Blog

Pesë shoferë janë ndëshkuar nga Njësitë e Komunikacionit Rrugor në rajonin e Ferizajt, pasi u kapën duke kryer kundërvajtje të rënda në trafik në Shtime dhe Ferizaj.

Sipas policisë, më 22 nëntor 2025, në rrugën “Adem Jashari” në Shtime u ndaluan tre shoferë për tejkalim të shpejtësisë dhe një tjetër për tejkalim të rrezikshëm.

I.R., 31 vjeç, u kap duke vozitur me 90 km/h në zonën me kufizim 40 km/h me veturën VW Golf. Ai u gjobit me 200 euro, mori 2 pikë negative dhe iu pezullua patentë shoferi për 3 muaj.

Y.B., 30 vjeç, i cili po lëvizte me Audi me 93 km/h në të njëjtën zonë, po ashtu u ndëshkua me 200 euro, 2 pikë negative dhe 3 muaj pezullim të patentës.

Ndërkohë, B.T., 40 vjeç, u kap duke kryer tejkalim në vijë të plotë me veturën Toyota dhe u ndëshkua me të njëjtën masë.

M.G., 30 vjeç, që po ngiste VW Caddy, u gjobit për përdorim të telefonit gjatë vozitjes. Policia konstatoi se kjo ishte përsëritje e kundërvajtjes, ndaj u aplikua ndëshkimi maksimal prej 200 euro, 2 pikë negative dhe 3 muaj pezullim të patentë shoferit.

Në Ferizaj, në rrugën “Brahim Ademi”, u ndalua edhe H.K., 39 vjeç, i cili po voziste VW Golf me 100 km/h në zonën ku kufizimi është 50 km/h. Edhe ai u ndëshkua me 200 euro, 2 pikë negative dhe 3 muaj pezullim të patentës.

Policia Rajonale e Ferizajt u ka bërë thirrje të gjithë shoferëve që të respektojnë kufizimet e shpejtësisë dhe shenjat e komunikacionit, duke theksuar se shpejtësia e lartë, tejkalimet e pasigurta dhe përdorimi i telefonit gjatë ngasjes rrezikojnë seriozisht jetën dhe pronën e qytetarëve.

Një valë moti të ashpër, me temperatura të ulëta dhe reshje dëbore, po godet Ballkanin.

Borë e madhe ka rënë gjatë orëve të fundit, veçanërisht në Sarajevë dhe në të gjithë Bosnjën dhe Hercegovinën, si dhe në Kroaci, Serbi dhe pjesë të tjera të rajonit.

Në kryeqytetin boshnjak, mediat rajonale raportuan se trafiku ishte i paralizuar për orë të tëra, me ekipe punëtorësh borëpastruese të vendosura për të pastruar rrugët nga bora dhe akulli.

Shumë qytete në të gjithë Kroacinë kanë luftuar me reshjet e dëborës, përfshirë përgjatë bregdetit dalmat.

Shira të rrëmbyeshëm janë regjistruar ditët e fundit në Maqedoninë e Veriut, ku disa lumenj kanë dalë nga shtrati, duke lënë dhjetëra komunitete të përmbytura dhe të izoluara.

Situatë me të reshura të rrëmbyeshme ka mbretëruar edhe në Kosovë ditëve të fundit, sidomos të matën e javës që po lëmë pas.

Ndërkaq, sipas IHMK-së, mot i paqëndrueshëm pritet të mbretërojë edhe ditëve në vijim, ku janë paralajmëruar edhe vërshime të mundshme në zona të caktuara.

Ministri në detyrë i Mbrojtjes, Ejup Maqedonci, ka deklaruar se një pjesë e raketave kundërtank “Javelin”, të blera në Shtetet e Bashkuara të Amerikës, pritet të arrijnë në Kosovë gjatë vitit të ardhshëm.

