Blog

Sezoni i Juventusit po shfaqet më i vështirë se sa pritej, dhe trajneri kroat Igor Tudor po ndodhet nën presion të madh. Pas humbjes së fundit kundër Comos, që ishte e para për këtë sezon pas pesë barazimeve radhazi, mediat dhe komentatorët italianë nuk e kursyen kritikën.

Gazetari i njohur Enzo Bucchioni deklaroi për mediat:

“Tudor është më i keq se Thiago Motta, Juventusi i tij është banal, i parashikueshëm, pa shpirt. Vendimet e tij janë të dyshimta dhe tabela e konfirmon këtë.”

Sezoni filloi me optimizëm, por performanca e ekipit ka rikthyer kujtime nga sezoni i kaluar, ku Juventusi nuk arriti të gjejë identitetin e lojës. Humbja kundër Comos ka ngritur shqetësime brenda klubit, dhe nuk përjashtohet mundësia që drejtuesit të fillojnë të shqyrtojnë pozicionin e Tudorit në pankinë.

Një vit më parë, “Bianconerët” ishin të tretët në tabelë pas Napolit dhe Interit, ndërsa tani renditen të shtatë me vetëm 12 pikë. Humbja e fundit nxori në pah të gjitha kufizimet dhe mangësitë e ekipit, duke bërë që presioni mbi trajnerin të rritet ndjeshëm.

Situata e Juventusit duket se po bëhet një test i madh për Tudor, i cili duhet të tregojë se mund të udhëheqë klubin edhe gjatë një sezoni të vështirë.

Gazeta prestigjioze italiane La Gazzetta dello Sport ka analizuar në detaje humbjen e rëndë të Napolit me rezultat 6-2 ndaj PSV Eindhoven, në kuadër të raundit të tretë të fazës së grupeve në Ligën e Kampionëve.

Sipas analizës së publikuar, media italiane ndalet veçanërisht te mungesa e Amir Rrahmanit, duke e cilësuar atë si një faktor vendimtar në katastrofën e mbrojtjes napolitane.

“Në mbrojtje sot më shumë se kurrë u ndie mungesa e Rrahmanit: mbrojtësi kosovar na dukej si një kolos, kur kthehemi pas te gabimet e Buongiornos dhe Beukemas,” – shkruan La Gazzetta dello Sport.

Më tej, analiza nënvizon se Rrahmani, së bashku me Lobotkën dhe Højlundin, përbëjnë boshtin e këtij ekipi:

“Nëse ata do të ishin në fushë, ndeshja nuk do të kishte përfunduar në këtë mënyrë,” shton gazeta.

Megjithatë, Gazzetta thekson se humbja nuk mund të justifikohet vetëm me mungesat:

“Rezultati 6-2 nuk mund të arsyetohet vetëm me mungesat, Napoli duhet të tregojë karakter dhe reagim pas këtij turpërimi.”

Në anën tjetër, brenda klubit mbizotëron optimizmi për rikthimin e Amir Rrahmanit, i cili pritet të jetë gati për ndeshjen e fundjavës kundër Interit.

Qendërmbrojtësi kosovar u lëndua gjatë detyrës me Kombëtaren e Kosovës në muajin shtator, por duket se rikuperimi i tij po ecën mirë – dhe trajneri Antonio Conte shpreson ta ketë në dispozicion për sfidën e rëndësishme në Serie A.

Sipas gazetarit të njohur për lajmet e transferimeve, Fabrizio Romano, mbrojtësi austriak David Alaba do të largohet nga Real Madridi si lojtar i lirë në vitin 2026, përveç nëse ndodh ndonjë surprizë e papritur në momentet e fundit.

“David Alaba do të largohet nga Real Madrid si lojtar i lirë në 2026, përveç nëse ndodh diçka e papritur.”- shkruante në llogarin zyrtare të Romanos në Facebook.

Kontrata e Alabës me “Los Blancos” skadon pikërisht në verën e vitit 2026, dhe sipas burimeve të Romano-s, klubi nuk ka ndërmend ta rinovojë në këtë fazë. Vendimi është marrë pas disa diskutimeve të brendshme në klub, teksa Reali po planifikon një ristrukturim gradual të mbrojtjes, duke i hapur rrugë talenteve të rinj që pritet të marrin më shumë hapësirë në vitet në vijim.

