Blog

Shefi ushtarak i Izraelit të dielën shkarkoi disa personel të lartë ushtarakë dhe qortoi të tjerë për rolet e tyre në dështimet e 7 tetorit 2023, kur Hamasi nisi një sulm të papritur ndaj Izraelit.

Një numri oficerësh u tha se do të liroheshin nga detyra rezervë dhe nuk do të shërbenin më në ushtri, tha ushtria në një deklaratë.

Të tjerëve iu dhanë qortime zyrtare, ndërsa një u informua se shërbimi i tij do të përfundonte. Një tjetër paraqiti dorëheqjen.

Ata që u informuan se do të liroheshin nga detyra rezervë përfshinin ish-krerë të drejtorisë së inteligjencës, drejtorisë së operacioneve dhe komandës jugore, e cila është përgjegjëse për Gazën.

Gjeneralët kishin dhënë më parë dorëheqjen nga shërbimi aktiv, por mbetën në detyrë rezervë.

Ushtria izraelite “dështoi në misionin e saj kryesor më 7 tetor – për të mbrojtur civilët e Shtetit të Izraelit”, tha shefi i shtabit ushtarak izraelit, Eyal Zamir, shkruajnë mediat e huaja.

“Ky është një dështim i rëndë, i madh dhe sistemik, që lidhet me vendimet dhe sjelljen në prag të ngjarjes dhe gjatë saj. Mësimet e asaj dite janë të shumta dhe domethënëse, dhe ato duhet të shërbejnë si busulla jonë për të ardhmen drejt së cilës kam ndërmend të udhëheq [ushtrinë izraelite]”,

Masat e fundit disiplinore vijnë ndërsa zyrtarët izraelitë përballen me presion publik në rritje për përgjegjësi për dështimet që çuan në sulm.

Qeveria e kryeministrit Benjamin Netanyahu ende nuk ka hapur një hetim kombëtar për sulmin e 7 tetorit.

Mijëra protestues u bashkuan me udhëheqësit e opozitës në Tel Aviv të shtunën në mbrëmje duke kërkuar një komision hetimor shtetëror.

Sulmi i 7 tetorit nga Hamasi dhe fraksione të tjera palestineze vrau rreth 1,200 njerëz në Izrael dhe pa rreth 250 të marrë peng, sipas llogaritjeve izraelite.

Sulmi shkaktoi fushatën tokësore dhe ajrore të Izraelit në Gaza, e cila ka shkatërruar pjesë të mëdha të enklavës dhe ka vrarë më shumë se 69,000 njerëz, sipas autoriteteve lokale shëndetësore.

Izraeli dhe Hamasi arritën një marrëveshje armëpushimi të ndërmjetësuar nga SHBA-të muajin e kaluar, si pjesë e fazës së parë të një plani për t’i dhënë fund luftës.

Ish-kryetari i Prishtinës, Shpend Ahmeti, ka reaguar pas paralajmërimeve se kryeqyteti të hënën do të mbetet pa transport publik. Ai e ka cilësuar situatën si “ditë të dhimbshme” për qytetarët.

Ahmeti ka thënë se gjatë mandatit të tij Komuna kishte marrë Trafikun Urban me 1.5 milion euro borxhe dhe 24 muaj paga të papaguara. Ai ka theksuar se procesi i rifunksionalizimit ishte zvarritur për shkak të procedurave qeveritare dhe votimit të garancionit të sovranitetit në Kuvend, pavarësisht se ishte siguruar një kredi prej 10 milionë eurosh nga BERZH-i.

“Gjatë asaj kohe pëekundlr kundërshtimeve kam takuar vetëm Avdullah Hotin nja pesë herë. Kam kërkuar edhe nfa shefi i grupit parlamentar të VV që ti votonte marrëveshjet ndërkombëtare (asokohe vv rralë votonte propozimet e qeverisë) vetëm që të votoheshin edhe autobusët”, ka thënë Ahmeti.

“Politika është kompromis. Posaçërisht kur është interesi qytetar në pyetje. Autobusat janë një, e ditëve në vijim shkollat do të mbesin pa rrymë, çerdhet pa bukë etj etj. Aman takonu qoftë edhe me ndërmjetësues sepse janë pika vitale të funksionimit. Çkado që keni nevojë janë të gatshëm të tjerët të ndihmojmë”, ka thënë ndër të tjera Ahmeti.

