Blog

Në Klinikën e Kirurgjisë Torakale të Qendrës Klinike Universitare të Kosovës është realizuar me sukses një ndërhyrje e ndërlikuar kirurgjikale për largimin e një tumori me përmasa rreth 16 centimetra.

Sipas njoftimit të QKUK-së në Facebook, pacientja F. D., e lindur në vitin 1956, ishte diagnostikuar me këtë tumor, i cili ndodhej në mes të mushkërive dhe shumë afër strukturave vitale të gjoksit, çka e bënte rastin tejet delikat dhe me rrezik të lartë gjatë ndërhyrjes.

“Pas ekzaminimeve të nevojshme, ekipi i mjekëve torakal me asistencë edhe nga mjekët e Klinikës së Anestezionit dhe ekipi i infermierëve dhe stafit tjetër profesional, kryen operacionin me sukses.

Tumori është larguar plotësisht, ndërsa pacientja pas operacionit është në gjendje të mirë shëndetësore, derisa po monitorohet nga afër nga stafi i klinikës”, thuhet në postim.

Kryetari i Lidhjes Demokratike të Kosovës, Lumir Abdixhiku në një konferencë tha se çdo zvarritje e qëllimshme nga Lëvizja Vetëvendosje është zgjatje e krizës dhe se zgjidhja e vetme janë zgjedhjet.

Abdixhiku theksoi para gazetarëve në këto rrethana edhe mandatari i dytë, Glauk Konjufca duhet të jetë i sinqertë dhe të konstatojë se nuk e ka shumicën.

“Partitë serioze do të duhej të i kishin menduar me kohë propozimin tonë. Përveçse jemi vonë, qeveri të pakicës nuk mund të ketë më në Kosovë. Nga viti 1989, nga 23 dhjetori 1989 në Kosovë vendos shumica. LDK e rikujton se në demokraci pakica nuk mund të vendos për shumicën, për populloni. Në demokraci pakicës i thonë opozitë, jo qeveri. S’mund të jesh qeveri pakicë. Ose je opozitë, ose je qeveri shumicë. Në demokraci pakica nuk e ndanë buxhetin, nuk kalon ligje, nuk imponon politika dhe nuk mund ta bllokojë vullnetin qytetarë të shprehur me votë të lirë, e as me zvarritje si kjo me mandatarin e dytë. Çdo Qeveri legjitime duhet të përfaqësojë shumicën qytetare, kur kjo shumicë nuk ekziston, vendi duhet t’i kthehet sovranit. Ajo çka sot na propozohet më shumë se demokracisë i ngjanë monarkisë. Në monarki mandati trashëgohet nga i babai te i biri, nga Albin te Glauki. Në monarki mandati mund të trashëgohet e në demokraci mandati sigurohet, tha Abdixhiku në konferencën për media.Ai tha se Konjufca duhet ta kuptojë sa më parë që nuk ka vota.“Në këto rrethana Glauk Konjufca me mandat të trashëguar në rrethana të tanishme politike duke kuptuar qartë dhe saktë vullnetit të qytetarëve, duhet të jetë i sinqertë më vetën më shumë dhe shumë më shumë se kryetari i tij dhe të konstatojë sa më parë aq më mirë se nuk ka shumicë”, theksoi ai.

Një veprim i koordinuar ndërkombëtarisht kundër rrjeteve të dyshuara të mashtrimit online dhe pastrimit të parave, që përfshinte edhe ofrues gjermanë të shërbimeve të pagesave, ka rezultuar me 18 të arrestuar, kanë njoftuar autoritetet gjermane të mërkurën.

Zyra Federale e Policisë Kriminale të Gjermanisë dhe prokurorët kanë bërë të ditur se midis viteve 2016 dhe 2021, të dyshuarit kishin përdorur të dhënat e kartave të kreditit të 4.3 milionë individëve nga 193 vende në skemën e tyre, duke grumbulluar fonde në vlerë mbi 300 milionë euro.

Të dyshuarit kishin përvetësuar para përmes abonimeve në faqet e internetit të rreme, të dizajnuara për transmetim, takime dhe argëtim.

Autoritetet kanë shtuar se të pandehurit kishin kompromentuar katër ofrues të mëdhenj gjermanë të shërbimeve të pagesave për të përpunuar pagesat, por emrat e kompanive nuk janë bërë të ditura.

