Blog

Në Gjykatën Themelore në Prishtinë është anuluar seanca e së hënës në rigjykimin ndaj Pal Lekajt, Eset Berishës, Nebih Shatrit dhe Besim Tahirit, të akuzuar për keqpërdorim të detyrës lidhur me autostradën “Arbën Xhaferi”. Shkak për anulimin e seancës është mospërfundimi i ekspertizës financiare.

Në këtë rast, Pal Lekaj, në cilësinë e ministrit të Ministrisë së Infrastrukturës (MI), Eset Berisha, në cilësinë e këshilltarit të lartë politik i tij, Nebih Shatri, si sekretar i përgjithshëm në këtë ministri dhe Besim Tahiri, si drejtor i prokurimit publik në MI, ngarkohen nga prokuroria për keqpërdorim të detyrës zyrtare në bashkëkryerje, raporton “Betimi për Drejtësi”.

Nga zyra e gjykatëses Violeta Namani-Hajra konfirmuan se seanca e planifikuar për sot nuk mbahet për shkak se nuk është kryer ende ekspertiza financiare, ndërkaq e radhës caktohet pas pranimit të ekspertizës.

Ndryshe, kryetarja e Gjykatës Themelore në Prishtinë, Albina Shabani-Rama ka refuzuar kërkesën për përjashtimin e kryetares së trupit gjykues, Violeta Namani-Hajra nga gjykimi i rastit të njohur si “53-milionëshi”, kërkesë kjo e parashtruar nga i akuzuari Eset Berisha.

Gjykata Themelore në Prishtinë më 31 janar 2024 i shpalli fajtorë dhe i dënoi me 10 vjet e 3 muaj burigm (së bashku): Pal Lekajn, Eset Berishën, Nebih Shatrin dhe Besim Tahirin për rastin e njohur si “53-milionëshi”.

Sipas aktgjykimit të Themelores, Pal Lekaj u dënua me 3 vjet e 8 muaj burgim efektiv. Ndaj tij, gjykata shpalli edhe dënim plotësues, ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vjetësh e 6 muaj.

Nebih Shatri u dënua me 1 vit e 8 muaj burgim, kurse Besim Tahiri u dënua me 1 vit e 8 muaj burgim. Ndaj tyre u shpall edhe dënim plotësues, ndalim i ushtrimit të funksionit publik në administratë publike ose në shërbimin publik në kohëzgjatje prej 2 vjetësh. Ndërsa, Eset Berisha u dënua me 3 vjet e 3 muaj burgim.

Po ashtu, ndaj Berishës u shpall edhe dënimi plotësues ndalimi i ushtrimit të funksionit publik në administratë publike ose në shërbimin publik në kohëzgjatje prej 3 vjetësh.

Por, Gjykata e Apelit e ka kthyer në rigjykim rastin ndaj Pal Lekajt, Eset Berishës, Nebih Shatrit dhe Besim Tahirit.

“Betimi për Drejtësi” kishte raportuar lidhur me përmbajtjen e vendimi të plotë të përpiluar nga Themelorja në Prishtinë, duke publikuar gjetjet e gjykatës nga mbrojtja e të akuzuarve dhe gjetjet nga deklaratat e dëshmitarëve. Po ashtu, edhe për gjetjet e Apelit.

Sipas aktakuzës së ngritur më 4 shkurt 2022 nga Prokuroria Speciale e Republikës së Kosovës, Pal Lekaj, në cilësinë e ministrit të Ministrisë së Infrastrukturës (MI), Eset Berisha, këshilltar i lartë politik i tij, Nebih Shatri, si sekretar  i përgjithshëm në këtë ministri, në bashkëveprim dhe me dashje edhe me të pandehurin Besim Tahiri, drejtor i prokurimit publik në MI, akuzohen për keqpërdorim të detyrës zyrtare me rastin e ndarjes së 53 milionë eurove për konsorciumin “Bechtel &Enka”, për ndërtimin e autostradës Prishtinë – Hani i Elezit apo e njohur ndryshe si autostrada “Arbën Xhaferi”.

Gjykata Themelore në Prishtinë do të shqyrtojë nga ora 10:00 ankesën e Millosh Pleskoviçit, i dënuar për krime lufte.

Në Gjykatën Themelore të Prishtinës do të mbahet seancë gjyqësore ndaj Millosh Pleskoviçit, i cili akuzohet për krime lufte në zonën e Prizrenit.

Gjatë kësaj seance pritet të shqyrtohet ankesa ndaj vendimit të gjykatës. Në korrik të vitit 2025, Pleskoviç ishte dënuar me 15 vjet burgim nga Gjykata Themelore në Prishtinë.

I akuzuari është urdhëruar gjithashtu të paguajë shpenzimet e procedurës penale, përfshirë paushallin gjyqësor prej 200 eurosh, si dhe 100 euro të tjera për taksën e kompensimit për viktimat e krimit.

Sipas aktakuzës së Prokurorisë Speciale, Pleskoviç gjatë viteve 1998–1999, në Prizren, në bashkëkryerje me një grup serbësh të armatosur, ka vrarë tre civilë shqiptarë dhe ka plagosur disa të tjerë.

Ndër të tjera, ai akuzohet se, duke vepruar si pjesë e një grupi të armatosur prej 7–8 personash të nacionalitetit serb, më 1 shtator 1998, në Prizren, ka ndalur papritmas viktimat R.D., B.D. dhe F.B., të cilët së bashku me të dëmtuarit Fevzi Cana, Xhenger Cana dhe Bashkim Kastrati po shkonin drejt malit.

