Blog

Kryetarja e Kuvendit, Albulena Haxhiu, e ka vendosur njeriun e saj në krye të administratës së Kuvendit.

Me anë të një vendimi, të cilin e ka nënshkruar dje, ajo e ka emëruar Feride Podvoricën ushtruese të detyrës së Sekretares së Përgjithshme të Kuvendit të Kosovës.

Podvorica njihet se person shumë i afërt me Haxhiun.

Paraprakisht, ajo kishte punuar për kohë të gjatë me Albulena Haxhiun në Ministria e Drejtësisë.

Derisa ky dikaster drejtohej nga Albulena Haxhiu, Podvorica në këtë ministri kishte ushtruar pozita të rëndësishme.

Fillimisht kishte ushtruar detyrën e zëvendësdrejtoreshës dhe më pas të ushtrueses së detyrës së Drejtoreshës së Departamentit Ligjor.

Njësiti i Trafikut të Kryeqytetit ka ndërmarrë masa ndaj dy drejtuesve të automjeteve, të cilët janë kapur duke zhvilluar gara shpejtësie në rrugët e Prishtinës.

Pas identifikimit të kundërvajtësve, policia thotë se ka shqiptuar ndaj secilit prej tyre gjobë prej 500 eurosh, ndalim të drejtimit të mjetit motorik për 12 muaj, si dhe 5 pikë negative.

“Policia e Kosovës apelon tek të gjithë pjesëmarrësit në trafik që të respektojnë rregullat e komunikacionit dhe të shmangin sjelljet që rrezikojnë jetën dhe sigurinë e qytetarëv”, thotë PK.

Shqipëria do të përjetojë sot një nga ditët më të nxehta të kësaj vere, me temperatura që në disa zona pritet të arrijnë deri në 42 gradë Celsius.

Sipas meteorologes së A2 CNN, Tanja Porja, mëngjesi ka nisur me temperatura më të larta se një ditë më parë, me një rritje prej rreth dy gradësh.

“Në zonat malore temperaturat e mëngjesit variojnë nga 20 deri në 22 gradë, ndërsa në gjysmën perëndimore të vendit ato janë dukshëm më të larta. Berati e ka nisur ditën me 29-30 gradë, një vlerë shumë e lartë për orët e para të mëngjesit”, ka deklaruar Porja.

Gjatë mesditës pritet shtim i vranësirave fillimisht në veri dhe verilindje, të cilat më pas do të shtrihen edhe në zonat qendrore e juglindore, por pa ndikuar ndjeshëm në uljen e temperaturave.

“Temperaturat maksimale do të regjistrohen në pjesën veriore dhe qendrore të vendit. Shkodra pritet të kalojë 39 gradët, Kopliku do të shkojë mbi 41 gradë, ndërsa Lezha, Durrësi dhe Velipoja do të arrijnë rreth 39 gradë”, tha meteorologia.

Kryetari i Komunës së Prizrenit Shaqir totaj ka njoftuar se, përmes Drejtorisë për Emergjenca dhe Siguri, në bashkëpunim me Brigadën e Zjarrfikësve, Policinë e Kosovës, Parkun Kombëtar “Sharri” dhe Agjencinë e Pyjeve të Kosovës, ka intensifikuar masat për parandalimin e zjarreve në territorin e komunës.

Sipas njoftimit, zonat me rrezik të lartë monitorohen 24 orë në ditë me dronë të pajisur me kamera termike (termovizive), të cilët mundësojnë vëzhgim të vazhdueshëm si gjatë ditës ashtu edhe gjatë natës, edhe në kushte të vështira.

Totaj, ka bërë të ditur se qëllimi i këtij monitorimi është mbrojtja e jetës së qytetarëve, pyjeve, tokave bujqësore dhe pasurisë publike, si dhe identifikimi dhe ndëshkimi i shkaktarëve të zjarreve.

Zjarrvënia e qëllimshme është vepër penale dhe dënohet me burgim nga tre deri në gjashtë vjet.

Qytetarëve u bëhet thirrje të mos ndezin zjarre në natyrë, pyje apo fusha, të mos djegin mbeturina, bar të thatë ose mbetje bujqësore, të mos hedhin cigare të ndezura në ambiente të hapura dhe të njoftojnë menjëherë shërbimet emergjente ose Policinë e Kosovës në rast se vërejnë zjarr apo persona që shkaktojnë zjarr.

“Mbrojtja e natyrës është përgjegjësi e secilit prej nesh. Mos ndizni zjarr – mbroni jetën, pyjet dhe të ardhmen tonë”, thuhet tutje në njoftim.

