Blog

Duke filluar nga dita e sotme (24 nëntor) do të fillojnë disa afate të aktiviteteve zgjedhore që kanë të bëjnë me subjektet politike për zgjedhjet e parakohshme për Kuvendin e Kosovës, të cilat do të mbahen më 28 dhjetor 2025.

Formimi i koalicioneve nga partitë politike, aplikimi për certifikim të subjekteve politike që duan të marrin pjesë në zgjedhje si dhe dorëzimi i listës së kandidatëve për deputetë, janë disa nga aktivitetet kryesore zgjedhore që sipas KQZ-së do të zhvillohen në afate të ndryshme.

Aplikimi për certifikim të subjekteve politike, 24 nëntor – 30 nëntor

Zëdhënësi i KQZ-së, Valmir Elezi ka bërë të ditur se subjektet politike (partitë politike, koalicionet, nismat qytetare dhe kandidatët e pavarur) duhet të plotësojnë online formularin e aplikimit për certifikim për pjesëmarrje në zgjedhje.

“Duke filluar nga data 24 nëntor dhe deri më 30 nëntor, subjektet duhet të dorëzojnë në KQZ, respektivisht në Zyrën për Regjistrim, Certifikim dhe Kontrollin Financiar, aplikimin për certifikim për pjesëmarrje në zgjedhjet e parakohshme për Kuvendin e Kosovës. Formulari, i cili është i ngjashëm me të poceseve të kaluara zgjedhore, është i vendosur në platformën elektronike të KQZ-së dhe i njëjti duhet të plotësohet online”, tha Elezi.

Dorëzimi i listave me kandidatët për deputetë, 24 nëntor – 7 dhjetor

Gjithashtu, duke filluar nga data 24 nëntor, subjektet politike (partitë politike, koaliciont, nismat qytetareve dhe kandidatët e pavarur) mund të dorëzojnë listën e tyre me emrat e kandidatëve për deputetë. Për të përgatitur këto lista me kandidatë për deputetë, KQZ u ka dhënë subjekteve politike afat 2-javor.

“Duke filluar nga 24 nëntori dhe deri më 7 dhjetor 2025, subjektet politike duhet të dorëzojnë në KQZ listën me emrat e kandidatëve për deputetë që kërkojnë të certifikohen për të marrë pjesë në zgjedhjet e parakohshme. Ky afat shënon një moment vendimtar në procesin zgjedhor, pasi pikërisht në këtë periudhë subjektet politike do të formalizojnë kandidatët për deputetë me të cilët do të marrin pjesë në zgjedhjet e funddhjetorit”, tha Elezi.

Deklarimi i koalicioneve dhe mospjesëmarrjes në zgjedhje, 24 nëntor – 30 nëntor

Brenda kësaj jave, partitë politike që duan të marrin pjesë në zgjedhje përmes koalicionit, duhet ta njoftojnë KQZ-në për këtë mënyrë të përfaqësimit në garën elktorale.

“Sipas Ligjit për Zgjedhjet e Përgjithshme, partitë politike të cilat janë të regjistruara në KQZ dhe të cilat duan të marrin pjesë në zgjedhjet e parakohshme përmes koalicionit duhet ta njoftojnë KQZ, respektivisht Zyrën për Regjistrim, Certifikim dhe Kontrollim Financiar të Subjekteve Politike se duan të marrin pjesë në këto zgjedhje në këtë mënyrë. Afati i fundit për të bërë këtë njoftim është data 30 nëntor 2025”, ka thënë Elezi.

Elezi ka theksuar se partia politike e cila vendos të bëhet pjesë e një koalicioni ka detyrimin të respektojë rregullat e tij.

“Koalicioni mund të ndërtohet nga së paku dy parti politike. Partia politike nuk mund të tërhiqet nga koalicioni pasi të jete certifikuar deri sa rezultati i zgjedhjeve të certifikohet nga ana e KQZ. Gjithashtu partia politike e cila është anëtare e koalicionit nuk mund të marr pjesë si anëtare në një koalicion tjetër apo edhe si parti e veçantë në të njëjtat zgjedhje”, tha Elezi.

Gjithashtu, deri më 30 nëntor 2025 është afati edhe për partitë politike që ta njoftojnë KQZ-në, respektivisht Zyrën, se nuk duan të certifikohen për pjesëmarrje në zgjedhje.