Alaba iu bashkua Real Madridit në vitin 2021 nga Bayern Munich si transfer i lirë dhe që atëherë ka qenë pjesë e rëndësishme e skuadrës, duke fituar trofe të shumtë përfshirë La Ligën, Champions League dhe Superkupën Evropiane.

Në moshën 33-vjeçare, ai pritet të ketë oferta nga disa klube elitare europiane dhe nga MLS, me të ardhmen e tij që tashmë po bëhet një nga temat më të nxehta në tregun e ardhshëm të transferimeve.

Një ngjarje e paprecedentë ka tronditur basketbollin në Maqedoninë e Veriut! Klubi i njohur KB Shkupi është përjashtuar nga të gjitha garat, vendim që është konfirmuar nga vetë klubi përmes një reagimi publik.

Në njoftimin e tyre zyrtar, Shkupi e quan këtë vendim “skandal të madh”, duke fajësuar Federatën e Basketbollit të Maqedonisë së Veriut për trajtim të padrejtë dhe selektiv.

“Vetëm KB Shkupi suspendohet nga Federata e Basketbollit e Maqedonisë së Veriut. Nga të gjitha ligat… Shkaku është borxhi prej 590.000 denarësh. Arsyeja e vërtetë është mosmarrja e fondeve nga Ministria e Sportit, të cilat klubi kishte të drejtë t’i përfitonte. Madje, një anëtar i bordit nga partia Vlen votoi për suspendim,” – thuhet në reagimin e klubit.

Për momentin, Federata nuk ka dhënë ende një qëndrim zyrtar, ndërsa në opinion po qarkullojnë akuza për ndikime politike dhe mungesë transparence në procesin e vendimmarrjes.

Ky përjashtim ka shkaktuar tronditje në komunitetin sportiv, duke ngritur pyetje serioze për mënyrën si po menaxhohen fondet dhe rregullat në basketbollin maqedonas.

Nëse situata nuk zgjidhet, Shkupi rrezikon të humbasë të gjithë sezonin – një goditje e rëndë për klubin dhe sportin vendor.

Trajneri i Dritës, Zekirija Ramadani, foli të mërkurën në konferencën për shtyp para përballjes së rëndësishme kundër Omonias, duke theksuar se ka përfituar shumë nga mënyra e lojës së Kosovës në kualifikimet për Kupën e Botës 2026.

Ai vlerësoi veçanërisht punën e përzgjedhësit Franco Foda, duke e cilësuar si shembull pozitiv për mënyrën se si një skuadër mund të organizohet përballë kundërshtarëve të fortë. Ramadani theksoi se, në rast fitoreje ndaj Omonias, një pjesë e meritës do t’i takonte edhe Fodas.

“Niveli i futbollit në Qipro është pak më i lartë se ai në kampionatin tonë. Kemi analizuar disa ndeshje të tyre dhe është e qartë se luhet me intensitet të lartë, me tifozë të zjarrtë dhe ritëm që ne e përjetojmë vetëm në ndeshjet evropiane,” deklaroi ai.

Ai shtoi se ka ndjekur me kujdes tre ndeshjet e fundit të Kosovës, duke nxjerrë mësime të rëndësishme si trajner.

“Kam parë dhe analizuar ndeshjet jo për debate televizive, por për t’u pasuruar profesionalisht. Nëse arrijmë sukses kundër Omonias, Franco Foda padyshim ka pjesën e tij të meritës,” u shpreh trajneri shkupjan.

Ndeshja mes Dritës dhe Omonias zhvillohet të enjten mbrëma në stadiumin “Fadil Vokrri”, duke filluar nga ora 18:45, në kuadër të raundit të dytë të Ligës së Konferencës. /ATVLIVE.TV

Real Madridi do të duhet të përballet me Juventusin pa një nga mbrojtësit e tij më të rinj dhe më të talentuar, Dean Huijsen. Klubi ka konfirmuar zyrtarisht se 19-vjeçari nuk do të jetë në dispozicion për shkak të një lëndimi që ende nuk është shëruar plotësisht.

Megjithatë, lajmi pozitiv për tifozët madrilen është se stafi mjekësor po punon intensivisht që Huijsen të rikuperohet në kohë për “El Clásico”, ndeshjen më të madhe të sezonit që i pret fundjavën e ardhshme.

