Blog

Kompania Rajonale e Ujësjellësit “Mitrovica”, ka njoftuar se pas kryerjes së të gjitha analizave fiziko-kimike dhe bakteriologjike të ujit të pijshëm nga sistemi i furnizimit me ujë i Ujësjellësit Rajonal Mitrovicë, rezultatet e marra kanë treguar se të gjithë parametrat janë brenda kritereve të përcaktuara sipas legjislacionit në fuqi për ujin e pijshëm.

Bazuar në këto rezultate, uji është i sigurt dhe mund të përdoret pa asnjë kufizim për pije dhe përdorim shtëpiak.

“Ujësjellësi Rajonal Mitrovicë mbetet i përkushtuar në monitorimin e vazhdueshëm të cilësisë së ujit dhe në garantimin e shëndetit publik”, thuhet në njoftim.

Dënim i përjetshëm është kërkuar edhe sot për Millosh Pleskoviqin, i akuzuar për krime lufte në zonën e Prizrenit. Në seancën e sotme të Gjykatës së Apelit, është shqyrtuar ankesa e avokates së të akuzuarit ndaj vendimit të Gjykatës Themelore në Prishtinë, ku akuzohet për krime lufte në zonën e Prizrenit.

Kjo seancë është kryesuar nga gjyqtari Mentor Bajraktari, ndërkaq ka munguar prokurori i Apelit.

Gjyqtarja Albina Shabani Rama gjatë paraqitjes së pretendimeve të avokates së të akuzuarit, Jovana Filipoviq, ka thënë se Prokuroria e Apelit ka propozuar që të refuzohet si e pabazuar ankesa e saj.

“Prokurori i çështjes ka parashtruar përgjigje në ankesën të cilën e ka dorëzuar mbrojtje, i cili i kundërshton të gjitha pretendimet e mbrojtjes dhe i propozon Gjykatës së Apelit që ankesa e mbrojtësit të pandehurit, Millosh Pleskoviq, avokates Jovana Filipoviq të refuzohet si e pabazuar, ndërsa aktgjykimi me numër 54 2024 të Departamentit Special të Gjykatës Themelore në Prishtinë të vërtetohet. Po ashtu, edhe Prokuroria e Apelit ka propozuar që të refuzohet si e pabazuar ankesa e mbrojtëses së të akuzuarit Millosh Pleskoviq dhe të trajtohet si e bazuar përgjigja në ankesë e mbrojtësit të akuzuarit, Millosh Pleskoviq”, tha ajo.

Gjatë seancës së sotme të Gjykatës së Apelit, nëna e dy djemve binjakë të vrarë në Prizren, Mihrije Daçaj kërkoi burgim të përjetshëm për Millosh Pleskoviqin.

“Mi kanë mbytur, çfarë të bëjë, në mal kanë qenë, kanë shkuar për dru… Ne kërkojmë dënim për jetë”, ka thënë shkurt Mihrije Daçaj.

Dënim kapital kërkoi edhe avokati mbrojtës, Blend Gjini, i cili tutje theksoi se ankesa e avokates është e pabazë.

“Duke marrë parasysh se kemi të bëjmë me viktima civilë shqiptarë, të zonjës Mihrije këtu ja kanë djegur shpirtin sepse dy djemtë të rinj binjakë, kanë humbur jetën dhe janë ekzekutuar në mënyrë barbare, pasi që edhe vuajtjet dhe përjetimet janë riprodhuar në seancë, ne konsiderojmë se dënimi i shqiptuar nga gjykata e shkallës së parë është i vogël, pasi qe ligji… Ne kërkojmë nga Gjykata e Departamentit Special të Apelit qe duke i marrë parasysh këto rrethana dhe fakte, të akuzuarit t’i shqiptohet një dënim kapital…. Andaj për fund, i propozojë kolegjit të Departamentit Special për Krime lufte që të refuzohet ankesa e avokates, pasi që një ankesë e tillë është e pabazë dhe nuk korrespondon me provat e shtjelluara”, tha ai.

Avokatja e të akuzuarit, Jovana Filipoviq ka pretenduar se ky krim nuk është kryer nga i akuzuari Millosh Pleskoviq.

