ATV

Blog

  • Barcelona në garë për Fisnik Asllanin

    Barcelona në garë për Fisnik Asllanin

    Barcelona i është bashkuar garës për të nënshkruar me sulmuesin kosovar Fisnik Asllani, i cili po kalon një sezon mbresëlënës në Bundesliga.

    Ylli 23-vjeçar i Kosovës shkëlqeu sërish fundjavën që lamë pas, duke realizuar golin e pestë në kampionatin gjerman gjatë fitores 3–1 të Hoffenheim ndaj Heidenheim.

    Sipas raportimeve të “Sky Sport”, katalanasit kanë ndjekur prej javësh paraqitjet e Asllanit, por tani në garë janë futur edhe disa nga klubet më të mëdha gjermane.

    Gazetari i njohur Florian Plettenberg ka bërë të ditur se sulmuesi kosovar pritet të largohet nga Hoffenheim në verën e ardhshme, ndërsa interesimi për të po rritet dita-ditës.

    “Fisnik Asllani shënoi golin e pestë këtë sezon në fitoren 3:1 ndaj Heidenheim. 23-vjeçari pritet të largohet këtë verë falë klauzolës së lirimit.
    FC Barcelona, disa klube angleze dhe top klubet gjermane po e ndjekin nga afër”,     ka shkruar Plettenberg.

    Klauzola e lirimit të Asllanit raportohet të jetë rreth 30 milionë euro, shumë që mund ta bëjë të realizueshëm transferimin e tij drejt një skuadre më të madhe në merkaton e verës. /ATVLIVE.TV

  • Sot Seanca për Qeverinë e re, Kurti pritet të prezantojë kabinetin

    Sot Seanca për Qeverinë e re, Kurti pritet të prezantojë kabinetin

    Seanca për Qeverinë e re është caktuar të mbahet sot, me fillim nga ora 10:00. Mandatari për formimin e Qeverisë së re të Kosovës, kreu i Vetëvendosjes, Albin Kurti, sot pritet t’ua prezantojë kabinetin qeveritar deputetëve të Kuvendit.

    Më 10 tetor u bë konstituimi i legjislaturës së 9-të, e dalë nga zgjedhjet e 9 shkurtit. E gjithë kjo ndodhi tetë muaj pas mbajtjes së zgjedhjeve. Tashmë vendi ndodhet para një situate tjetër. Mandatari për formimin e qeverisë së re, kryetari i Vetëvendosjes, Albin Kurti, sot duhet ta prezantojë para 120 deputetëve kabinetin e ri qeveritar.

    Vetëvendosje ka 48 deputetë, ndërsa aktualisht nuk ka informacione për një marrëveshje koalicioni.
    Ani pse fitoi zgjedhjet parlamentare të 9 shkurtit, Vetëvendosje nuk mori mjaftueshëm vota për të qeverisur e vetme, ndërsa zgjodhi t’i bëjë ofertë Lidhjes Demokratike për bashkëpunim, e kjo e fundit refuzoi. Vetëvendosje tha se nuk bën koalicion me Partinë Demokratike as me Listën Serbe.

    Kurti, për ta formuar qeverinë e re, duhet t’i sigurojë votat e 61 deputetëve deri nesër. Por nëse kjo nuk ndodh, presidentja është e obliguar që brenda 10 ditëve t’i ftojë në konsultim edhe një herë partitë politike dhe të vendosë, sipas diskrecionit të saj, për mandatarin e dytë, nëse i dëshmohet se i ka numrat për të formuar qeverinë.

    Edhe i dyti ka 15 ditë kohë që t’ia paraqesë Kuvendit përbërjen e kabinetit qeveritar. Nëse as herën e dytë nuk formohet, presidentja duhet t’i shpallë zgjedhjet e reja, të cilat duhet të mbahen dyzet ditë nga data e shpalljes.

  • Peja dhe Sigal Prishtina shënuan fitore në xhiron e 3-të në Procredit Superligë

    Peja dhe Sigal Prishtina shënuan fitore në xhiron e 3-të në Procredit Superligë

    Janë zhvilluar dy ndeshjet e ditës së shtunë në kuadër të xhiros së tretë në Procredit Superligën e Kosovës në basketboll,ku skuadrat favorite kanë arritur fitore të pritura.

    Peja në udhëtim ka mposhtur Boran me rezultat 96:94,ku në këtë takim më i miri për Pejën ishte Tajh Green me 22 pikë kurse për Borën Adem Mekic realizoi 23 pikë.

    Në ndeshjen tjetër Sigal Prishtina mposhti Rahovecin 029 me rezultat 77:68,ku në këtë ndeshje Isiah Umipig realizoi 26 pikë për vendasit por ishin të pamjaftueshme,teksa Deondre Burns shënoi 20 pikë.

