Blog

Numri i të vdekurve nga protestat në Iran ka arritur në 2.403, njoftoi HRANA, grupi për të drejtat e njeriut me seli në Shtetet e Bashkuara (SHBA).

Ky numër po vazhdon të rritet sepse udhëheqësit klerikë të Republikës Islamike po bëjnë përpjekje për ta shtypur valën më të madhe të protestave antiqeveritare ndër vite, duke nxitur kërcënime për ndërhyrje nga SHBA-ja.

Presidenti amerikan, Donald Trump, u bëri thirrje iranianëve t’i vazhdojnë protestat, duke iu premtuar se do t’iu dalë në ndihmë.

HRANA tha të mërkurën vonë se deri më tani e ka verifikuar vdekjet e 2.403 protestuesve, 147 individëve të lidhur me Qeverinë, 12 personave nën moshën 18-vjeçare dhe nëntë civilëve që nuk kanë marrë pjesë në protesta.

Një zyrtar iranian tha të martën se rreth 2.000 njerëz janë vrarë. Kjo ishte hera e parë që autoritetet japin një shifër të përgjithshme të viktimave nga trazira mbarëkombëtare mbi dyjavore.

“Ndihma po vjen”
I pyetur se çfarë nënkuptonte kur tha se “ndihma po vjen”, Trump u tha gazetarëve se ata do të duhej ta kuptonin vetë.

Trump ka deklaruar se veprimi ushtarak është ndër mundësitë që është duke i shqyrtuar për ta ndëshkuar Iranin për shtypjen e protestave.

Në një intervistë për CBS Neës, Trump tha se SHBA-ja do të ndërmarrë “veprime shumë të forta” në Iran, nëse regjimi fillon t’i varë protestuesit.

“Nuk duam që ajo që po ndodh në Iran të vazhdojë”, tha ai. “Nuk do të përfundojë mirë”.

Ai shtoi se administrata po pret një konfirmim zyrtar të numrit të protestuesve të vrarë nga forcat iraniane të sigurisë.

Trump shpalli tarifa importi prej 25 për qind për produktet nga çdo vend që bën tregti me Iranin – i cili është eksportues i madh i naftës.

Kina, e cila blen pjesën më të madhe të eksporteve të naftës së Iranit, e kritikoi menjëherë këtë veprim.

Në një bisedë telefonike të shtunën, kryeministri izraelit, Benjamin Netanyahu, dhe sekretari amerikan i Shtetit, Marco Rubio, diskutuan mundësinë e ndërhyrjes së SHBA-së në Iran, sipas një burimi izraelit të pranishëm në bisedë, raporton Reuters.

Irani u zotua se do të kundërpërgjigjej ndaj çdo sulmi duke goditur Izraelin dhe bazat e anijet amerikane.

Trazirat, të nxitura nga kushtet e rënda ekonomike, kanë paraqitur sfidën më të madhe të brendshme për udhëheqësit iranianë për të paktën tre vjet dhe kanë ndodhur në një kohë presioni ndërkombëtar në rritje ndaj Iranit për programet e tij bërthamore dhe të raketave balistike./REL

Ushtria izraelite ka sulmuar zonat perëndimore të qytetit të Rafahut dhe lagjet veriore të qytetit mëngjesin e kësaj të mërkure, duke bërë që të shkelë të armëpushimi.

Nga sulmet janë prekur zonat veriore të kampit të refugjatëve Bureij në Gazën qendrore gjatë orëve të para të mëngjesit të sotëm.

Deri më tani nuk janë raportuar viktima apo të plagosur palestinezë.

Nga ana e saj ushtria izraelite njoftoi të martën vonë se dy palestinezë u vranë në atë që ajo e përshkroi si shkëmbim zjarri në Rafah.

Që nga shpallja e armëpushimit midis Izraelit dhe Hamasit më 10 tetor 2025, Izraeli ka vrarë më shumë se 400 palestinezë.

Izraeli ka vazhduar gjithashtu të shkelë rezolutën e Këshillit të Sigurimit të OKB-së të miratuar në nëntor të vitit 2025, e cila kërkon armëpushim të përhershëm dhe gjithëpërfshirës në Gazë, dorëzim të pandërprerë të ndihmës humanitare dhe rindërtimin e territorit.

Ushtria izraelite ka shkaktuar më shumë se 71 mijë viktima, shumica gra dhe fëmijë, dhe ka plagosur mbi 171 mijë të tjerë në një ofensivë brutale që nga tetori i vitit 2023, duke e lënë Gazën në rrënoja, transmeton Anadolu Agency.

Sulmet e fundit vijnë mes akuzave të ndërsjella për shkelje të armëpushimit, i cili u ndërmjetësua nga SHBA dhe u zbatua në faza, duke përfshirë shkëmbimin e pengjeve, rritjen e ndihmës dhe hapjen e kalimit Rafah – por shumë kushte mbeten të paplotësuara.

Palestinezët akuzojnë Izraelin për shkelje sistematike që pengojnë rindërtimin dhe ndihmën, ndërsa Izraeli pretendon se vepron kundër kërcënimeve të Hamasit që shkelin marrëveshjen.

I dërguari i posaçëm i Bashkimit Evropian për dialogun mes Kosovës dhe Serbisë, Peter Sorensen, ka përfunduar takimin me Kryeministrin në detyrë, Albin Kurti, ku pas këtij takimi është takuar me Presidenten, Vjosa Osmani.

Kjo do të jetë vizita e parë e Soresen që kur iu vazhdua mandati edhe për dy vjet të tjera si i dërguar për dialogun mbi normalizimin e marrëdhënieve ndërmjet dy vendeve fqinje.

Po ashtu, gjatë mandatit të parë, i dërguari i BE-së zhvilloi vetëm dy takime në nivel kryenegociatorësh, të cilat nuk dhanë fryt.

Të paktën 22 persona kanë humbur jetën dhe 79 të tjerë janë plagosur pasi një vinç ndërtimi u shemb mbi një vagon treni në lëvizje në Tajlandë. Tetë nga të plagosurit ndodhen në gjendje të rëndë shëndetësore.

Sipas Hekurudhave Shtetërore të Tajlandës, në tren ndodheshin gjithsej 195 pasagjerë dhe anëtarë të stafit, bazuar në planin e ulëseve. Aksidenti ndodhi mëngjesin e kësaj të mërkure në provincën Nakhon Ratchasima, në veri të kryeqytetit Bangkok.

Vinçi ishte duke punuar në një projekt hekurudhor me shpejtësi të mesme kur u shemb, duke goditur një vagon treni. Si pasojë, vagoni doli nga shinat dhe mori flakë për një kohë të shkurtër.

Autoritetet paralajmërojnë se bilanci i viktimave mund të rritet, pasi ekipet e shpëtimit vijojnë operacionet për nxjerrjen e trupave nga vagoni i rrënuar.

Zëvendëskryeministri dhe ministri i Transportit i Tajlandës, Phipat Ratchakitprakarn, ka urdhëruar një “hetim të plotë dhe gjithëpërfshirës” për të zbardhur shkaqet e aksidentit. Ai bëri të ditur se po verifikohen identitetet e viktimave dhe se të plagosurit po monitorohen nga afër. Sipas tij, familjet e viktimave do të kompensohen, nëse të ndjerit rezultojnë të kenë qenë punonjës të hekurudhës.

Guvernatori i Hekurudhave Shtetërore të Tajlandës është thirrur gjithashtu për të zhvilluar një hetim të detajuar mbi ngjarjen.