ATV

Blog

  • Pse interneti po bëhet gjithnjë e më i bezdisshëm për t’u përdorur

    Pse interneti po bëhet gjithnjë e më i bezdisshëm për t’u përdorur

    Po përpiqeni të hyni në një faqe interneti dhe në vend që ajo të hapet menjëherë ju del përpara një test irritues.

    Testi shfaq shtatë fotografi të vogla me cilësi të dobët të kafshëve dhe ju kërkon të gjeni atë që ka të njëjtat zakone ushqimore si kafsha në një fotografi të tetë, një lopë me sfond të kuq.

    Ju shikoni me kujdes imazhet e paqarta. “Është kalë apo luan? Po pelikani çfarë ha?” Më në fund zgjidhni fotografinë e deles.

    Urime, sapo provuat se jeni njeri, edhe pse tani pak më i irrituar. Në rastin më të mirë keni humbur disa sekonda. Në rastin më të keq, një klikim i gabuar ose një moment hutimi ju detyron ta filloni gjithë procesin nga e para.

    Këto teste “A jeni robot?”, të njohura si CAPTCHA, kanë qenë pjesë e internetit pothuajse që nga fillimet e tij. Motori i kërkimit Altavista, tashmë i mbyllur, prezantoi një test të thjeshtë kundër robotëve në vitin 1997. Versionet e para të CAPTCHA-ve kishin edhe një qëllim të dobishëm: u kërkonin përdoruesve të shkruanin një fjalë të skanuar nga një tekst i vjetër, duke ndihmuar kështu në digjitalizimin e librave.

    Por rritja e robotëve që kryejnë sulme kibernetike dhe, së fundmi, e sistemeve të avancuara të inteligjencës artificiale, ka përshpejtuar garën mes sulmuesve dhe mbrojtësve. Si rezultat, këto teste janë bërë më të vështira, ndërsa interneti është bërë më i ngadaltë dhe më irritues për përdoruesit.

    Sipas kompanisë së sigurisë kibernetike Imperva, në vitin 2024 trafiku i krijuar nga robotët në internet tejkaloi për herë të parë trafikun e krijuar nga njerëzit. Kompania thotë se këtë e kanë nxitur chatbot-et që mbledhin informacion nga interneti, si edhe inteligjenca artificiale që ndihmon robotët të shmangin zbulimin.

    “Vëllimi i madh i agjentëve të IA-së që mbledhin të dhëna për të trajnuar modelet e mëdha gjuhësore ka ndryshuar plotësisht rregullat e lojës,” thotë BryanBecker, drejtor produkti në Cloudflare, kompani që zhvillon sisteme mbrojtëse kundër robotëve.

    Robotët po u shmangen CAPTCHA-ve

    Pronarët e faqeve të internetit, në përgjithësi, nuk i pëlqejnë robotët. Ata mund të përdoren për të mbingarkuar një faqe me trafik dhe për ta nxjerrë jashtë funksionit. Shpesh përdoren edhe nga konkurrentët për të mbledhur të dhëna mbi çmimet ose nga spekulantët për të blerë bileta apo për të rezervuar vende në testet e patentës së drejtimit.

    Gjithnjë e më shumë po përdoren edhe “agjentë IA-je”, që kryejnë detyra në emër të përdoruesve të tyre. Kjo do të thotë se nuk ka njeri që të shohë reklamat apo të bëjë blerje spontane, ndërsa të dhënat mblidhen shpesh pa pëlqimin e pronarëve të tyre.

    CAPTCHA-t dhe testet e tjera kundër robotëve janë bërë të kudondodhura. Cloudflare, e cila përdor edhe metoda të tjera si kutitë “Verifiko që je njeri”, thotë se tani kryen 7.7 miliardë kontrolle në ditë, nga 2.1 miliardë që ishin në vitin 2023.

