella dhe diarre.

Ai përhapet përmes kontaktit me sipërfaqe të kontaminuara ose me grimca të feçeve dhe të vjellave, ndaj autoritetet shëndetësore rekomandojnë larjen e shpeshtë të duarve me ujë dhe sapun si masën më efektive mbrojtëse.

Sipas CDC-së, anijet turistike mbeten ndër mjediset me rrezikun më të lartë për përhapjen e infeksioneve për shkak të numrit të madh të njerëzve që ndajnë hapësira të përbashkëta.

Gjatë këtij viti janë regjistruar edhe gjashtë shpërthime të tjera të norovirusit në anije turistike.

Posta e Kosovës organizoi sot ceremoninë e lansimit të emisionit të pullave postare kushtuar 250-vjetorit të Pavarësisë së Shteteve të Bashkuara të Amerikës. Ceremonia u mbajt në objektin qendror të Postës së Kosovës në Prishtinë, në praninë e përfaqësuesve të institucioneve të Republikës së Kosovës, Ambasadës së SHBA-së në Kosovë dhe mysafirëve të tjerë të ftuar.

Kryeshefja ekzekutive e Postës së Kosovës, Nora Rraci, theksoi se një pullë postare është shumë më tepër se një element filatelik.

“Për Postën një pullë postare nuk është vetëm një element filatelik, ajo është histori në miniaturë. Është një mesazh që udhëton në kohë, lidh njerëz, popuj dhe ruan ngjarjet e vlerat që meritojnë të kujtohen brez pas brezi. Pullat postare mbahen si nga format më autentike të ruajtjes së kujtesës historike dhe promovimit të identitetit shtetëror në arenën ndërkombëtare. Edhe në një kohë të transformimeve të mëdha teknologjike, Posta e Kosovës vazhdon të ruajë me krenari traditën filatelike dhe njëkohësisht të ofrojë shërbim universal postar të qasshëm për çdo qytetar të vendit tonë. Ky është misioni ynë, të mbetemi urë komunikimi, besimi dhe lidhje njerëzore”, tha Nora Rraci.

Kryeministri i Republikës së Kosovës, Albin Kurti, e cilësoi pullën postare si një simbol të miqësisë dhe partneritetit të qëndrueshëm ndërmjet Kosovës dhe Shteteve të Bashkuara të Amerikës.

Ai theksoi se, përtej shënimit të jubileut të rëndësishëm amerikan, kjo pullë përfaqëson afirmimin e marrëdhënieve të shkëlqyera ndërmjet dy vendeve dhe vlerësimin për mbështetjen vendimtare që SHBA-ja i ka dhënë Kosovës në proceset shtetndërtuese, konsolidimin e institucioneve demokratike, sigurinë dhe zhvillimin e vendit.

“Mirëpo edhe përtej kësaj date të rëndësishme, kjo pullë shërben për një afirmim simbolik të partneritetit të fortë dhe raporteve të shkëlqyeshme ndërmjet dy vendeve tona. Mbështetja e vazhdueshme e Shteteve të Bashkuara të Amerikës për Kosovën ka qenë vendimtare në proceset tona shtetndërtuese dhe në konsolidimin e institucioneve demokratike, dhe kjo përkrahje vazhdon të luajë një rol jetik në sigurinë dhe në zhvillimin e vendit tonë. Të nderuar të pranishëm, kur pasardhësit tanë ta festojnë me 4 korrik 2076 përvjetorin e 300-të të pavarësisë së Shteteve të Bashkuara të Amerikës, ne mbase nuk do të jemi, e mbase edhe pullat postare s’do të jenë. Por një gjë është e sigurt, aleanca jonë, partneriteti midis Republikës së Kosovës dhe Shteteve të Bashkuara të Amerikës do të vijojë të jetojë, po aq i fortë dhe i qëndrueshëm sikurse që është edhe sot”, theksoi Albin Kurti.

Në emër të Ambasadës së Shteteve të Bashkuara në Kosovë, zëvendësshefja e misionit, Anu Prattipati, falënderoi Postën e Kosovës për këtë nismë, duke e cilësuar atë një nder për popullin amerikan.

