Blog

Qeveria në detyrë e Kosovës ka mbajtur mbledhjen e rregullt, ku janë ka miratuar 12 vendime.

Sipas njoftimit, në mesin e vendimeve, ekzekutivi ka ndarë mjete financiare në shumën prej 9,480.00 euro për mbështetjen e realizimit të programit “OringinAL”, i cili promovon Republikën e Kosovës në nivel ndërkombëtar përmes forcimit të imazhit pozitiv të Republikës së Kosovës, promovimin e potencialit të saj turistik, kulturor dhe zhvillimor, si dhe në zgjerimin e bashkëpunimit me diasporën në funksion të zhvillimit afatgjatë të vendit.

Gjithashtu, është themeluar Këshilli Kombëtar i Arteve, i cili konsiderohet një mekanizëm i rëndësishëm institucional që do të forcojë zhvillimin e politikave publike në fushën e artit dhe kulturës, duke garantuar profesionalizëm, pavarësi dhe përfaqësim të denjë të komunitetit artistik.

Pos tjerash, qeveria tha se ka miratuar vendimin për ndryshimin dhe plotësimin e Vendimit të Qeverisë Nr. 05/16, të datës 30 prill 2026, përmes të cilit Ministria e Shëndetësisë do të mbështesë financiarisht vetëm specializantet lehona, të cilat janë kthyer nga pushimi i lehonisë dhe, si pasojë e ndërprerjes së vijimit të programit specialistik gjatë kësaj periudhe, nuk i kanë përfunduar modulet/ciklet e trajnimit specialistik të parapara sipas programit të specializimit, për periudhën nga 1 nëntor 2025 deri më 31 dhjetor 2026.

Këto janë të gjitha vendimet e mbledhjes së sotme:

Miratuar Rregulloren për Zhvillimin e Procedurave të Rekrutimit për Zjarrfikës, e cila përcakton rregullat dhe procedurat për pranimin e zjarrfikësit në Njësitë Profesionale të Zjarrfikjes dhe Shpëtimit, në pajtim me parimet themelore të përcaktuara në Ligjin Nr. 08/L-197 për Zyrtar Publikë.

Miratuar vendimin për qiradhënie për sipërfaqen prej 61402.9 m², Zona Kadastrale Raçak, Komuna Shtime, sipas kërkesës nga Agjencia Pyjore e Kosovës/Ministria e Bujqësisë, Pylltarisë dhe Zhvillimit Rural, në kohëzgjatje prej 15 vite për nxjerrjen dhe shfrytëzimin e gurit gëlqeror.

Miratuar vendimin për dhënien në shfrytëzim të hapësirës prej rreth 30 ari, nga parcela kadastrale e cila është në pronësi të Agjencisë Pyjore të Kosovës — Ndërmarrja e Pyjeve në Prizren, për Ministrinë e Drejtësisë. Dhënia në shfrytëzim e kësaj prone Ministrisë së Drejtësisë do të kontribuojë në krijimin e kushteve të përshtatshme infrastrukturore për realizimin e nevojave institucionale të kësaj ministrie, në forcimin e bashkëpunimit ndërinstitucional dhe në racionalizimin e kostove operative.

Miratuar vendimin për ndryshimin dhe plotësimin e Vendimit të Qeverisë Nr. 05/16, të datës 30 prill 2026, përmes të cilit Ministria e Shëndetësisë do të mbështesë financiarisht vetëm specializantet lehona, të cilat janë kthyer nga pushimi i lehonisë dhe, si pasojë e ndërprerjes së vijimit të programit specialistik gjatë kësaj periudhe, nuk i kanë përfunduar modulet/ciklet e trajnimit specialistik të parapara sipas programit të specializimit, për periudhën nga 1 nëntor 2025 deri më 31 dhjetor 2026.

Miratuar vendimin për Kornizën për Ndërtimin e Kapaciteteve Digjitale për Qeverinë e Kosovës, që do të shërbejë si një model që siguron një qasje të unifikuar për zhvillimin e aftësive digjitale thelbësore për qeverisje efektive, ofrimin e shërbimeve dhe inovacionin në një mjedis digjital.