    Megjithatë, robotët janë bërë më të aftë për t’i kaluar këto pengesa. Dy vjet më parë, studiues të Universitetit të Cyrihut zbuluan se sistemet e të mësuarit automatik mund të zgjidhnin 100% të testeve të reCaptcha-s, sistemi CAPTCHA i Google. Ky është sistemi që ju kërkon të klikoni të gjitha katrorët ku shfaqen autobusë, ura ose hidrantë në një rrjet me 16 kuti.

    Si përgjigje, kompanitë i kanë bërë testet edhe më të ndërlikuara. ArkoseLabs, e përdorur nga shumë kompani teknologjike, u kërkon vizitorëve të zgjedhin çiftin e zareve që bën shumën shtatë ose të zhvendosin një personazh vizatimor në vendin e duhur në avion. Kompania i reklamon këto teste si “rezistente ndaj IA-së”.

    Kompania rivale hCaptcha u tregon përdoruesve nëntë fotografi ushqimesh dhe pijesh, duke u kërkuar të zgjedhin cilat prej tyre përbëjnë një pjatë kryesore. “Mendoj se këto teste janë bërë për të penguar njerëzit, jo robotët,” shkruan një përdorues në internet.

    Një zëdhënës i hCaptcha tha se të dhënat e kompanisë tregojnë se njerëzit nuk po marrin më shumë kohë për t’i përfunduar testet, “por larmia e pyetjeve është rritur me kalimin e kohës, pasi edhe sulmet janë bërë më të sofistikuara”. Kompania shton se duhet t’i përditësojë vazhdimisht testet për të përballuar automatizimin.

    Megjithëse shumica e njerëzve nuk kanë vështirësi për t’i zgjidhur këto teste, organizatat që mbrojnë personat me aftësi të kufizuara thonë se ato shpesh përjashtojnë njerëzit me probleme të shikimit. Dhe koha e humbur nuk është e vogël. Cloudflare vlerësoi pesë vjet më parë se një CAPTCHA kërkon mesatarisht 32 sekonda për t’u plotësuar, çka do të thotë se njerëzimi humbet gjithsej rreth 500 vite çdo ditë vetëm duke zgjidhur këto teste.

    Masat gjithnjë e më të ndërlikuara të mbrojtjes rrezikojnë gjithashtu ta ngadalësojnë internetin, pasi çdo faqe shton shtresa të reja sigurie.

    “I gjithë koncepti i CAPTCHA-së është, në fund të fundit, një betejë e humbur. Mund të duket si një garë armatimi, por ne, njerëzit, e kemi humbur tashmë,” thotë profesori GeneTsudik nga Universiteti i Kalifornisë në Irvine.

    Disa faqe po marrin masa edhe më drastike, duke u kërkuar përdoruesve të krijojnë llogari ose të identifikohen më shpesh për të provuar se janë njerëz. Reddit njoftoi këtë muaj se përdoruesit do të duhet të jenë të identifikuar për të parë postimet e vjetra, me qëllim që “të kufizojë mënyrën se si sistemet e automatizuara kanë qasje te Reddit”.

    Nuk ka shenja se robotët do të zhduken, as se nevoja për t’u mbrojtur prej tyre do të pakësohet.

    “Nëse nuk ndalojmë robotët, situata do të jetë edhe më e keqe, sepse një valë e pakontrolluar trafiku të automatizuar do t’i mbingarkojë serverët dhe do t’i nxjerrë faqet jashtë funksionit,” thotë BryanBecker nga Cloudflare.

    Njerëzit tashmë janë pakicë në internet. Dhe të provosh se je njëri prej tyre do të bëhet gjithnjë e më e vështirë. /Telegraph

  • Ministri Hoxha takon Gjuriqin, ia përmend deklaratën skandaloze të ministres serbe

    Ministri Hoxha takon Gjuriqin, ia përmend deklaratën skandaloze të ministres serbe

    Ministri i Jashtëm i Shqipërisë, Ferit Hoxha, ka njoftuar ditur se është takuar në Uashington me homologun e tij serb, Marko Gjuriq.

