ATV

Blog

  • FIFA dhe Wenger synojnë të transformojnë rregullin e jashtëlojes për Kupën e Botës 2026

    FIFA dhe Wenger synojnë të transformojnë rregullin e jashtëlojes për Kupën e Botës 2026

    FIFA po shqyrton një ndryshim të madh dhe potencialisht revolucionar në rregullin e pozicionit jashtë loje, i cili mund të ndryshojë ndjeshëm mënyrën se si luhet dhe gjykohet futbolli modern. Lajmi u bë i ditur nga presidenti i FIFA-s, Gianni Infantino, gjatë Samitit Botëror të Sportit që u mbajt së fundmi në Dubai.

    Ndryshimi i propozuar është prezantuar fillimisht dy vjet më parë nga ish-trajneri legjendar i Arsenalit, Arsene Wenger, dhe synon të reduktojë polemikat e shumta që shoqërojnë vendimet për pozicion jashtë loje, veçanërisht në epokën e VAR-it, ku diferencat mes sulmuesit dhe mbrojtësit shpesh maten në milimetra.

    Sipas të ashtuquajturit “Ligji i Wenger”, një lojtar nuk do të konsiderohej më në pozicion jashtë loje nëse vetëm një pjesë e trupit të tij është përpara mbrojtësit. Jashtë loje do të shpallej vetëm në rastet kur i gjithë trupi i sulmuesit ndodhet përpara kundërshtarit në momentin e pasimit.

    Presidenti Infantino konfirmoi se FIFA po e analizon seriozisht këtë propozim, duke theksuar se synimi kryesor është ta bëjë lojën më sulmuese dhe më tërheqëse për tifozët.

    “Po shqyrtojmë ndryshimin e rregullit të pozicionit jashtë loje, i cili ka evoluar me kalimin e viteve. Ndoshta në të ardhmen, një sulmues do të duhet të jetë plotësisht përpara mbrojtësit për t’u konsideruar jashtë loje. Ne vazhdojmë të analizojmë rregullat për ta bërë futbollin më dinamik dhe më emocionues”, ka deklaruar Infantino.

    Propozimi i Wenger pritet të analizohet nga Bordi Ndërkombëtar i Shoqatës së Futbollit (IFAB) në një takim që do të mbahet më 20 janar në Londër. Më pas, çështja do të diskutohet në Asamblenë e Përgjithshme të IFAB-it në shkurt, në Uells, ku mund të merret edhe vendimi përfundimtar.

    Nëse miratohet, ky ndryshim mund të hyjë në fuqi që nga sezoni i ardhshëm, duke shënuar një nga reformat më të mëdha në rregullat e lojës në vitet e fundit.

  • Asllani poston foto me Xavi-n, takim që mund t’i hapë rrugën drejt Barcelonës?

    Asllani poston foto me Xavi-n, takim që mund t’i hapë rrugën drejt Barcelonës?

    Fisnik Asllani po kalon një formë fantastike në Bundesliga këtë sezon. Lojtari i Hoffenheimit ka tërhequr vëmendje me golat e tij dhe është bërë një nga elementët kryesorë të ekipit.

    Interesi për kosovarin nuk mungon. Sipas mediave, Barcelona e ka vënë në listën e saj si një zëvendësues potencial për Robert Lewandowskin.

    Lajmet u forcuan pas një fotografie të Asllanit pranë legjendës katalanase, Xavi Hernandez, të postuar në Instagram me mbishkrimin: “Kënaqësi e madhe.”

    Aktualisht, Asllani ndodhet në Katar për pushime dimërore, por formën e tij në fushë e ka treguar me 6 gola në 15 paraqitje për Hoffenheimin këtë sezon në ligën gjermane. /ATVLIVE.TV

  • Messi kryeson listën e 100 më të mirëve, duke lënë pas Pele dhe Maradonën

    Messi kryeson listën e 100 më të mirëve, duke lënë pas Pele dhe Maradonën

    Lionel Messi është shpallur futbollisti më i mirë i të gjitha kohërave, sipas revistës prestigjioze angleze ‘FourFourTwo’. Revista përditësoi klasifikimin e 100 futbollistëve më të mirë që ka njohur bota e futbollit dhe ylli argjentinas, kampion bote në fuqi dhe kapiten i kombëtares së Argjentinës, kryeson këtë listë.

