Blog

Kryetari i Skënderajt, Sami Lushtaku, ka deklaruar se nuk do ta urojë asnjëherë kryetarin e Lëvizjes Vetëvendosje, Albin Kurti, për fitoren në zgjedhjet parlamentare të së dielës.

I ftuar në një lidhje direkte në emisionin “Frontal” në televizionin T7, Lushtaku u pyet nëse do ta uronte Kurtin për fitoren, ashtu siç bëri më herët gjatë ditës kryetari i Partisë Demokratike të Kosovës, Bedri Hamza.

“Jo, absolut jo. Ai ia ka vjedhë votat edhe kandidatit të PDK-së në Mitrovicë”, deklaroi Lushtaku.

Ai theksoi se qëndrimi i tij është personal dhe i ndryshëm nga ai i kryetarit të partisë.

“Bedriu është kryetar i partisë, kurse unë e kam mendimin tim personal. Unë asnjëherë nuk ia uroj, as nuk ia uroj as nuk dëshiroj që Albin Kurti të jetë kryeministër i vendit”, u shpreh Lushtaku.

Sipas tij, qeverisja e Albin Kurtit përbën dëm të madh për vendin.

“Unë konsideroj që kjo është e keqja më e madhe e Republikës së Kosovës ndonjëherë”, tha ai.

Kreu i partisë “Guxo”, Faton Peci, në festën e mbrëmshe pas fitores në zgjedhje, ka thënë se opozitës zgjedhjet ia ka ka humbur analistat nëpër studio televizive.

Peci tha se partitë tjera s’kanë pasur as kauzë e as program.

“Ky proces zgjedhor, përveç tjerash, përveç dështimit opozitar që s’kanë pas as kauzë as program e as figura kredibile, ua kanë hup edhe analistat nëpër studio”, ka deklaruar Peci për “Interaktiv Talks”.

“Flasin palidhje, bajnë akuza të rënda, akuzojnë pa bazë…kështu del rezultati…Kanë qesh nëpër studio, sot po qeshi unë me ta”, ka shtuar Peci.

Prokuroria Speciale ka ngritur aktakuzë ndaj 9 personave, të cilët ngarkohen për përfitimin e e mbi 2 milionë eurove nga mashtrimi i shtetasve të huaj.

“Prokuroria Speciale e Republikës së Kosovës ka ngritur atakuzë ndaj N.S., E.S., D.B., A.J., G.S., M.D., K.S., B.Q dhe V.M për veprën penale “Mashtrimi”. Ndërsa N.S., akuzohet edhe për posedim të paautorizuar të armëve”, tha Prokuroria Speciale në një njoftim.

“Të pandehurit akuzohen se në bashkëveprim, nga një periudhë e papërcaktuar kohore e deri në shkurt të 2024-ës, kanë mashtruar shetas të vendeve të ndryshmve evropiane, kryesisht nga Gjermania dhe Zvicra, duke përfituar kundërligjshëm mjete financiare në vlerë prej dy milionë e gjashtëdhjetë e shtatë mijë e dyqind e shtatëdhjetë e një (2,067,271) euro”, thuhet në njoftimin e Prokurorisë.

Sipas aktakuzës, të pandehurit duke u paraqitur rrejshëm si kompani investimesh, kanë kontaktuar viktimat dhe i kanë bindur të investojnë në platformat ”Option888” dhe “Krack”. Gjithashtu, pasi kanë përfituar qasje nga viktimat në aplikacionet e tyre, kanë manipuluar të dhënat, duke i paraqitur investimet (fiktive) në rritje.

“Hetimet kanë vërtetuar se parat e të dëmtuarëve, të transferuara përmes platformës “Krack”, janë ndarë mes të gjithë të pandehurve. Prokuroria Speciale mbetet e përkushtuar në luftimin e krimit të organizuar, si dhe në mbrojtjen e rendit dhe ligjshmërisë”, thuhet në njoftim.

Takimi në Florida mes Donald Trump dhe Volodymyr Zelensky ka prodhuar lëvizjet e para konkrete për t’i dhënë fund luftës.

Ndërsa Trump thotë se marrëveshja është “95% gati”, pika e nxehtë mbetet kohëzgjatja e mbrojtjes amerikane dhe fati i territoreve të pushtuara.

Garancitë e sigurisë: 15 apo 50 vite?

Uashingtoni i ka ofruar Ukrainës një premtim sigurie për 15 vitet e ardhshme. Megjithatë, Zelensky po kërkon më shumë.

