ATV

Blog

  • Qumështorja Vita kërkon ndërhyrjen e Prokurorisë Speciale dhe Policisë pas vonesave të rezultateve

    Qumështorja Vita kërkon ndërhyrjen e Prokurorisë Speciale dhe Policisë pas vonesave të rezultateve

    Qumështorja Vita ka njoftuar se ka paraqitur Kërkesë në Policinë e Kosovës dhe Prokurorinë Speciale të Republikës së Kosovës, nëpërmjet të cilës ka kërkuar nga këto institucione që të vijnë dhe të marrin të gjitha mostrat paralele të produkteve Vita dhe Holla, për, siç tha, shkak të vonesës së institucioneve kompetente për të dorëzuar rezultatet brenda afateve ligjore.

    “Nëpërmjet kësaj komunikate, njoftojmë opinionin publik, që sot, më datë 24.07.2026, kemi paraqitur Kërkesë në Policinë e Kosovës dhe Prokurorinë Speciale të Republikës së Kosovës, nëpërmjet të cilës kemi kërkuar nga këto institucione që të vijnë dhe të marrin të gjitha mostrat paralele të produkteve Vita dhe Holla, për shkak të vonesës së institucioneve kompetente për të dorëzuar rezultatet brenda afateve ligjore. Duke marrë parasysh që deri më sot nuk kemi pranuar rezultatet dhe pavarësisht kërkesave të shumta që i kemi bërë ndaj institucionit AUV, ne akoma nuk kemi pranuar rezultatet e analizave të mostrave”.

    Kompania Vita shton: “Duke e konsideruar edhe vetë faktin që në inspektimin e datës 02.07.2026, Këshilltarja Politike e Ministrisë së Bujqësisë na u ka prezentuar si Inspektore, e njësoj ka bërë edhe pronari i Kompanisë konkurrente, ne e kemi parë të udhës që të paralajmërojmë Prokurorinë Speciale dhe Policinë e Kosovës, që të ndërmarrin masa dhe të parandalojnë manipulimin me rezultatet e të gjitha mostrave që i ka marrë AUV, për brendet “Holla” dhe “Vita“.

  • Komuna e Hanit të Elezit kërkon që t’i ndahet buxhet UShA-it në Ferizaj

    Komuna e Hanit të Elezit kërkon që t’i ndahet buxhet UShA-it në Ferizaj

    Komuna e Hanit të Elezit ka reaguar ndaj mungesës së mbështetjes buxhetore për Universitetin e Shkencave të Aplikuara në Ferizaj në planifikimet buxhetore për vitin 2027, duke e cilësuar këtë një shqetësim për të ardhmen e institucionit.

    Në reagimin e saj, Komuna vlerëson se universiteti ka rëndësi të veçantë jo vetëm për Ferizajn, por edhe për komunat e rajonit, pasi ndër vite ka qenë institucion arsimor edhe për studentët nga Hani i Elezit dhe zonat përreth.

    Sipas Komunës, përmes programeve të tij, Universiteti i Shkencave të Aplikuara ka kontribuar në përgatitjen e profesionistëve të rinj dhe në lidhjen e arsimit të lartë me nevojat e tregut të punës.

    Komuna e Hanit të Elezit shpreh shqetësimin se mosparashikimi i mjeteve financiare për funksionimin e universitetit ngre pikëpyetje serioze për të ardhmen e tij dhe ndikon drejtpërdrejt te studentët, stafi akademik dhe zhvillimi i rajonit.

    Përmes këtij reagimi, Komuna u ka bërë thirrje institucioneve qendrore që të rishikojnë planifikimet buxhetore dhe të sigurojnë financimin e nevojshëm për vazhdimin e veprimtarisë së Universitetit të Shkencave të Aplikuara në Ferizaj.

    “Ruajtja dhe fuqizimi i institucioneve të arsimit të lartë është përgjegjësi e përbashkët. Investimi në universitete nuk është vetëm mbështetje për studentët e sotëm, por edhe garanci për zhvillimin ekonomik, profesional dhe shoqëror të vendit në të ardhmen”, thuhet tutje në reagimin e Komunës.

  • Kontrollet ndaj mjeteve të mbingarkuara vazhdojnë, shqiptohen mbi 15 mijë euro gjoba

    Kontrollet ndaj mjeteve të mbingarkuara vazhdojnë, shqiptohen mbi 15 mijë euro gjoba

    Ministri në detyrë i Infrastrukturës dhe Transportit Dimal Basha ka njoftuar se Departamenti i Sigurisë Rrugore, në bashkëpunim me Policinë e Kosovës, po vazhdon kontrollet në terren ndaj mjeteve që tejkalojnë peshën e lejuar.

