Blog

Serge Gnabry është kthyer në një nga temat më të përfolura brenda kampit bavarez, teksa sulmuesi 30-vjeçar po kalon një sezon mbresëlënës, duke fituar sërish besimin e klubit dhe tifozëve pas një periudhe të vështirë.

Skuadra e drejtuar nga Vincent Kompany po kalon një moment të shkëlqyer, si në Bundesliga ashtu edhe në Ligën e Kampionëve, dhe forma e lartë e shumicës së lojtarëve, përfshirë edhe Gnabryn, ka qenë vendimtare për suksesin aktual.

Pas një vere ku Bayern nuk e përjashtoi mundësinë e largimit të tij, Gnabry është shndërruar në një nga elementët më të rëndësishëm të skuadrës. Deri tani, ai ka zhvilluar 15 paraqitje zyrtare, duke shënuar tre gola dhe dhënë pesë asiste. Roli i tij pas Harry Kane është kthyer në një pikë kyçe në mekanizmin ofensiv të kampionëve të Gjermanisë.

Megjithatë, pavarësisht formës së mirë, çështja e kontratës së tij mbetet pezull. Klubi nuk e ka përjashtuar një rinovim të mundshëm, por bisedimet nuk kanë marrë ende një drejtim konkret. I pyetur për të ardhmen, vetë lojtari është shprehur: “Nuk jam aspak i shqetësuar për momentin”, duke lënë të hapur të gjitha skenarët.

Nëse nuk arrihet një marrëveshje për zgjatjen e kontratës brenda muajve të ardhshëm, Gnabry mund të kthehet në një opsion interesant për shumë klube në merkaton e verës, pasi do të hyjë në vitin e parafundit të kontratës së tij me Bayernin. Për momentin, bavarezët po përfitojnë nga forma e tij, por e ardhmja e sulmuesit mbetet ende e paqartë.

FC Prishtina ka zyrtarizuar përforcimet e radhës në skuadër, duke afruar sulmuesin anësor 20-vjeçar, Elton Krasniqi. Futbollisti nga Kosova vjen me një përvojë të çmuar nga futbolli gjerman dhe i bashkohet klubit nga kryeqyteti në prag të edicionit të ri.

Krasniqi ka qenë pjesë e skuadrës U19 dhe ekipit të dytë të Stuttgartit, ndërsa më parë ka zhvilluar karrierën e tij në akademinë e Hannoverit, ku është formuar si lojtar.

Në nivel ndërkombëtar, ai ka përfaqësuar Kombëtaren e Kosovës në grupmoshat U15, U17 dhe U19.

I prezantuar sot si lojtari më i ri i FC Prishtinës, Krasniqi shprehu emocionet e tij për këtë hap të ri në karrierë:

“Jam i lumtur që i bashkohem një klubi të madh siç është Prishtina. Shpresoj që ky do të jetë një vit i suksesshëm dhe do të jap maksimumin për të arritur objektivat tona. Mezi pres të zbres në fushë dhe të luaj para tifozëve tanë, Plisat”, u shpreh ai për faqen zyrtare të klubit.

Ndërsa, Shkambi Baruti, është qendërmbrojtës 194 cm i gjatë dhe i bashkohet skuadrës nga kryeqyteti.

Baruti vjen me një përvojë nga futbolli shqiptar. Ai ishte pjesë e Partizanit, më pas kaloi te Tomori, ndërsa së fundmi ka luajtur për ekipin e Erzenit.

21 vjeçari për faqen zyrtare te klubit u shpreh i lumtur që është pjesë e Prishtinës.

“Është krenari të jesh pjesë e klubit ma të trofeshëm në Kosovë, premtoj se do ta jap maksimumin për këtë fanellë si dhe për tifozët e zjarrtë Plisat” – përfundoi Baruti. /ATVLIVE.TV

Klubi i FC Barcelona ka publikuar sot një përditësim zyrtar mbi gjendjen fizike të lojtarëve të ekipit të parë, teksa skuadra përgatitet për sfidën e radhës në La Liga ndaj Gironës.