Miratuar në parim Nismën për lidhjen e Marrëveshjes Ndërkombëtare ndërmjet Qeverisë së Republikës së Kosovës dhe Bashkimit Evropian për aderimin në zonën “EU Roam Like Home”, e cila do të jetë parakusht për implementimin e plotë të ‘EU Roaming Acquis’. Kjo Marrëveshje krijon kornizën për përfshirjen graduale të Republikës së Kosovës në regjimin “EU Roam Like Home”, duke mundësuar përdorimin e shërbimeve roaming pa tarifa shtesë ndërmjet Kosovës dhe shteteve pjesëmarrëse, pasi të plotësohen kushtet e parapara.

Miratuar në parim Nismën për lidhjen e Marrëveshjes së Grantit në mes të Republikës së Kosovës, e përfaqësuar nga Ministria e Financave, “Termokosit” dhe Bankës Evropiane për Investime, për Projektin e Zgjerimit të Sistemit të Ngrohjes Qendrore në Prishtinë.

Miratuar vendimin për rialokimin e mjeteve në shumën prej 2,000,000.00€ (dy milionë eurosh), në Ministrisë së Administrimit të Pushtetit Lokal, nënprogrami “Administrata qendrore”, nga kategoria e shpenzimeve kapitale, konkretisht nga projekti kapital “Programi për Grantin e Performancës Komunale”, në 15 (pesëmbëdhjetë) projekte kapitale, në përputhje me 15 (pesëmbëdhjetë) marrëveshjet për mbështetje financiare, për projektet kapitale të nënshkruara nga Ministri i Administrimit të Pushtetit Lokal dhe kryetarët e komunave përkatëse.

Themeluar Këshillin Kombëtar të Arteve, një mekanizëm i rëndësishëm institucional që do të forcojë zhvillimin e politikave publike në fushën e artit dhe kulturës, duke garantuar profesionalizëm, pavarësi dhe përfaqësim të denjë të komunitetit artistik, në këtë përbërje:
1.1. Yll Rugova, përfaqësues nga fusha e arteve pamore;

1.2. Baki Jashari, përfaqësues nga fusha e muzikës klasike dhe operës;

1.3. Visare Aliu, përfaqësuese nga fusha e teatrit;

1.4. Afrim Spahiu, përfaqësues nga fusha e filmit dhe fusha audiovizuale;

1.5. Ardianë Pajaziti, përfaqësuese nga fusha e letërsisë dhe librit;

1.6. Visar Munishi, përfaqësues nga fusha e këngëve dhe valleve folklorike;

1.7. Aulona Nuhiu, përfaqësuese nga fusha e baletit dhe vallëzimit modern;

1.8. Alberta Troni, përfaqësuese nga institucionet akademike dhe kërkimore në fushën e artit dhe kulturës;

1.9. Arif Muharremi, përfaqësues nga sektori i pavarur kulturor që përfshin organizatat, institutet dhe shoqatat e fushës së artit dhe kulturës dhe fushat e ndërlidhura me kulturën;

1.10. Artnet Haskuka, përfaqësuese nga fushat e ndërlidhura me kulturën, si dizajni, arkitektura apo fusha të ndërlidhura me industrinë kreative;

1.11. Visar Haxhibeqiri, përfaqësues i administratës nga Ministria e Kulturës.

Ndarë mjete financiare në shumën prej 9,480.00 euro, (nëntë mijë e katërqindetetëdhjetë eurosh), për mbështetjen e realizimit të programit “OringinAL”, i cili promovon Republikën e Kosovës në nivel ndërkombëtar përmes forcimit të imazhit pozitiv të Republikës së Kosovës, promovimin e potencialit të saj turistik, kulturor dhe zhvillimor, si deh në zgjerimin e bashkëpunimit me diasporën në funksion të zhvillimit afatgjatë të vendit.

Miratuar Propozimin e Ministrisë së Financave për të kërkuar nga Presidentja e Republikës së Kosovës për dhënien e Autorizimit Ministrit të Financave, për nënshkrimin e Marrëveshjes së Kredisë ndërmjet Republikës së Kosovës dhe Agjencisë Franceze për Zhvillim, për Projektin e Lojërave Mesdhetare XXI në Kosovë.

Riaprovuar Raportin Vjetor Financiar për Buxhetin e Republikës së Kosovës për vitin 2025.

Ministrja serbe për Administratë Shtetërore dhe Vetëqeverisje Lokale, Snezhana Paunoviq, ka thelluar edhe më tej skandalin e shkaktuar nga deklaratat e saj për Kosovën, duke mos kërkuar falje, por duke e rikonfirmuar publikisht qëndrimin se do të kryente “spastrimin etnik” të Kosovës. Derisa foli për Euronews Serbia, ajo deklaroi se edhe sot do ta “spastronte etnikisht Kosovën nga terroristët”, duke këmbëngulur se deklarata e saj ishte nxjerrë jashtë kontekstit dhe se kishte pasur parasysh vetëm ushtarët e UÇK-së.

