Blog

Agjencia e Ushqimit dhe Veterinarisë (AUV) ka lëshuar ndalim për përdorimin e ujit për pije nga sistemi i ujësjellësit të Gostivarit, për shkak të dyshimeve të bazuara se uji është i ndotur dhe i pasigurt për konsum.

Gjatë inspektimit është konstatuar se në gypin kryesor të rrjetit të ujësjellësit, në mënyrë të paligjshme dhe pa leje, ishte vendosur një pompë që injektonte drejtpërdrejt ujë nga lumi Vardar në sistemin e furnizimit me ujë.

Mbi 1.200 banorë të Gostivarit kanë kërkuar ndihmë mjekësore në Spitalin e Përgjithshëm, duke u ankuar për dhimbje barku dhe të vjella.

“Pas njoftimit të marrë nga Prokurori Publik i Prokurorisë Themelore Publike në Gostivar për kryerjen e një inspektimi të jashtëzakonshëm në stacionin e pastrimit të ujit në fshatin Vrutok, Komuna e Gostivarit, me qëllim verifikimin e sigurisë dhe cilësisë së ujit të pijshëm në këtë sistem furnizimi, si dhe pas ankesave të qytetarëve drejtuar Prokurorisë dhe kallëzimit nga MPB Gostivar lidhur me sigurinë dhe cilësinë e ujit, shërbimet inspektuese të AUV-së, së bashku me përfaqësues të Ministrisë së Mjedisit, Prokurorisë Publike dhe teknikës kriminalistike të MPB-së, mbrëmë zhvilluan një inspektim të jashtëzakonshëm. Specialistët e Institutit të Shëndetit Publik, të pranishëm gjatë kontrollit, morën mostra të ujit për analiza laboratorike me qëllim përcaktimin e sigurisë së tij. Për të parandaluar një rrezik më të madh për popullatën e këtij rajoni, AUV vendosi ndalim të përkohshëm të përdorimit të ujit për pije deri në marrjen e rezultateve laboratorike që do të konfirmojnë sigurinë e tij”, thuhet në njoftimin e AUV-së.

Nga spitali bëjnë të ditur se kjo gjendje ka qenë e pranishme gjatë 3–4 ditëve të fundit. Nga SPB Tetovë njoftojnë se ekzistojnë baza dyshimi se Ndërmarrja Publike “Ujësjellësi”, në bashkëpunim me Komunën e Gostivarit, kishte vendosur tre pompa në shtratin e ujërave të ndotura, përmes të cilave injektohej ujë drejtpërdrejt në gypin kryesor që furnizon qytetin. Kjo veprimtari dyshohet se është ndërmarrë për të rritur presionin në rrjet për shkak të mungesës së ujit të pijshëm, duke rrezikuar drejtpërdrejt shëndetin e qytetarëve të Gostivarit.

“Në lidhje me epideminë që është përhapur në Gostivar gjatë këtyre 3–4 ditëve, kemi një numër të madh pacientësh të cilëve u është ofruar ndihmë mjekësore në institucionin tonë. Për këtë arsye kemi përforcuar personelin mjekësor në repartet ku ka më shumë pacientë. Shumica e pacientëve paraqiten me të njëjtat simptoma: të vjella, diarre, dhimbje stomaku, temperaturë, dobësi etj. Numri më i madh i pacientëve me këto simptoma është në repartin e Infektologjisë, Pediatrisë dhe Njësinë e Urgjencës”.
“Gjatë këtyre ditëve, në Spitalin e Përgjithshëm ‘Dr. Ferid Murad’ në Gostivar janë paraqitur rreth 1.000–1.200 pacientë me këto simptoma. Të gjithë pacientëve u është ofruar ndihmë mjekësore dhe terapi përkatëse”, thuhet në njoftimin e spitalit.

Rasti është raportuar edhe në SPB Tetovë, nga ku pas veprimeve të ndërmarra është konstatuar se shkaku i mundshëm ka qenë injektimi i ujit të ndotur në ujësjellësin e qytetit për të rritur presionin në rrjet, nga pika e pompimit në fshatin Vrutok.

“Më 16.07.2026, rreth orës 18:20, inspektorët e Zyrës së Jashtme për Punë Kriminalistike në Gostivar, duke vepruar sipas udhëzimeve të Prokurorit Publik të Prokurorisë Themelore Publike Gostivar, ndërmorën masa urgjente dhe aktivitete në terren në fshatin Vrutok, për shkak të dyshimeve për ndotjen e ujit me të cilin furnizohet qyteti i Gostivarit”, thuhet në njoftimin e SPB Tetovë.