“Milloshi atëherë i ka pasur 19 vjet, në momentin kur ka ndodhur kjo ka qenë në mbajtje të dënimit, nuk ka qenë as zyrtar i policisë. Ai ka ardhur dhe e ka vizituar Prizrenin deri tash dhe ka publikuar fotografi në facebook-un e tij, dhe kanë komentuar shumë shqiptarë nga Prizreni, deri në moment askush nuk ka folur për të”, ka thënë ajo.

Aty nuk munguan as përplasjet. Në këtë rast dhe fjalës së avokates Jovana Filipoviq, kanë reaguar familjarët e viktimave.

Pas përplasjes së tyre, ka reaguar gjyqtari Mentor Bajraktari.

Ky i fundit ka thënë se vendimi do të merret përmes “shkallës së parë në një afat të arsyeshëm”.

Millosh Pleskoviq është dënuar me 15 vjet burgim, më 31 korrik 2025, i njëjti akuzohet për vrasjen e tre civilëve shqiptarë dhe plagosjen e disa të tjerëve gjatë luftës në Kosovë.

Prokuroria e Pejës ka konfiskuar mbi 66 automjete me vendim të prerë e  që kanë vlera të larta, ndërsa ka sekuestruar 48 automjete për të cilat pritet përfundimi i çështjeve.

Kryeprokurorja e Prokurorisë në Pejë, Lumturije Vuçetaj, në konferencën për media tregoi edhe për hetime financiare ku janë përfshi prona, e shtëpi e po ashtu përmendi edhe rastet e dhunës në familje.

“Kemi arritur rezultat të jashtëzakonshëm si për herë të parë si kryeprokurore në bashkëpunim me Policinë e  Kosovës kemi identifikuar të gjitha ato automjete që kanë qëndruar me vitet e me vite tek agresioni për administrimin e pasurisë së  konfiskuar dhe tek stacionet policore. Të gjitha këto automjete të cilat kanë përfunduar me aktgjykim të formës së prerë mirëpo nuk është vendosur në raport me objektin akuzës është vepruar dhe në një kohë rekord kemi arritur me i konfisku me vendim të formës së prerë mbi 66 automjete që kanë vlera të ndryshme dhe të larta që në shitjen dhe konfiskimin e përhershëm të tyre është arrit që këto të hyjnë në buxhetin e Republikës së Kosovës të cilat ndikojnë në zhvillimin  e shoqërisë dhe vendit tonë. 48 automjete janë sekuestruar që pritet që pas përfundimit të çështjeve të përfundojnë dhe këto varësisht prej rrjedhjes, me konfiskim apo edhe me procedurë tjetër. Ju njoftoj se veç këtyre procedurave Prokuroria në Pejë ka zbatuar dhe dispozitat ligjore të ligjit për kompetencat e zgjeruar të  konfiskimit, ku kem bërë hetim financiar për të gjitha rastet aty ku ka vend dhe kemi ngirë, kufizuar, patundshmëri mbi 5 prona të patundshme, po ashtu mbi 3 shtëpi dhe llogari bankare”, tregoi Vuçetaj.

Ajo përmendi edhe rastet e dhunës në familje.

“Kjo prokurori ka pranuar 353 lënë në kontekst të dhunës në familje dhe ka përfunduar 309 lëndë. Kjo tregon që rritja e numrit të lëndëve rezulton me ngritjen e vetëdijes së qytetarëve dhe të raportojnë të gjitha rastet. Besimin që kanë treguar në polici dhe në prokuroi. Të gjitha këto raste janë hetuar dhe provuar para gjykatës ku kemi arritur në këtë  fazë të procedurës aktgjykime dënuese. 155 që i bijën 70 për qind të rasteve komplete. Si prokurori për të ngritur vetëdijen e qytetarëve dhe mos të mbetet dhuna në familje dhe të luftohet brenda katër mureve kemi pasë takime të shumta me Policinë e Kosovës duke avancuar hetimin dhe duke nxjerrë konkluzionin mbi bazën e të cilit duhet vepruar dhe në këtë drejtim takimet tona të shumta që janë bërë publike kanë rezultuar me ngritjen e rasteve të dhunës në familje”, tregoi Vuçetaj.