Blog

Endrit Nika, i akuzuar se ka hedhur nga kati i gjashtë të një hoteli në Fushë-Kosovë të dashurën e tij argjentinase, sot më 22.01.2026 ka dhënë versionin e tij lidhur me këtë ngjarje.

Endrit Nika nga Prokuroria akuzohet se pas një mosmarrëveshjeje paraprake me të dashurën e tij M.K.U., me dashje që ta privojë nga jeta, e kishte nxjerrë kornizën e dritares duke e hedhur tanimë të ndjerën nga dritarja e dhomës së hotelit nga kati i gjashtë, me ç’rast viktima kishte pësuar lëndime të rënda trupore dhe, përkundër trajtimit mjekësor, ajo kishte ndërruar jetë në QKUK.

I akuzuari Endrit Nika tha se tani të ndjerën për herë të parë e kishte takuar në Barcelonë gjatë kohës sa ai kishte qenë në pushime me shoqërinë e tij.

Ai tha se kur kishte takuar tani të ndjerën për herë të parë, ai ishte ndjerë sikur e kishte takuar shpirtin binjak.

Ai tha se disa herë kishte shkuar në Barcelonë për ta takuar tani të ndjerën, dhe pas 1 muaji e gjysmë që ishin njoftuar e ndjera kishte shkuar te ai në Zvicër për të bashkëjetuar më të.

Sipas Nikës, raporti i tij dhe tani të ndjerës kishte qenë shumë i mirë, dhe ata verën e vitit 2023 kishin ardhur bashkë në Kosovë për dasmën e vëllait të tij.

Ai raportet mes tij dhe tani të ndjerës i përshkroi si shumë të mira, ndërsa tha se në ditën kritike, konflikti mes tyre kishte filluar për shkak të xhelozisë së të ndjerës.

Ai tha se pas ahengut që kishte qenë në shtëpinë e tyre në Gllanasellë ata ishin nisur për të shkuar në hotelin ku kishin qëndruar në Fushë-Kosovë.

Nika tha se kur kishin mbërritur në parking para hotelit në Fushë-Kosovë tanimë e ndjera në veturë ia kishte derdhur një pije në kokë.

I akuzuari tha sa pas kësaj ishte munduar t’ia heqë nga dora pijen dhe të dytë kishin dalë nga vetura. Sipas Nikës tashmë e ndjera gjatë kohës kur kishin dalë nga vetura e kishte ofenduar, dhe më pas ai e kishte shtyrë me derë.

Tutje, Nika tha se pasi kanë shkuar në dhomë ai i kishte thënë të ndjerës që të qëndrojë në hotel ndërsa ai dëshiron të shkojë në shtëpinë e tij në Gllanasellë, por ai tha se tashmë e ndjera i kishte thënë të qëndrojnë bashkë.

I akuzuari tha se në momentin kritik kur ka ndodhur ngjarja ai kishte qenë në korridor, dhe tha se e kishte dëgjuar një zhurmë dhe pasi ishte kthyer në dhomë e kishte parë që xhami statik dhe tashmë e ndjera nuk janë.

“U nisa me marrë ni maicë dhe para derës së hymjes e nijta një zhurmë, tri zhurma kenë si me gjujtë najsen në tokë dhe u nal, s’u ni kurrgjë në dhomë. U ktheva prapë edhe e pash që xhami statik nuk është aty mo, nuk ishte në vendin e vet, pastaj e hapa një dritare këqyra poshtë dhe e pash që Clara është në tokë, ka ra”- deklaroi i akuzuari.

Pas kësaj i akuzuari tha se ka pësuar atak paniku.

“Prej atyshit m’kapi panika, ia nisi frymëmarrja dhe pisikita dy-tri herë: “Clara, Clara, Clara” dhe sapo e mbledha forcën u ula në krevat se m’u dok krejt si film, si andërr e keqe se qaty ke deri sa e mblodha veten”- tha i akuzuari.

Tutje, i akuzuari tha se ishte nisur për të shkuar poshtë te tani e ndjera.

“Shkova te Clara edhe aty shkova iu afrova ngat edhe do ujë ia qitsha mbi kry se e dijsha që s’guxoj me e prekë, tani unë fola me Clarën, m’tha: Thuju prindërve të mi se ju dua, edhe unë i thash: O zemër vet ki me ju thanë, veç mbledhe veten, bonu e fortë”- tha i akuzuari.