“Po ndërmerren masa për zbardhjen e plotë të rastit, për shkak të dyshimeve për veprën penale ‘Ndotja e ujit të pijshëm’, e paraparë dhe e dënueshme sipas nenit 219 të Kodit Penal”, njofton SPB Tetovë.

Nga Qendra e Shëndetit Publik në Gostivar bëjnë të ditur se analizat për cilësinë e ujit janë ende në zhvillim.

Prokuroria Themelore në Pejë ngrit aktakuzë ndaj një personi për veprat penale “Dhunimi”, “Dhuna në familje” dhe “Mbajtja në pronësi, kontroll ose posedim të paautorizuar të armëve”

Prokuroria Themelore në Pejë, Departamenti për Krime të Rënda, ka ngritur aktakuzë ndaj të pandehurit me inicialet Xh.Sh , për shkak të dyshimit të bazuar mirë se ka kryer veprat penale “Dhunimi”, “Dhuna në familje” dhe “Mbajtja në pronësi, kontroll ose posedim të paautorizuar të armëve”, nga Kodi Penal i Republikës së Kosovës.

Siç thuhet në njoftim për media sipas aktakuzës, i pandehuri me inicialet Xh.Sh dyshohet se, më 22 dhe 23 shkurt 2026, në Pejë, në cilësinë e bashkëshortit të viktimës, me përdorim të forcës dhe kanosjes, e ka detyruar atë të kryejë veprime seksuale pa pëlqimin e saj.

Tutje bëhet e ditur se i pandehuri ngarkohet se, për një periudhë të caktuar kohore, ka ushtruar dhunë fizike dhe psikologjike ndaj bashkëshortes së tij, duke cenuar sigurinë dhe mirëqenien e saj në kuadër të marrëdhënies familjare.

“Në një pikë tjetër të aktakuzës, i pandehuri akuzohet se, në kundërshtim me dispozitat ligjore në fuqi, ka mbajtur në pronësi dhe posedim të paautorizuar armë zjarri, municion dhe mjete të tjera, të cilat janë sekuestruar nga Policia e Kosovës gjatë ndërmarrjes së veprimeve hetimore. Prokurori i Shtetit, me rastin e ngritjes së aktakuzës, i ka propozuar Gjykatës kompetente që, pas shqyrtimit gjyqësor dhe administrimit të provave, të pandehurin Xh.Sh ta shpallë fajtor dhe ta dënojë sipas ligjit për veprat penale për të cilat akuzohet”, thuhet në njoftim.

Pjesëtarë të Forcës së Sigurisë së Kosovës (FSK) kanë marrë pjesë në konferencën “European Partnership Flight”, që sipas tyre, është një nga aktivitetet kryesore të Forcave Ajrore të Shteteve të Bashkuara për Evropë (USAFE), që synon forcimin e bashkëpunimit ndërkombëtar dhe zhvillimin e kapaciteteve në fushën e aviacionit ushtarak.

Sipas njoftimit të FSK-së në Facebook, programi i konferencës përfshiu ligjërata profesionale, diskutime tematike dhe punë në grupe, duke u mundësuar pjesëmarrësve shkëmbimin e përvojave, praktikave më të mira dhe ekspertizës me përfaqësues të vendeve partnere.

”Në kuadër të aktivitetit u realizua edhe një vizitë në Bazën Ajrore të Kuçovës në Republikën e Shqipërisë, si dhe aktivitete të dedikuara për forcimin e partneriteteve, bashkëpunimit profesional dhe shkëmbimit kulturor. Pjesëmarrja e FSK-së në këtë konferencë dëshmon angazhimin e vazhdueshëm për zhvillimin e kapaciteteve profesionale, rritjen e ndërveprueshmërisë dhe thellimin e bashkëpunimit me partnerët strategjikë”, thuhet në postimin e FSK-së.

IKSHP ka dalë me disa rekomandime për qytetarët rreth rregullave që duhet t’i ndjekin për të parandaluar helmimet gjatë stinës së nxehtë të verës.

Në faqen zyrtare, IKSHP ka publikuar një listë rregullash për temperaturat dhe kushtet higjienike në të cilat duhet ruajtur ushqimet.