“Pranimimi i kësaj pulle nga Kosova sot përbën një nder për ne. Çdo shkronjë e cila gjendet aty përcjell një histori të lirisë dhe miqësisë mes nesh. Postës së Kosovës dua t’ju them se keni krijuar diçka që do të qëndrojë për shumë mot. Vite pas ditës së sotme, njerëzit, qytetarët do e shikojnë këtë pullë postare dhe do ta kujtojnë që Kosova dhe Shtetet e Bashkuara kanë qëndruar së bashku për liri. Si Amerikë, ndërsa po shënon 250-vjetorin e pavarësisë, ne e shpërfaqim mirënjohjen për aleatët tanë siç është Kosova, një komb i cili e kupton vlerën e sovranitetit, demokracisë dhe bashkëpunimit të qëndrueshëm. Në emër të Ambasadës së Shteteve të Bashkuara dhe popullit amerikan, ju falënderoj shumë për këtë nder dhe për miqësinë tuaj”, tha Prattipati.

Kjo ceremoni u mbajt në kuadër të 250-vjetorit të Pavarësisë së Shteteve të Bashkuara të Amerikës.

Në ceremoninë e mbajtur me këtë rast, Rama tha se projekti u prit me humor dhe përqeshje, e më pas vazhdoi me akuza për falimentim, por ja ku jemi sot Shkolla Kombëtare e Fluturimit çel dyert e saj”.

Kreu i qeverisë falënderoi partnerët e Elbit Systems, një prej ekselencave globale të industrisë ushtarake, duke theksuar se “ata besuan dhe na u bashkuan në këtë projekt ambicioz, duke na vënë në dispozicion dijen e tyre të spikatur, që e bën Elbit Systems një prej kompetencave më absolute në botën e sotme të zhvillimeve të teknologjisë ushtarake”.

Kryeministri Rama vuri në dukje se “vetëm një dekadë më parë Forcat e Armatosura ishin lënë në mëshirë të fatit, ndërsa personeli përballej me vështirësi të shumta. Historitë e korrupsionit për të zënë një vend në ndonjë mision paqeruajtës jashtë shtetit ishin barcaleta të dhimbshme”.

“Sot Forcat e Armatosura janë më të mirëpaguarat në rajon dhe se objektivi i qeverisë është që, në kuadër të vizionit “Shqipëria 2030″ dhe procesit të integrimit në Bashkimin Evropian, pagat e tyre të arrijnë mesataren e vendeve të NATO-s”, tha Rama.

Kryeministri Rama vlerësoi gjithashtu rritjen e interesit të të rinjve për t’iu bashkuar Forcave të Armatosura.

“E kemi nisur këtë përpjekje me një vështirësi të jashtëzakonshme për të afruar të rinjtë, por sot është gjithnjë e më e vështirë të zgjedhësh mes shumë kandidaturave që vijnë. Kjo Shkollë Kombëtare e Fluturimit është një tjetër shembull. Shkolla ka zgjuar interes të konsiderueshëm dhe do të jetë e hapur jo vetëm për stërvitjen dhe certifikimin e pilotëve shqiptarë, por edhe të pilotëve të rinj nga vendet e NATO-s në rajon. Kemi një numër të konsiderueshëm të interesuarish, ndërkohë që Shkolla Kombëtare e Fluturimit është e hapur për të stërvitur dhe për të certifikuar pilotët e rinj të vendeve të NATO-s në rajonin tonë dhe, pa diskutim, duke filluar nga Kosova”, tha Rama.

“Ministri i Mbrojtjes është ngarkuar të kërkojë nga ministri i Mbrojtjes së Kosovës nëse ka interes për të stërvitur këtu për të certifikuar edhe pilotët e ardhshëm të Kosovës he po ashtu të njëjtën gjë edhe për dy vendet e tjera fqinje që janë edhe anëtare të NATO-s pasi kjo shkollë gëzon qysh nga momenti i parë kredibilitetin e padiskutueshëm të ekspertëve ndërkombëtarë të Elbit Systems edhe eksperiencën e njerëzve tanë të Forcës Ajrore, të cilët besoj se Komandanti i FA ma pranon ta them kanë rifilluar të buzëqeshin”, nënvizoi Rama.

Sot, shtoi Rama, ne kemi një flotë ajrore tërësisht të gatshme ndërkohë që na u desh të kalonim në kalvare të paimagjinueshme historirash me mirëmbajtje, bllokime, ngecje, me lloj-lloj çudirash dhe tanimë jemi plotësisht gati edhe për të përballuar sfidën e përvitshme të sezonit të nxehtë ku beteja me zjarret është e pashmangshme./ATSH

Drejtoria e Inspekcionit në Komunën e Prishtinës ka shqiptuar një gjobë prej 200 euro ndaj një personi i cili është kapur duke hedhur mbeturina në hapësirë publike.