Ndonëse deklarata e saj fashiste nxiti reagime të shumta në Kosovë, rajon e BE, Paunoviq tha se nuk sheh asgjë të diskutueshme në qëndrimin e saj, duke pretenduar se i ishte referuar “terroristëve”.

Ajo madje e përsëriti këtë qëndrim, duke deklaruar se në vitin 1998 do ta kishte spastruar etnikisht Kosovën: “Në vitin 1998 do ta kisha spastruar etnikisht Kosovën… Ndërkohë tani është viti 2026. Do ta kisha spastruar etnikisht Kosovën nga terroristët!”

“Kush guxon ta bëjë këtë? Kush është ai në Evropë që guxon të merret me këtë çështje në këtë mënyrë, ose edhe më keq, të mos merret fare me këtë, por të merret me një ministre që ka thënë: ‘Ah, në vitin 1998 do ta kisha spastruar etnikisht Kosovën…’. Ndërkohë tani është viti 2026. Do ta kisha spastruar etnikisht Kosovën nga terroristët! Po, do ta kisha bërë – jo vetëm Kosovën, por do ta pastroja tërë botën nga terroristët për hir të viktimave të pafajshme, gjithmonë! Çfarë ka këtu të diskutueshme?”, deklaroi ajo të premten.

Megjithatë, në të drejtën ndërkombëtare dhe në praktikën e tribunaleve ndërkombëtare, termi “spastrim etnik” përdoret për të përshkruar largimin me forcë të një popullsie civile nga një territor për shkak të përkatësisë etnike, fetare ose kombëtare. Ai nuk përdoret për operacione kundër personave të cilësuar si terroristë, çka edhe më parë, e ka bërë deklaratën e Paunoviqit objekt kritikash dhe reagimesh.

Ndërkohë, Paunoviq, në paraqitjen e saj të sotme televizive, nuk u ndal vetëm në përpjekjen për të arsyetuar deklaratën e saj të mëparshme për “spastrimin etnik të Kosovës”, por adresoi edhe një sërë deklaratash të reja kontroverse ndaj Bashkimit Evropian, institucioneve të Kosovës dhe zyrtarëve ndërkombëtarë.

Një nga kritikat më të ashpra ishte drejtuar komisioneres evropiane për Zgjerim, Marta Kos, e cila më herët kishte vlerësuar se deklaratat e ministres janë të papranueshme për një anëtare të Qeverisë së Serbisë.

Ajo e akuzoi Kos për qasje selektive, duke pretenduar se nuk ka reaguar asnjëherë për pozitën e serbëve në Kosovë apo për, sic pretendoi ajo, sulmet ndaj komunitetit serb.

“Që Marta Kos ka reaguar, është e drejta e saj. Më vjen keq që ajo nuk ka reaguar kurrë ndaj thirrjeve tona për ta ndalur terrorin ndaj serbëve, i cili, sipas saj, zhvillohet hapur para syve të gjithë opinionit botëror, ndërsa të gjithë heshtin. Më vjen keq që nuk ka pyetur kurrë se kush janë vrasësit e fëmijëve në Bistricë të Gorazhdecit; më vjen keq që nuk ka pyetur kush qëlloi mbi djalin që vetëm po mbante badnjakun. Ka shumë gjëra për të cilat më vjen keq. Më vjen keq që nuk pyet se si është e mundur që nga 250 mijë serbë asnjëri nuk është kthyer, se që nga viti 2006 nuk kanë ku të kthehen. Më vjen keq që nuk pyeti: ‘Pse i shkatërruat varrezat, çfarë ju kishin bërë të vdekurit?’ Më vjen keq që nuk pyet: ‘Nga ju lindi ideja të krijoni Kishën Ortodokse të Kosovës?’ e kështu me radhë”, tha Paunoviq teksa kritikoi e akuzoi Kos.

Derisa shkoi edhe më larg, Paunoviq tha se “nuk do ta shpreh mendimin e saj personal për Marta Kos, pasi respekton institucionet”.

