Sheshi i Prishtinës ka filluar të dekorohet për nder të festës së pavarësisë së Kosovës, raporton Ekonomia Online.
Në 18-vjetorin e shpalljes së Kosovës shtet të pavarur dhe sovran, sheshi i Prishtinës po vendos flamujt e Kosovës por krah tyre edhe flamurin Kombëtar.
Kryetarja e Kuvendit të Kosovës, Albulena Haxhiu ka pritur në takim përfaqësuesit e platforma “Liria ka Emër” ku edhe ka dhënë mbështetjen për marshin paqësor “Drejtësi, jo politikë” që do të mbahet më 17 shkurt në ora 14:00 në sheshin “Skënderbeu”.
Nga platforma njoftojnë se Haxhiu vlerësoi angazhimin e platformës dhe rëndësinë e mobilizimit qytetar në këtë moment.
“Ju përgëzoj për angazhimin dhe mobilizimin qytetar. Do të jetë një marsh madhështor, sepse kur bëhet fjalë për vlerat e luftës çlirimtare, UÇK-ja na bashkon të gjithëve”, citohet të ketë thënë Haxhiu.
Në takim ku ishte Eliza Hoxha, Ismail Tasholli dhe Ridvan Emini, u diskutua për marshin qytetar “Drejtësi, jo politikë”, i cili do të mbahet nesër në Prishtinë, në mbrojtje të çlirimtarëve Hashim Thaçi, Kadri Veseli, Jakup Krasniqi, Rexhep Selimi, dhe shokët e tyre që po gjykohen në Hagë, si dhe për rëndësinë e një mobilizimi dinjitoz në këtë moment vendimtar të procesit.
Eliza Hoxha theksoi se marshimi është shprehje e ndërgjegjes qytetare dhe e unitetit përtej dallimeve politike.
“Ky marsh është zë i qytetarëve për drejtësi dhe dinjitet. Është moment kur shoqëria jonë tregon se di të bashkohet për çështje që e tejkalojnë politikën,” u shpreh Hoxha.
Ismail Tasholli nënvizoi se pjesëmarrja masive do të jetë mesazh i qartë për respektimin e së vërtetës dhe të drejtësisë.
“Nesër, Prishtina do të jetë zëri i qytetarëve që kërkojnë drejtësi të paanshme dhe mbrojtje të vlerave të luftës çlirimtare,” tha Tasholli.
Platforma “Liria ka Emër” falënderoi Kryetaren e Kuvendit për pritjen dhe diskutimin konstruktiv, duke ritheksuar thirrjen që nesër qytetarët të bashkohen në marshin “Drejtësi, jo politikë” në Prishtinë.
Pasditen e së dielës, një burrë është gjetur pa shenja jete në shtëpinë e tij në Graçanicë.
Policia ka njoftuar se ekipi mjekësor ka konstatuar vdekjen e viktimës në vendin e ngjarjes.
Me vendim të prokurorit trupi i pajetë është dërguar në IML për obduksion.
“Një mashkull kosovar është gjetur i vdekur në shtëpinë e tij. Në vendin e ngjarjes kanë dalë njësitë përkatëse dhe ekipi mjekësor i cili ka konstatuar vdekjen e viktimës. Me vendim të prokurorit trupi i pajetë është dërguar në IML për obduksion”, thuhet në raportin e policisë.
Kryeministri i Kosovës, Albin Kurti në takim me shefin e zyrës së Bashkimit Evropian, Aivo Orav, ka thënë se BE është organizata e paqes dhe sigurisë e ku nënvizon se është e nevojshme që Kosova ta marr statusin e vendit kandidat dhe pyetësorin nga Komisioni Evropian.
Kurti poashtu thotë të kenë biseduar edhe për marrëveshjen për Planin e Rritjes që u miratua në Kuvend të premten.
“E falënderova ambasadorin Orav, shefin e misionit të Bashkimit Evropian në vendin tonë, për urimin e tij me rastin e konstituimit të Kuvendit të legjislaturës së 10-të dhe për formimin e Qeverisë, si dhe për aprovimin e Planit të Rritjes së Bashkimit Evropian, i cili ka vlerë të gjithmbarshme për Republikën tonë prej 882.6 milionë euro. Nga këto, afër 30 për qind janë grante, ndërkaq mbi 70 për qind janë kredi”, tha Kurti, raporton EO.
I pari i ekzekutivit nënvizoi se BE është partner i besueshëm i Kosovës.
“Gjithashtu, i përsërita zotimet e Republikës së Kosovës se shteti ynë do të jetë, siç ka qenë përherë, partner i besueshëm dhe serioz i Bashkimit Evropian. Ne konsiderojmë që Bashkimi Evropian është organizata e paqes dhe sigurisë, ku ne dëshirojmë edhe të kontribuojmë, edhe të përfitojmë. Për këtë është e nevojshme që sa më parë të marrim statusin e vendit kandidat dhe pyetësorin nga Komisioni Evropian, që do të na ndihmojë t’i përshpejtojmë agjendën e reformave, që padyshim do të jetë prioritet i Qeverisë sonë”, theksoi Kurti.
