Blog

Trajneri legjendar i Liverpoolit, Jurgen Klopp, ka komentuar për herë të parë mënyrën se si klubi ka vepruar në merkaton e verës. Në një deklaratë që ka bërë bujë, gjermani tha:

“Askush nuk më ka thënë kurrë se është e mundur që ne të shpenzojmë në këtë mënyrë…”

Klopp, i njohur për stilin e tij të kujdesshëm në përzgjedhjen e futbollistëve dhe për ndërtimin e skuadrës me buxhet të balancuar, duket se u befasua nga qasja e klubit këtë verë. Liverpool ka bërë disa afrime të rëndësishme, duke forcuar ndjeshëm ekipin në disa reparte kyçe.

Megjithatë, Klopp nënvizoi se qëllimi nuk është vetëm të shpenzohet, por të ndërtohet një skuadër konkurruese me një projekt afatgjatë:

“Nuk është fjala për paratë, por për mënyrën si e përdorim çdo mundësi për ta bërë Liverpoolin më të fortë.”

Kjo deklaratë vjen në një moment kur “The Reds” po kalojnë një fazë të re pas ndryshimeve në drejtim dhe strategjinë e klubit, me synimin për t’u rikthyer fuqishëm në garën për titullin e Premier League.

Mesfushori holandez i Barcelonës, Frenkie de Jong, ka bërë një deklaratë të fortë lidhur me periudhën e tij të vështirë te katalanasit, duke zbuluar se në një moment klubi kishte menduar ta shiste për arsye financiare.

“Në një moment kishte njerëz në klub që donin të më shisnin vetëm për të marrë pak para. Por unë gjithmonë kam dashur të qëndroj te Barça, ky është klubi im i ëndrrave,” tha De Jong për mediat spanjolle.

Holandezi theksoi se pavarësisht presioneve të brendshme, ai nuk e ka menduar kurrë largimin nga “Camp Nou”, duke theksuar lidhjen e tij të fortë me klubin dhe tifozët.

Kujtojmë se De Jong iu bashkua Barcelonës në vitin 2019 nga Ajax, dhe prej asaj kohe është bërë një nga shtyllat kryesore të mesfushës blaugrana, megjithëse shpesh ka qenë në qendër të spekulimeve për një transferim të mundshëm drejt Manchester United apo klubeve të tjera të mëdha evropiane.

Klubi kosovar i të rinjve, 2 Korriku U19, ka nisur një nga aventurat më të rëndësishme në historinë e tij duke udhëtuar drejt Skocisë, ku do të përballet me Hibernian U19 në ndeshjes e parë të raundit të dytë në UEFA Youth League, kompeticionit më të rëndësishëm evropian për ekipet e moshave të reja.

Skuadra tashmë ka mbërritur në Edinburgh, ku sot do të zhvillojë seancën e fundit stërvitore në prag të sfidës që mund t’i dërgojë drejt finales së madhe të rrugës së kampionëve në UEFA Youth League.

Përfaqësues të klubit kanë theksuar se skuadra është në gjendje të mirë fizike dhe psikologjike, me atmosferë pozitive dhe fokus maksimal për ndeshjen. Mbështetja nga Kosova është e madhe – qoftë nga federata, tifozët, apo vetë komuniteti sportiv, që e sheh këtë si një mundësi të rrallë.

Ndeshja do të luhet nesër mbrëma, më 22 tetor, në stadiumin legjendar Easter Road të Hibernianit, me fillim nga ora 20:45 sipas kohës lokale.

Stadiumi, që ka përjetuar dhjetëra ndeshje të mëdha në futbollin skocez, tani do të jetë skena e një tjetër sfide të veçantë — këtë herë me një klub nga Kosova që kërkon të lërë gjurmë në arenën evropiane. /ATVLIVE.TV

Pas disa javësh mungesë për shkak të lëndimit, Ousmane Dembele është rikthyer në dispozicion të Paris Saint-Germain. Sulmuesi francez është përfshirë në listën e lojtarëve të grumbulluar për sfidën e fazës së grupeve të Ligës së Kampionëve kundër Bayer Leverkusen.

Në konferencën për shtyp para ndeshjes, trajneri Luis Enrique theksoi rëndësinë e rikthimit të Dembele, duke u fokusuar më shumë te ndikimi i tij në atmosferën e skuadrës sesa te suksesi individual.