Shefi i grupit parlamentar të CDU/CSU në Bundestag, Jens Spahn dhe bashkëshorti i tij, Daniel Funke, janë bërë prindër me ndihmën e një nëne zëvendësuese në Shtetet e Bashkuara të Amerikës.

Lajmi për ardhjen në jetë të fëmijës së tyre u shoqërua me urime, por edhe me debat publik sepse amësia zëvendësuese mbetet e ndaluar me ligj në Gjermani.

Çdo marrëveshje e lidhur për këtë qëllim nuk ka fuqi ligjore sepse sipas legjislacionit gjerman, nënë e fëmijës njihet gjithmonë gruaja që e ka lindur atë.

Megjithatë, prindërit që zgjedhin një nënë zëvendësuese jashtë vendit nuk ndëshkohen penalisht, raporton Bild, transmeton Klankosova.tv

Por, sfida lind me procedurat për sjelljen e fëmijës në Gjermani, pasi shteti verifikon prejardhjen biologjike dhe shtetësinë.

Ministria Federale e Drejtësisë ka theksuar se në disa raste, prindërit mund të njihen ligjërisht si të tillë nëse të paktën njëri prej tyre ka lidhje gjenetike me fëmijën.

Vetë Spahn deklaroi: “Burri im u bë baba, dhe bashkë me të edhe unë“.

Agjencitë në Amerikën e Veriut ofrojnë shërbime për gjetjen e një nëne zëvendësuese dhe menaxhimin e gjithë procesit mjekësor e ligjor.

Një kompani amerikane vlerëson koston totale mes 140.000 dhe 160.000 dollarëve (rreth 122.000–140.000 euro), ndërsa studime shkencore tregojnë se shpenzimet mund të arrijnë deri në 200.000 dollarë.

Në SHBA, amësia zëvendësuese është e ligjshme, por rregullat ndryshojnë nga një shtet në tjetrin. Atje lejohet edhe pagesa për nënat zëvendësuese, teksa brenda Bashkimit Evropian nuk ekziston një rregullore e përbashkët.

Finalja e Kupës së Botës në Nju Jork, ku do të përballen Argjentina dhe Spanja, do të tërheqë shumë liderë botërorë dhe personazhe të famshëm në tribunat e stadiumit MetLife.

Megjithatë, njeriu i parë i Argjentinës padyshim që nuk do të jetë midis tyre.

Presidenti argjentinas, Javier Milei, ka konfirmuar zyrtarisht se nuk do ta ndjekë ndeshjen drejtpërdrejt në stadium dhe arsyeja që dha është mjaft e pazakontë për një burrë shteti – është supersticion i pastër.

I njohur për temperamentin dhe qëndrimet e tij jokonvencionale, Milei e bëri shumë të qartë se nuk donte të ndryshonte ritualet e fitoreve që i çuan Gauçot deri në fund të turneut.

“A do të shkoj në ndeshje? Absolutisht jo! Do ta shikoj ndeshjen në rezidencën time në Olivos me motrën time, ashtu siç kam bërë që nga dita e parë. Është supersticion i pastër”, tha Milei, siç raportohet nga gazeta argjentinase El Observador.

Në Argjentinë, një vend ku futbolli është praktikisht një fe, supersticionet dhe ritualet gjatë ndeshjeve merren jashtëzakonisht seriozisht.

Pra, ndërsa e gjithë bota shikon mega-spektaklin në New York, presidenti i Argjentinës do të qëndrojë në shtëpi me motrën e tij, duke shpresuar që besnikëria e tij ndaj traditës do t’i sjellë Lionel Messit dhe ekipit një tjetër titull kampion bote.

Një hapësirë publike në Kompleksin “Ramiz Sadiku”, e cila ishte duke u shfrytëzuar pa bazë ligjore si parking privat, është liruar pas një aksioni të realizuar nga Drejtoria e Pronës.

Sipas njoftimit të kryetarit Perparim Rama, aksioni është ndërmarrë me vendim të Drejtorisë së Pronës, në kuadër të angazhimeve për mbrojtjen e pronës publike dhe rikthimin e hapësirave në shërbim të qytetarëve

Rama ka bërë të ditur se ky nuk do të jetë aksioni i fundit, duke paralajmëruar vazhdimin e lirimit të hapësirave të tjera publike që janë uzurpuar ose shfrytëzohen pa bazë ligjore.Kryetari thekson se qëllimi i këtyre veprimeve është garantimi i përdorimit të drejtë të pronës publike dhe ruajtja e interesit të përgjithshëm të qytetarëve.