    Sipas njoftimit, vetëm gjatë kësaj jave janë evidentuar 27 kundërvajtje, ndërsa janë shqiptuar gjoba në vlerë të përgjithshme prej 15 mijë e 40 eurosh.

    Basha ka bërë të ditur, se mbingarkesa e mjeteve të rënda paraqet rrezik për sigurinë në trafik dhe dëmton infrastrukturën rrugore.

    Sipas autoriteteve, tejkalimi i peshës së lejuar ndikon në kontrollin e automjetit, zgjat distancën e frenimit dhe rrit mundësinë e aksidenteve, duke rrezikuar drejtpërdrejt jetën e qytetarëve.

    Kontrollet dhe masat ndaj shkelësve do të vazhdojnë edhe në periudhën në vijim, ndërsa Ministria u ka bërë thirrje operatorëve ekonomikë dhe transportuesve që të respektojnë kufijtë e lejuar të peshës.

    “ Mbrojtja e rrugëve tona dhe siguria e qytetarëve janë përgjegjësi e përbashkët”, thuhet në njoftim.

  • Manchester City synon talentin e Barcelonës Marc Bernal

    Manchester City synon talentin e Barcelonës Marc Bernal

    Manchester City po shfaq interes konkret për mesfushorin e Barcelonës, Marc Bernal, dhe po shqyrton mundësinë e transferimit të tij gjatë afatit kalimtar të verës.

    Sipas Diario Sport, pasiguria rreth të ardhmes së Rodrit, i cili vazhdon të lidhet me një kalim te Real Madridi, ka bërë që kampioni anglez ta identifikojë Bernalin si zëvendësuesin ideal për mesfushën.

    Megjithatë, Barcelona nuk ka ndërmend të heqë dorë nga 19-vjeçari, i cili pas sezonit mbresëlënës 2025/26 është shndërruar në një nga lojtarët më të rëndësishëm të skuadrës.

    Trajneri Hansi Flick e vlerëson lart mesfushorin e dalë nga akademia La Masia dhe e sheh atë si kandidatin kryesor për të zëvendësuar Frenkie de Jong, i cili pritet të mungojë për shkak të lëndimit në sezonin 2026/27.

    I konsideruar si një nga talentet më premtues të futbollit spanjoll dhe pjesë e së ardhmes së Barcelonës, klubi katalanas synon t’ia përmirësojë kontratën për të larguar interesimin e klubeve të tjera.

    Bernal ka kontratë me Barcelonën deri në verën e vitit 2029, ndërsa klauzola e lirimit të tij është 500 milionë euro. Megjithatë, ai vazhdon të jetë një nga lojtarët me pagën më të ulët në skuadrën e parë.

  • Kurti i bën thirrje KGJK-së t’i refuzojë kërkesat për tërheqjen e dorëheqjeve të stafit serb

    Kurti i bën thirrje KGJK-së t’i refuzojë kërkesat për tërheqjen e dorëheqjeve të stafit serb

    Kryeministri në detyrë, Albin Kurti, i ka bërë thirrje Këshillit Gjyqësor të Kosovës që t’i refuzojë kërkesat e gjyqtarëve dhe stafit administrativ serb për tërheqjen e dorëheqjeve të dhëna në fund të vitit 2022.

    Ai tha se braktisja ishte e organizuar politikisht si pikënisje e një serie veprimesh sabotuese ndaj shtetit.

    “Braktisja e organizuar dhe politikisht e motivuar e institucioneve të Republikës së Kosovës nga pjesëtarë të komunitetit serb, në fund të vitit 2022 ishte pikënisje e një serie veprimesh sabotuese ndaj shtetit. Qysh atëherë e kemi thënë dhe u kemi bërë thirrje të gjithë serbëve në institucione mos i braktisni ato, mos jepni dorëheqje, mos shkoni. Por, nuk e kemi thënë e as nuk kemi të drejtë të themi kthehuni. Kishim të drejtë etike të ju themi mos shkoni, por nuk kemi të drejtë kushtuese e ligjore tu themi kthehuni”, tha Kurti.

    Sipas tij, largimi nga institucionet kishte qenë akt politik, ndërsa çështja e kthimit duhet të trajtohet në përputhje me Kushtetutën dhe ligjet e Kosovës.