“Nëse ky është qëndrimi personal i zonjës Marta Kos, është legjitim. Unë nuk do ta shpreh mendimin tim personal për të, duke respektuar institucionet, por një gjë është e sigurt: për një bashkëjetesë cilësore në Evropë, jo vetëm në Ballkanin Perëndimor, unë kam luftuar shumë më gjatë dhe shumë më intensivisht sesa zonja Marta Kos. Nuk mendoj se jam më e madhe se ajo, por se kam qenë dikush që e ka kuptuar se, pavarësisht të gjitha plagëve, duhet ecur përpara. Kjo ishte ajo që jam përpjekur të bëj”, pretendoi Paunoviq.

Ajo sërish shtrembëroi të vërtetën duke u munduar të dezinformojë se gjoja më ’99 u krye “spastrim etknik ndaj serbëve, në vitin 1999”. Madje, ajo dezinformoi sërish duke pretenduar rrejshëm se, “spastrimi etnik ndaj serbëve vazhdon edhe sot”.

“A kam pasur sukses? Nëse flasim për territorin nga i cili jam dëbuar, jo. Përkundrazi, jemi kthyer prapa. Ai spastrim etnik që, u bë ndaj serbëve në vitin 1999, e më pas u thellua në vitin 2004, vazhdon ende edhe sot. Edhe kjo fushatë kundër meje është në një masë të madhe përpjekje për të ushtruar presion shtesë”, pretendoi Paunoviq.

Kujtojmë se, Paunoviq, për deklaratat skandaloze për spastrim etnik të Kosovës i ka kërkuar falje presidentit të Serbisë, Aleksandër Vuçiq, por jo shqiptarëve./KP/

Kompanitë kroate, INA dhe Petrol kanë vendosur kufizime për sasinë e karburantit që mund të blihet në pikat e tyre të karburantit, pasi në publik kanë dalë informacione për çmime të reja të mundshme, sipas të cilave karburanti pritet të shtrenjtohet ndjeshëm të martën, veçanërisht nafta.

“Të nderuar dhe të respektuar klientë, ju njoftojmë se nga 24 korriku 2026 vendoset një kufizim i përkohshëm i shitjes së karburantit, i cili do të jetë në fuqi deri në një njoftim të mëtejshëm. Në përputhje me vendimin e marrë, sasia maksimale e karburantit për një furnizim është: 300 litra për furnizim. Ju falënderojmë për mirëkuptimin dhe bashkëpunimin”, thuhet në njoftimin e vendosur në një nga pikat e karburantit të INA-s.

Sipas portalit kroat Regionalexpress, në pikën e karburantit të Petrolit në rrugën Mutilska në Pula, nga sot ka hyrë në fuqi kufizimi i përkohshëm i shitjes së karburantit, shkruan index.hr.

As kompania Petrol nuk ka bërë të ditur arsyen e vendosjes së kufizimit, ndërsa në njoftimin për klientët ka falënderuar për mirëkuptimin dhe bashkëpunimin.

Sipas modelit aktual të llogaritjes së çmimeve, një litër Eurosuper 95 pritet të shtrenjtohet me 11 centë, duke arritur çmimin e ri prej 1.65 euro për litër.

Rritja më e madhe pritet për Eurodizelin, i cili me një shtrenjtim prej 22 centësh do të kushtojë 1.81 euro për litër.

Ndërkohë, çmimi i dizelit blu pritet të rritet me 24 centë, duke arritur në 1.26 euro për litër.

35-vjeçari Refit (Nertil) Buzi, i dyshuar për ngjarjen e rëndë në Roskovec,ka vrarë veten me armë zjarri pas disa orësh negociata me forcat e policisë.

Ai ishte i rrethuar nga forcat speciale RENEA në zonën e ish-fushës së helikopterëve në fshatin Kurjan, ku qëndroi i ngujuar në automjetin e tij, ndërsa negociatorët tentuan disa herë ta bindnin të dorëzohej.

Më herët, 35-vjeçari dyshohet se vrau me armë gjahu ish-vjehrrin e tij, Kosta Plakun, plagosi ish-vjehrrën, Bejlere Plakun, dhe mori me forcë ish-të dashurën, Rozalinda Plakun. E reja u lirua disa orë më vonë gjatë operacionit të policisë.

Autoambulanca dhe forca të shumta policie janë afruar pranë automjetit ku ndodhet prej disa orësh 35-vjeçari.

