Blog

Policia letoneze ka shkatërruar një rrjet të madh në internet që ka mashtruar mijëra viktima në të gjithë Evropën.

Policia arrestoi shtatë të dyshuar, njoftoi agjencia e zbatimit të ligjit e BE-së, Europol.

Për të shkatërruar rrjetin kriminal, hetuesit e zbatimit të ligjit nga Austria, Estonia dhe Letonia, në partneritet me agjencitë e BE-së Europol dhe Eurojust, u bashkuan.

Hetimi kulmoi me një operacion që u zhvillua më 10 tetor.

Të dyshuarit e ndaluar besohet se janë përgjegjës për më shumë se 1,700 raste individuale të mashtrimit kibernetik në Austri dhe 1,500 në Letoni.

Kreu i Grupit Parlamentar të PS-së, Taulant Balla ka publikuar pamje nga protesta madhështore që u mbajtë në Sheshin “Skënderbej” në Tiranë, e ku njëzëri kërkuan drejtësi për ish-kreët e Ushtrisë Çlirimtare të Kosovës (UÇK) të cilët po mbahen në Hagë.

Balla ka shkruar “në mbështetje të komandantëve të UÇK”.

“Mirëmëngjes, dhe me këto pamje nga protesta mbarëkombëtare në “Sheshin Skënderbej”📍Tiranë në mbështetje të Komandantëve të UÇK-së, ju uroj një ditë të mbarë”, ka shkruar Balla.

https://www.facebook.com/reel/2052142688858644

Spitali i Përgjithshëm i Pejës ka njoftuar se njëri nga pacientët, që mbeti i plagosur pas gjuajtjes me armë zjarri pasditen e së premtes, është në gjendje stabile dhe jashtë rrezikut për jetë.

Nga Spitali kanë njoftuar poashtu se pacienti tjetër është dërguar për trajtim të mëtejmë në Qendrën Klinik Universitare të Kosovës.

Bëhet e ditur poashtu se të gjithë personat e përfshirë në rast janë trajtuar nga ekipet mjekësore të spitalit, në përputhje me nevojat e tyre shëndetësore.

“Njëri nga pacientët është dërguar për trajtim të mëtejmë në QKUK, ndërsa tjetri po trajtohet në Spitalin e Përgjithshëm në Pejë dhe aktualisht është në gjendje stabile dhe pa rrezik për jetën. Të gjithë personat e përfshirë në rast janë trajtuar nga ekipet mjekësore të spitalit, në përputhje me nevojat e tyre shëndetësore”, shkruhet në njoftimin e tyre.

Ndryshe, i dyshuari që plagosi dy persona në rrugën “Hasan Murati”, në afërsi të Qendrës së Paraburgimit në Pejë, është ndaluar për 48 orë.

Tre persona kanë humbur jetën dhe rreth 80 të tjerë janë lënduar pas një aksidenti me autobus në mes Sremska Mitrovicës dhe Jarakut të Serbisë. Autobusi ka devijuar nga rruga, duke shkaktuar tragjedinë.

Sipas raportimeve nga Tanjug, 35 nga të lënduarit janë shtruar në spital për ndihmë mjekësore. Të lënduarit ishin punonjës të kompanisë “Healthcare”. Ndër ta, një person ndodhet në gjendje kritike, ndërsa pjesa tjetër është në gjendje të qëndrueshme, sipas mjekut Millan Mandiq.

Autoritetet serbe vazhdojnë hetimet për shkakun e aksidentit.

Studiuesit në Spitalin e Fëmijëve ‘Johns Hopkins’ në Maryland, SHBA, kanë zbuluar një mënyrë për të aktivizuar sistemin imunitar të trupit për të njohur dhe shkatërruar qelizat kancerogjene që më parë ishin të padukshme për të.