“Marrëveshjet për blerje nuk përfshijnë vetëm raketat Javelin. Ne kemi bërë dhe po bëjmë blerje të shumta të sistemeve të armatimit nga SHBA-ja dhe nga shtete të tjera. Aktualisht jemi në periudhën e përcaktimit të afateve të arritjes dhe jemi në pritje të konfirmimit. Po diskutojmë që t’i kemi sa më herët. Mendoj se viti 2026 do të jetë koha kur patjetër do të kemi një sasi, por bashkë me komandantin e FSK-së po përpiqemi t’i sjellim edhe brenda këtij viti. Javelin është një nga sistemet më të mira anti-tank, por nuk është i vetmi që kemi në FSK”, ka thënë Maqedonci, në KallxoPërnime.

Ministri kishte konfirmuar më 11 janar 2024 se Kosova ka dërguar kërkesë zyrtare në SHBA për blerjen e sistemit raketor kundërtank “Javelin”.

Raketat “Javelin” janë zhvilluar për ushtrinë dhe trupat detare amerikane dhe u dëshmuan jashtëzakonisht efikase në luftën e Ukrainës kundër agresionit rus. Ky sistem prodhohet nga kompanitë amerikane Lockheed Martin dhe Raytheon Technologies.

Sipas të dhënave të publikuara nga Lockheed Martin, “Javelin” është një sistem preciz dhe i lëvizshëm kundërtank, që mund të përdoret nga një ushtar i vetëm duke e mbajtur mbi supe, ose të montohet në automjete ushtarake. Këto raketa vlerësohen se janë të afta të neutralizojnë të gjitha llojet e forcave të blinduara të njohura deri më sot, si edhe objektiva të buta apo të parregullta në terren.

Izraeli thotë se ka filluar të godasë objektivat e Hamasit në Gaza, duke vrarë të paktën nëntë persona, pas asaj që e quajti një “shkelje flagrante të marrëveshjes së armëpushimit”.

Autoritetet lokale shëndetësore në Gaza thanë se kishte pasur tre sulme ajrore të ndara, njëri prej të cilave goditi një veturë në lagjen e dendur të populluar Rimal, duke vrarë pesë persona dhe duke plagosur disa të tjerë.

Menjëherë pas sulmit ndaj veturës, forcat ajrore izraelite goditën dy objektiva të tjerë në Rripin qendror të Gazës.

Të paktën katër persona vdiqën kur dy shtëpi u goditën me bombë në qytetin Deir Al-Balah dhe në kampin Nuseirat.

Ushtria izraelite tha se kishte pasur një “shkelje flagrante të marrëveshjes së armëpushimit”.

Ajo pretendoi se një person i armatosur kishte kaluar në territorin e mbajtur nga Izraeli pasi kishte shfrytëzuar “rrugën humanitare në zonën përmes së cilës ndihma hyn në Gazën jugore”.

Një zyrtar i Hamasit i hodhi poshtë akuzat e ushtrisë izraelite si të pabaza, duke i quajtur ato një “justifikim për të vrarë”, duke shtuar se grupi palestinez ishte i përkushtuar ndaj marrëveshjes së armëpushimit.

Ndryshe, sulmet ajrore izraelite janë një provë e mëtejshme e një armëpushimi të brishtë me Hamasin, i cili ka qenë në fuqi që nga 10 tetori pas luftës dyvjeçare në Gaza.

Juria e Gjykatës së Krimeve në Poitiers, Francë, ka dhënë vendimin. Sipas tyre, autori i vrasjes së një të riu në vitin 2023 ka qenë bashkëshorti i tij. Ky fakt u konsiderua rrethanë rënduese në vendimin përfundimtar, i cili u shpall pas pesë orësh diskutimi. Gjykata e dënoi atë me tridhjetë vjet burgim.

Në ditën e dytë të gjyqit ndaj Ismail Garos, një shtetas shqiptar i akuzuar për vrasjen e “partnerit” të tij, i cili e kishte strehuar prej gati tre vitesh banesën e tij në Poitiers, gjykata u përqendrua edhe në vlerësimin e personalitetit të të pandehurit.