Të martën vonë, autoritetet kanë kryer kontrolle në ndërtesa në Gjermani, Itali, Kanada, Luksemburg, Holandë, Singapor, Spanjë, SHBA dhe Qipro.

Prokurorët kanë thënë se fokusin e kanë pasur tek 44 të dyshuar në Gjermani dhe vende të tjera, përfshirë anëtarë të rrjetit të mashtrimit, punonjës të firmave të pagesave dhe ofrues të shërbimeve kriminale si shërbim.

Në nëntë vjetorin e vdekjes së djalit të tyre, Xhemile e Avni Dehari kërkojnë drejtësi për Astritin.

Prindërit e Astrit Deharit pas homazheve tek varri i tyre që u bënë edhe nën shoqërim të kryeministrit në detyrë Albin Kurti e kryeparlamentarit Dimal Basha, kanë hedhur kritika ndaj sistemit të drejtësisë që nuk ka zbardhur rastin.

E nëna Xhemile Dehari u përgjigj kritikëve që pse Vetëvendosje nuk po bënë asgjë për rastin, pa cka ajo tha se Prokuroria nuk ka punë me Vetëvendosjen sepse sipas saj ai u vra në burgin në të cilin u mbyll për çështje politike.

“Për me u përgjigj ajo prokurori, nuk ka punë me Vetëvendosje. Astriti ka qenë anëtar i Vetëvendosjes. Astriti politikisht është mbyllur, është vrarë në burgun e Prizrenit. Sylë Hoxha, Nexhmi Krasniqi le të dalin e ta thonë, ndoshta u ka ardhur koha me dalë e me thënë të vërtetën, se çka kanë parë në Astritin. E jo neve me na kërku që nuk kemi qenë prezent. Por nëntë vite nuk është pak me prit. Duhet edhe ata prokurorët e rinj me ditë çka duhet të bëjnë tutje”, ka deklaruar nëna e Deharit, Xhemilja.

Moszbardhjen e rastit, dyshime po ka edhe babai i Astrit Deharit i cili tha se mosfunksionaliteti i drejtësisë po bëhet ndoshta me qëllim për të mos hedhur dritë mbi vdekjen e djalit të tij.

“Kjo flet shumë për një sistem jofunksional të drejtësisë, dhe ky jofunksionalitet më shumë duket të jetë i qëllimshëm sesa i paqëllimshëm. Ne, si familje, por edhe në emër të të gjithë pjesëmarrësve këtu, kërkojmë që ky rast ta gjejë zgjidhjen dhe drejtësia të kthehet në binarët e duhur, sepse kjo flet për një njollë të keqe të drejtësisë në Republikën e Kosovës dhe nuk do të duhej të vazhdohej kështu. Uroj që për këtë rast dhe për të gjitha rastet në Kosovë, drejtësia ta thotë fjalën e vet”, tha Dehari.

Agjencia e Ushqimit dhe Veterinarisë së Kosovës (AUV) ka njoftuar se ka marrë vendim për ndalimin e importit të shpezëve dhe produkteve të tyre nga Hungaria, pas konfirmimit të përhapjes së gripit të shpezëve në disa rajone të këtij shteti.

Vendimi vjen pas raportimeve të Organizatës Botërore për Shëndetin e Kafshëve (WOAH) dhe Komisionit Evropian, të cilat kanë njoftuar se virusi është përhapur në fermat komerciale dhe tek shpezët e egra në njësitë administrative Jasz, Nagykun dhe Szolnok të Hungarisë.

“Në bazë të raportimeve zyrtare, ndalohet importi i shpezëve të gjalla dhe i produkteve të tyre që kanë origjinën nga zonat e infektuara të shtetit të Hungarisë, përveç nëse ato kanë origjinën nga ferma të paprekura nga sëmundja, të cilat gjenden në një rreze prej 50 km larg zonave të prekura”, thuhet në njoftimin e AUV-së.

Kjo ndalesë hyn në fuqi menjëherë dhe vjen vetëm pak ditë pasi Kosova ndaloi importin e shpezëve nga Italia, për arsye të njëjta.

Agjencia ka theksuar se masat janë ndërmarrë për të parandaluar futjen e virusit në territorin e Kosovës dhe për të mbrojtur shëndetin e kafshëve vendore.