Studimi, i botuar në ‘Nature Immunology’, tregon se duke stimuluar dy rrugë kryesore imunitare, shkencëtarët arritën të shndërrojnë tumoret rezistente ndaj sistemit imunitar në tumore “të nxehta ndaj imunitetit”, të afta të sulmohen nga mbrojtjet natyrore të trupit.

Eksperimentet u kryen në modele minjsh të kancerit të gjirit, pankreasit dhe muskujve.

Qasja jo vetëm që shtypi rritjen e tumorit, por gjithashtu krijoi një kujtesë imunitare afatgjate, duke përmirësuar shkallën e mbijetesës dhe duke reduktuar mundësinë e përsëritjes.

“Duke ndërtuar infrastrukturën e duhur imune brenda tumoreve, ne mund të fuqizojmë mbrojtjen e vetë pacientit, si të qelizave T ashtu edhe të qelizave B, kundër rritjes së kancerit, rikthimit dhe metastazës”, citon raporti shkencëtarin e lartë dhe autorin kryesor të studimit, Masanobu Komatsu.

Shumë tumore konsiderohen “të ftohtë imunitar”, që do të thotë se atyre u mungon aktiviteti i qelizave imune i nevojshëm që trajtime të zakonshme si imunoterapia të funksionojnë.

Ekipi i spitalit ‘Johns Hopkins’ kërkoi ta ndryshojë këtë duke stimuluar mjedisin e tumorit me molekula imunoaktive.

Ata u përqendruan në forcimin e strukturave limfoide terciare (TLS), të cilat janë grumbuj qelizash imune që luajnë një rol kritik në organizimin e sulmeve imune.

TLS-ja zakonisht gjenden në tumoret imunoaktive dhe janë të lidhura me rezultate më të mira për pacientët.

Duke përdorur dy molekula imunoaktive, studiuesit rikrijuan kushte të ngjashme me ato që gjendet në tumoret imunoaktive.

Kjo çoi në një rritje të qelizave T vrasëse që sulmojnë kancerin, formimin e enëve të reja të gjakut që lejuan qelizat imune të hyjnë dhe prodhimin e antitrupave që synojnë qelizat tumorale.

Qelizat B brenda TLS-së u zhvilluan në qeliza plazme që prodhojnë antitrupa dhe qeliza kujtese që ndihmojnë sistemin imunitar të njohë dhe të luftojë kancerin nëse ai rikthehet.

Trajtimi gjithashtu rriti qelizat T ndihmëse dhe qelizat T të kujtesës, duke rritur imunitetin humoral dhe ai i ndërmjetësuar nga qelizat.

Sipas shkencëtarit Komatsu, rezultatet sugjerojnë se kombinimi i dy sinjaleve imunoaktive mund të rrisë efektivitetin e trajtimeve aktuale, duke përfshirë kimioterapinë dhe imunoterapitë, në llojë të ndryshme të kancerit.

Hulumtimi u financua nga Instituti Kombëtar i Kancerit (NIH), Departamenti i Mbrojtjes i SHBA-së dhe Departamenti i Shëndetësisë i Floridës. /AA/

Zyrtarët pakistanezë do të zhvillojnë bisedime në Katar më 18 tetor me homologët afganë, një ditë pasi Islamabadi kreu sulme ajrore në shtetin fqinj që vranë të paktën dhjetë persona dhe shkeli armëpushimin që solli qetësi për dy ditë në kufi.

“Ministri i Mbrojtjes, Khawaja Asif, dhe shefi i inteligjencës gjenerali, Asim Malik, do të nisen për në Doha sot për bisedime me talibanët afganë”, raportoi televizioni shtetëror në Pakistan.

Një zyrtar i qeverisë talibane po ashtu konfirmoi se do të mbahen bisedimet.

“Një delegacion i nivelit të lartë nga Emirati Islamik, i udhëhequr nga ministri i Mbrojtjes, Mohammed Yaqub, është nisur për në Doha”, shkroi në X zëdhënësi i qeverisë talibane, Zabihullah Mujahid.

