Blog

Kisha e famshme Sagrada Familia në Barcelonë është bërë zyrtarisht kisha më e lartë në botë, pasi punëtorët vendosën pjesën e parë të një kryqi në majë të kullës së saj qendrore.

Me një lartësi prej 162.91 metrash, bazilika spanjolle ka thyer rekordin e mëparshëm të Minsterit të Ulmit në Gjermani, i cili mbante titullin që nga viti 1890, raporton BBC.

E projektuar nga arkitekti i njohur Antoni Gaudi, Sagrada Familia ka qenë në ndërtim e sipër për më shumë se një shekull, dhe përfundimi i ndërtesës kryesore pritet vitin e ardhshëm.

Kulla qendrore e Jezu Krishtit do të rritet më tej me pjesët e mbetura të kryqit, duke arritur përfundimisht një lartësi prej 172 metrash.

Vendimi i Qeverisë në detyrë për të miratuar dhe proceduar në Kuvend projektligjin për buxhetin e vitit 2026 ka nxitur reagime të forta nga organizatat e shoqërisë civile.

Instituti GAP dhe përfaqësuesi i KDI-së, Eugen Cakolli, kanë ngritur shqetësime serioze mbi ligjshmërinë e këtij procesi, duke e cilësuar atë si veprim në kundërshtim me Kushtetutën dhe legjislacionin në fuqi.

Në reagimin e publikuar nga GAP, thuhet se mënyra se si është zhvilluar mbledhja e Qeverisë bie ndesh me Ligjin për Qeverinë dhe me aktgjykimin e Gjykatës Supreme, pasi në votim kanë marrë pjesë persona që tashmë janë certifikuar si deputetë.

Sipas GAP-it, një situatë e tillë krijon konflikt ligjor, për shkak se askush nuk mund të ushtrojë njëkohësisht funksionin e deputetit dhe të anëtarit të Qeverisë.

Instituti paralajmëron se një qasje e tillë rrezikon jo vetëm ligjshmërinë e buxhetit, por edhe stabilitetin institucional dhe financiar të vendit, duke theksuar se procesi është zhvilluar pa konsultim të gjerë dhe në një periudhë zgjedhore.

Nga ana tjetër, përfaqësuesi i KDI-së, Eugen Cakolli, ka theksuar se ky veprim i Qeverisë ka krijuar një “situatë absurde dhe paradoksale”, pasi disa nga anëtarët e kabinetit që miratuan buxhetin tani janë deputetë që do të votojnë të njëjtin dokument në Kuvend.

Sipas Cakollit, kjo përbën një “konflikt të qartë interesi” dhe një shkelje të parimeve ligjore, e cila po paraqitet padrejtësisht si veprim në emër të qytetarëve.

Aktivisti i njohur Rron Gjinovci ka reaguar pas komenteve që e kanë cilësuar rritjen e pagave, pensioneve dhe shtesave nga Qeveria si “blerje votash”.

Përmes një postimi në rrjetin social Facebook, Gjinovci ka kundërshtuar këtë narrativë, duke e quajtur “shkurtpamësi dhe mungesë logjike”.

“Rritja e pagave, pensioneve dhe shtesave nuk është blerje votash. Me e cilësu si të tillë është shkurtpamësi dhe mungesë logjike”, ka shkruar ai.

Në argumentimin e tij, Gjinovci thekson se “blerja” nënkupton një marrëveshje mes dy palëve, ku njëra jep para dhe tjetra ofron diçka në këmbim, gjë që sipas tij nuk ekziston në këtë rast.

“Qeveria ndan para, por qytetarët nuk kanë asnjë detyrim që t’i japin diçka në këmbim. Këto rritje i përfitojnë të gjithë, pa dallim bindjesh politike”,  ka sqaruar aktivisti.

Sipas tij, edhe konceptualisht nuk qëndron ideja e “blerjes së votave”, pasi mjetet që ndahen janë nga taksat e vetë qytetarëve.

“Këto para nuk janë të qeverisë, por të atyre që i marrin. Në fakt, qeveria po i shpërndan fondet që i ka mbledhur nga vetë qytetarët”, ka shtuar ai.

Në përfundim, Gjinovci ironizon me ata që e shohin rritjen e pagave si strategji elektorale, duke u thënë se nëse “oferta e tyre politike sfidohet kaq lehtë, atëherë duhet ta rishikojnë programin”.

“Nëse qytetarët blehen kaq lehtë, atëherë problemi nuk është te qeveria, por te oferta jote si opozitë. Rishikoje programin,” ka përfunduar ai.