Nika tha se ai i ishte drejtuar recepsionistes së hotelit duke i thënë se si është e mundur që të shkëputet xhami statik dhe të bjerë një njeri.

Ai tha se në momentin kur ishte arrestuar nga Policia kishte qenë shumë i shqetësuar për gjendjen e tani të ndjerës.

Paraprakisht në seancën e sotme në cilësi të dëshmitares është dëgjuar doktoresha Blerina Gashi, e cila kishte qenë doktoresha në ekipin e urgjencës që kishte shkuar të vendi i ngjarjes për t’i ofruar ndihmë tani të ndjerës.

Ajo tha se më të pranuar telefonatën ajo bashkë me dy infermiere dhe me shoferin e autoambulancës ishin nisur për të shkuar te vendi i ngjarjes.

Gashi tha se kur kishte arritur ajo me ekipin e urgjencës në vendin e ngjarjes tani e ndjera kishte qenë në parking anash një veture e shtrirë dhe përreth saj kishte pasur xhama të thyer.

Ajo tha se kur ishte afruar te tani e ndjera ajo kishte pasur vetëdije, dhe pasi e kishin vendosur në autoambulancë ajo i kishte bërë disa pyetje tani të ndjerës.

“Gjatë rrugës kam biseduar me të ndjerën fillmisht e kam pyetur për emër dhe mbiemër në gjuhën angleze dhe më është përgjigjur, e kam pyetut sa vjet i ka, pas këtyre dy pyetjeve e kam pyetur se a ke dashtë me u hedh vetë? Më është përgjigjë veç me “jo” në gjuhën angleze. E kam pyetur pastaj: Atë ka shtyrë dikush? Prapë më është përgjigjur me: “Jo”” – tha dëshmitarja.

Ajo tha se veprimet e tyre kanë qenë monitorimi vazhdimisht në frymëmarrjen e viktimës dhe se a ka puls në mënyrë të vazhdueshme.

Dëshmitarja tha se nuk i kujtohet se çka i kanë dhënë si medikamente tani të ndjerës gjatë kohës sa kanë qenë në autoambulancë.

“Nuk më kujtohet se a i kam dhanë diçka, urdhëri ka qenë i tillë nëse gjindet vija venoze,.. I kam urdhëruar infermieret që të gjendet vija venoze të vendoset kanilla me medikamente, sipas protokollit i jepim tramadoll dhe metokloparmil,.. Nuk më kujtohet a është vendosë a jo diçka urdhrat kanë qenë po tani nuk po më kujtohet” – deklaroi dëshmitarja.

Ajo tha se pasi tani të ndjerën e kanë dërguar në Qendrën Emergjente në Prishtinë, e ka shkruar raportin dhe më pas janë larguar.

Ajo tha se ka menduar se do të thirret nga Policia apo nga Prokuroria që të japë dëshmi lidhur me rastin por meqë nuk ishte thirrur për këtë arsye nuk kishte shkuar që të japë dëshmi në mënyrë vullnetare lidhur me rastin

Trupi gjykues refuzoi propozimin e mbrojtjes për dëgjimin e dy infermiereve që kishin qenë me doktoreshën Blerina Gashi në ekipin e urgjencës me arsyetimin se dëshmitarja Blerina Gashi i ka dhënë të gjitha përgjigjjet.

Me propozim të prokurorit Armend Hamiti, seanca e sotme (22.01.2026) u ndërpre dhe e radhës u caktua për në muajin shkurt 2026, ku i akuzuari Endrit Nika pritet të vazhdojë mbrojtjen e tij.

Aktakuza në këtë rast po përfaqësohet nga prokurori Armend Hamiti.

Kjo çështje është duke u trajtuar në Departamentin e Krimeve të Rënda nga trupi gjykues i përbërë nga Gazmend Bahtiri (kryetar i trupit gjykues) dhe dy anëtarët, Gëzim Ademi dhe Alltëne Murseli.