    Përmes një postimi në X, Hoxha tha se gjatë bisedës, ia ka përmendur edhe deklaratën e ministres serbe për spastrim etnik të Kosovës.

    “Rikonfirmova qëndrimin e qartë dhe të palëkundur të Shqipërisë lidhur me deklaratat e papranueshme dhe të papërgjegjshme të bëra së fundmi nga një anëtare e Qeverisë së Serbisë, duke theksuar nevojën për të refuzuar pa asnjë mëdyshje retorikën që nxit tensione, cenon stabilitetin dhe bashkëpunimin rajonal, si dhe bie ndesh me frymën e marrëdhënieve të mira fqinjësore dhe me vlerat Evropiane”, shkroi Hoxha në X.

    Ai tha se “pikërisht këtë përfaqëson diplomacia: zhvillimin e një dialogu të hapur, ballafaqimin sy më sy, përballjen me realitetin dhe trajtimin me përgjegjësi të dallimeve”.

    Ditë më parë, ministrja e qeverisë së Serbisë, Snezhana Paunoviq, tha se po të kishte qenë në vend të Sllobodan Millosheviqit në vitin 1999, do ta spastronte etnikisht Kosovën.

  • Kufijtë zyrtarë të Qendrës Historike të Prishtinës regjistrohen në Gjeoportalin e Kosovës

    Kufijtë zyrtarë të Qendrës Historike të Prishtinës regjistrohen në Gjeoportalin e Kosovës

    Ministria e Kulturës dhe Turizmit ka njoftuar se institucionet përgjegjëse për trashëgiminë kulturore dhe Agjencia Kadastrale e Kosovës kanë bërë të ditur se kufijtë zyrtarë të perimetrit dhe zonës mbrojtëse të Qendrës Historike të Prishtinës tashmë janë regjistruar dhe janë të qasshëm në platformën Gjeoportali i Kosovës.

    Sipas njoftimit, Qendra Historike e Prishtinës si aset i trashëgimisë kulturore – fushë e konservimit arkitektural me numër unik 4790, është pjesë e Listës së Trashëgimisë Kulturore për Mbrojtje të Përkohshme që nga viti 2020, ndërsa mbrojtja e saj është konfirmuar edhe me vendimin e fundit të Ministrisë së Kulturës, Rinisë dhe Sportit.

    Në njoftim thuhet, se publikimi i kufijve të perimetrit dhe zonës mbrojtëse në Gjeoportal përbën një hap të rëndësishëm në zbatimin e parimit të konservimit të integruar, ku trashëgimia kulturore trajtohet si pjesë e planifikimit hapësinor, zhvillimit urban dhe proceseve të vendimmarrjes.

    Sipas institucioneve, ky proces do të mundësojë koordinim më të mirë ndërmjet institucioneve, planifikim më të përgjegjshëm dhe vendimmarrje të bazuar në ruajtjen dhe promovimin e vlerave të trashëgimisë kulturore.

    Megjithatë, procesi i publikimit të kufijve të perimetrit dhe zonave mbrojtëse do të vazhdojë edhe për asetet e tjera të trashëgimisë kulturore në vend.

  • Arsenali rikthehet në garë për Julian Alvarez, po përgatit një plan me Gyokeres

    Arsenali rikthehet në garë për Julian Alvarez, po përgatit një plan me Gyokeres

    Julian Alvarez vazhdon të jetë një nga emrat më të përfolur në tregun e transferimeve. Edhe pse sulmuesi argjentinas është i fokusuar te Kupa e Botës 2026 me kombëtaren e Argjentinës, e ardhmja e tij mbetet në qendër të vëmendjes së klubeve më të mëdha evropiane.

    Atletico Madridi vazhdon të këmbëngulë se llogarit në shërbimet e 26-vjeçarit edhe për sezonin e ardhshëm, por kjo nuk i ka penguar klubet e interesuara të eksplorojnë mundësinë e transferimit të tij.

