Presidentja e vendit, Vjosa Osmani, po deklarohet pas takimit me liderët partiakë, afër një javë pasi Kuvendi i Kosovës nuk e votoi kabinetin qeveritar të prezantuar nga mandatari Albin Kurti.

Pasi krerët e PDK-së, LDK-së dhe AAK-së, të cilët iu drejtuan mediave paraprakisht, kërkuan zgjedhje të reja, pasi sipas tyre nuk ka shumicë parlamentare, por Osmani tha se e ka detyrim të bëjë çmos që të evitohen zgjedhjet.

“Fat i keq për Kosovën, që partitë politike nuk kanë arritur të konsolidojnë të gjitha institucionet, përfshirë Qeverinë. Bashkë me kohën, kemi humbur shumë mundësi për vendin tonë. Aktgjykimet  Kushtetueses thonë që presidentja duhet të bëjë çmos t’i evitojë zgjedhjet. Detyrimi i presidentes ësjtë që të bëjë çmos t’i evitojë zgjedhjet. Do të iu lusim për pak durim edhe pak ditë, derisa të sqarohen të gjitha rrethanat për caktimin e mandatarit të dytë”.

Kryetari i Partisë Demokratike të Kosovës, Memli Krasniqi ka bërë të ditur se nga takimi me Presidenten Vjosa Osmani, është biseduar për shkuarjen në zgjedhjet e parakohshme.

I pari i PDK-së, zbuloi se duhet sa më parë që të shkohet në zgjedhjet, në mënyrë që të miratohet buxheti dhe marrëveshjet e tjera ndërkombëtare.

“Nga ky takim u bë e qartë se askush nuk mund ta formojë shumicën parlamentare, bazuar në legjislaturën aktuale”, tha Krasniqi.

“Në këtë takim e kam bërë të qartë se nuk jam pjesë e asnjë shumicë, andaj kjo e bënë të pamundur krijimin e një qeverie matematikisht”.

“Kjo do të duhej të ishte e mjaftueshme që edhe sot, Presidentja e vendit do ta caktonte datën e zgjedhjeve, pasi ne si PDK e kemi paralajmëruar një situatë të tillë”.

“Nga kjo situatë e krijuar na imponohet që të shkojmë në zgjedhjet të parakohshme, andaj ne kërkojmë që sa më parë të caktohet data për zgjedhje”.

“Kjo situatë nuk duhet të shtyhet, pasi kemi miratimin e buxhetit, miratimin e marrëveshjeve ndërkombëtare, specifikisht siç është plani i rritjes për Ballkanin Perëndimor”, shtoi kreu i PDK-së.

Ish-kryeministri i Shqipërisë, Fatos Nano, është ndarë nga jeta në moshën 73-vjeçare, pas më shumë se tre javësh betejë në një spital privat në Tiranë, ku ndodhej në gjendje të rëndë shëndetësore.

Sipas burimeve mjekësore, Nano kishte pësuar vdekje klinike (arrest kardiocirkulator) në banesën e tij dhe që prej asaj kohe mbahej nën kujdes të vazhdueshëm nga mjekët, por pa mundur të rikthehej në gjendje të qëndrueshme.

Fatos Nano mbetet një ndër figurat më të rëndësishme të tranzicionit demokratik pas viteve ’90. Ai themeloi Partinë Socialiste të Shqipërisë dhe e udhëhoqi drejt shndërrimit në një forcë të fuqishme politike që do të qeveriste vendin për vite me radhë.

Gjatë periudhave të tij në krye të qeverisë — në vitet 1991, 1997–1998 dhe 2002–2005 — Nano u përball me sfida të mëdha politike dhe ekonomike, duke u kujtuar për përpjekjet për stabilizimin e vendit dhe afrimin e Shqipërisë me standardet europiane.

Për kontributin e tij, ai është vlerësuar shpesh si arkitekti i modernizimit të së majtës shqiptare, një politikan që la gjurmë në jetën publike dhe në kulturën politike të vendit.

Pas tërheqjes nga politika aktive, Nano qëndroi në prapaskenë, duke dhënë deklarata herë pas here për zhvillimet politike, por duke ruajtur gjithmonë ndikimin e tij në opinionin publik.

Fatos Nano lindi më 16 shtator 1952 në Tiranë, ku u diplomua në Fakultetin e Ekonomisë të Universitetit të Tiranës. Me ikjen e tij, mbyllet një kapitull i rëndësishëm i historisë moderne shqiptare.

Dhomat e Specializuara të Kosovës kanë anuluar edhe zyrtarisht seancat e planifikuara për javën e ardhshme, që nis më 3 nëntor, sikurse kanë vepruar edhe për javën aktuale të 27 tetorit.

Krejt kjo u bë për shkak të shtyrjes së dëshmisë së diplomatit amerikan, Christopher Hill.

I njëjti, së bashku me një dëshmitar tjetër paraprakisht, të thirrur nga ish-presidenti Hashim Thaçi, pritet të dëshmojnë në javën që nis më 10 nëntor.

Presidentja e Kosovës, Vjosa Osmani, pas takimit të sotëm me partitë politike, ka bërë të ditur se nga diskutimet është parë se ekzistojnë qëndrime të ndryshme për krijimin e shumicës parlamentare.

Sipas Osmanit, disa parti kanë theksuar se nuk ka mundësi të krijohet shumicë për formimin e qeverisë, ndërsa të tjerat kanë kërkuar që të ketë edhe një takim tjetër për të shqyrtuar mundësinë e propozimit të një mandatari të ri.

Presidentja ka nënvizuar se do të presë deri më 5 nëntor, datë kur skadon afati kushtetues për caktimin e mandatarit të dytë, për të parë nëse do të ketë ndonjë lëvizje nga partitë politike.

“Besoj i keni dëgjuar partitë për qëndrimet e tyre. Disa kishin që s’mund të krijojnë shumicë, kishte qëndrime që dëshirojnë të takohemi sërish për të parë mundësinë e propozimit të një mandatari të ri. Sipas Kushtetutës ne i kemi dhjetë ditë, afati s’kadon deri më 5 nëntor. Deri me atë datë do të kontaktoj me kryetarë të partive. Do të jem në komunikim me ta, dhe kushdo që ka gatishmëri për takim për të parë nëse ka mundësi për caktim të një mandatari të tjetër, i pres në takim,” ka deklaruar Osmani.

Kreu i Qeverisë shqiptare dhe i Partisë Socialise, Edi Rama, i ka dhënë lamtumirën paraardhësit të tij politik, Fatos Nanos.

Në një postim në llogarinë e tij në Facebook, Rama ka shkruar “lamtumirë kryetar”.

Nano vdiq sot pas përkeqësimit serioz të gjendje së tij shëndetësore. Ai vdiq në moshën 73-vjeçare.