“Postet vijnë e shkojnë. Zgjedhje do të ketë edhe të tjera. Por të këqijat ju mbesin në ndërgjegjje e në histori. Takonu!”.

Komisionerja Evropiane për Zgjerimin, Marta Kos ka folur për Kosovën, duke thënë se s’është e kënaqur që do të ketë sërish zgjedhje.

Megjithatë, ajo në një intervistë për A2CNN tha se demokracia po funksionon dhe për këtë është shprehur e kënaqur.

“Për çështjen e Kosovës, nuk jam e kënaqur që tani do të kenë përsëri zgjedhje, por demokracia e tyre po funksionon dhe jam e kënaqur për këtë. Pse nuk jam e kënaqur? Sepse po presim ratifikimin e dy marrëveshjeve për Planin e Rritjes. Pra, për momentin, Kosova po i bën reformat, por ne nuk mund t’i paguajmë paratë sepse nuk i kemi këto dy marrëveshje”.

“Nga ana tjetër, siç e dini, Kosova, edhe duke mos qenë ende kandidate zyrtarisht, është plotësisht e përafruar me politikën e jashtme dhe të sigurisë evropiane, ashtu si dhe vendi tuaj, Shqipëria. Ju keni marrëdhënie shumë të mira me këtë vend, që do të thotë se nuk mund ta përfytyroj përfundimin e bashkimit të Evropës pa integruar edhe Kosovën në Bashkimin Evropian. Pra, do të punojmë për këtë”, u shpreh ajo.

Kos tha gjithashtu se shpreson që pas zgjedhjeve të ketë një qeveri të re e cila, sipas saj, mund të shtyjë përpara reformat.

“Unë shpresoj se së shpejti, pas zgjedhjeve, do të kemi një qeveri të re dhe pastaj, qeveria është ajo që mund të shtyjë përpara reformat. Dhe jam e sigurt se janë të gatshëm ta bëjnë këtë në aspektin ekonomik. Po ecin shumë mirë. Ata kanë kryer tashmë disa nga reformat, kështu që mezi pres që të kenë një qeveri funksionale dhe efikase dhe, pastaj, do të mund të përshpejtojmë, ndoshta në një moment tjetër, edhe procesin e anëtarësimit”, u shpreh Kos.

Janë ndaluar rreth 300 kilogramë eksplozivë në Vërmicë, ka njoftuar të dielën Dogana e Kosovës.

Në njoftimin e Doganës është thënë se rreth orës 16:30 zyrtarët doganorë kanë ndaluar për kontroll një automjet të tipit furgon, i cili është dërguar në vijën e dytë për kontroll të detajuar, në kuadër të bashkëpunimit ndërinstitucional me Policinë Kufitare.

Gjatë intervistimit, pala ka deklaruar se nuk posedon mallra për deklarim. E gjatë kontrollit është hasur në mallra të padeklaruara, përkatësisht mallra të ndaluara dhe të rrezikshme (eksploziv), të vendosura në thasë dhe pako, me peshë rreth 300 kilogramë, të cilat ishin fshehur në bagazhin e automjetit dhe të kamufluara me pajisje peshkimi.

“Malli është ndaluar, ndërsa ndaj palës është iniciuar procedurë për kundërvajtje doganore, sipas dispozitave të Kodit Doganor dhe të Akcizave të Kosovës (KDAK), ndërsa rasti i është dorëzuar Policisë Kufitare, e cila po vazhdon me veprimet e mëtejshme ligjore”, thuhet në njoftim.

Presidentja Vjosa Osmani ka bërë të ditur se bashkë me bashkëshortin e saj, Prindon Sadriun, kanë marrë pjesë në ceremoninë “Marines Ball”.

Në një postim në Facebook, Osmani ka theksuar se është mirënjohëse ndaj sakrificës dhe kontributit që ka bërë ShBA-ja për Kosovën.

“Një mbrëmje e paharrueshme në ‘Marines Ball’, së bashku me aleatët tanë të përhershëm dhe në nderim të marinsave amerikanë që kanë qenë krah nesh në ditët më vendimtare të vendit tonë, dhe që vazhdojnë të kontribuojnë për paqe, në Kosovë dhe kudo në botë”.

“Mirënjohëse për shërbimin, sakrificën dhe partneritetin e pathyeshëm që na ka bashkuar gjithmonë”, ka thënë Osmani.