    Sipas raportimeve nga Anglia, Arsenali është rikthyer fuqishëm në garë dhe po monitoron nga afër situatën e reprezentuesit argjentinas.

    Gazetari Ben Jacobs raporton se klubi londinez po shqyrton një operacion të ndërlikuar, i cili mund të përfshijë edhe sulmuesin suedez Viktor Gyokeres, për të lehtësuar negociatat me Atletico Madridin për Alvarezin.

    Sipas të njëjtit burim, Arsenali është i vetëdijshëm se prioriteti i Alvarezit mbetet një transferim te Barcelona. Megjithatë, drejtuesit londinezë besojnë se Atletico Madridi nuk është i gatshëm ta shesë një nga lojtarët e tij më të rëndësishëm te një rival i drejtpërdrejtë në La Liga.

    Ky qëndrim i klubit madrilen mund t’u hapë rrugë skuadrave jashtë Spanjës. Arsenali beson se ka ende shanse reale për ta bindur si lojtarin, ashtu edhe Atletico Madridin, nëse paraqet një ofertë bindëse si në aspektin sportiv, ashtu edhe në atë financiar.

    Alvarez është nën kontratë afatgjatë me Atletico Madridin dhe konsiderohet një nga figurat kyçe të projektit të klubit. Paraqitjet e tij gjatë sezonit të kaluar, të kombinuara me performancat mbresëlënëse me Argjentinën në Kupën e Botës, kanë bërë që vlera e tij në treg të rritet edhe më shumë.

    Një nga detajet më interesante të këtij operacioni lidhet me Viktor Gyokeres. Sipas Ben Jacobs, Arsenali po shqyrton mundësinë e dy lëvizjeve paralele: transferimin e Julian Alvarezit në “Emirates”, ndërsa Atletico Madridi do të kishte mundësinë të afronte Gyokeresin si zëvendësues në repartin ofensiv.

  • Ndërpritet në sekondën e fundit nisja e raketës Starship, pësoi 4 defekte motorësh

    Ndërpritet në sekondën e fundit nisja e raketës Starship, pësoi 4 defekte motorësh

    Nisja provë e mega-raketës Starship të kompanisë SpaceX u ndërpre në sekondën e fundit, pasi disa nga motorët nuk u ndezën, duke detyruar anulimin e lëshimit mes reve të dendura të tymit dhe avullit.

    Themeluesi dhe drejtori ekzekutiv i SpaceX, Elon Musk, tha se dy motorë do të zëvendësohen “për të qenë të sigurt për një fluturim të mirë”, ndërsa shtoi se nisja pritet të tentohet sërish në fillim të javës së ardhshme.

    Ky do të ishte fluturimi i 13-të i Starship, e cila me 124 metra lartësi dhe 33 motorë kryesorë konsiderohet raketa më e madhe dhe më e fuqishme në botë.

    Transmetimi i drejtpërdrejtë i SpaceX tregoi se ndezja e motorëve nisi tre sekonda para ngritjes së planifikuar.

    Megjithatë, të dhënat në ekran treguan se katër motorë nuk u ndezën, ndërsa 29 motorët e tjerë u fikën menjëherë, duke e mbajtur raketën të ankoruar në platformën e lëshimit.

    Kjo ishte hera e parë që një Starship në përmasa të plota përjetoi një ndërprerje të lëshimit në sekondat e fundit.

    Pas anulimit, ekipi i misionit nisi menjëherë procedurat për shkarkimin e karburantit nga raketa.

    Sipas Musk, sistemi automatik i lëshimit funksionoi sipas parashikimeve duke ndalur nisjen, pasi një numër i pamjaftueshëm motorësh në funksion do ta kishte bërë fluturimin të pasigurt.

    Disa nga misionet e mëparshme të Starship kanë përfunduar me shpërthime gjatë fluturimit.