    Në moshën 38-vjeçare, Messi ka lënë pas dy legjenda të sportit si Pele, brazilianin e jashtëzakonshëm dhe Diego Maradona, i njohur si “El Pibe de Oro”, të cilët plotësojnë podiumin e klasifikimit. Cristiano Ronaldo, edhe pse 40-vjeçar dhe në formë të jashtëzakonshme, renditet i katërti në këtë listë, duke lënë pas emra legjendarë si Johan Cruyff, Zinedine Zidane, Franz Beckenbauer dhe Alfredo Di Stefano.

    Dhjetëshen më të mirë e plotësojnë edhe Ronaldo Nazario dhe George Best, ndërsa lista e 100 më të mirëve përfshin emra si Marco Van Basten, Eusebio, Paolo Maldini, Ronaldinho, Lev Yashin, Xavi Hernandez, Andres Iniesta, Luka Modric, Thierry Henry dhe Ruud Gullit.

    Ky klasifikim vlerëson kontributin e jashtëzakonshëm të Messi-t në futboll, duke e konsoliduar si një nga figurat më ikonike të historisë së këtij sporti. /ATVLIVE.TV

  • Trump paralajmëron Hamasin: Çarmatosje e menjëhershme ose pasoja të rënda

    Trump paralajmëron Hamasin: Çarmatosje e menjëhershme ose pasoja të rënda

    Presidenti i Shteteve të Bashkuara të Amerikës, Donald Trump, ka paralajmëruar Hamasin se ka vetëm një periudhë shumë të shkurtër kohore për t’u çarmatosur plotësisht, duke theksuar se moszbatimi i këtij kushti do të ketë pasoja të rënda.

    Deklarata u bë të hënën gjatë një konference për shtyp në Florida, pas takimit që Trump zhvilloi me kryeministrin izraelit, Benjamin Netanyahu. Presidenti amerikan theksoi se çarmatimi i Hamasit është pjesë e marrëveshjes dhe se nuk ka hapësirë për vonesa.

    “Nëse nuk çarmatosen, siç kanë rënë dakord ta bëjnë, atëherë do ta paguajnë shtrenjtë. Ne nuk e duam këtë, por ata duhet të çarmatosen brenda një periudhe mjaft të shkurtër kohore”, deklaroi Trump.

    Takimi me Netanyahun, i gjashti mes dy liderëve vetëm këtë vit, u fokusua në disa çështje kyçe, përfshirë fazën e dytë të armëpushimit në Rripin e Gazës, e cila pritet gjerësisht të nisë në muajin janar.

    Faza e parë e marrëveshjes së armëpushimit, e cila hyri në fuqi më 10 tetor, i dha fund luftimeve që kishin nisur në vitin 2023 dhe përfshinte pezullimin e armiqësive, tërheqjen e pjesshme të forcave izraelite dhe shkëmbimin e pengjeve izraelite me të burgosur palestinezë.

    Ndërkaq, faza e dytë, e paraparë në planin e paqes prej 20 pikash të Trump, synon tërheqjen e plotë të Izraelit nga Gaza, çarmatimin e Hamasit dhe krijimin e një komiteti palestinez që do të qeveriste përkohësisht enklavën.

    Trump tha se pret që procesi i rindërtimit të Gazës të nisë “shumë shpejt”, por nuk ofroi detaje konkrete mbi afatet kohore apo aktorët që do të udhëheqin këtë proces. Rripi i Gazës është shkatërruar gjerësisht pas më shumë se dy vjetësh luftime, ndërsa OKB-ja vlerëson se mbi 80 për qind e ndërtesave janë dëmtuar ose shkatërruar.