    “Largimi i tyre ka qenë akt politik, individual ndonëse i organizuar, por kthimi është çështje ligjore dhe kushtetuese. Nuk mund të ketë kthim që i mbivendoset kushtetutës e ligjit, veçmas kur braktisja ishte një akt sabotimi i ligjshmërisë dhe kushtetutshmërisë. Në këtë linjë gjithnjë sipas kushtetutshmërisë dhe ligjshmërisë, këto dorëheqje i ka trajtuar kohë më parë Policia e Kosovës dhe ditë më parë edhe Këshilli Prokurorial. Teksa prisnim që edhe Këshilli Gjyqësor të vepronte njësoj kuptuam që mbledhja dështoi në mungesë kuorumi. Presim që në mbledhjen e radhës të marrë epilog të atillë kjo çështje”, tha Kurti.

    Edhe U.D e presidentes së Kosovës, Albulena Haxhiu, kërkoi sot më herët nga Këshilli Gjyqësor i Kosovës, që t’u jap përgjigje negative të dorëhequrve.

    Veçse mbledhja e sotshme e KGjK-së, dështoi për shkak të mungesës së kuorumit.

    Ditë më parë, Haxhiu dekretoi lirimin nga detyra të prokurorëve serbë që kishin dhënë dorëheqje në fund të vitit 2022. Kjo, derisa Këshilli Prokurorial i Kosovës refuzoi kërkesat e tyre dhe stafit administrativ për të tërhequr dorëheqjet e mëparshme.

    Në nëntor të vitit 2022, gjyqtarë, prokurorë, punonjës administrativë dhe policë serbë kishin dhënë dorëheqje kolektive nga institucionet e drejtësisë e sigurisë në veri.

  • Gianni Infantino i dërgon letër Argjentinës pas finales së Kupës së Botës 2026

    Gianni Infantino i dërgon letër Argjentinës pas finales së Kupës së Botës 2026

    Federata Argjentinase e Futbollit (AFA) ka vendosur të bëjë publike një letër që presidenti i FIFA-s, Gianni Infantino, ia dërgoi presidentit të AFA-s, Claudio Tapia, pas përfundimit të Kupës së Botës 2026.

    Letra mbërriti pas humbjes dramatike të Argjentinës në finalen e Kupës së Botës 2026 ndaj Spanjës me rezultat 1:0, pas vazhdimeve. Në të, kreu i FIFA-s vlerësoi paraqitjen e “Albicelestes”, duke e cilësuar fitimin e medaljes së argjendtë si një sukses të madh.

    Edhe pse mesazhe të tilla zakonisht kanë karakter diplomatik dhe mbeten private, AFA vendosi ta publikojë letrën në faqen e saj zyrtare të internetit.

    Në letër, Infantino theksoi se loja e Argjentinës dha një kontribut të rëndësishëm që Kupa e Botës 2026 të mbahet mend si një festival i paharrueshëm futbolli.

    Kreu i FIFA-s vlerësoi gjithashtu punën e trajnerit Lionel Scaloni, lojtarëve, stafit teknik dhe mjekësor, si dhe tifozëve argjentinas që e mbështetën ekipin gjatë gjithë turneut.

    “Fitoret dhe sukseset janë gjithmonë fryt i punës së palodhur, profesionalizmit dhe vëmendjes ndaj detajeve, por edhe i pasionit, përkushtimit dhe dashurisë për këtë sport të bukur. E gjithë kjo paralajmëron një të ardhme shumë premtuese për futbollin argjentinas. Ju lutem përcillni urimet e mia më të sinqerta për lojtarët, trajnerin Lionel Scaloni, stafin teknik dhe mjekësor, si dhe për tifozët që e mbështetën ekipin gjatë gjithë garës”, shkroi Infantino.

    Kjo letër diplomatike dhe jashtëzakonisht pozitive tërhoqi vëmendje të madhe në opinion, pasi presidenti i FIFA-s nuk përmendi polemikat e shumta që shoqëruan Argjentinën gjatë gjithë turneut.

  • Babai goditi për vdekje një grua, i biri riparoi mjetin për të fshehur ngjarjen – arrestohen të dy

    Babai goditi për vdekje një grua, i biri riparoi mjetin për të fshehur ngjarjen – arrestohen të dy

    Policia e Tiranës ka arrestuar dy persona, babë e bir, pas një aksidenti të ndodhur në autostradën “Durrës-Tiranë” ku humbi jetën një 74-vjeçare.