Huijsen, i cili ka treguar potencial të jashtëzakonshëm në mbrojtje dhe qetësi me topin në këmbë, shihet si një element i rëndësishëm për të ardhmen e Real Madridit.

Ancelotti do të duhet të bëjë pa të ndaj Juventusit, por plani i madh mbetet rikthimi i tij për duelin e zjarrtë me Barcelonën — aty ku çdo detaj mund të bëjë diferencën.

Skuadra nga Gjilani, Drita, zhvillon nesër ndeshjen e dytë të fazës së ligës në Conference League.

Kampioni i Kosovës, do të jetë nikoqire e skuadrës nga Qipro, Omonia, ndeshje e cila e zhvillohet në stadiumin ”Fadil Vokrri” në Prishtinë, nga ora 18:45.

FC Drita ka njoftuar tifozët se biletat do të qëndrojnë në shitje deri nesër (e enjte) në ora 12:00.

”Biletat për ndeshjen Drita vs Omonia mund të blihen vetëm deri nesër (e enjte) në ora 12:00!Pas kësaj, sistemi i shitjes online mbyllet!

Siguro biletën TANI dhe bëhu pjesë e historisë! https://eu.ebileta.al/biglietteria/listaEventiPub.do”, thuhet në njoftim. /ATVLIVE.TV

Real Madridi ka publikuar listën e lojtarëve të grumbulluar për ndeshjen ndaj Juventusit, dhe lajmi i madh është rikthimi i Ferland Mendy-t, i cili më në fund është rikuperuar dhe do të jetë i gatshëm si për këtë sfidë, ashtu edhe për “El Clásico”-n ndaj Barcelonës.

Mendy ka munguar për disa javë për shkak të një lëndimi muskulor, por rikthimi i tij pritet t’i japë stabilitet mbrojtjes së majtë të Ancelottit, në një moment kur ndeshjet e mëdha po afrohen.

Nga ana tjetër, Trent Alexander-Arnold nuk do të jetë pjesë e skuadrës përballë Juventusit, pasi ende nuk është rikuperuar plotësisht nga dëmtimi. Megjithatë, raportimet nga kampi madrilen tregojnë se objektivi kryesor mbetet rikthimi i tij pikërisht për “El Clásico”, që do të zhvillohet fundjavën e ardhshme.

Real Madridi, që po kalon një formë të lartë, do të kërkojë të vazhdojë serinë pozitive edhe ndaj “Zonjës së Vjetër”, ndërsa të gjithë sytë tashmë janë drejt supersfidës me Barcelonën.

Një sulm ajror nga Rusia ka ndodhur sot në Ukrainë, ku objektivi kryesor ishte fusha e futbollit ku stërvitet skuadra e Metalist 1925.

Sipas faqes zyrtare të klubit ukrainas, sulmi është kryer me dron rreth orës gjashtë të mëngjesit.

Fatmirësisht, nuk raportohet për të lënduar, megjithatë janë shkaktuar dëme materiale.

Vlen të përmendet se në radhët e Metalist 1925 luajnë edhe dy futbollistë shqiptarë: Baton Zabërgja dhe Ermir Rashica.

Njoftimi zyrtar i klubit:

Sot, rreth orës gjashtë të mëngjesit, gjatë bombardimeve të natës, armike të Ukrainës, Akademia “Metalista 1925” është goditur. Droni “Shahed” ra në fushën stërvitore.
Si pasojë e kësaj, një zjarr shumë shpejt u eliminua.
Të gjithë nxënësit e Akademisë Metalist 1925, të cilët tani janë mirë, studiojnë dhe stërviten në Kyiv – dhe kjo është rreth 120 futbollistë të rinj – ishin fshehur gjatë shqetësimit, kështu që askush nuk u lëndua.
Për momentin, Metalisti 1925, së bashku me menaxhmentin e kolegjit, po vlerësojnë dëmet e shkaktuara nga bombardimi dhe tashmë po planifikojnë të rikthejnë sa më parë fushën e futbollit.
Procesi stërvitor dhe garues i nxënësve të Akademisë “Metalista 1925” do të zhvillohet sipas planit – në terrene të tjera. /ATVLIVE.TV