Me fillim nga ora 09:30, në Pallatin e Drejtësisë do të mbahet seanca e shqyrtimi gjyqësor ndaj Naim Murselit, Granit Plavës dhe Kushtrim Kokallës, të akuzuar për përfshirje në vrasjen e Liridona Ademajt.

Për vijimin e seancës, ka shkruar edhe vëllai i Liridonës, Leonard Ademaj.

Ai tha se kjo javë është e vështirë për ta, pasi më 29 nëntor bëhen dy vjet nga vrasja e më të dashurës së tyre.

“Përshëndetje, ju informojmë që do të vazhdojë gjykimi në rastin e vrasjes së më të dashurës tonë Liridona Ademaj. Java që po vjen është e vështirë për neve sepse më 29 nëntor bëhen dy vite nga vrasja e Liridonës tonë”.

“Nuk ka fjalë për të përshkruar pikëllimin që ndjejmë për të. Vetëm drejtësia e shpejtë, profesionale dhe pa gabime mund të na lehtësojë dhimbjen e rëndë që po e përjetojnë fëmijët e saj dhe ne”, ka shkruar ai në Facebook.

Ndërkohë, në rastin e Liridona Ademaj kanë dëshmuar dëshmtarë okular, mjeku që bëri autopsinë, Naim Uka, eksperti Bujar Obertinca, ish-drejtori i Institutit të Mjekësisë Ligjore, Shpend Haxhibeqiri, e të tjerë.

Transporti publik në Prishtinë nga sot ka pezulluar shërbimet për shkak të problemeve të rënda financiare të shkaktuara nga bllokimi i mjeteve buxhetore.

Por, ndërprerjen e operimit për këtë shkak e kanë njoftuar edhe disa nga linjat private.

Lidhur me këtë dje, kryetari Përparim Rama, ka deklaruar se qytetarët po rrezikohen si asnjëherë më parë.

“Në historinë e shtetit të Kosovës, rrallëherë kemi parë të rrezikohen qytetarët deri në këtë shkallë. Për më shumë se një vit, kanë alokuar buxhetin që i duhet kryeqytetit, por buxheti i Prishtinës është bllokuar për çështje politike. Ne kemi dorëzuar kallëzim penal ndaj ministrit Murati për shkelje të ligjit; jemi drejtuar te kryeministri, te presidentja dhe te Gjykata Kushtetuese. Qytetarët e Prishtinës kanë mbetur pa paga”, tha Rama gjatë konferencës për media.

Situata e krijuar me transportin publik ka përpalusr mbrëmë liderin e LDK-së Lumir Abdixhiku dhe ministrin në detyrë të Financave, Hekuran Murati.

Sipas Abdixhikut, partia në pushtet e mori mesazhin në zgjedhjet lokale për bllokadën e krijuar.

“Prishtinën e bllokuan. Dhe Prishtina foli e para, foli qartë. LDK-në e riktheu si parti të parë; bllokuesit i la larg”, tha ai.

Kurse Murati tha se fajtore për mosvotimin e buxhetit mbetet ish-opozita.

“Por ju vendosët që betejën politike ta bëni në kurriz të qytetarëve duke mos e votuar buxhetin”, ka shkruar ai.

Instituti Hidrometeorologjik e ka publikuar parashikimin e motit për pesë ditët e ardhshme.

Sipas IHMK-së, moti gjatë javës parashihet të jetë i ndryshueshëm, me intervale të shkurta me diell, i vranët dhe me shi.

E hënë

Moti i vranët dhe me intervale me diell.

Temperaturat minimale: 0-3°C

Temperaturat maksimale: 5-9°C

Era: Kryesisht nga jugperëndimi me shpejtësi 1-4m/s.

E martë

Mot kryesisht i vranët.
Temperaturat minimale: 0-2C

Temperaturat maksimale: 8-11°

Era: nga jugperëndimi, me shpejtësi 1-5m/s

E mërkurë

Moti kryesisht i vranët dhe vende-vende me riga shiu.

Temperaturat minimale: 3-5 °C

Temperaturat maksimale: 10-13°C

Era: kryesisht nga jugperëndimi me shpejtësi 1-5m/s.

E enjte

Mot kryesisht i vranët dhe me reshje shiu.

Temperaturat minimale: 1 deri 3°C

Temperaturat maksimale: 4-6°C

Era: nga veriperëndimi , 1-4 m/s

E premte

Mot me diell dhe vranësira të shpërndara. Vranësirat vende-vende mund te sjellin riga lokale shiu.