    Identifikohet dhe arrestohet 65-vjeçari që përplasi me automjet, me pasojë vdekjen, shtetasen M. T., 74 vjeçe. Në pranga dhe djali i 65-vjeçarit, pasi së bashku, u larguan nga vendi i aksidentit, pa i dhënë ndihmë 74-vjeçares, dhe nuk njoftuan Policinë. Gjithashtu, 32-vjeçari fshehu automjetin dhe e riparoi për të penguar zbulimin e së vërtetës.

    Gjendet dhe sekuestrohet automjeti tip “Mercedez Benz”.

    “ Si rezultat i veprimeve hetimore të kryera me qëllim identifikimin dhe kapjen e drejtuesit të automjetit që përplasi me pasojë vdekjen, shtetasen M. T., 74 vjeçe, rreth orës 04:10 të datës 23.07.2026, në autostradën “Durrës-Tiranë”, si dhe për sqarimin e rrethanave të aksidentit, specialistët e qarkullimit rrugor identifikuan, lokalizuan dhe kapën autorin e dyshuar të rastit, shtetasin Xh. M., 65 vjeç, banues në Durrës.

    Më tej, në vijim të veprimeve u arrestua djali i 65-vjeçarit, shtetasi B. M., 32 vjeç, banues në Durrës, pasagjer në automjet, në momentin e aksidentit.

    2 të arrestuarit dyshohet se janë larguar nga vendi i aksidentit, menjëherë pas përplasjes, pa i dhënë ndihmë 74-vjeçares, si dhe pa njoftuar Policinë.

    Më pas, 32-vjeçari dyshohet se me qëllim pengimin e zbulimit të së vërtetës, ka fshehur automjetin tip “Mercedez Benz” të përfshirë në aksident, si dhe ka riparuar dëmet që i ishin shkaktuar nga përplasja”, tha policia.

    Materialet procedurale iu referuan Prokurorisë së Tiranës, për veprime të mëtejshme. /A2CNN

  • Debati për gjyqtarët serbë, Kryesuesi-anëtarit të KGJK’së: Po kërkon vëmendje pasi këtë çështje e ngriti u.d. presidentja

    Debati për gjyqtarët serbë, Kryesuesi-anëtarit të KGJK’së: Po kërkon vëmendje pasi këtë çështje e ngriti u.d. presidentja

    Në takimin e 371-të të Këshillit Gjyqësor të Kosovës (KGJK), është zhvilluar debat mes anëtarit Bashkim Hyseni dhe kryesuesit Rrustem Thaqi lidhur me trajtimin e dorëheqjeve të gjyqtarëve dhe prokurorëve serbë që kanë lënë sistemin e drejtësisë.

    Hyseni ka kërkuar nga kryesuesi Thaqi sqarime se mbi çfarë baze kushtetuese dhe ligjore janë mbajtur këto dorëheqje për rreth katër vite.

    “Me çfarë baze kushtetuese, ligjore janë mbajtur katër vite? Kjo i bie sikur kapiteni i anijes ta lëshojë timonin për shkak të valëve. Mund ta shpëtojë momentin, por do ta dëmtojë të nesërmen dhe të ardhmen. Cila është përgjigjja juaj, meqenëse ju jeni kryesues dhe duhet ta dini për shkak të kontinuitetit institucional që kanë këto organe?”, ka thënë Hyseni.

    Në përgjigje, Thaqi ka thënë se nuk mund të mbahet përgjegjës për këtë çështje dhe ka theksuar se edhe Hyseni, si anëtar i KGjK-së, ka pasur mundësi të paraqesë iniciativa apo propozime.

    “Nuk mundesh me më mbajt përgjegjës për këtë pikë. Edhe unë edhe ti jemi anëtarë. Nuk kam obligim as përgjigje me të dhënë, sepse ti po do me i dhënë kontest tjetër kësaj çështjeje dhe po do me marrë vëmendje për këtë çështje, që nuk është korrekte nga ana juaj”, ka deklaruar Thaqi.

    Ai ka shtuar se kjo çështje është aktualizuar pas kërkesës së ushtrueses së detyrës së presidentes, Albulena Haxhiu, drejtuar KGjK-së.

    “Unë vetëm mund të të pyes: prej kur je zgjedhur anëtar i Këshillit, cila ka qenë iniciativa, kërkesa dhe propozimi yt konkret? Kjo çështje është aktualizuar nga momenti kur ushtruesja e detyrës së presidentes ka paraqitur kërkesë në Këshill, për të cilën ju kam njoftuar me kohë”, ka thënë Thaqi.

    Hyseni i është kundërpërgjigjur duke thënë se kryesuesi duhet të japë përgjigje për çështjen.