DOSJA E PROKURORISË

Sipas aktakuzës së datës 11.02.2025, i pandehuri Endrit Nika po akuzohet se më 01.08.2023 në Fushë-Kosovë, në hotel “Sonoma”, pas një mosmarrëveshjeje paraprake me të dashurën e tij, tani të ndjerën M.K.U., paraprakisht e godet në vazhdimësi dhe tenton ta shkelë me veturë te parkingu jashtë hotelit, dhe pasi që hynë në hotelin – dhomën ku ishin duke qëndruar, i pandehuri Endrit Nika me dashje që ta privojë nga jeta tani të ndjerën ka vazhduar përleshjen dhe goditjet ndaj të dëmtuarës, duke e dërguar në qoshe të dhomës nga ku nuk ka pasur mundësi të largohet e dëmtuara dhe nga goditjet dhe shtyrjet që i ka bërë tani të ndjerës i pandehuri Nika e ka nxjerrë kornizën e dritares duke e hedhur nga dritarja e dhomës së hotelit nga kati i gjashtë, me ç’rast tani e ndjera M.K.U. ka pësuar lëndime të rënda trupore dhe përkundër trajtimit mjekësor e njëjta ka ndërruar jetë në QKUK.

Andaj për shkak veprimeve të lartpërmendura Endrit Nika nga Prokuroria po akuzohet se ka kryer veprën penale – vrasje e rëndë, raporton Kallxo.

Shërbimi i Kërkim-Shpëtimit Malor i Kosovës (ShKShMK) ka njoftuar për rrezik të shtuar nga ortekët në zonën e Brezovicës, pas raportimit të një aksidenti orteku të ndodhur sot në një zonë jashtë shtegut të rregulluar.

Sipas njoftimit, orteku është iniciuar nga disa skitarë, por fatmirësisht personat e përfshirë kanë shpëtuar pa lëndime trupore.

ShKShMK bën të ditur se më 18 janar 2026, gjatë kontrollimit të shtresave të borës në zonën e Brezovicës, teknikët e kërkim-shpëtimit kanë identifikuar dy shtresa problematike të borës.

Shtresa më shqetësuese, sipas tyre, është ajo bazë mbi vegjetacion, e njohur si “Ground-based Persistent Weak Layer – Depth Hoar”.

Si pasojë e reshjeve të fundit të borës, të shoqëruara me erëra të forta nga juglindja, janë krijuar akumulime të shtresave të konsoliduara të borës, të cilat kanë rritur peshën dhe presionin mbi shtresat e dobëta ekzistuese. Bazuar në vlerësimin aktual, ky kombinim faktorësh ka krijuar kushte të pafavorshme dhe rrezik të shtuar për ortekë.

Shërbimi i Kërkim-Shpëtimit Malor apelon për kujdes maksimal gjatë skijimit dhe aktiviteteve bjeshkatare, veçanërisht në faqet veriore, duke theksuar se rreziku nuk përjashtohet as në orientime dhe pozita të tjera gjeografike.

Qytetarëve u rekomandohet që të shmangin lëvizjet jashtë shtigjeve të sigurta, të informohen paraprakisht për kushtet e borës dhe motit, të përdorin pajisje adekuate të sigurisë dhe të mos veprojnë individualisht në terrene të rrezikshme.

Kompania Rajonale e Mbeturinave“Pastrimi” ka njoftuar qytetarët dhe bizneset e Prishtinës se ka filluar zbatimin e çmimores së re për shërbimin e grumbullimit dhe transportit të mbeturinave komunale.

Sipas dokumentit zyrtar të çmimores, tarifa për amvisëritë rezidente është përcaktuar në 5.56 euro në muaj pa TVSH, respektivisht 6.20 euro në muaj me TVSH 8%, ndërsa për amvisëritë jorezidente tarifa vjetore arrin në 17.8 euro me TVSH.

Çmimorja parasheh tarifa të diferencuara edhe për bizneset, varësisht nga madhësia, zona dhe kostoja e shërbimit.

Për dyqanet e vogla dhe bizneset artizanale, tarifa mujore në zonat urbane është 8.4 euro me TVSH, ndërsa në zonat rurale 6 euro me TVSH.

Për bizneset e mesme dhe të mëdha, çmimet mujore në zonat urbane variojnë nga 15 euro deri në 30 euro me TVSH, në varësi të kostos së shërbimit, ndërsa në zonat rurale nga 8.4 deri në 18 euro me TVSH.

Sot në Kosovë pritet të mbajë mot me diell dhe vranësira lokale. Rrallë në disa zona priten reshje të dobëta kryesisht në formë të ndonjë rigë të dobët shiu në mëngjes apo në mbrëmje. Temperaturat pritet të lëvizin nga -2 minimalja deri në 11 gradë Celsius ajo maksimale.