Prokuroria në Mitrovicë i ka çuar në ekzaminim dy telefona të shtetasit Milan Vukashinoviq, që u plagos dhe u rrëmbye në territorin e Kosovës. Autoritetet kanë akuzuar Serbinë për këtë rast, e Bashkimi Evropian ka shprehur qëndrimin se “autoritetet mund ta vënë në funksion mekanizmin e Ndihmës së Ndërsjellë Juridike që lehtësohet nga BE-ja në Kosovë”. Institucionet e Serbisë vazhdojnë të heshtin, përfshirë edhe Klinikën në Nish ku po trajtohet Vukashinoviq.

Bashkimi Evropian (BE) i ka sugjeruar Kosovës të kërkojë bashkëpunim ndërkombëtar për hetimin e tentimvrasjes dhe rrëmbimit të Milan Vukashinoviqit më 1 nëntor në Jellakcë të Leposaviqit.

Në një përgjigje për KOHËN, zëdhënësi i Zyrës së BE-së në Prishtinë, Nikola Gaon, ka thënë se “autoritetet mund ta vënë në funksion mekanizmin e Ndihmës së Ndërsjellë Juridike që lehtësohet nga BE-ja në Kosovë”.

E në misionin evropian për sundimin e ligjit në Kosovë, EULEX ka shprehur gatishmërinë të ndërmjetësojë në shkëmbimin e informatave me Ministrinë e Brendshme të Serbisë.

“EULEX-i po ashtu është i gatshëm që ta mbështesë hetimin duke shkëmbyer informacionet policore mes Policisë së Kosovës, Interpolit, Europolit, dhe Ministrisë së Punëve të Brendshme, në qoftë se një asistencë e tillë i kërkohet nga institucionet relevante të Kosovës që e kanë përgjegjësinë që ta hetojnë rastin në mënyrë efikase dhe të paanshme”, thuhet në përgjigjen e EULEX-it.

Në Prokurorinë Themelore në Mitrovicë nuk kanë treguar nëse është parashtruar një kërkesë e këtillë, por kanë bërë të ditur se kanë ndërmarrë disa hapa për zbardhjen e rastit.

“Deri tash janë intervistuar nëna dhe një person tjetër i afërm me viktimën. Janë gjetur dy (2) telefona të viktimës, një në shtëpi dhe tjetri në veturën e tij, dhe të njëjtit janë dërguar për ekzaminim”, thuhet në përgjigjen e Prokurorisë.

Kryeprokurori i Shtetit në Serbi e as dy prokuroritë në Prokuple nuk janë përgjigjur në pyetjet e KOHËS nëse po e hetojnë tentimvrasjen dhe rrëmbimin e Vukashinoviqit.

Përgjigje në pyetjen se pse nuk u është lejuar familjarëve ta vizitojnë atë, nuk kanë dhënë as në Qendrën Klinike në Nish, ku po trajtohet Vukashinoviqi.

Avokati i Popullit në Serbi, institucion që në këtë vend njihet si Mbrojtësi i Qytetarëve, nuk ka shprehur interesim për rastin. Udhëheqësi i këtij institucioni, Zoran Pashaliq, është arsyetuar se familja e as avokati i Vukashinoviqit nuk kanë bërë kërkesë për ta vizituar atë në spital.

“Institucioni i Mbrojtësit të Qytetarëve viziton këdo që personalisht ose nëpërmjet të afërmve, miqve ose përfaqësuesve të tyre shpreh nevojën për të vizituar një person të privuar nga liria. Deri më sot unë nuk kam marrë një informacion të tillë”, thuhet në një përgjigje të shkruar të Pashaliq.

Por avokati i familjes së Vukashinoviqit, Ivan Niniq, nuk pajtohet me këtë konstatim. Sipas tij, Mbrojtësi i Qytetarëve në Serbi e ka për obligim të interesohet në bazë të detyrës zyrtare.

“Vukashinoviq e ka ende plumbin në shpinë. Nënës nuk iu mundësua vizita shkaku i gjendjes shëndetësore të Milanit. Ne nuk kemi kërkuar mbrojtje dhe mbështetje nga Ombudspersoni, meqë ai e ka për obligim, në bazë të detyrës zyrtare që të reagojë në mënyrë proaktive dhe ta intervistojë atë”, ka thënë Niniq.

Vukashinoviq u plagos e më pas u rrëmbye në territorin e Kosovës. Sipas autoriteteve të Kosovës, këtë veprim e kreu xhandarmëria e Serbisë.

