Blog

Policia e Kosovës ka shpallur në kërkim Liridon Hajdar Podrimjën nga Gjakova.

Sipas Policisë, i njëjti konsiderohet person i rrezikshëm dhe dyshohet se mund të posedojë armë, shkruan Reporteri.net.

Ai kërkohet për veprat penale: ‘kanosje (ndaj personit zyrtar)’, ‘mbajtje në pronësi, kontroll ose posedim të paautorizuar të armëve’, ‘posedim i paautorizuar i narkotikëve, substancave psikotrope ose analoge’ dhe aktualisht gjendet në arrati.

“Policia e Kosovës fton të gjithë qytetarët që, nëse kanë ndonjë informacion që mund të ndihmojë në lokalizimin e tij, ta njoftojnë Policinë përmes numrit 192, adresës elektronike [email protected], aplikacionit “Lajmëro Policinë”, apo në stacionin policor më të afërt. Të gjitha informacionet do të trajtohen me konfidencialitet të plotë”, thuhet në kërkesë.

Mbrojtja e ish-krerëve të Ushtrisë Çlirimtare të Kosovës po vazhdon deklaratën përmbyllëse në gjykimin në Gjykatën Speciale në Hagë.

Rodney Dixon, avokat i Kadri Veselit, po vazhdon me deklaratën përmbyllëse, duke thënë se Zyra e Prokurorit të Specializuar po bazohen “thjesht në informacionet e dorës së dytë, thashetheme dhe dëshmi të pavërtetuara”.

Në dy ditët e para, prokurorë të Prokurorisë së Specializuar thanë deklaratën përmbyllëse të organit të akuzës. Deklaratën përmbyllëse e dha dje edhe Mbrojtësi i Viktimave. Nga dje, avokatët e Hashim Thaçit, Kadri Veselit, Rexhep Selimit dhe Jakup Krasniqit nisën t’i jepnin deklaratat e tyre përmbyllëse.

Prokuroria e Specializuar ka kërkuar 45 vjet burgim për secilin prej ish-krerëve të UÇK-së.

Pasi të jepen të gjitha deklaratat përmbyllëse, që parashihet të kryhen deri më 18 shkurt, çështja do t’i kalojë trupit gjykues, që ka tre muaj kohë për shpalljen e një aktgjykimi.

Thaçi, Veseli, Selimi e Krasniqi po qëndrojnë në paraburgimin e Gjykatës Speciale në Hagë prej fillimit të nëntorit të vitit 2020, të akuzuar për krime lufte dhe krime kundër njerëzimit. Prokuroria e Specializuar i akuzon ata se kanë qenë ose duhej të ishin në dijeni të këtyre krimeve.

Deputetja e Republikës së Kosovës, Duda Balje, ka reaguar pasi nuk mundi të hyjë në qeverinë “Kurti 3”.

Balje, përmes një postimi në facebook ka ironizuar duke ju thënë mirëmëngjes vetëm atyre që e dinë se karakteri dhe parimet tregohen në jetë, në punë dhe në treg.

“Mirëmëngjes atyre që e dinë se karakteri dhe parimet tregohen në jetë, në punë dhe në treg. Dhe atyre që nuk e dinë këtë – qoftë kafeja pa sheqer”, ka shkruar Balje.

Drama gjyqësore në Hollywood mes Justin Baldoni dhe Blake Lively po shkon zyrtarisht drejt një gjyqi të madh civil, pasi negociatat për marrëveshje jashtë gjykate dështuan këtë javë, konfirmoi avokati i Baldoni-t.

Gjatë një seance të mbyllur në një gjykatë federale në New York, të dyja palët kaluan orë të tëra duke u përpjekur të arrinin një marrëveshje, por pa sukses. Avokati i Baldoni-t, Bryan Freedman, deklaroi publikisht se përpjekjet ishin “të pasuksesshme” dhe la të kuptohet se çështja do të vazhdojë drejt gjyqit këtë pranverë.

Padia lidhet me akuzat e Blake Lively për ngacmim seksual dhe hakmarrje në sheshxhirimin e filmit të vitit 2024 “It Ends With Us”. Lively kërkon më shumë se 160 milionë dollarë dëmshpërblim, ndërsa ekipi i saj ka paraqitur dokumente dhe prova mbështetëse. Baldoni i ka mohuar akuzat dhe mban qëndrimin e tij mbrojtës, megjithëse një kundërpadi që ai kishte paraqitur më herët është hedhur poshtë.

Të dy aktorët u paraqitën në gjykatë gjatë seancës për marrëveshje, me një gjyqtar që u përpoq të inkurajonte zgjidhjen jashtë gjykate, por pa rezultat. Aktualisht, çështja pritet të shqyrtohet para një gjyqtari dhe potencialisht një jurie në maj 2026, një datë që tashmë po afrohet pas muajsh përplasjesh ligjore.