Ai ishte jashtëzakonisht ekspresiv në bankën e të akuzuarve, ndërhynte shpesh dhe këmbëngulte në qëndrimin e tij të pandryshuar që nga dita e parë: “Të gjykohem mbi bazën e provave.”

Juria dëgjoi një sërë raportesh ekspertësh, të paraqitura drejtpërdrejt ose përmes videolidhjes, për të përcaktuar – përtej aktit të vrasjes – nëse i pandehuri kishte qenë bashkëjetues me viktimën, çka përbën rrethanë rënduese, si dhe nëse ai mund të kishte pasur çrregullime mendore që do të kishin ndikuar aftësinë e tij për të gjykuar në momentin e krimit.

Analizat toksikologjike të kryera disa orë pas ngjarjes nuk zbuluan asnjë gjurmë alkooli, droge apo ilaçesh, sipas raportit të biologes së paraqitur në gjykatë. Mjeku ligjor plotësoi këto të dhëna me vëzhgime të detajuara, përfshirë fotografitë, të cilat ndihmuan në rindërtimin e skenarit të vrasjes.

Gjykata Themelore në Prishtinë ka aprovuar kërkesën e Prokurorisë Speciale për caktimin e masës së paraburgimit prej një muaji ndaj të pandehurit B.K., i dyshuar për blerje, posedim dhe shpërndarje të narkotikëve, si dhe për mbajtje të paautorizuar të armëve.

I njëjti dyshohet se më 21.11.2025, ka transportuar 120 kg marihuanë nga Shqipëria në Kosovë me autobus, me qëllim dërgimin e saj në shtete të tjera evropiane. Substanca narkotike u gjet në bunkerë të modifikuar nën karrige në autobus.

Gjykata ka vendosur që B.K. të mbahet në paraburgim për një muaj, duke vlerësuar se masat e tjera nuk do të ishin të mjaftueshme për të parandaluar pengimin e hetimeve ose përsëritjen e veprave penale.

Ky vendim mund të ankimohet në Gjykatën e Apelit.

Xhamitë në qytete të ndryshme të Kosovës shpeshherë janë cak i hajnave, të cilët ua vënë syrin gjërave me vlerë. Cak i hajnave janë më së shumti arkat e ndihmave e kasafortat e mbushura me para, por në raste tjera edhe gjësende tjera materiale.

Një ngjarje e tillë ka ndodhur gjatë natës në xhaminë e Obiliqit.

Lajmin e ka bërë të ditur vetë Xhamia e Hashanëve, duke theksuar se një person i panjohur ka hyrë me forcë, ka thyer xhamin dhe ka dëmtuar kasafortën ku ruheshin të hollat e dhuruara nga xhemati.

Sipas xhamisë, rasti i është raportuar menjëherë policisë dhe shpresojnë që përgjegjësi të identifikohet sa më shpejt.

Postimi i plotë:

NJË NGJARJE E DHIMBSHME PËR XHAMINË TONË

Të dashur vëllezër dhe motra,

Me zemër të rënduar ju njoftojmë se gjatë natës së sotme xhamia jonë është përballur me një akt të dhunshëm e të dhimbshëm.

Një person i panjohur ka hyrë me forcë në shtëpinë e Allahut, duke thyer xhamin dhe duke dëmtuar kasafortën ku ruheshin të hollat e dhuruara me sinqeritet nga xhemati ynë.

Ky është jo vetëm një dëm material, por edhe një plagë shpirtërore për të gjithë ne që e duam dhe e mbështesim këtë vend të shenjtë. Ndjehemi të pikëlluar që një akt i tillë ka ndodhur në një vend ku mbizotëron paqja, lutja dhe mëshira.

Rasti i është raportuar menjëherë policisë dhe shpresojmë që përgjegjësi të identifikohet sa më shpejt. Ju lusim që kushdo që mund të ketë parë apo dëgjuar diçka të na njoftojë.

I lutemi që Allahu ta ruajë xhaminë tonë dhe zemrat tona nga çdo e keqe.

Allahu ju shpërbleftë për mirëkuptimin dhe mbështetjen tuaj!