  • Prej gati 2 vitesh në burg, Diddy shet rezidencën luksoze në Miami për 55 milionë dollarë

    Prej gati 2 vitesh në burg, Diddy shet rezidencën luksoze në Miami për 55 milionë dollarë

    Reperi dhe producenti amerikan Sean “Diddy” Combs ka shitur një nga rezidencat e tij luksoze në Miami për 55 milionë dollarë, ndërsa aktualisht po vuan dënimin me burg.

    Prona ndodhet në zonën Star Island dhe ka një sipërfaqe prej rreth 7,988 metrash katrorë. Rezidenca përfshin gjashtë dhoma gjumi dhe tetë banjo e gjysmë. Ajo ndodhet pranë një tjetër shtëpie në pronësi të artistit, e cila ishte kontrolluar nga autoritetet federale në vitin 2024 gjatë hetimeve ndaj tij.

    Kontrollet e vitit 2024 lidhen me akuzat për trafikim seksual dhe krijim të një organizate kriminale. Gjatë procesit gjyqësor në vitin 2025, Combs u shpall fajtor për dy akuza që lidhen me transportimin e personave për qëllime prostitucioni, ndërsa u shpall i pafajshëm për akuzat më të rënda për trafikim seksual dhe drejtim të një organizate kriminale.

    Gjatë mbrojtjes së tij, artisti kërkoi falje publike dhe deklaroi se veprimet e tij kishin qenë të gabuara.

    Sean Combs u dënua me 50 muaj burg dhe, sipas të dhënave të fundit, pritet të lirohet më 8 shkurt 2028.

  • Fermerët dhe “Vita” me konferencë para AUV-it: Nxirrni rezultatet

    Fermerët dhe “Vita” me konferencë para AUV-it: Nxirrni rezultatet

    Shoqata e Fermerëve dhe kompania e prodhimit të produkteve të qumështit “Vita”, kanë mbajtur sot një konferencë për media, në të cilën i kanë bërë thirrje Ministrisë së Bujqësisë, Pylltarisë dhe Zhvillimit Rural, si dhe Agjencisë së Ushqimit dhe Veterinarisë (AUV), që të publikojnë rezultatet e analizave për të cila ka më shumë se dy javë që janë marrë mostrat.

    Përfaqësuesit e kompanisë Vita thanë se ministri në detyrë i Bujqësisë, Armend Muja, u kishte premtuar se rezultatet e analizave do të bëheshin publike më së voni deri më 10 korrik.

    Megjithatë, sipas tyre, pavarësisht këtij premtimi, deri më tani nuk kanë marrë asnjë përgjigje dhe rezultatet ende nuk janë publikuar.

    Ata kërkuan transparencë nga institucionet përgjegjëse, duke theksuar se publikimi i rezultateve është në interes të konsumatorëve, fermerëve dhe të gjithë sektorit të prodhimit vendor.

    Elvir Uka, përfaqësues i fermerëve, tha se nuk janë duke kërkuar asgjë, pos asaj që janë dakorduar me Ministrinë e Bujqësisë.