Njoftimi i Policisë së Shtetit

“Në vijim të informacionit paraprak për ngjarjen e rëndë kriminale të ndodhur në fshatin Vidhisht, Roskovec, ku shtetasi R. B., 35 vjeç, vrau me armë gjahu babanë e ish-të dashurës së tij, plagosi nënën e saj dhe mori peng ish-të dashurën, shtetasen R.P, ju informojmë se: Pas lirimit të saj falë veprimeve profesionale të Policisë, ekipi negociator i RENEA-s, në bashkëpunim me shërbimet e Drejtorisë Vendore të Policisë Fier, nën drejtimin e Prokurorit, vijoi negociatat me 35-vjeçarin, me qëllim bindjen e tij për t’u dorëzuar dhe për të shmangur përshkallëzimin e mëtejshëm të situatës”.

“Pavarësisht negociatave intensive, të zhvilluara që prej orëve të para të mëngjesit, 35-vjeçari nuk iu bind thirrjeve të Policisë për t’u dorëzuar dhe, rreth orës 16:35, dyshohet se është vetëvrarë me armën e gjahut që mbante me vete, brenda automjetit.

Grupi hetimor, nën drejtimin e Prokurorit, vijon veprimet për dokumentimin e plotë të rrethanave dhe shkaqeve të kësaj ngjarjeje të rëndë kriminale”.

Policia e Kosovës ka arrestuar një shtetas turk, i cili dyshohet për kryerjen e krimeve të luftës në zonën e Krushës dhe rrethinës së Prizrenit gjatë luftës së fundit në Kosovë.

Sipas raportimeve të Klan Kosovës, i dyshuari dyshohet se ka marrë pjesë drejtpërdrejt në Masakrën e Krushës gjatë luftës në Kosovë.

I dyshuari është siguruar në Stacionin Policor në Prizren nga Prokuroria Themelore e Prizrenit dhe më pas i është dorëzuar hetuesve të Hetuesisë së Veçantë, të cilët veprojnë në kuadër të Prokurorisë Speciale të Republikës së Kosovës.

Rasti mësohet se po trajtohet nga Departamenti për Krime të Luftës në Prokurorinë Speciale të Republikës së Kosovës.

Ndërkohë, sipas burimeve të tjera, i dyshuari është paraqitur vetë në stacionin policor, pasi mbrëmë, gjatë një emisioni televiziv, emri i tij është përmendur si person që dyshohet se ka qenë pjesë e grupit të kriminelit Arkan.

Moti në Kosovë gjatë fundjavës pritet të jetë kryesisht me diell dhe me vranësira të shpërndara.

“Mbi vendin tonë do të mbajë mot me diell dhe vranësira të shpërndara. Temperaturat minimale do të lëvizin ndërmjet 8 dhe 11°C, ndërsa maksimalet e ditës do të arrijnë 23deri në 26°C. Do të fryjë erë e lehtë deri mesatare nga drejtimet veriore dhe veriperëndimore”, thuhet në njoftimin e IHK-së për ditën e shtunë.

Ndërkaq, një mot pak a shumë i ngjashëm pritet të ngjajë edhe në ditën pasuese, të dielën.

“Parashihet mot me diell dhe vranësira të pakta, kryesisht për rreth relievit malor. Temperaturat minimale do të lëvizin nga 9–12 , ndërsa ato maksimale do të lëvizin ndërmjet 25-31°C. Era do të fryjë nga veriperendimi me shpejtësi 1-5m/s”.

Organizata AVONET ka kërkuar ndërhyrje urgjente të institucioneve kompetente lidhur me një rast të mbindërtimit të paligjshëm në rrugën “Ahmet Kaçiku” në Ferizaj, duke e cilësuar atë si shkelje të ligjit dhe rrezik për sigurinë publike.

Përmes një deklarate për media, AVONET ka shprehur shqetësim të thellë për këtë rast, duke theksuar se çdo mbindërtim mbi objekte të ndërtuara sipas kritereve teknike dhe lejeve përkatëse cenon standardet e ndërtimit, rrezikon stabilitetin e objektit dhe sigurinë e banorëve e qytetarëve.

Sipas organizatës, veprime të tilla janë të ndaluara me legjislacionin në fuqi dhe nuk duhet të tolerohen në një shtet që synon zbatimin e sundimit të ligjit.

AVONET i ka bërë thirrje Komunës së Ferizajt që të ndërmarrë pa vonesë të gjitha masat ligjore dhe administrative për ndalimin e punimeve dhe rrënimin e mbindërtimit të paligjshëm, duke siguruar zbatimin e plotë të legjislacionit.