Në Shqipëri, Maqedoninë Veriore, Luginë të Preshevës dhe Mal të Zi e premtja sjellë mot me diell dhe vranësira e rrallë në disa rajone mund të ketë reshje shiu. Temperaturat do të shënojnë rritje në nivel rajonal.

Fundjava sipas ecurive më të fundit sinoptike pritet të karakterizohet me mot mjaft të ndryshueshëm, me vranësira, intervale kohore me diell dhe reshje të shpeshta lokale shiu. Do të ketë edhe periudha të gjata pa reshje, por priten reshje të herëpashershme të karakterit lokal.

Temperaturat pa ndonjë ndryshim, por intensifikim të reshjeve e rrebesheve të shiut presim mbrëmjen e së dielës./MeteoBallkan

Kanë diplomuar 21 zjarrfikës të rinj të cilët përfunduan me sukses trajnimin profesional.

Në këtë ceremoni mori pjesë edhe ministri në detyrë i Punëve të Brendshme Xhelal Sveçla dhe Sekretari i Përgjithshëm Genc Metaj.

Ky trajnim i ndarë në 9 module për 20 javë, u ofroi kadetëve mundësinë fitimit të njohurive të avancuara dhe aftësi konkrete për reagim të shpejtë dhe efikas në raste emergjencash, parandalimin dhe menaxhimin e zjarreve, si dhe për ndërhyrje profesionale në mbrojtje të jetës njerëzore, pronës dhe mjedisit.

Qëllimi kryesor i këtij trajnimi ka qenë ngritja e kapaciteteve profesionale të zjarrfikësve, duke i pajisur ata me kompetencat e nevojshme për t’u përballur me sfidat bashkëkohore të sigurisë, të cilat po bëhen gjithnjë e më komplekse, thuhet nga MPB.

Me rastin e përfundimit me sukses të këtij trajnimi, Ministri Sveçla falënderoi të gjithë instruktorët dhe trajnerët të cilët kanë ndarë dijen dhe përvojën e tyre duke kontribuar drejtpërdrejtë në formimin profesional të këtyre zjarrfikësve. Po ashtu, Ministri Sveçla falënderoi edhe partnerët tanë ndërkombëtar që kanë kontribuar në këtë projekt.

Instituti Kombëtar i Shëndetësisë Publike të Kosovës (IKSHPK) ka reaguar ndaj përhapjes së informatave të pasakta mbi vaksinimin, duke theksuar se vaksina MMR (Fruth–Parotit–Rubellë) nuk shkakton autizëm dhe se kjo është e vërtetuar shkencërisht.

Sipas IKSHPK-së, vaksinimi ka qenë për dekada një nga masat më të suksesshme të shëndetit publik në Kosovë. Falë vaksinimit të rregullt sipas Kalendarit të Vaksinimit, sot fëmijët nuk sëmuren më nga shumë sëmundje që dikur ishin të shpeshta dhe shpesh fatale. Poliomieliti është eliminuar, difteria dhe tetanusi janë bërë shumë të rralla, ndërsa rubella e lindur – që shkaktonte verbëri dhe dëmtime të rënda – është parandaluar me sukses.

Instituti thekson se edhe fruthi, i cili dikur ishte shkaktar i shpeshtë i hospitalizimeve dhe vdekjeve te fëmijët, është vënë nën kontroll falë vaksinës MMR. Megjithatë, viteve të fundit janë përhapur pretendime të pabazuara se kjo vaksinë lidhet me autizmin, pretendime që, sipas IKSHPK-së, nuk qëndrojnë.

“Kjo është konfirmuar nga Organizata Botërore e Shëndetësisë (OBSH), Qendra Amerikane për Kontroll dhe Parandalim të Sëmundjeve (CDC), Agjencia Evropiane e Barnave (EMA), si dhe nga studime të shumta ndërkombëtare që kanë përfshirë miliona fëmijë,” thuhet në njoftim.

IKSHPK paralajmëron se rreziku më i madh për shëndetin e fëmijëve vjen nga mosvaksinimi, pasi fruthi nuk është sëmundje e lehtë dhe mund të shkaktojë komplikime serioze, përfshirë infeksione të mushkërive, dëmtime të trurit dhe, në raste të rënda, edhe humbje jete.

Në fund, Instituti u bën thirrje prindërve që të informohen nga profesionistët shëndetësorë, duke i konsideruar ata burimin kryesor dhe më të besueshëm të informatave për vaksinimin dhe rëndësinë e tij në mbrojtjen e shëndetit të fëmijëve.