    “Sot jemi mbledhur këtu para AVUK-ut që të prezantojmë kërkesat tona që jemi marrë vesh mes Ministrisë së Bujqësisë, AVUK-ut dhe qumështorëve të Vita-s. Pra, i kemi të bëjmë me disa pika siç jemi dakorduar në takimin e fundit, jemi zotuar të bëjmë grumbullimin e qumështit. Ne kemi marrë deklaracion se rezultatet e mostrave të marra me datë 2 korrik 2026 të qumështit Vita, me vendim të posaçëm të 2 korrikut 2026, në numër… që janë në numër të konsiderueshëm të inspektorëve të dërguar në qumështore së shpejti dhe pastaj do t’i bllokojmë… publikojmë edhe ne. Produktet që importohen, rezultatet, analizat të dalin brenda ditës, maksimumi mbas dy ditëve. Pse kjo pasiguri ndaj produkteve vendore? Ne si shoqatë jemi zotuar te Vita, se ministria shumë shpejt do t’i publikojë rezultatet por nuk ka asgjë konkrete deri më tani. Ju lutem që rezultatet e mostrave të 2 korrikut 2026 të qumështit Vita, me vendim të posaçëm, t’i dërgohen qumështores Vita menjëherë, në mënyrë që të përmirësojë imazhin e qumështit Vita, në mënyrë që automatikisht të mos ketë probleme me grumbullimin e qumështit në ditët në vijim, për shkak të stoqeve të krijuara në qumështoren Vita. Pra, urgjentisht të merren masa në kontrollin… në kontrollin e produkteve të importuara të dyshimta që po shiten në raftet tona me çmime shumë të ulëta, në mënyrë që sa më shpejt qumështoret tona të rrisin grumbullimin e qumështit. Edhe me shumë mirësjellje, edhe një herë po ju lusim publikisht të gjithë aktorët, nuk jemi duke kërkuar diçka të paarritshme, po kërkojmë vetëm publikimin e rezultateve që jemi të sigurtë që deri më tani janë realizuar. Po të publikohet rezultati i analizës së marrë më 2.07.2026 sa më shpejt”, tha ai.

    Kurse, Kushtrim Tigani përfaqësues nga qumështorja “Vita” tha se ministri në detyrë i Bujqësisë, Armend Muja në takim u ka thënë se rezultatet do t’i pranojnë më datë 10 korrik dhe të njëjtat do t’i publikojë në konferencë pas tre ose katër ditësh.

    “Pas shumë përpjekjeve të kontaktojmë më kryeshefin e e AUV-it, dhe ministrin Muja nuk kemi marrë përgjigje, i kemi emailet që i kemi dërguar për takim, nuk na kanë pranuar për takim. Pastaj kemi qenë të detyruar të dalim dhe të flasim vetëm të vërtetën. Unë si përfaqësues i Vitas dhe përfaqësuesit e fermerëve jemi dakorduar që qumështin të fillojmë dhë ta marrim qumështin prej fermerëve. Le t’i publikojnë rezulatet, rezultatet më tha ministri do më vijnë mua më datën 10, dhe unë jam i obliguar që t’ua dërgoi juve si qumështore, ndërsa për konferencë për shtyp deri sa të i përpunojë rezultatet më duhen 3-4 ditë kohë dhe dal edhe unë me rezultatet e juaja”, tha ai.

    Ndërsa, anëtari i Shoqatës së Fermerëve të Qumështit, Fidan Krasniqi u shpreh se nuk duan të ndërhyjnë në proces, por vetëm duan publikim të rezultateve.

    “Ministri na e ka dërgu një përgjigje të jemi më konkretë në datën 27 korrik do të publikohet raporti, në rregull ne nuk po duam të marrim absolut me i ndërhyrë procesit. Ne e përkrahim çdo proces në favor të prodhimit vendor, mirëpo këtu në këtë rast po kërkojmë një rezultat të një qumështi që është marrë i vetëm, nuk po kërkojmë që të ndërhyrjmë në raportin i cili do të përpilohet nga ministri dhe do të përpilohet me gjasë deri më datë 27 korrik. Ne po kërkojmë vetëm se rezultatet e datës 2 korrik që janë marrë në qumështore, që neve na thotë kompania kinse me pretendime se ka përbërjë të vajit të palmës dhe qumështit pluhu, këtë po kërkojmë. Të krijojmë një qartësi në konsumatorë dhe një siguri tek fermerët, kemi edhe në mesin e fermerëve që është krijuar në hamulli, çka paska ndodhë? Pse janë kriju gjithë këto analiza?”, tha Krasniqi.