Përballja publike mes dy yjeve që më parë kishin një marrëdhënie profesionale, ka tërhequr vëmendje të madhe mediatike, duke nxitur debat mbi sjelljen në vendin e punës dhe dinamikat e pushtetit në industrinë e filmit.

Sot, me fillim në ora 17:00, Aleanca për Ardhmërinë e Kosovës mban mbledhjen e Këshillit të Përgjithshëm.

Rendi i ditës është shpallja e zgjedhjeve të brendshme të rregullta në AAK.

Takimi mbahet në selinë qendrore të AAK-së në Prishtinë.

Gjashtëmbëdhjetë kandidatë për deputetë nga Lëvizja Vetëvendosje do të përfshihen në grupin parlamentar dhe do të “fitojnë” ulëse në Kuvendin e Kosovës, pasi po kaq deputetë të kësaj partie u bënë pjesë e Qeverisë Kurti 3 që u zgjodh mbrëmë.

LVV ka 57 ulëse në Kuvend, aty ku do të marrin mandat edhe 16 kandidatët që u renditën jashtë 57-shes së parë në rezultatet e zgjedhjeve parlamentare të 28 dhjetorit.

Deputetët që pritet të bëhen deputetë: Egzon Azemi, Fahrush Rexhepi, Bajram Mavriqi, Luan Aliu, Driton Hyseni, Enver Dugolli, Arijeta Rexhepi, Shqipe Isufi, Afërdita Hajrizi, Ejup Ahmeti, Avdullah Klinaku, Mytaher Haskuka, Bylbyl Sokoli, Ilir Qeriqi, Mimoza Shala dhe Agon Batusha.

Këto do t’i zëvendësojnë ata që tashmë u bënë pjesë e qeverisë: Kryeministrin Albin Kurti Kurti dhe ministrat Glauk Konjufca, Albulena Haxhiu, Hekuran Murati, Donika Gërvalla, Xhelal Sveçla, Hajrulla Çeku, Mimoza Kusari-Lila, Ejup Maqedonci, Andin Hoti, Arben Vitia, Saranda Bogujevci, Armend Muja, Fitore Pacolli, Artane Rizvanolli dhe Dimal Basha.

Nën masa të rrepta sigurie, të dyshuarit Haki Bela, Edmond Lika, Rilind Murati, Shkëlqim Kuka, Diamant Gashi dhe Vatan Çakaper janë sjellë sot në Gjykatën Themelore në Ferizaj, lidhur me vrasjen e rreshterit policor Muhamed Lika.

Seanca ka filluar nga ora 09:00, ndërsa prezente është edhe bashkëshortja e viktimës.

Sipas aktakuzës, më 1 prill 2025, rreth orës 23:00, në Kaçanik, afër vendbanimit të viktimës, të pandehurit, në bashkëkryerje me të miturin Rejan Bela (i cili nuk është prezent pasi ishte i mitur gjatë kohës së ngjarjes), kanë privuar nga jeta rreshterin Muhamed Lika me armë zjarri. Pas ngjarjes, ata janë larguar nga vendi i krimit.

Të akuzuarit Haki Bela, Edmond Lika, Rilind Murati, Shkëlqim Kuka, Diamant Gashi dhe Vatan Çakaper kanë deklaruar para trupit gjykues se janë të pafajshëm për vrasjen e rreshterit policor Muhamed Lika në Kaçanik.

Në seancën fillestare që po mbahet në Gjykatën Themelore të Ferizajt, ata thanë se kanë kuptuar natyrën e aktakuzës dhe mohuan çdo përgjegjësi për vrasjen e rreshterit policor.

Kanë mbërritur në Portin e Durrësit trupat e pajetë të katër anëtarëve të familjes Kola, të cilët humbën jetën tragjikisht në Itali si pasojë e helmimit nga monoksidi i karbonit, pas një rrjedhjeje gazi në banesën e tyre.

Familjarë, të afërm dhe miq ishin të pranishëm për të pritur kortezhin mortor, në një atmosferë të rënduar nga dhimbja dhe emocionet. Pamjet nga porti dëshmuan trishtimin e thellë për humbjen e një familjeje të tërë nga fshati Grysh i Madh i Peqinit, ngjarje që ka tronditur opinionin publik në Shqipëri.

Sipas raportimeve edhe nga mediat italiane, dyshohet se rrjedhja e gazit dhe prania e monoksidit të karbonit, një gaz pa ngjyrë dhe pa erë, ka shkaktuar asfiksinë fatale. Ngjarja ka ngritur shqetësime për sigurinë në banesa dhe nevojën për instalimin e pajisjeve detektuese të monoksidit të karbonit, të cilat konsiderohen thelbësore për parandalimin e rasteve të tilla tragjike.

Ndërkohë ceremonia mortore për familjen Kola pritet të zhvillohen në Shqipëri, raporton A2.