Serbia nuk e njeh Kosovën dhe nuk bashkëpunon me të as në fushën e drejtësisë.

Nuk ka bashkëpunuar as për sulmin terrorist në kanalin e “Ibër-Lepencit” e as për atë në Banjskë, kur u vra rreshteri policor, Afrim Bunjaku.

Ish-ministri i Financave, Abdullah Hoti dhe ish-nënkryetari i Prishtinës, Dardan Sejdiu janë përfshirë në debatin për atuobusët në Prishtinë, ku kanë hedhur akuza mes njëri-tjetrit.

E gjitha nisi pasi Sejdiu reagoi lidhur me blerjen e autobusëve për Trafikun Urban të Prishtinës në vitin 2017, duke akuzuar Qeverinë e atëhershme të Isa Mustafës për bllokimin e projektit.

Sejdiu ka kujtuar se në vitin 2017, pas dy vitesh bllokim dhe presion të qytetarëve, Prishtina mori 51 autobusët e rinj, pas 30 vjetësh pa asnjë investim në transport publik.

“Dhe që ta dini saktë se çfarë ka ndodhë: në vitet 2015–2017, autobusët e rinj kanë mbetur të bllokuar nëpër letra për dy vjet të plota, jo pse mungonin paratë, jo pse s’kishin dokumente, por sepse qeveria qendrore refuzonte me nënshkruar vetëm se projekti ishte i Prishtinës. E asokohe Prishtina udhëhiqej nga VV, ndërsa pushtetin qendror e kishte LDK. Çdo procedurë u zvarrit me qëllim, çdo justifikim u shpik. Ishte bllokadë politike e pastër, me një synim të vetëm, me e nënshtru qytetin që kishte votuar ndryshe. Dhe ajo bllokadë u thye vetëm kur qytetarët protestuan, firmosën peticione e dolën para derës së pushtetit. Vetëm atëherë qeveria u detyru me u tërheq.
Sot, historia po përsëritet, por me një cinizëm edhe më të madh. Nesër, Prishtina mbetet pa transport publik. Fajtori është politika që po e përdor qytetin si peng.”, ka shkruar ndër të tjera Sejdiu.

Pas këtij postimi, ka reaguar ish-ministri i Financave në atë kohë, Avdullah Hoti, duke thënë se problemi në atë kohë ka qenë te Komuna e Prishtinës dhe jo te Qeveria qendrore.

“Sejdiu po gënjen. Ai dhe shefi i tij nuk kryenin detyrimin ligjor përmes nxjerrjes së vendimit nga Kuvendi i Komunës, që do të garantonte pagesën e kredisë nëse NP Trafiku Urban dështon të paguajë kredinë. Sapo vendimi u miratua në Kuvend, marrëveshja u procedua në Qeveri dhe më tutje,” ka shkruar Hoti.

Ai ka shtuar se qëllimi i Sejdiut dhe i partisë së tij ka qenë të bëjnë një kauzë politike për të mbuluar dështimet e veta në Prishtinë, duke vazhduar me “politika të ulëta dhe të ndyra kundër LDK-së”.

Hoti ka paralajmëruar se nëse Sejdiu nuk kërkon falje publike, ai do të padisë për shpifje.

Nuk ka vonuar dhe Sejdiu i është kundërpërgjigjur Hotit, duke thënë se ky i fundit ka zgjedhur të hyjë në betejë kundër tij, jo kundër atyre që realisht po e shkatërrojnë transportin publik sot, dhe sipas Sejdiut kjo, në vetvete, flet shumë.

“Zotëria jo vetëm që ka zgjedhur me gënjy për të kaluarën, por po e përdor këtë gënjeshtër për t’i shërbyer narrativës së pushtetit aktual. Në vend se ta thotë qartë se çfarë po ndodh sot me transportin publik, ai ka vendosur me u marrë me mua, me vitin 2017, me një fotografi, me një postim”, thotë ndër të tjera Sejdiu.

Kurse, ai i kundërpërgjigjet Hotit edhe për padinë që paralajmëroi ndaj tij.

“Sa për padinë që përmendi: ju lutem, vazhdoni. Nuk ka askund më mirë se në gjykatë për me u sqaru edhe një herë publikisht bllokadën e asaj kohe. Nuk kam asnjë problem me këtë. Përkundrazi, është rast i artë që opinioni me i pa faktet e vërteta edhe një herë”, thuhet në kundërpërgjigjen e Sejdiut.