  • Alarm për cilësinë e ajrit para finales së Kupës së Botës Spanjë–Argjentinë

    Alarm për cilësinë e ajrit para finales së Kupës së Botës Spanjë–Argjentinë

    Vetëm pak ditë para finales së Kupës së Botës, autoritetet në Nju Jork dhe Nju Xhersi kanë lëshuar një alarm shëndetësor për shkak të cilësisë së dobët të ajrit. Shkak është tymi nga zjarret pyjore në Kanada, i cili ka mbuluar sërish zonën metropolitane. Për këtë arsye, qytetarëve u është bërë thirrje të qëndrojnë sa më pak në ambiente të hapura dhe të kufizojnë aktivitetet fizike.

    Finalja e shumëpritur mes Spanjës dhe Argjentinës është planifikuar të zhvillohet të dielën, me fillim nga ora 21:00, në stadiumin MetLife në East Rutherford. Cilësia e ajrit u përkeqësua pak para mbërritjes së kombëtares spanjolle të mërkurën në mbrëmje, pas fitores në gjysmëfinale ndaj Francës në Teksas.

    Pavarësisht kushteve atmosferike, Spanja zhvilloi një seancë stërvitore në ajër të hapur të enjten, pa ndonjë problem të dukshëm, ndërsa deri më tani nuk ka reaguar publikisht për situatën. Nga ana tjetër, Argjentina, që eliminoi Anglinë në gjysmëfinale, pritet të zhvillojë stërvitjen e parë në Nju Xhersi gjatë ditës së premte.

    Qielli i mbuluar nga tymi dhe temperaturat e larta kanë ndikuar tashmë në disa aktivitete sportive në rajon. Të mërkurën, ndeshja e Ligës Kombëtare të Futbollit për Femra (NWSL) mes Gotham FC dhe Washington Spirit u zhvillua në Citi Field, pavarësisht mjegullës së dendur portokalli që mbulonte stadiumin. Për shkak të nivelit të lartë të ndotjes së ajrit (AQI), rregullorja e ligës parashikoi dy pushime për hidratim në secilën pjesë të lojës.

    Pas përfundimit të takimit, yllja e Washington Spirit, Trinity Rodman, deklaroi se, sipas saj, ndeshja nuk duhej të ishte zhvilluar në ato kushte.

    Megjithatë, deri më tani nuk ka asnjë sinjal se finalja e Kupës së Botës do të ndikohet. Parashikimet meteorologjike tregojnë se cilësia e ajrit do të përmirësohet gjatë së premtes, ndërsa reshjet e shiut të parashikuara për të shtunën pritet të pastrojnë pjesën më të madhe të tymit, duke krijuar kushte më të favorshme për finalen mes Spanjës dhe Argjentinës, e cila pritet të ndiqet nga mbi 80 mijë tifozë në stadium.

  • Alarmante: Për 10 ditë, 52 raste të dhunës në familje në Kosovë

    Alarmante: Për 10 ditë, 52 raste të dhunës në familje në Kosovë

    Zyra për Mbrojtje dhe Ndihmë të Viktimave, ka bërë të ditur se gjatë një periudhe 10-ditore të muajit korrik ka trajtuar dhjetëra raste të veprave penale, ku dominojnë rastet e dhunës në familje.

    Sipas të dhënave të publikuara nga ZMNV, në këtë periudhë janë evidentuar gjithsej 52 raste të dhunës në familje, duke e bërë këtë kategorinë më të shpeshtë të rasteve të trajtuara.

    Përveç tyre, Zyra ka trajtuar edhe:

    2 raste të trafikimit;
    2 raste të vrasjes;
    1 rast të vrasjes në tentativë;
    1 rast të dhunimit;
    1 rast të ngacmimit seksual;
    1 rast të shpëlarjes së parave;
    2 raste të lëndimit të lehtë trupor; dhe
    2 raste të shkeljes së Urdhrit të Mbrojtjes (UM).

