Blog

Ish-kryetari i Gjykatës Kushtetuese, Enver Hasani, e ka cilësuar jokushtetuese seancën e Kuvendit të Kosovës për zgjedhjen e Qeverisë së re, e cila pritet të mbahet të dielën, më 26 tetor. Sipas tij, presidentja Vjosa Osmani ka shkelur Kushtetutën me dekretimin e kreut të Lëvizjes Vetëvendosje, Albin Kurti, si mandatar për formimin e qeverisë, në një kohë kur Kuvendi ende “nuk është konstituuar ligjërisht”.

Në një intervistë për Radion Evropa e Lirë, Hasani ka theksuar se Osmani është “ngutur në mënyrë arbitrare” duke konstatuar se Kuvendi është konstituuar, ndonëse kjo çështje është ende në shqyrtim nga Gjykata Kushtetuese, pas ankesës së Listës Serbe.

“Zonja Osmani, me ngutjen e treguar, ka bërë një shkelje serioze të Kushtetutës së Kosovës – më të rëndë se rasti i Fatmir Sejdiut – sepse ka prishur parametrat e funksionimit të organeve kushtetuese”, ka deklaruar Hasani.

Sipas tij, Gjykata Kushtetuese është dashur të vendosë paraprakisht për kërkesën e Listës Serbe, e cila konteston zgjedhjen e Nenad Rashiqit si nënkryetar të Kuvendit, përfaqësues nga komuniteti serb. Hasani thotë se kërkesa e Listës Serbe “është e bazuar dhe me substancë”, pasi sipas aktgjykimeve të mëparshme të Gjykatës Kushtetuese, propozimi për nënkryetar nga komuniteti serb duhet të vijë nga partia që ka shumicën e votave serbe – në këtë rast, Lista Serbe.

“Ky nuk ka qenë rasti, sepse kandidatura e Rashiqit u propozua nga një deputet shqiptar, Dimal Basha, i cili ka manipuluar procesin me qëllim të mohimit të përfaqësimit politik të serbëve”, ka shtuar Hasani.

Ai paralajmëron se mbajtja e seancës së së dielës për votimin e Qeverisë “është jokushtetuese në tërësi”, pasi Kuvendi “nuk është konstituuar sipas urdhrit të tri aktgjykimeve të Gjykatës Kushtetuese”.

Hasani vlerëson se dekretimi i Kurtit në fundjavë “cenon neutralitetin dhe rolin ndërmjetësues të presidentes”, dhe se një veprim i tillë “mund të ndodhë vetëm në kushte të jashtëzakonshme”.

“Nëse formohet Qeveria të dielën, ajo do të shpallet jokushtetuese brenda 60 ditëve”, ka paralajmëruar ish-kryetari i Gjykatës Kushtetuese.

Ai shton se një vendim i ardhshëm i Gjykatës Kushtetuese në favor të Listës Serbe do të anulonte tërë procesin e formimit të ekzekutivit, ndërsa në rast të kundërt “do të rrënohej përfundimisht parimi themelor kushtetues i formimit të organeve qendrore pas zgjedhjeve”.

Në fund, Hasani ka paralajmëruar pasoja të rënda institucionale dhe politike nga këto veprime, duke theksuar se “sjelljet e fundit të pushtetit vetëm sa e thellojnë ndarjen juridiko-kushtetuese mes komuniteteve në Kosovë dhe rrezikojnë federalizimin e vendit”.

Komisioni Qendror i Zgjedhjeve ka certifikuar Listën Votuese për balotazhin e 9 nëntorit.

Ky vendim erdhi në mbledhjen e sotme të KQZ-së ku u theksua se bazuar në rezultatet preliminare votimi i dytë për zgjedhjet lokale mbahet në 18 komuna.

Gjakova, Gjilani, Dragashi, Kaçaniku, Klina, Fushë Kosova, Mitrovica e Jugut, Obiliqi, Rahoveci, Peja, Prishtina, Prizreni, Suhareka, Vitia, Vushtrria, Juniku, Mamusha dhe Kllokoti janë komunat që pretendentët për kryetarë do të përballen në balotazh.

“Sipas kësaj liste, numri i përgjithshëm i qytetarëve me të drejtë vote në raundin e dytë të zgjedhjeve në këto 18 komuna është 1,346,397 votues. Ky numër, në krahasim me raundin e parë të Zgjedhjeve Lokale të mbajtura më 12 tetor 2025, është më i lartë për 543 votues”.

“Sipas të dhënave nga Lista Votuese, numri i qytetarëve me të drejtë vote në vendvotimet e këtyre komunave është 1,316,672 votues, ndërkaq numri i qytetarëve të regjistruar për të votuar me postë nga jashtë Kosovës dhe që i takojnë këtyre komunave është 29,725 votues”.

“Duke u mbështetur në Rregulloren Zgjedhore Nr. 03/2024 për krijimin, kundërshtimin dhe konfirmimin e Listës Votuese, Lista Votuese brenda vendit, e raundit të dytë, është plotësuar me personat që nga data 13 tetor deri më 9 nëntor 2025 arrijnë moshën e votimit, ndërkaq janë larguar personat që nga shtatori i këtij viti kanë hequr dorë nga shtetësa e Kosovës apo që kanë ndërruar jetë”.

Raundi i dytë i zgjedhjeve do të organizohet në 525 Qendra të Votimit me gjithsej 1,648 vendvotime, prej të cilave 507 Qendra të Votimit për votimin e rregullt me 1,628 vendvotime dhe 18 Qendra të Votimit për votimin me kusht me gjithsej 20 vendvotime.

Gjithashtu në këtë mbledhje, KQZ mori vendim për numrin e fletëvotimeve që do të shtypen për raundin e dytë të zgjedhjeve për Kryetarë të Komunave.

“Sipas vendimit të KQZ-së, do të shtypn 1,158,015 fletëvotime apo rreth 16% më pak se numri i përgjithshëm i qytetarëve me të drejtë vote në këtë raund. Në këtë numër përfshihen fletëvotimet për vendvotimet e rregullta, votimin me kusht, Votimin e Personave e Nevoja të Veçanta, fletëvotimet rezervë dhe për votimin me postë”, thuhet në një njoftim të KQZ-së.