Lajmin e ka bërë të ditur Komuna e Prishtinës përmes një njoftimi në Facebook.

“Ndotja e qytetit nuk është vetëm papërgjegjësi, por edhe shkelje që ndëshkohet. Kryeqyteti do të vazhdojë me kontrolle të rregullta dhe me zbatimin e masave ndaj të gjithë atyre që dëmtojnë hapësirat publike. Ta mbajmë qytetin të pastër, është përgjegjësi e secilit prej nesh”, thuhet në njoftim.

Është arrestuar në Dhërmi Granit Pepnika. Pepnika ishte shpallur në kërkim ndërkombëtar në kuadër të dosjes së bujshme të Call Centerave, pasi dyshohet se ka mashtruar qindra qytetarë me dëmin financiar 50 milion euro.

Pepnika është shpallur fajtor nga Gjykata e Tiranës për këtë vepër penale. Të njëjtat burime nga Policia e Vlorës bëjnë me dije se Granit Pepnika është arrestuar sapo ka dal nga vila e tij në Drimadhes. Në rrugë operative policia e Vlorës ka patur informacion mbi vendndodhjen e tij dhe e ka mbajtur në vëzhgim.

Në momentin kur po dilte për të shkuar për të pushuar e kanë arrestuar. Operacioni është finalizuar nga Operacionalja e Policisë së Vlorës. Granit Pepnika nuk ka patur kohë të reagojë dhe nuk ka bërë rezistencë.

Operacioni është në zhvillim e sipër pasi janë evidentuar dhe disa sende të tjera të kundra ligjshme të cilat do të jenë pjesë e hetimit.

Sipas dosjes hetimore, skema funksiononte përmes call centerave të organizuar në mënyrë profesionale, ku operatorët komunikonin në gjermanisht, italisht dhe anglisht me qytetarë europianë.

Ata prezantoheshin si këshilltarë financiarë apo përfaqësues platformash investimi dhe u premtonin personave fitime të mëdha nga investimet në bursë, kriptovaluta apo tregje financiare.

Masa mjaft jo-stabile ajrore krijuan kushte për stuhi intensive ditëve të kaluara të cilat në disa zona shkaktuan probleme dhe dëme materiale.Këto masa ajrore tani janë dobësuar dhe po largohen nga rajoni ynë. Temperaturat po ashtu pësuan ulje të ndjeshme pas një valë të shkurt por të fuqishme tropikale.

Pas depërtimit të masave më të freskëta ajrore tani nuk priten rritje të mëdha të temperaturave përkundër stabilizimit të atmosferës. Kjo vlen për viset kontientale, sepse në viset mesdhetare të Shqipërisë do të jetë mjaftë nxehtë këtë fundjavë, por jo ndonjë i nxehtë ekstrem.

Nga tani edhe vranësirat po tërhiqën dhe kemi stabilizim gradual dhe të plotë të atmosferës në rajonin tonë, megjithatë do të kemi erëra të freskëta që herë pas here do të na freskojnë gjatë fundjavës, por pa reshje atmosferike.

E shtuna do të karakterizohet me diell dhe vranësira lokale. Vranësira do të ketë më shumë pjesë të Kosovës, veriut të Malit të Zi dhe pjesë të Maqedonisë së Veriut. Rrallë në ndonjë rajon mund të ketë ndonjë rigë ose rrebesh të shkurtër shiu. Në Shqipëri më shumë diell dhe vranësira të pakta në viset kontinentale.

Temperaturat maksimale në Kosovë rreth 27 apo 28 gradë Celsius, kurse në perëndim të Shqipërisë mbi 30 gradë Celsius.

Edhe dita e diel do të jetë pak a shumë e ngjashme, me më shumë diell dhe vranësira lokale të pakta. Temperaturat pa ndonjë ndryshim që vlen të theksohet. Shumë më nxehtë në gysmën perëndimore të Shqipërisë.

Fillimi i javë së re pritet të rikthejë zhvillimet e vranësirave dhe vende-vende parashihen rrebeshe lokale të shiut me vetëtima dhe bubullimë. Sipas parashikimeve aktuale nuk priten reshje shumë të mëdha, por të lokalizuara vetëm në disa zona. Nxehtë në perëndim të rajonit e më freskët në lindje e veri. Kjo mbetet ende të ndjeket gjendja sinoptike dhe zhvillimi i situatës./MeteoBallkan

Dy deputetët e Partisë Demokratike të Kosovës i janë drejtuar Gjykatës Supreme me ankesë kundër vendimit të Panelit Zgjedhor për Ankesa dhe Parashtresa (PZAP), duke kërkuar rinumërimin e votave, raporton Ekonomia Online.