    Sa i përket masave mbrojtëse për viktimat, gjatë kësaj periudhe janë paraqitur:

    5 kërkesa për Urdhër Mbrojtjeje (UM) në gjykatë;
    11 kërkesa për Urdhër Mbrojtjeje Emergjente (UME); dhe
    4 kërkesa për vazhdimin e Urdhrit të Mbrojtjes.

    Ndërkohë, gjykatat kanë nxjerrë 13 aktvendime aprovuese, ndërsa 2 kërkesa janë refuzuar.

    ZMNV ka marrë pjesë edhe në 86 seanca gjyqësore dhe 17 seanca në prokurori, ndërsa ka ofruar 69 këshilla juridike për viktimat.

    Në aspektin gjyqësor, gjatë kësaj periudhe janë shqiptuar:

    13 aktgjykime dënuese;
    1 aktgjykim lirues; dhe
    1 aktgjykim refuzues.

    Po ashtu, Zyra ka evidentuar:

    1 ankesë;
    1 përfaqësim të rastit në polici;
    10 referime të rasteve në Qendrën për Punë Sociale (QPS); dhe
    3 deklarata të pëlqimit të viktimave për ofrimin e ndihmës.

    Të dhënat e publikuara nga Zyra për Mbrojtje dhe Ndihmë të Viktimave pasqyrojnë numrin e lartë të rasteve të dhunës në familje dhe nevojën për vazhdimin e mbështetjes institucionale për viktimat, si dhe forcimin e mekanizmave të mbrojtjes dhe parandalimit të këtyre veprave penale.

  • Thomas Tuchel: Mbajtja e topit nuk është në ADN-në e Anglisë

    Thomas Tuchel: Mbajtja e topit nuk është në ADN-në e Anglisë

    Kur Thomas Tuchel u kthye te stoli në minutën e 72-të, duke zëvendësuar golashënuesin Anthony Gordon dhe duke kaluar në një skemë me pesë mbrojtës për të ruajtur epërsinë, tifozët anglezë mbajtën frymën. Ishte një skenar që e kishin parë edhe më parë.

    Megjithatë, pasi Argjentina përmbysi rezultatin dhe fitoi 2-1, duke eliminuar Anglinë nga një tjetër gjysmëfinale e Kupës së Botës, Tuchel refuzoi të merrte përsipër të gjithë fajin për qasjen e tij taktike.

    Trajneri gjerman dha një vlerësim të ashpër pas ndeshjes, duke argumentuar se problemi kryesor nuk ishte sistemi i lojës, por një mangësi psikologjike e rrënjosur në futbollin anglez.

    “Në atë moment, ndjesia ime ishte se asnjë strukturë në botë nuk do të na kishte ndihmuar, sepse ishim shumë pasivë dhe nuk ishim mjaftueshëm fizikë. Nuk i ndaluam lojtarët që depërtonin në zonën tonë dhe as dërgesat tona nuk ishin të sakta”, deklaroi Tuchel.

    Ai theksoi se gjithçka ndryshoi menjëherë pasi Anglia kaloi në epërsi.

    “Nuk i kam parë ende të dhënat, por mendoj se menjëherë pas golit momenti ndryshoi plotësisht dhe posedimi ynë i topit ra në mënyrë drastike. Nuk fituam më duele dhe u tërhoqëm gjithnjë e më thellë. Nuk ishte ky plani, por kështu ndodhi”, u shpreh ai.

    Sipas Tuchelit, skuadra nuk arriti të ndalte depërtimet e mesfushorëve kundërshtarë dhe nuk ishte në gjendje të rikthente kontrollin e lojës.

    “Duhet ta rikthesh topin, përndryshe nuk mund ta thyesh presionin dhe nuk mund ta rifitosh vrullin. Mendoj se posedimi i topit luan një rol vendimtar. Ndoshta kjo nuk është pjesë e ADN-së sonë, siç është për Spanjën, Argjentinën apo Brazilin, të cilat e marrin topin dhe e kontrollojnë lojën”, përfundoi trajneri gjerman.