Ai ka deklaruar se me një fqinj si Rusia, paqja nuk është kurrë e sigurt, ndaj kërkon që mbrojtja amerikane të zgjasë 30 deri në 50 vite.

Sipas tij, garancitë duhet të nisin në momentin që firmoset paqja.

Çfarë mbetet pa zgjidhur?

Edhe pse palët thonë se janë shumë afër, dy pengesa të mëdha janë ende në tavolinë:

Territoret: Fati i rajonit të Donbasit mbetet i paqartë. Rusia kërkon tërheqjen totale të trupave ukrainase, ndërsa Ukraina propozon që zona të jetë ekonomike dhe e mbrojtur nga forcat e saj.

Centrali i Zaporizhias: Ky central bërthamor, aktualisht në duart e Rusisë, është një pikë kyçe që Zelensky kërkon ta zgjidhë përpara se të firmosë çdo gjë.

Çfarë thotë Trump dhe Kremlini?

Presidenti Trump u shpreh optimist, duke thënë se edhe aleatët evropianë do të marrin një barrë të madhe në këtë proces.

Nga ana tjetër, Kremlini ka rënë dakord me vlerësimin e Trump se “paqja është afër”, por mbetet kundër një armëpushimi të përkohshëm që do t’i lejonte Ukrainës të mbante një referendum popullor për marrëveshjen.

Hapat e radhës

Zyrtarët ukrainas pritet të vizitojnë Shtëpinë e Bardhë për të finalizuar detajet në Janar.

Ndërsa muajin tjetër, aleatët evropianë do të mblidhen në Francë për të diskutuar rolin e tyre në garancitë e sigurisë.

Ndërkohë që bisedimet vazhdojnë në sallat luksoze të Floridës, në terren lufta nuk ka ndaluar. Gjatë natës, të dyja palët kanë vijuar sulmet me dronë dhe raketa, duke treguar se rruga drejt paqes së premtuar mbetet ende e vështirë.

Kanë mbetur edhe dy kuti votimi pa u numëruar nga 2557 gjithsej.

Nga rezultatet e fundit të dala nga Komisioni Qendror i Zgjedhjeve, VV prin me 49.33%.

PDK ka grumbulluar 20.99% të votave, LDK 13.57% dhe AAK 5.66%.

Ndërkohë qytetarët këtë vit iu drejtuan kutive të votimit plot dy herë në kuadër të zgjedhjeve nacionale, dhe dy herë të tjera për zgjedhjet lokale.

Nga Fatos Çoçoli

Libri në dy vëllime “Sekretet e gjenive të biznesit” i Prof. Dr. Adrian Civici përfaqëson një prej botimeve më të rëndësishme të viteve të fundit në fushën e ekonomisë, menaxhimit dhe edukimit sipërmarrës në Shqipëri.

Ai sjell një qasje të rrallë: kombinimin e analizës teorike me biografitë konkrete të sipërmarrësve më të mëdhenj të botës moderne, duke i përkthyer eksperiencat e tyre në mësime të thjeshta, të zbatueshme dhe të vlefshme për çdo lexues.

Ky libër jo vetëm informon, por formon, duke shërbyer si udhërrëfyes për studentët, biznesin, politikëbërësit dhe këdo që kërkon të kuptojë mekanizmat e suksesit në ekonominë globale.

Një manual modern i mendimit sipërmarrës

Vlera e parë e librit është se përkthen mendësinë e gjenive të biznesit, nga Steve Jobs te Elon Musk, nga Warren Buffett te Jack Ma, në modele të qarta, të prekshme dhe të sistemuara. Profesor Civici nuk përqendrohet në mitologjinë e tyre, por në procesin e tyre të të menduarit, disiplinën, strategjinë dhe vizionin afatgjatë.

Libri arrin të lidhë botën e miliarderëve të teknologjisë, industrisë dhe shërbimeve me sfidat e tregut shqiptar: mungesa e inovacionit, frika nga rreziku, kultura e ulët menaxheriale dhe dobësia e planeve strategjike. Kjo e bën veprën një mjet të çmuar orientues për sipëmarrsit e ndërmarrjeve tona të vogla e të mesme, për startup-et tona, për profesionistët e sektorëve të ndryshëm dhe për vendimmarrjen ekonomike publike.