“Nuk është Topi i Artë që po kthehet, është Ousmane Dembele – personi që sjell energjinë e tij në ekip. Topi i Artë është kapitull i mbyllur,” u shpreh Enrique.

Ai theksoi se për PSG-në, më e rëndësishme është harmonia dhe kontributi në grup, jo arritjet personale.

“Jam më i lumtur që kemi rikthyer njeriun dhe energjinë e tij, sesa Topin e Artë. Ne po punojmë për të fituar ndeshjen e tretë në Ligën e Kampionëve,” shtoi ai.

Paris Saint-Germain do të kërkojë fitoren e tretë radhazi në këtë edicion të Ligës së Kampionëve, me shpresën se rikthimi i Dembele do të sjellë një shtysë të re në sulm. /ATVLIVE.TV

Robert Lewandowski po kalon një periudhë përcaktuese në karrierën e tij. Pas një sezoni ku ishte thelbësor për Barcelonën, këtë vit situata ka ndryshuar. Me ardhjen e Hansi Flick dhe stilin e tij më të shpejtë e të lëvizshëm në fazën sulmuese, roli i një “numri 9” klasik si Lewandowski është venitur.

Në këtë sfond, një mundësi e re po hapet nga Arabia Saudite. Al Nassr, nën ndikimin e drejtpërdrejtë të Cristiano Ronaldos, ka shprehur interes konkret për ta sjellë Lewandowskin në Riad.
Portugezi kërkon një partner elitar në sulm dhe e sheh polakun si përforcimin ideal.

Lewandowski, me eksperiencën dhe instinktin e tij për gol, do të sillte jo vetëm cilësi në fushë, por edhe peshë mediatike për projektin e Al Nassr, që synon të rivalizojë në skenën
ndërkombëtare. Prania e ish-shokut të skuadrës, Íñigo Martínez, tashmë në klub, mund ta lehtësojë adaptimin e tij në Arabinë Saudite.

Nga ana tjetër, Barcelona nuk e përjashton largimin e tij, sidomos nëse paraqitet një ofertë e vlefshme. Me një kontratë që zgjat deri në 2026 dhe një pagë të konsiderueshme, klubi po analizon nëse Lewandowski përshtatet ende me drejtimin e ri taktik.

Një vit më parë, 37 vjeçari refuzoi ofertat nga Arabia, por tani rrethanat janë ndryshe. Mosha, stili i ri i Barcelonës dhe tundimi për një sfidë të fundit të madhe mund të shtyjnë drejt largimit.

Nëse ky transferim realizohet, do të ishte një nga lëvizjet më të bujshme të merkatos së verës — dhe një tjetër dëshmi e ambicies së Arabisë Saudite për të qenë pjesë qendrore e futbollit botëror. /ATVLIVE.TV

Fanella që Rey Manaj veshi në sfidën historike të Shqipërisë ndaj Serbisë më 11 tetor në Leskovc është kthyer në një objekt shumë i kërkuar për koleksionistët.

Në ankandin ndërkombëtar të organizuar nga MatchWornShirt, me të cilin bashkëpunon zyrtarisht FSHF-ja, fanella u shitet për 3,100 euro. Oferta fituese erdhi nga Shtetet e Bashkuara të Amerikës, ku blerësi, i vendosur për ta pasur këtë kujtim të veçantë, e rriti çmimin nga 378 euro në mbi tri mijë, duke e ngritur çmimin plot 11 herë.

Fanella mban firmën e Manajt dhe është simbol i një momenti të paharrueshëm, pasi ai shënoi golin vendimtar që siguroi fitoren historike të Shqipërisë ndaj Serbisë, një moment që do të mbahet mend gjatë nga tifozët kuqezi.

Kjo është fanella e dytë më e shtrenjtë e Kombëtares shqiptare që është shitur në ankand. Rekordin e mban fanella e Nedim Bajramit, e veshur në ndeshjen ndaj Italisë në Euro 2024, ku ai realizoi golin më të shpejtë në historinë e Kampionateve Europiane, vetëm pas 23 sekondash. Ajo fanellë u shit për 5,792 euro. /ATVLIVE.TV