Po ashtu, organizata i ka kërkuar Prokurorisë së Shtetit të nisë hetimet për rastin, të verifikojë përgjegjësinë e të gjithë personave të përfshirë, përfshirë investitorin, mbikëqyrësit dhe zyrtarët kompetentë, si dhe të ndërmarrë veprimet e nevojshme nëse konstatohen elemente të veprave penale.

Organizata ka bërë të ditur se do të vazhdojë ta monitorojë këtë rast dhe pret reagim të menjëhershëm, transparent dhe në përputhje me ligjin nga të gjitha institucionet përgjegjëse.

Gjashtë persona nga Kosova kanë mbetur të lënduar në një aksident të rëndë trafiku që ka ndodhur në orët e para të mëngjesit të së premtes në rrugën magjistrale Shkup–Pikëkalimi Kufitar Bllacë e Poshtme në Maqedoninë e Veriut.

Sipas njoftimit të Ministrisë së Punëve të Brendshme të RMV-së, në aksident janë përfshirë dy automjete me targa të Kosovës: një veturë “Kia”, e drejtuar nga K.C. (33-vjeç) nga Kosova, dhe një “Volkswagen Golf”, të cilin e drejtonte S.J. (61-vjeç), gjithashtu shtetas i Kosovës.

“Si pasojë e përplasjes, lëndime të rënda trupore kanë pësuar të dy drejtuesit e automjeteve, si dhe pasagjeret e “Volkswagen Golf”-it, S.J. (54) dhe E.J. (20). Ndërsa lëndime trupore kanë marrë edhe dy pasagjerët e tjerë të kësaj veture, B.H. (23) dhe B.I. (35)”, ka njoftuar MPB-ja e RMV-së.

Të gjithë të lënduarit mësohet se janë dërguar për trajtim mjekësor në Spitalin e Përgjithshëm “8 Shtatori” dhe në Qendrën e Urgjencës pranë kompleksit të klinikave “Nënë Tereza” në Shkup.

Autoritetet maqedonase kanë njoftuar se, me urdhër të prokurorit publik, drejtuesi i veturës “Kia”, K.C., do të privohet nga liria pasi të përfundojë trajtimin në spital.

Ekipi hetimor i Sektorit për Punë të Brendshme (SPB) në Shkup ka kryer këqyrjen e vendit të ngjarjes, ndërsa hetimet për zbardhjen e plotë të shkaqeve dhe rrethanave të aksidentit janë duke vazhduar.

Qumështorja Vita ka njoftuar se ka paraqitur Kërkesë në Policinë e Kosovës dhe Prokurorinë Speciale të Republikës së Kosovës, nëpërmjet të cilës ka kërkuar nga këto institucione që të vijnë dhe të marrin të gjitha mostrat paralele të produkteve Vita dhe Holla, për, siç tha, shkak të vonesës së institucioneve kompetente për të dorëzuar rezultatet brenda afateve ligjore.

“Nëpërmjet kësaj komunikate, njoftojmë opinionin publik, që sot, më datë 24.07.2026, kemi paraqitur Kërkesë në Policinë e Kosovës dhe Prokurorinë Speciale të Republikës së Kosovës, nëpërmjet të cilës kemi kërkuar nga këto institucione që të vijnë dhe të marrin të gjitha mostrat paralele të produkteve Vita dhe Holla, për shkak të vonesës së institucioneve kompetente për të dorëzuar rezultatet brenda afateve ligjore. Duke marrë parasysh që deri më sot nuk kemi pranuar rezultatet dhe pavarësisht kërkesave të shumta që i kemi bërë ndaj institucionit AUV, ne akoma nuk kemi pranuar rezultatet e analizave të mostrave”.

Kompania Vita shton: “Duke e konsideruar edhe vetë faktin që në inspektimin e datës 02.07.2026, Këshilltarja Politike e Ministrisë së Bujqësisë na u ka prezentuar si Inspektore, e njësoj ka bërë edhe pronari i Kompanisë konkurrente, ne e kemi parë të udhës që të paralajmërojmë Prokurorinë Speciale dhe Policinë e Kosovës, që të ndërmarrin masa dhe të parandalojnë manipulimin me rezultatet e të gjitha mostrave që i ka marrë AUV, për brendet “Holla” dhe “Vita“.