Sipas aktakuzës, ata fillimisht janë fyer në gjuhën serbe nga grupi i armatosur, në mesin e të cilit ishte parë edhe i akuzuari Pleskoviç.

Në një moment, thuhet se Pleskoviç ka filluar të gjuajë me armë të tipit “Kallashnikov”, ku si pasojë e të shtënave në vendin e ngjarjes mbetën të vrarë R.D., B.D. dhe F.B., ndërsa të dëmtuarit Xhenger Cana, Fevzi Cana dhe Bashkim Kastrati kanë shpëtuar.

Prej rrëshqitjes së shpatit të malit raportohet se janë bllokuar akset Zallë–Dardhë dhe Zallë–Reç.

Si pasojë e rrëshqitjeve, rrugët kanë qenë tërësisht të bllokuara për disa orë.

Bashkia Dibër ka punuar gjatë gjithë natës për pastrimin dhe hapjen e rrugës që lidh zonën me qytetin e Peshkopisë.

Po ashtu vijon puna edhe për hapjen e rrugëve në njësinë administrative Sllovë.

Reshjet e dendura të borës kanë shkaktuar vështirësi të mëdha, veçanërisht në fshatrat e thella, ku trashësia e borës në disa zona ka kaluar mbi 40 centimetra.

Mësohet se autoritetet vendore janë në terren dhe po punojnë për normalizimin e situatës.

Presidenti Donald Trump thotë se ushtria amerikane po shqyrton “opsione shumë të forta” në Iran, ndërsa protestat antiqeveritare, të cilat thuhet se kanë vrarë qindra persona, hyjnë në javën e tretë.

Agjencia e Lajmeve të Aktivistëve të të Drejtave të Njeriut (HRANA) me seli në SHBA thotë se ka verifikuar vdekjen e gati 500 protestuesve dhe 48 personelit të sigurisë në Iran, ndërsa burimet i tregojnë BBC-së se numri i të vdekurve mund të jetë shumë më i lartë.

Trump ka kërcënuar të ndërhyjë dhe tha të dielën se zyrtarët iranianë e kishin thirrur “për të negociuar” – por shtoi se “mund të na duhet të veprojmë para një takimi”.

Udhëheqësit iranianë i kanë përshkruar demonstruesit si një “grup vandalësh” dhe u kanë bërë thirrje mbështetësve të tyre të marrin pjesë në marshimet pro-qeveritare të hënën.

Qeveria ka njoftuar gjithashtu tre ditë zie për ata që i quajti “martirë” të vrarë në një “betejë kombëtare kundër SHBA-ve dhe Izraelit” – dy vende që Teherani thotë se po nxisin trazira.

Zemërimi për rënien e vlerës së monedhës iraniane shkaktoi protesta në fund të dhjetorit, të cilat janë shndërruar në një krizë legjitimiteti për Udhëheqësin Suprem të Iranit, Ajatollah Ali Khamenei.

Trump ende nuk ka dhënë detaje mbi atë që SHBA-të po shqyrtojnë në lidhje me opsionet ushtarake, as mbi negociatat e propozuara, pavarësisht se tha se një “takim po caktohet” me zyrtarët iranianë.

Ai shtoi se udhëheqësit iranianë “duan të negociojnë”, sepse “janë të lodhur duke u rrahur nga Shtetet e Bashkuara”.

Një zyrtar amerikan i tha CBS, se Trump është informuar mbi opsionet për sulme ushtarake ndaj Iranit.

Qasje të tjera mund të përfshijnë forcimin e burimeve antiqeveritare në internet, përdorimin e armëve kibernetike kundër ushtrisë së Iranit ose vendosjen e më shumë sanksioneve, thanë zyrtarët për Wall Street Journal.

Burime i thanë BBC-së se protestat vazhduan të dielën në mbrëmje, por në një nivel më të reduktuar krahasuar me ditët e mëparshme, ndërsa frika rritet për një përshkallëzim të masave të ashpra nga qeveria iraniane.

Të paktën 10 mijë e 600 persona janë ndaluar gjatë dy javëve të trazirave, sipas HRANA.

BBC numëroi 180 qese me kufoma në pamjet filmike nga një morg pranë kryeqytetit iranian, me një burim që tha të dielën se rrugët e Teheranit ishin “plot me gjak”.

“Po marrin kufoma me kamionë”, shtoi burimi.

Për shkak të problemeve me energjinë elektrike, minatorët qëndruan të bllokuar për disa orë në Trepçë.

Pesë pompistë kujdestarë kanë kaluar rreth nëntë orë të bllokuar brenda minierës së Trepçës në Stan Tërg, për shkak të telasheve të ndërmarrjes me energjinë elektrike.

Kryetari i Sindikatës së Punëtorëve të Trepçës, Ibrahim Januzi, ka konfirmuar të dielen se të pesë minatorët janë nxjerrë nga miniera në gjendje të mirë shëndetësore.

“Sot kanë qenë pesë pompistë kujdestarë, të cilët kanë mbetur në vendet e tyre të punës për shkak të problemeve teknike në energji elektrike. Lajmi i mirë është se ata kanë dalë nga miniera, janë shëndoshë e mirë dhe janë kthyer në shtëpi pas rreth 8–9 orësh”, ka deklaruar Januzi në një përgjigje zyrtare për shtypin në Prishtinë.

Ndryshe, në korrik të vitit 2024, minatorët kishin hyrë në grevë brenda minierës për gati një muaj për shkak të mosrealizimit të pagave dhe kushteve të punës.