  • Prishtina vazhdon serinë e fitoreve-mund në Fadil Vokrri Dukagjinin

    Prishtina vazhdon serinë e fitoreve-mund në Fadil Vokrri Dukagjinin

    Skuadra e Prishtinës ka shënuar fitoren e rradhës në Albi Mall Superligë,duke mposhtur Dukagjinin me rezultat 2:0

    Pjesa e parë u karakterizua me dominion të kryeqytetasve të cilët shënuan përmes Hamdi Namanit në minutën e 33-të në 1:0,kurse 5 minuta para fundit të pjesës së parë Ilievski shënoi për 2:0 rezultat me të cilën përfunduan 45 minutat e parë.

    Në pjesën e dytë Prishtina krijoi raste të tjera për shënon,por deri në fund më gola nuk pati dhe kështu skuadra nga kryeqyteti vazhdon me serinë e fitoreve.

    Prishtina është lidere në tabelë me 25 pikë 6 më shumë se Ballkani,kurse Dukagjini mbetet në pozitën e 4-të me 14 pikë.

  • Djali i Driton Kukës fiton medaljen e bronztë, mposht serbin

    Djali i Driton Kukës fiton medaljen e bronztë, mposht serbin

    Jon Kuka fiton medaljen e bronztën në Kupën Evropiane për Kadet në Kranjska Gora, Slloveni.

    Në xhiron e parë Joni mposhti me Ippon, gjermanin Mortiz Schubert. Kurse në xhiron e dytë ai mposhti me dy yuko austriakin Djamil Kurbanov. Në xhiron tjetër Joni humbi me Wazari ndaj Celil Uyar nga Holanda.

    Joni u ndesh në repasazh ku në luftën e parë mposhti me Ippon Yuval Fuchus nga Izraeli, dhe në luftën e dytë fitoi me tri shido për Ippon kundër Yanis Semadi nga Franca, që i siguroi atij ndeshjen për medalje të bronztë.

    Në ndeshjen vendimtare, Joni mposhti me 2 Yuko, Lazar Bogdanovic nga Serbia. /ATVLIVE.TV

  • Granit Begolli rikthehet në krye të Feronikelit ’74

    Granit Begolli rikthehet në krye të Feronikelit ’74

    Klubi nga Drenasi, Feronikeli ’74, ka njoftuar zyrtarisht emërimin e Granit Begollit si trajner të ri të ekipit.

    Pas ndarjes me Granit Dervishollin para disa ditësh, drejtuesit e klubit nuk kanë humbur kohë dhe kanë gjetur menjëherë pasuesin e tij – një emër të njohur për tifozët drenicas.

    Bëhet fjalë për Granit Begollin, ish-trajnerin e skuadrës, i cili është rikthyer në bankinën e klubit nga stadiumi “Rexhep Rexhepi”.

    Lajmi është bërë i ditur përmes njoftimit zyrtar të klubit, ku gjithashtu është konfirmuar se Arsim Tërshani do të jetë pjesë e stafit teknik të Begollit.

    Në njoftimin e Feronikelit thuhet:

    “FC Feronikeli ’74 njofton me kënaqësi rikthimin e trajnerit Granit Begolli në krye të ekipit tonë.
    Begolli, trajneri i njohur që na ka udhëhequr drejt inkuadrimit në Superligë, rikthehet sërish në bankinën e klubit tonë për të vazhduar më tej.
    Ai është një emër i dëshmuar në futbollin kosovar, me përvojë te klubet Liria, Vushtrria, Suhareka, Vëllaznimi e të tjera.”

    Më tej, klubi shton:

    “Në të njëjtën kohë, ekipi ynë teknik përforcohet edhe me trajnerin Arsim Tërshani.
    Ky është një hap i rëndësishëm për FC Feronikeli ’74, duke fuqizuar shtabin teknik me profesionalizëm, përvojë dhe vizion për sukses.”

  • “Je legjendë” – Lladrovci emocionon me mesazhin për Granit Xhakën

    “Je legjendë” – Lladrovci emocionon me mesazhin për Granit Xhakën

    Sunderland arriti një fitore të madhe në udhëtim ndaj Chelseat me rezultat 2–1, në kuadër të xhiros së nëntë të Ligës Premier.

    Të udhëhequr nga kapiteni, Granit Xhaka, ekipi që u promovua këtë sezon në elitë arriti të bëjë befasinë e javës, duke siguruar fitoren krejt në fund të takimit.

    Mesfushori shqiptar ishte titullar dhe zhvilloi një ndeshje të plotë me paraqitje pozitive, duke u afruar edhe pranë golit në një rast.

    Në tribunë për ta përkrahur Xhakën ishte i pranishëm edhe Ramiz Lladrovci, i cili pas ndeshjes mori fanellën e tij si kujtim.