Kandidatët për deputetë nga PDK-ja, Bekim Haxhiu dhe Qëndrin Kryeziu, thanë se ankesa bazohet në fakte të reja, të cilat sipas tyre dëshmojnë parregullsi të konsiderueshme në procesin e numërimit të votave.

Haxhiu tha se ankesa mbështetet në raportin e Sekretariatit të Komisionit Qendror të Zgjedhjeve (KQZ) për procedurën e rinumërimit, i cili, sipas tij, evidenton gabime të shumta në numërimin fillestar në Qendrën e Numërimit dhe Rezultateve.

“Siç kemi paralajmëruar, kemi dorëzuar ankesën në Gjykatën Supreme. Kjo ankesë bazohet në faktet e reja të cilat i kemi siguruar, e të cilat KQZ nuk i ka bërë publike. Është fjala për raportin e Sekretariatit të KQZ-së për procedurën e rinumërimit, në të cilin janë të evidentuara fakte të shumta për gabimet në procesin e numërimit fillestar në QNR (Qendrën e Numërimit dhe Rezultateve). Nuk janë gabime të vogla, sepse ato gabime prej 6% deri në 25% janë të evidentuara në komuna të caktuara. Ndërsa në total, si mesatare tek votat e Partisë Demokratike, ky gabim është 3.7% — një margjinë e madhe e gabimit. Ndonëse KQZ-ja është munduar që ta minimizojë këtë si gabim, duke e vlerësuar se tek votat preferenciale të kandidatëve është 1.4%, por nëse llogaritet atëherë në të gjitha votat preferenciale të Partisë Demokratike — që i bie në 147,594 vota të PDK-së të numëruara në Qendrën Kombëtare të Numërimit, herë 10 vota preferenciale, pra janë mbi 1 milion e 470 mijë vota preferenciale — me një margjinë gabimi prej 1.4%, i bie që mbi 20,600 vota preferenciale janë potencialisht të regjistruara gabimisht në Qendrën Kombëtare. Prandaj, rezultati zgjedhor nuk mund të certifikohet i pasaktë. Ligji është në këtë çështje i qartë dhe kërkon që të kemi një certifikim të rezultatit zgjedhor të saktë. Askund në ligj nuk shkruan që mund të certifikohet një rezultat zgjedhor me 1.4% gabime, e as me 25%, mirëpo ai duhet të jetë ashtu siç e ka dhënë votën qytetari”, tha Haxhiu.

Ai shprehu pritjen që Gjykata Supreme ta shqyrtojë ankesën në mënyrë të pavarur dhe të urdhërojë rinumërimin.

“Prandaj shpresojmë shumë në profesionalizmin e Gjykatës Supreme, e cila në shumë raste ka ditur të jetë e pavarur dhe të rrëzojë vendimet e PZAP-ës, dhe të urdhërojë rinumërimin. Sepse nuk mund të bëhesh deputet me votat e numëruesve, por duhet të bëhesh me votat e qytetarëve, ashtu siç i ka hedhur ditën e votimit”, tha ai.

Edhe kandidati tjetër për deputet nga PDK-ja, Qëndrin Kryeziu, tha se ankesa është plotësuar me prova shtesë, të cilat, sipas tij, nuk janë marrë parasysh nga PZAP-ja.

“Ne presim sepse kemi sjellë fakte shtesë. Edhe nuk e di pse PZAP-ja e ka rrëzuar kur i ka pasur tërë këto prova, të cilat i kemi sjellë sot për juve. Sepse nga 6.5% që është Mitrovica e Jugut, kemi deri në 25% ndryshim të votës. Dhe 25%, edhe marzhi 1.4% në qoftë se shkojmë në total të 725,000 votuesve, janë në pyetje 101,000 vota gabim. Vetëm për Partinë Demokratike diku janë rreth 22-23 mijë vota që është ndryshimi. Dhe 22-23 mijë vota nuk janë dy vota që po bëjmë hajgare. Kjo nuk është hajgare, me shku deputet me votat e numëruesve. Kështu që unë besoj shumë në drejtësinë e Kosovës, besoj shumë në institucionet e vendit tonë dhe besoj shumë që do të ketë rinumërim dhe do të ketë rezultat real për të gjithë kandidatët”, tha Kryeziu.