    I pyetur për situatën në Bregun Perëndimor të pushtuar dhe për dhunën e kolonëve izraelitë, Trump pranoi se ekzistojnë mospajtime mes tij dhe Netanyahut lidhur me këtë çështje. “Nuk biem dakord 100 për qind për Bregun Perëndimor, por do të arrijmë në një përfundim”, tha ai, duke shtuar se beson që kryeministri izraelit “do të bëjë gjënë e duhur”.

  • Kurti në Ditën e Veteranëve: Me luftën tuaj u shkrua historia e çlirimit të Kosovës

    Kurti në Ditën e Veteranëve: Me luftën tuaj u shkrua historia e çlirimit të Kosovës

    Me rastin e Ditës së Veteranëve të Ushtrisë Çlirimtare të Kosovës, kryeministri në detyrë, Albin Kurti, ka nderuar luftëtarët e lirisë, duke theksuar se me veprën dhe sakrificën e tyre ata kanë shkruar historinë e çlirimit të Kosovës.

    Në një postim të publikuar në Facebook, Kurti uroi veteranët e UÇK-së, duke rikujtuar një nga momentet më të rëndësishme të rezistencës shqiptare, qëndresën e familjes Jashari në Prekaz. Ai theksoi se Dita e Veteranëve shënohet më 30 dhjetor, pasi në këtë datë, në vitin 1991, forcat policore serbe ndërmorën aksionin e parë kundër familjes Jashari.

    Kurti kujtoi se vetëm tri javë pas kthimit nga stërvitjet në Shqipëri, Adem Jashari dhe bashkëluftëtarët e tij u përballën me përpjekjen e policisë serbe për ta arrestuar komandantin e togut të dytë të vullnetarëve. Mirëpo, ajo që nuk e kishte parashikuar policia serbe ishte rezistenca e armatosur e bijve të Shaban Jasharit, Rifatit, Hamzës dhe Ademit, të cilëve iu bashkuan kushërinj, bashkëfshatarë dhe dhjetëra luftëtarë të tjerë.

    Sipas Kurtit, gjatë 30 dhjetorit 1991, Prekazi u shndërrua në arenë përballjesh të ashpra, ku mbi 200 persona u mobilizuan për ta mbrojtur familjen Jashari. Si pasojë e aksionit policor, pati të plagosur, dhjetëra familje të bastisura dhe shumë persona të ndaluar e të arrestuar, përfshirë edhe Shaban Jasharin.

    Ai theksoi se dalja e Rifatit, Hamzës dhe Ademit nga rrethimi policor nuk ishte vetëm shpëtim fizik, por edhe vazhdimësi e projektit kombëtar për çlirimin e Kosovës. Familja Jashari do të përballej sërish me sulme të armatosura në janar të vitit 1998, deri te rezistenca heroike e marsit të po atij viti, ku Adem dhe Hamza Jashari ranë dëshmorë për lirinë e vendit.

    Në mesazhin e tij, Kurti i cilësoi veteranët si bashkudhëtarë dhe dëshmitarë të sakrificës së dëshmorëve, duke nënvizuar se kontributi i tyre mbetet themel i shtetndërtimit dhe i faktorizimit të Republikës së Kosovës.

    “Me veprën dhe luftën tuaj, ju e keni bërë historinë e çlirimit të Kosovës”, ka përfunduar Kurti, duke uruar jetë të gjatë veteranëve të Ushtrisë Çlirimtare të Kosovës.

  • Pas një muaji larg, Araujo rifillon stërvitjet

    Pas një muaji larg, Araujo rifillon stërvitjet

    Kapiteni i Barcelonës, Ronald Araujo, është rikthyer në stërvitje me klubin katalanas pas një mungese prej një muaji, që ai e kishte kërkuar për tu përkujdesur për shëndetin e tij mendor. Sipas raportimeve të L’Équipe, uruguaiani 26-vjeçar rifilloi punën në qendrën stërvitore të Barcelonës të hënën, më 29 dhjetor.

    Araujo nuk kishte luajtur që nga 25 nëntori, kur u ndëshkua me karton të kuq në ndeshjen ndaj Chelseat, në humbjen 3-0. Pas këtij momenti, mbrojtësi kërkoi një pushim për të rifreskuar mendërisht, një kërkesë që klubi e pranoi dhe i dha kohë për rikuperim.