Temperaturat minimale: -1 deri 2°C

Temperaturat maksimale: 4-6°C

Era: e lehtë deri mesatare nga drejtimi i veriperëndimit.

Lidhja Demokratike e Kosovës sot pritet të caktojë kandidatin për kryeministër për zgjedhjet e 28 dhjetorit.

Mbledhja e Kryesisë së LDK-së do të nisë nga ora 15:00.

Si pikë e dytë e rendit të ditës është edhe nominimi i kandidatit të LDK-së për kryeministër.

Sindikalistët e Radio Televizionit të Kosovës (RTK) kanë njoftuar se sot, nga ora 11:00 deri në ora 13:00, të gjithë sektorët e RTK-së do të hyjnë në grevë të përgjithshme.

Sindikata ka kërkuar që nëse kërkesat e saj nuk adresohen, greva mund të shoqërohet me bojkot të shumicës së emisioneve dhe lajmeve të RTK-së.

Në një njoftim për media, Sindikata ka theksuar se gjatë kohës së grevës do të organizohen protesta dhe veprime të tjera si shenjë e kundërshtimit për situatën e vështirë që po kalojnë punonjësit.

Sindikata ka ftuar mediat të jenë të pranishme në fillimin e grevës për të ndjekur zhvillimet e mëtejshme.

Kërkesat e Sindikatës janë dërguar një javë më parë dhe deri tani nuk ka pasur reagime nga Menaxhmenti i RTK-së.

Sindikata gjithashtu ka kërkuar bojkotimin e fushatës zgjedhore dhe ngjarjeve me karakter politik, duke kërcënuar se nëse kërkesa e saj nuk miratohet, do ta marrin vendimin për bojkotin vetë

“Gjatë kohës së grevës, krahas ndaljes së punës, do të organizohen protesta dhe do të ndërmerren veprime të tjera në ekran si shenjë e protestës për situatën e rëndë që po kalojnë kolegët dhe transmetuesit publik. Ftojmë mediet që të jenë të pranishme në fillimin e grevës së përgjithshme për të ndjekur nga afër zhvillimet. Ky veprim është ndërmarrë pas dërgimit të kërkesave tona dhe njoftimit të të gjithë akterëve përkatës 7 ditë më parë, në përputhje me ligjin për grevat. Edhe njëherë, bëjmë thirrje që Menaxhmenti të marrë vendim për bojkotimin e fushatës zgjedhore dhe ngjarjeve me karakter politik. Nëse kjo nuk ndodh, Sindikata do ta marrë këtë vendim vetë”, thuhet në njofitm.

Kandidati i SNSD-së, Sinisha Karan shpalli fitoren në zgjedhjet për president të entitetit Republika Srpska, duke iu referuar rezultateve paraprake të partisë.

Sipas të dhënave të publikuara nga SNSD pas përpunimit të 95.61 përqind të qendrave të votimit, Karan kryeson me rreth 8,500 vota në krahasim me kundërshtarin e tij Branko Blanusha nga SDS.

Megjithatë, bëhet fjalë për rezultatet e brendshme të partisë dhe jo për të dhënat zyrtare të Komisionit Qendror Zgjedhor të Bosnjës dhe Hercegovinës.

Karan u bë kandidati i SNSD-së pasi udhëheqësi dhe presidenti i RS-së, Milorad Dodik, u ndalua të kandidonte për poste dhe të mbante poste publike për shkelje të vendimeve të Përfaqësuesit të Lartë, Christian Schmidt.

Sinisha Karan, ish-ministër i Brendshëm, është aleat i ngushtë dhe zgjedhja personale e Dodikut, i cili mbetet kreu i partisë së tij, Aleanca e Socialdemokratëve të Pavarur (SNSD).

Dodiku u largua nga posti i presidentit të Republikës Sërpska në gusht, pasi u dënua për mosrespektim të vendimeve të përfaqësuesit ndërkombëtar, Christian Schmidt, që e mbikëqyr marrëveshjen e paqes, e cila e ka mbajtur Bosnjën të bashkuar që nga përfundimi i luftës ndëretnike të viteve ‘90.

Zgjedhjet e parakohshme në Republikën Sërpska (RS) – një nga dy entitetet gjysmautonome të Bosnjës, përkrah federatës boshnjakokroate – nënkuptojnë se fituesi do të shërbejë për më pak se një vit, deri në zgjedhjet e përgjithshme në tetor 2026.