Policia e Kosovës ka raportuar për tri raste të ndara të armëmbajtjes dhe përdorimit të armëve në rajonin e Pejës, Klinës dhe Istogut.

Në Pejë, më 8 korrik 2026, një person është paraqitur i lënduar në Spitalin Rajonal, ku ka deklaruar se ishte sulmuar nga një person tjetër, i cili më pas ishte larguar në drejtim të panjohur.

Pas hetimeve, Policia thotë se dje është arrestuar i dyshuari, i cili ka dorëzuar armën e dyshuar si mjet i përdorur në rast. Me urdhër të prokurorit, ai është dërguar në mbajtje për 48 orë.

Ndërkohë, në një pikë kontrolli në fshatin Dollc të Klinës, policia ka ndaluar një veturë dhe gjatë kontrollit ka gjetur dhe sekuestruar një armë të tipit TT, një karikator dhe shtatë fishekë.

I dyshuari është arrestuar, ndërsa pas intervistimit është liruar në procedurë të rregullt me urdhër të prokurorit.

Rast tjetër është regjistruar në Istog, ku policia ka pranuar informatë se një person në një lokal posedonte armë.

I dyshuari është arrestuar dhe gjatë kontrollit i është sekuestruar një armë e tipit Ekol, një karikator dhe pesë fishekë të kalibrit 9 mm.

Edhe në këtë rast, pas intervistimit nga hetuesit dhe me urdhër të prokurorit, i dyshuari është liruar në procedurë të rregullt.

Kryeministri i Shqipërisë, Edi Rama ka uruar homologun e ri të Ukrainës, Serhii Koretskyi për detyrën e re. Në një postim në rrjetin social X, kreu i qeverisë shqiptare ka shprehur mbështetjen e Shqipërisë ndaj popullit ukrainas në luftën e tyre për liri, sovranitet dhe paqe në luftën mbi 4-vjeçare me Rusinë.

Rama i uron suksese kryeministrit Koretskyi në udhëheqjen e vendit përkrah Presidentit Volodymyr Zelenskyy në një prej atyre që ai e cilësoi si kapitullin më të vështirë të historisë së Ukrainës, raporton rtsh.al.

“Urime Kryeministrit Serhii Koretskyi për emërimin e tij nga Verkhovna Rada e Ukrainës.

I uroj suksese teksa i bashkohet Presidentit Volodymyr Zelenskyy në udhëheqjen e Ukrainës gjatë një prej kapitujve më të vështirë të historisë së saj, me guxim, qëndresë dhe vendosmëri.

Shqipëria qëndron e palëkundur përkrah Presidentit Zelenskyy, Qeverisë së Ukrainës dhe popullit ukrainas në luftën e tyre për liri, sovranitet dhe një paqe të drejtë e të qëndrueshme”, shkruan Rama në rrjetin social X.

Një ditë më parë (16 korrik), ligjvënësit e Ukrainës votuan për emërimin e të nominuarit të Presidentit Volodymyr Zelenskyy, Sergii Koretskyi (kryetar i kompanisë shtetërore të energjisë Naftogaz), si kryeministër.

Koretskyi zëvendëson Yulia Svyrydenkon, e cila dha dorëheqjen këtë javë ndërsa Zelenskyy kërkoi të bëjë “ndryshimet e nevojshme në qeverinë ukrainase”.

Zelenskyy tha se Koretskyi ishte kandidati më i përshtatshëm për prioritetin e qeverisë për përgatitjen e Ukrainës për një dimër tjetër të vështirë, duke përmendur përvojën e shefit të Naftogaz në sektorin e energjisë.

Deputeti i zgjedhur i LDK’së, Lutfi Haziri, ka reaguar në profilin e tij në facebook, teksa partia e tij po bën përgatitjet për thirrjen e Kuvendit të jashtëzakonshëm në të cilin do të vendoset për shkarkimin ose jo të kryetarit Lumir Abdixhiku, shkruan Gazeta Express.

Haziri ka thënë se LDK është partia e idealistëve dhe se idealistët janë anëtarësia e partisë.

Ai është marrë edhe me dy partitë e tjera, PDK-në dhe Vetëvendosjen.

Sipas Hazirit, PDK janë parti e kryengritësve dhe Vetëvendosje e të pakënaqurve.

“LDK ju takon idealistave. Idealistat janë anëtarësia!

Në Kosovë, historia na ka mësu që LDK është parti e idealistave, PDK është parti e kryengritësve dhe VV është parti e të pakënaqunve.

LDK ju takon idealistave e idealistat e saj janë anëtarësia. Jo funksionarët.

Koha t’i kthehemi idealistave!”, ka shkruar Haziri.