    Gjatë mungesës së tij, Barcelona ka shënuar progres të dukshëm, duke u rikthyer në krye të La Ligës dhe regjistruar shtatë fitore radhazi në të gjitha garat. Me Andreas Christensen jashtë për shkak të një dëmtimi afatgjatë, Araujo pritet të rikthehet shpejt si titullar nën drejtimin e trajnerit Hansi Flick.

    Barcelona do të rikthehet në fushë të shtunën kundër Espanyolit në orën 21:00, ndërsa më pas skuadra udhëton për në Jeddah për të marrë pjesë në Superkupën e Spanjës, ku do të përballet me Athletic Bilbao në gjysmëfinale më 7 janar. Rikthimi i Araujo pritet të forcojë mbrojtjen e katalanasve për këtë sfidë të rëndësishme. /ATVLIVE.TV

  • Dy asistime – Vojvoda në formacionin e javës në Serie A

    Dy asistime – Vojvoda në formacionin e javës në Serie A

    Xhiroja e 17-të e Serie A ka përfunduar me një paraqitje fantastike të Mërgim Vojvodës, i cili ka ndihmuar Como-n të triumfojë me rezultatin 3-0 në udhëtim te Lecce. Ylli kosovar ishte protagonist absolut i sfidës, duke dhuruar dy asistime vendimtare dhe duke spikatur në lojë.

    Falë performancës së tij, Vojvoda u përfshi në formacionin e javës nga faqja e specializuar SofaScore, ku mori notën 7,8 dhe u konsiderua një nga futbollistët më të vlerësuar të Comos.

    Përveç Vojvodës, formacioni i javës përfshin edhe:

    • Portier: Caprile (Cagliari)

    • Mbrojtës: Kalulu (Juventus), Ziolkowski (Roma), Valenti (Parma)

    • Mesfushorë: Moro (Bologna), Nico Paz (Como), Kenan Yildiz (Juventus), Christopher Nkunku (Milan)

    • Sulm: Douvikas (Como), Rasmus Hojlund (Napoli)

    Ky sukses i Comos dhe performanca e Vojvodës tregojnë rëndësinë e lojtarëve kosovarë në futbollin italian dhe ndikimin që mund të kenë në ekipet e tyre. /ATVLIVE.TV

  • Sturm Graz me trajner të ri, Atdhe Nuhiu drejt një hapi të madh në karrierë

    Sturm Graz me trajner të ri, Atdhe Nuhiu drejt një hapi të madh në karrierë

    Fabio Ingolitsch është emëruar zyrtarisht trajner i ri i kampionit në fuqi të Austrisë, Sturm Graz, duke hapur një kapitull të ri për klubin austriak në prag të pjesës së dytë të sezonit.

    Sipas mediave austriake, Ingolitsch pritet ta marrë me vete edhe ndihmëstrajnerin e tij nga Altachu, Atdhe Nuhiun. Ky i fundit shihet si pjesë e stafit teknik të ri, duke e bërë këtë një hap të rëndësishëm në karrierën e tij.

    Trajneri i ri do ta nisë zyrtarisht punën te Sturm Graz të premten, ndërsa debutimi i tij në stolin e kampionëve austriakë do të jetë më 22 janar, në ndeshjen e fazës së Ligës së Evropës ndaj Feyenoordit.

    Atdhe Nuhiu, 36-vjeçar, ka nisur karrierën e tij si ndihmëstrajner te Altachu në vitin 2024 dhe aktualisht është gjithashtu ndihmës i përzgjedhësit të Kosovës, Franco Foda. Si futbollist, Nuhiu ka qenë pjesë e Përfaqësueses së Kosovës në 19 ndeshje, gjatë periudhës 2017–2021.

    Angazhimi i mundshëm te Sturm Graz do të përfaqësonte një hap të madh përpara në karrierën e Nuhiut, duke qenë pjesë e stafit të një prej klubeve më të mëdha dhe më të suksesshme në futbollin austriak.

