Blog

Kryetari i Partisë Demokratike të Kosovës, Memli Krasniqi, ka deklaruar se PDK ka përmbyllur me sukses një tjetër kapitull të rëndësishëm të jetës demokratike të vendit, duke u konfirmuar si partia më e votuar në nivel vendi me 187,526 vota, 206 asamblistë të zgjedhur dhe gjashtë komuna të fituara: Ferizaj, Prizren, Skenderaj, Vushtrri, Kaçanik dhe Han i Elezit.

“PDK u konfirmua si partia më e votuar në Kosovë. Me 206 asamblistë të zgjedhur, mbetëm forca me përfaqësimin më të gjerë lokal në vend. Dhe me gjashtë komuna të fituara, PDK dëshmoi se suksesi ndërtohet mbi punë me rezultate dhe përfaqësim me dinjitet,” ka theksuar Krasniqi.

Kreu i PDK-së tha se kjo ishte një fushatë e pastër dhe dinjitoze, duke vlerësuar se edhe aty ku gara ishte e vështirë, çdo përpjekje e ndershme është fitore në vetvete.

“Disa gara kanë qenë më të vështira, madje edhe të pabarabarta. Por për ne, çdo përpjekje e ndershme është fitore, sepse PDK nuk e mat suksesin vetëm me numra, por me qëndresën, qetësinë dhe përgjegjësinë me të cilat e përfaqëson qytetarin në çdo rrethanë,” tha ai.

Krasniqi ka falënderuar të gjithë kandidatët e PDK-së për kryetarë komunash për angazhimin dhe dinjitetin e treguar, duke përmendur në mënyrë të veçantë kandidatin për Mitrovicë, Arian Tahirin.

“Dua të shpreh mirënjohjen dhe respektin e veçantë për mikun tim, yllin e kësaj fushate, Arian Tahirin në Mitrovicë, i cili, i vetëm përballë tërë aparatit shtetëror, bëri një garë të fortë, dinjitoze dhe të ngushtë deri në fund,” deklaroi kryetari i PDK-së.

Në fund të mesazhit të tij, Krasniqi shprehu mirënjohje për qytetarët e Kosovës për shembullin demokratik që dhanë në këto zgjedhje, duke theksuar se PDK po hyn në një fazë të re të bashkimit dhe përgatitjes për fitore të tjera.

“Partia Demokratike e Kosovës sot qëndron më e bashkuar, më e pjekur dhe më e përgatitur për sfidat që na presin. Ky rezultat nuk është fundi, por fillimi i një kapitulli të ri – kapitulli i bashkimit, rigrupimit dhe përgatitjes për fitoret e ardhshme,” u shpreh ai.

Krasniqi përmbylli me një mesazh të qartë për të ardhmen:

“PDK nuk ndalet. Sepse PDK është e qytetarëve. PDK është e Kosovës. Dhe me PDK-në, ditët më të mira janë përpara vendit tonë!”

Kryetari i Lidhjes Demokratike të Kosovës, Lumir Abdixhiku, ka reaguar pas përfundimit të raundit të dytë të zgjedhjeve lokale, duke e cilësuar rezultatin si fitore të qytetarisë dhe të demokracisë.

Në një reagim të gjatë në rrjetet sociale, Abdixhiku tha se “dje Kosova foli me votë, me besim dhe me qartësi – foli në emër të shpresës, të qetësisë dhe të punës”. Ai theksoi se mesazhi i qytetarëve ishte i pastër: “Kosova jeton me demokraci. Kjo është vlera më e madhe e jona si popull.”

Sipas tij, LDK ka shënuar fitore në shtatë komuna, përfshirë edhe Prishtinën, të cilën e quajti “garën më të rëndësishme në vend”. Abdixhiku nënvizoi se “pas 12 vitesh, LDK është sërish parti e parë në Kryeqytet, dhe fitorja e dytë radhazi aty është shenjë e qartë e forcës sonë politike”.

Ai falënderoi kandidatët fitues dhe ekipet e tyre për rezultatet në Prishtinë, Pejë, Viti, Junik, Dragash, Lipjan dhe Istog, duke shtuar se “ky rezultat është dëshmi e një force që qëndron, rritet e forcohet”.

Në të njëjtën kohë, Abdixhiku u shpreh mirënjohës ndaj kandidatëve që nuk arritën të fitonin, duke thënë se “LDK ndihet krenare me punën e tyre të ndershme dhe dinjitoze në një garë të vështirë e të pabarabartë”.

“Kemi fituar me qytetari, me ide, me punë dhe me njerëzit më të mirë që ka ky vend. Pa aparat shtetëror, pa interesa klanore, dhe me bindje në veten tonë”, tha ai.

Kreu i LDK-së u shpreh se partia e tij do të qeverisë për të gjithë qytetarët, pa dallime partiake: “Në këtë Republikë, asnjë qytetar nuk duhet të ndjehet humbës. Ne nuk fitojmë për të ndarë, por për të bashkuar. Pushteti është përgjegjësi, jo privilegj.”

Në përmbyllje të reagimit, Abdixhiku tha se fitorja e LDK-së është “një thirrje për punë, për përulësi dhe dinjitet”, duke shtuar se qytetarët kanë nevojë për rezultate e jo për fjalë të mëdha.

“Dje, Kosova ka bërë një hap përpara drejt normalitetit, drejt një qeverisjeje që punon, që dëgjon dhe që respekton. Ky është misioni ynë”, përfundoi Abdixhiku, duke uruar qytetarët për “një natë shprese dhe një fillim të mbarë për Republikën e Kosovës”.

Ish-presidenti francez Nicolas Sarkozy do të lirohet nga burgu pas afërsisht 20 ditësh.

Gjykata e Apelit e Parisit miratoi kërkesën e tij për lirim të hënën.

Ish-presidenti tani do të vihet nën mbikëqyrje gjyqësore.

Në aferën që kishte të bënte me ndihmën e supozuar të paligjshme financiare nga Libia për fushatën zgjedhore presidenciale të vitit 2007, një gjykatë në Paris e dënoi Sarkozinë me pesë vjet burgim për anëtarësim në një organizatë kriminale

Komuna e Prishtinës ka njoftuar qytetarët se Forca e Sigurisë së Kosovës, do të zhvillojë më 15 nëntor 2025 një stërvitje ushtarake në zonën e Gërmisë.

Sipas njoftimit, stërvitja do të përfshijë marshim kondicional dhe lëvizje të këmbësorisë, me prani të pjesëtarëve të FSK-së në terren.

Komuna thekson se aktiviteti zhvillohet në kuadër të planit të rregullt stërvitor të FSK-së dhe nuk ka arsye për shqetësim për qytetarët.

Qytetarët këshillohen të jenë të vëmendshëm gjatë lëvizjeve në zonën e stërvitjes dhe të respektojnë sinjalizimet në terren.