    “Je kryesues dhe duhesh me ditë. Nëse drejtësia duhet t’i shërbejë vetëm drejtësisë, nëse i shërben qëllimeve tjera nuk quhet drejtësi”, tha Hyseni.

    Ndërsa Thaqi është përgjigjur se do të jetë i përkushtuar në kryerjen e detyrës së tij.

    “Do të jem i përkushtuar që të kryej detyrën time. Por jo duke i shërbyer agjendës ditore”, tha kryesuesi.

    Pas kësaj, për shkak të përplasjeve verbale mes anëtarëve Ahmeti Imami dhe Bashkimn Hyseni, kjo mbledhje u ndërpre.

  • Haxhiu pret në takimin lamtumirës ambasadorin e Turqisë

    Haxhiu pret në takimin lamtumirës ambasadorin e Turqisë

    U.d. së presidentes së Republikës së Kosovës, Albulena Haxhiu, priti sot në takimin lamtumirës ambasadorin e Republikës së Turqisë në Kosovë, Sabri Tunç Angılı, me rastin e përfundimit të mandatit të tij diplomatik.

    Gjatë takimit, Haxhiu e falënderoi ambasadorin Angılı për bashkëpunimin e ngushtë, qasjen konstruktive dhe kontributin e tij në forcimin e marrëdhënieve ndërmjet Kosovës dhe Turqisë.

    Ajo vlerësoi rolin e tij si një bashkëbisedues i hapur dhe partner të përkushtuar në avancimin e bashkëpunimit dypalësh në fusha me interes të përbashkët.

    Me këtë rast, u.d. së presidentes i uroi ambasadorit suksese në angazhimet e tij të ardhshme, duke shprehur bindjen se miqësia dhe partneriteti ndërmjet Republikës së Kosovës dhe Republikës së Turqisë do të vazhdojnë të thellohen edhe në të ardhmen.

  • Vrasja në Roskovec, drejtori i policisë në Fier: Autori nuk pranon të dorëzohet, u bë i mundur lirimi i vajzës

    Vrasja në Roskovec, drejtori i policisë në Fier: Autori nuk pranon të dorëzohet, u bë i mundur lirimi i vajzës

    Drejtori i Drejtorisë Vendore të Policisë Fier, Erion Ahmeti në një deklaratë për mediat ka zbuluar detaje lidhur me operacionin që po zhvillohet në fshatin Vidhisht pas vrasjes së 58-vjeçarit, Kosta Plaka nga 35-vjeçari Refit Buzi.

    Pas vrasjes së ish-vjehrrit dhe plagosjes së ish-vjehrrës, autori është arratisur dhe ka marrë me vete ish-bashkëshorten e tij.

    Ahmeti ka njoftuar se është bërë i mundur lirimi i vajzës dhe është në spital jashtë rrezikut për jetën. Ndërkohë ai theksoi se po vijon puna për të bindur të riun që të dorëzohet, raporton euronews.al.

    “Sot, rreth orës 06:00, ndodhi një ngjarje e rëndë kriminale në fshatin Vidhisht, Roskovec, ku shtetasi R. B., 35 vjeç, vrau me armë gjahu, babanë e ish të dashurës së tij, plagosi nënën e saj, mori peng ish-të dashurën dhe u largua me automjet nga vendi i ngjarjes.

    Menjëherë pas marrjes së njoftimit, shërbimet e Policisë shkuan në vendngjarje, rrethuan zonën, organizuan ndjekjen e autorit, ngritën pika kontrolli dhe koordinuan veprimet me të gjitha strukturat policore të angazhuara.

    Për shkak të rrezikshmërisë së lartë të autorit dhe dinamikës së ngjarjes, u kërkua ndërhyrja e Forcës Speciale “RENEA”.

    Pas lokalizimit të autorit, shërbimet e Policisë e rrethuan atë dhe nisën negociatat, pasi ai kërcënonte se do të vriste veten dhe ish të dashurën, të cilën e mbante peng.

    Falë profesionalizmit, qetësisë dhe veprimeve të mirëkoordinuara të efektivëve të Policisë, fillimisht u bë i mundur lirimi i shtetases që mbahej peng në automjet, kundër vullnetit të saj. Ajo u transportua menjëherë në spital dhe është jashtë rrezikut për jetën.

    Negociatat me autorin vijojnë, me qëllim që ai të dorëzohet pa shkaktuar pasoja të tjera.

    Grupi hetimor, në drejtimin e Prokurorisë, vijon veprimet për dokumentimin e plotë ligjor të ngjarjes, si dhe për sqarimin e të gjitha rrethanave dhe zbardhjen e motivit”, tha ai.