Profesori i shquar i ekonomisë sonë dhe publicisti i njohur, për çdo figurë gjeniale të biznesit botëror që analizon, përqendrohet tek psikologjia e suksesit. Civici shpjegon se gjenitë e biznesit dallohen jo vetëm nga inteligjenca apo kapitali, por nga aftësia për të marrë vendime të vështira, nga qëndrueshmëria ndaj dështimit, nga vizioni i qartë për të ardhmen dhe prirja për të parë mundësi, aty ku të tjerët shohin vetëm rrezik.

Libri, i shkruar me një gjuhë të thjeshtë, komunikuese dhe të zhdërvjelltë, e zhvendos me mjeshtëri vëmendjen nga qasja tradicionale “çfarë bënë” drejt qasjes “si menduan”, një risi me vlerë shkencore dhe praktike.

Libër që e sjell biznesin si kulturë, jo vetëm si aktivitet ekonomik

Në një vend si i yni, ku edukimi ekonomik shpesh mbetet teorik, libri plotëson një boshllëk të madh. Ai është i ilustruar me histori reale, i thjeshtëzuar në gjuhë të qartë, i sistemuar në forma që mund të përdoren gjerësisht në leksione, trajnime dhe seminare, si dhe i vlefshëm për sipërmarrësit e rinj, të cilët kërkojnë një “udhëzues fillestar” të besueshëm.

Profesor Civici ka arritur të japë një analizë të thellë dhe të ekuilibruar të këtyre gjenive, duke e mbajtur narrativën larg romantizimit. Ndryshe nga shumë libra motivues perëndimorë he qasje pothuajse biografike, Civici ruan një qasje kritike. Ai studion jo vetëm sukseset e gjenive të biznesit, por edhe gabimet, krizën e tyre, konfliktet me rregullatorët, etikat e diskutueshme, marrëdhënien mes pushtetit ekonomik dhe atij politik.

Ky ekuilibër e bën librin të besueshëm dhe akademikisht tejet të vlefshëm. Me të, Civici ia ka dalë ta konceptojë dhe të na e sjellë me shumë ngjyra aktivitetin e biznesit Konceptimi i biznesit si kulturë, jo vetëm si aktivitet ekonomik i jep veprës atë përmasë të gjashtë shtesë, që e bën unikale.

Libri hedh një mesazh të rëndësishëm: biznesi është sa eksperiencë e jashtëzakonshme e jetuar, aq edhe vlerë shoqërore dhe kulturë. Ai kërkon mentalitet të hapur, inovacion të vazhdueshëm, të mësuarit gjatë gjithë jetës, respekt për kohën, si dhe ndërtim të vlerave, e jo vetëm të pasurisë. Ky dimension i qartë dhe i plotë kulturor është ndoshta kontributi më i madh i librit të Prof. Dr. Adrian Civicit.

Ai do të sjellë një ndikim të drejtpërdrejtë në politikëbërjen dhe edukimin publik ekonomik. Përtej lexuesit individual, libri ofron referenca që shërbejnë si material për politika mbi sipërmarrjen, bazë për reforma në arsimin profesional, literaturë për programet universitare të ekonomisë dhe menaxhimit, si dhe frymëzim për sektorin privat që kërkon modernizim.

Një ftesë për të ndërtuar “gjenitë e biznesit” shqiptarë të së ardhmes

Në një vend me treg të vogël, ekonomi të brishtë dhe emigracion të lartë, Civici nxit një ide të rëndësishme: edhe Shqipëria mund të krijojë gjenitë e saj të biznesit, nëse ndërtohen kultura e inovacionit, tregjet konkurruese, mbështetja institucionale, mendësia e rrezikimit të matur dhe investimi në dije. Libri është një thirrje për të mos pritur vetëm “heronjtë globalë”, por për të kultivuar mendjet kreative shqiptare.

“Sekretet e gjenive të biznesit” është më shumë se një libër për ekonominë. Është një guide për mënyrën e të menduarit, një ftesë për ndryshim kulturor, një manual inspirues dhe një instrument edukativ që i mungonte tregut shqiptar. Kryevlera e tij qëndron tek aftësia e Profesorit të talentuar për të sjellë përvojat globale në realitetin tonës, duke dhënë mësime që mund të shndërrohen në strategji konkrete suksesi. Në një kohë kur Shqipërisë i duhen ide të reja, kultura inovative dhe sipërmarrje e guximshme, libri i Prof. Dr. Civici është një prej burimeve më të vlefshme të mendimit kritik dhe zhvillimor shqiptar në fushën e ekonomisë.