  • Komuna e Prishtinës vendos t’i japë në shfrytëzim 5288 prona

    Komuna e Prishtinës vendos t’i japë në shfrytëzim 5288 prona

    Komuna e Prishtinës në seancën e jashtëzakonshme të mbajtur sot ka vendosur për dhënien në shfrytëzim të 5288 pronave publike.

    Asamblistja Jeta Rafuna ka thënë se kjo është çështje me rëndësi për menaxhimin e pronës publike dhe për zhvillimin ekonomik të kryeqytetit.

    Ajo ka  shtuar se dhënia në shfrytëzim të këtyre pronave, krijon hapësirë për rritjen e të hyrave vetanake të komunës.

    Asamblisti i PDK-së, Leotrim Retkoceri ka thënë se shpreson që lista e pronave t’i përmbajë të gjitha elementet që kërkohen me ligj.

    Besa Shahini nga PSD-ja ka thënë se ka keqmenaxhim të përmasave të mëdha të pronës publike në Prishtinë. Ka thënë se dëmi që i është shkaktuar komunës është mbi 200 mijë euro.

    Asamblisti i Lëvizjes Vetëvendosje, Gëzim Sveçla ka thënë se nëse nuk miratohet kjo listë, i bie që komuna e Prishtinës vitin e ardhshëm nuk mund ta jep asnjë pronë në shfrytëzim.

    Sipas tij, me sjell një listë me mbi 5288 prona në një seancë të jashtëzakonshme dhe të kërkojë nga asambleja të votojë pa plotësim të dokumentacionit, nuk është  në rregull.

    Ka thënë se asamblistët nuk janë makineri votash që të votojnë prona që nuk e dinë kush i zotëron, e as kush i shfrytëzon.

    “Kjo mund të shërbejë për shumë veprime të tjera të jashtëligjshme. Mund të ketë qytetarë që kanë ndërtu dhe është një lloj shantazhi kundër tyre. unë kërkoj që dokumentacioni të plotësohet sot dhe lista të miratohet”, ka thënë  ai. “Në këtë listë janë 17 parcela në të cilat është ndërtu një lagje luksoze, lagjja ‘Marigona’, sponsorëve të Ramës. Kjo është tentativë që të legjitimohet keqpërdorimi i pronës publike”, ka thënë ai.

  • Aktakuzë ndaj S.A. për krime lufte, dyshohet se mori pjesë në vrasjen e 13 civilëve në Gjilan

    Aktakuzë ndaj S.A. për krime lufte, dyshohet se mori pjesë në vrasjen e 13 civilëve në Gjilan

    Prokuroria Speciale ka ngritur aktakuzë kundër S.A. për “Krim i luftës kundër popullsisë civile”.

    Ai akuzohet se gjatë periudhës 1998-1999, në fshatinë Llashticë, komuna e Gjilanit, në bashkëkryerje me pjesëtarë tjerë të forcave policore, paramilitare dhe ushtarake serbe, ka kryer krime lufte ndaj popullsisë civile të nacionalitetit shqiptar.

    “Sipas aktakuzës, më 30.04.1999, rreth orës 13:00, S.A, ka marrë pjesë në vrasjen e  trembëdhjetë (13) civilëve dhe në plagosjen e katër (4) personave të tjerë. Ekziston dyshimi i bazuar mirë se i pandehuri e ka ekzekutuar viktimën H.H duke e qëlluar me armë zjarri në kokë, e më pas e ka urdhëruar një person tjetër që të shtinte me armë zjarri në drejtim të civilëve të tjerë, duke i ekzekutuar ata një nga një.”

    Prokuroria ka propozuar mbajtjen e gjykimit në mungesë.

    “Prokuroria Speciale e Republikës së Kosovës, në bazë të neneve 234 dhe 303 të Kodit të Procedurës Penale, i ka propozuar Gjykatës Themelore në Prishtinë mbajtjen e gjykimit në mungesë, meqenëse i  pandehuri S.A është i paarritshëm për organet e drejtësisë.”