Të gatshëm për ndeshjen:
• Fermín López është rikuperuar plotësisht dhe do të jetë në dispozicion të trajnerit për ndeshjen e fundjavës.
• Lamine Yamal, i cili kishte pasur shqetësime të lehta, gjithashtu është i gatshëm për të luajtur.

Të dëmtuar:
• Raphinha do të mungojë për 1 deri në 2 javë për shkak të një dëmtimi muskulor.
• Dani Olmo pritet të jetë jashtë fushave për rreth 3 javë.
• Joan García do të mungojë për një periudhë prej 1 muaji.
• Marc-André ter Stegen përballet me një mungesë të gjatë prej 3 muajsh, pas një dëmtimi që kërkon trajtim të specializuar.
• Gavi, i cili ka pësuar një dëmtim serioz, do të jetë jashtë fushave për rreth 5 muaj, duke mbyllur pjesën më të madhe të sezonit.

Barcelona përballet me një seri mungesash të rëndësishme, por rikthimi i lojtarëve si Fermín dhe Yamal jep shpresa për një paraqitje pozitive ndaj një kundërshtari të fortë si Girona.

Ndeshjet kualifikuese për Kupën e Botës 2026 vazhdojnë sot, me pritshmëri të lartë për të mësuar emrat e pesë – e ndoshta deri në shtatë – kombëtareve të tjera që do të sigurojnë pjesëmarrjen në turneun e madh që do të mbahet në SHBA, Meksikë dhe Kanada.

Nga Afrika, pritet të zyrtarizohen tre pjesëmarrës të rinj, ndërsa nga Azia, dy ekipe mund të sigurojnë kualifikimin. Evropa, gjithashtu, mund të japë dy emra të rinj në listën e pjesëmarrësve, në varësi të rezultateve të mbrëmjes.

Në grupin A të zonës afrikane, Benini dhe Gaboni kanë një mundësi të artë për të siguruar paraqitjen e tyre të parë historike në Kupën e Botës.

Benini pret Nigerinë në orën 18:00. Një fitore do ta çonte Beninin direkt në Kupën e Botës.

Në rast barazimi, Benini do të varej nga ndeshja Afrika e Jugut – Ruanda, ku fitorja e Afrikës së Jugut do të siguronte kalimin e saj.

Nigeria, nga ana tjetër, do të kualifikohej vetëm nëse mposht Beninin dhe Afrika e Jugut nuk arrin të fitojë.

Një rezultat specifik 2-1 në favor të Nigerisë dhe humbje e Afrikës së Jugut do ta vendoste fatin e grupit përmes numrit të kartonëve të marrë – një skenar i pazakontë, por i mundshëm.

Anglia mund të sigurojë biletën për Kupën e Botës me një fitore ndaj Letonisë.

Portugalia, gjithashtu, ka mundësinë të kualifikohet sot, nëse mposht Hungarinë.

Nga Azia, priten dy emra të tjerë që do të bëhen pjesë e garës globale, në pritje të rezultateve të fundit të raundit kualifikues. /ATVLIVE.TV

GO+ Peja do të ketë sonte ndeshjen e parë në Ligën ENBL të basketbollit.

Skuadra me traditë nga Kosova do të përballet me ekipin Riga Zelli nga Letonia.

Sfida zhvillohet nga ora 19:00 në Pallatin e Rinisë dhe Sportit në Prishtinë, për shkak se palestra në Pejë është e zënë për shkak të Zgjedhjeve Lokale në Kosovë.

Për verdhezinjtë ky është takimi i parë, ndërsa Riga Zelli do të ketë ndeshjen e dytë dhe hyn pas fitores ndaj Dziki Warszawa (93:91).

Pejanët do të kenë tetë ndeshje, katër vendas dhe katër mysafirë, për të kërkuar kualifikimin tutje. /ATVLIVE.TV