Një armëpushim 48-orësh ndaloi gati një javë përplasje të përgjakshme në kufi, që shkaktuan vdekjen e dhjetëra ushtarëve dhe civilëve nga të dyja palët.

Por, të premten në mbrëmje, Afganistani akuzoi Pakistanin për shkelje të armëpushimit.

“Pakistani e ka shkelur armëpushimin dhe ka bombarduar tri lokacione në provincën Paktika. Afganistani do të kundërpërgjigjet”, tha për AFP-në një zyrtar taliban.

Dhjetë civilë u vranë dhe 12 të tjerë u plagosën nga sulmet, thanë zyrtarët shëndetësorë për AFP-në që folën në kushte anonimiteti, duke shtuar se dy fëmijë ishin në mesin e të vrarëve.

Ndërkaq, një zyrtar pakistanez tha se forcat kishin kryer “sulme precize ajrore” në zonat përgjatë kufirit afgan, duke shënjestruar grupin Hafiz Gul Bahadur, një fraksion lokal i lidhur me Tehreek-e-Taliban Pakistan (TTP) – talibanët pakistanezë.

Islamabadi thotë se ky grup është përfshirë në bombardimet vdekjeprurëse dhe sulmet me armë zjarri në një kamp ushtarak në Vaziristanin Verior, që gjendet në kufi me Afganistanin, duke vrarë shtatë trupa paramilitare pakistaneze.

Çështjet e sigurisë qëndrojnë në epiqendrën e tensioneve, me Pakistanin që akuzon Afganistanin për strehimin e grupeve militantë të udhëhequra nga TTP-ja, në tokën e tij, një pretendim që Kabuli e mohon.

Dhuna ndërkufitare u rrit në mënyrë dramatike që nga e shtuna, disa ditë pas shpërthimeve që tronditën kryeqytetin afgan Kabul, pikërisht ndërsa ministri i Jashtëm i talibanëve nisi një vizitë të paprecedentë në Indi, rivalin e kamotshëm të Pakistanit.

Talibanët më pas nisën një ofensivë përgjatë pjesëve të kufirit të tyre jugor me Pakistanin, duke shtyrë Islamabadin që të zotohet për kundërpërgjigje.

Kur nisi armëpushimi të mërkurën, Islamabadi tha se do të zgjaste 48 orë, por Kabuli tha se armëpushimi do të mbetet në fuqi derisa Pakistani ta shkelë atë.

Zëdhënësi i qeverisë talibane tha se forcat afgane janë urdhëruar që të mos sulmojnë, përveç se nëse forcat pakistaneze sulmojnë të parat. Nëse Pakistani sulmon, Afganistani tha se ka të drejtë që ta mbrojë veten.

Presidenti i SHBA Donald Trump dhe presidenti ukrainas Volodymyr Zelensky folën sot për shtypin përpara një takimi dypalësh, ku pritet të diskutohen ndihmat ushtarake dhe zhvillimet më të fundit në luftën në Ukrainë.

Gjatë deklaratave, Zelensky kërkoi publikisht nga Shtetet e Bashkuara raketa Tomahawk me rreze të gjatë veprimi, duke sugjeruar gjithashtu një marrëveshje të mundshme shkëmbimi, ku Ukraina do të ndihmonte SHBA-në në fushën e prodhimit të dronëve.

Nga ana tjetër, Trump konfirmoi se do të diskutojë çështjen e furnizimit me raketat Tomahawk, por paralajmëroi se një hap i tillë mund të sjellë një përshkallëzim serioz të konfliktit. Ai theksoi se edhe vetë SHBA-të kanë nevojë për sisteme të tilla për mbrojtjen e tyre.

Trump shtoi gjithashtu se samiti i tij i ardhshëm me presidentin rus Vladimir Putin në Budapest nuk ka gjasa të sjellë një takim të drejtpërdrejtë midis Putinit dhe Zelensky-t.