    Lladrovci e bëri të ditur këtë përmes një postimi në rrjetin social Facebook, ku publikoi një fotografi me fanellën e Xhakës në duar, duke shkruar:

    “Granit, faleminderit, je legjendë. Ky vrap yti, përqafimi dhe dhurata më bëjnë krenar.
    Krenar me edukatën tënde — faleminderit familje Xhaka, faleminderit Ragip, Taulant.
    Respekt Granit, je i paarritshëm kampion.”

    Pas kësaj fitoreje të madhe, ‘Macet e Zeza’ do të rikthehet në aksion të hënën, kur do të presë në shtëpi Evertonin. /ATVLIVE.TV

  • Asllani shkëlqen, Hoffenheim fiton bindshëm ndaj Heidenheim

    Asllani shkëlqen, Hoffenheim fiton bindshëm ndaj Heidenheim

    Ekipi gjerman, Hoffenheim, ka regjistruar fitore të rëndësishme këtë të shtunë, duke mposhtur Heidenheimin me rezultat 3–1 në ndeshjen e javës së tetë të Bundesligës.

    Një nga protagonistët kryesorë të fitores ishte sulmuesi kosovar Fisnik Asllani, i cili realizoi një gol të mrekullueshëm në minutën e 18-të, duke i dhënë epërsinë 1–0 ekipit të tij.

    Nga minuta e parë në këtë ndeshje u aktivizuan gjithashtu Albian Hajdari dhe Leon Avdullahu, të cilët dhanë kontribut të rëndësishëm në performancën e skuadrës.

    Asllani dhe Hajdari u renditën në mesin e më të mirëve të takimit, sipas vlerësimeve të “SofaScore”.

    Sulmuesi dardan mori notën 8.7 për golin dhe paraqitjen e tij të shkëlqyer, ndërsa mbrojtësi Hajdari u vlerësua me 7.3 për sigurinë e treguar në prapavijë.

    Pas kësaj fitoreje, Hoffenheimi ngjitet në vendin e shtatë të tabelës, ndërsa në javën e ardhshme do të përballet në udhëtim me Wolfsburgun. /ATVLIVE.TV

  • Karakter si Xhaka — Sunderland triumfon ndaj Chelseat

    Karakter si Xhaka — Sunderland triumfon ndaj Chelseat

    Sunderland ka arritur një fitore të madhe si mysafir ndaj Chelseat, në kuadër të javës së nëntë të Premier Ligës.

    “Blutë” ishin skuadra më dominuese në pjesën më të madhe të ndeshjes, megjithatë Sunderland arriti të marrë tri pikë të plota me rezultat 1–2.

    Ndeshja nisi furishëm dhe pas vetëm katër minutash lojë, Alejandro Garnacho shënoi nga afërsia pas një asistimi të Pedro Netos.

    Megjithatë, në minutën e 22-të, pas një kundërsulmi të shpejtë, Wilson Isidor realizoi nga afërsia për ta barazuar rezultatin në 1–1.

    Pjesa e dytë u zhvillua me më pak intensitet dhe raste të pastra. Kur dukej se ndeshja do të përfundonte në barazim, Sunderland realizoi një kundërsulm perfekt: Chemsdine Talbi shënoi një supergol në minutat shtesë (90+3’), pas një asistimi të Brobbey.

    Pas kësaj fitoreje, Sunderland ngjitet në pozitën e dytë të tabelës me 17 pikë, ndërsa Chelsea zbret në vendin e shtatë me 14 pikë. /ATVLIVE.TV

  • Rama: Kosova t’ia lërë topin në derë Serbisë

    Rama: Kosova t’ia lërë topin në derë Serbisë

    Kryeministri i Shqipërisë, Edi Rama, ka thënë se Kosova duhet “t’ia lërë topin në derë Serbisë”, duke i përfunduar obligimet e saj nga dialogu Kosovë-Serbi.

    Sipas tij, në rrugën evropiane Kosova duhet ta harrojë Serbinë”.

    “Sipas meje, Kosova duhet ta harrojë krejt Serbinë në kuptimin që duhet të përmbushë në mënyrë unilaterale të gjitha kërkesat e dialogut dhe t’ia lërë, siç i themi ne, topin në derë Serbisë, duke i thënë Evropës, duke u thënë të gjitha vendeve të Evropës, edhe atyre që nuk e njohin akoma, ‘ja kush jemi ne, i përmbushëm, i firmosëm dhe tani shkoni dhe merrjani firmën Serbisë’. Por duhet të shkëputet totalisht nga Serbia dhe nuk duket të jetojë me idenë e Serbisë”, ka thënë ai në një intervistë për “Deutsche Welle”.

    Rama ka folur edhe për raportet me kryeministrin në detyrë të Kosovës, Albin Kurti. Ka thënë se kanë raporte miqësore në aspektin personal, por se dallojnë në këndvështrime.

    Sipas tij, raportet Kosovë-Shqipëri kanë përparuar. E projekti i madh sipas tij në kohën aktuale është puna në hekurudhën Durrës-Prishtinë.