Policia Rajonale e Ferizajt ka njoftuar se gjatë javës 09–15 shkurt 2026, janë ndërmarrë një sërë masash për parandalimin e aksidenteve në komunikacion.
Gjatë kësaj periudhe janë shqiptuar gjithsej 1.443 gjoba kundërvajtëse, ndërsa 27 patentë shoferësh janë pezulluar për shkelje të rënda në trafik.
Sipas statistikave të policisë, janë regjistruar 25 aksidente, nga të cilat: 12 aksidente me lëndime, ku kanë mbetur të lënduar 15 personA dhe 13 aksidente me dëme materiale.
Policia Rajonale e Ferizajt thekson se do të vazhdojë me aktivitete të shtuara për parandalimin e aksidenteve dhe apelon tek shoferët që të respektojnë rregullat e trafikut dhe të jenë të kujdesshëm në rrugë.
Qytetarët ftohen të bashkëpunojnë me policinë dhe të raportojnë çdo kundërvajtje përmes stacionit më të afërt policor, aplikacionit digjital “Lajmëro Policinë” ose në numrin kujdestar 192.
Mëngjesin e së hënës, ambasadori i Bashkimit Evropian në Kosovë, Aivo Orav zhvilloi një takim me kryeministrin Albin Kurti.
Sipas njoftimit zyrtar, në këtë takim Orav uroi Kurtin për rizgjedhjen e tij të tretë si kryeministër, transmeton klankosova.tv.
Tutje, në njoftim theksohet se ata ranë dakord të rifillojnë punën për reformat për të çuar përpara rrugën evropiane të Kosovës.
“Ambasadori i BE-së në Kosovë, Aivo Orav, uroi sot kryeministrin Albin Kurti për rizgjedhjen e tij të tretë. Ata ranë dakord të rifillojnë punën për reformat për të çuar përpara rrugën evropiane të Kosovës”, thuhet në njoftimin e Zyrës së BE-së në Kosovë.
Kryeministri i Shqipëri, Edi Rama, do të qëndrojë sot për vizitë zyrtare në Kosovë.
Me këtë rast, Policia e Kosovës ka njoftuar se do të ndërmarrë masa për ruajtjen e rendit dhe qetësisë publike, si dhe për rregullimin e trafikut gjatë kohës së lëvizjes së eskortës dhe qëndrimit të delegacionit në vend.
Sipas njoftimit, për të mundësuar qarkullimin e lirë të eskortës, nga pika kufitare në Aeroport dhe përgjatë itinerarit të paraparë sipas agjendës zyrtare, do të ketë ndërprerje të përkohshme të qarkullimit në disa segmente rrugore, në intervale të shkurtra kohore. Në disa raste, trafiku do të riorientohet në rrugë alternative.
Policia ka kërkuar mirëkuptim nga qytetarët dhe pjesëmarrësit në trafik gjatë zhvillimit të kësaj vizite zyrtare.
Dy vëllezërit e Hashim Thaçi, Gani Thaçi dhe Idriz Thaçi, bashkë me disa qytetarë, kanë udhëtuar sot drejt Hagë për ta ndjekur nga afër procesin gjyqësor që po zhvillohet atje.
Ata janë parë pranë objektit të gjykatës, ku po mbahet seanca e radhës.
Në Dhomat e Specializuara të Kosovës, me seli në Hagë, sot vazhdon seanca e deklaratave përmbyllëse në gjykimin ndaj ish-krerëve të UÇK-së: Hashim Thaçi, Kadri Veseli, Rexhep Selimi dhe Jakup Krasniqi.
Mbrojtja e Jakup Krasniqit ka sot edhe një orë e gjysmë kohë për të përfunduar deklaratën e saj përmbyllëse, të cilën e ka nisur të premten.
Aiden Ellis, i cili përfaqëson Jakup Krasniqin, ka thënë të premten se, sipas provave, nuk është vërtetuar që klienti i tij të ketë pasur përgjegjësinë kryesore për komunikatat.
Sipas mbrojtjes, në dosjen e Prokurorisë thuhet se Krasniqi ka pasur përgjegjësi parësore për komunikatat dhe se ishte hartues e redaktor i tyre.
“Nuk është vërtetuar asnjëherë që z. Krasniqi e ka pasur përgjegjësinë kryesore për komunikatat. Unë do të përfundoj duke thënë se paragrafi 554 i dosjes së Prokurorisë është një shembull i qartë i mënyrave se si ka dështuar Prokuroria”, tha Ellis.
Avokatja e Jakup Krasniqit, Venkateswari Alagendra, tha se Jakup Krasniqi duhet të shpallet i pafajshëm dhe të kthehet pranë familjes së tij.
Ajo theksoi në fjalën e saj se Krasniqi gjendet në paraburgim në Hagë prej 1.926 ditësh.
“Parashtrojmë se ekziston vetëm një opsion: që të merrni vendim pafajësie ndaj të gjitha akuzave të ngritura ndaj Jakup Krasniqit. Në fund të parashtrimit, do t’i bëjmë thirrje gjykatës së nderuar që ta shpallë të pafajshëm Krasniqin dhe ta lejojë këtë zotëri 75-vjeçar të kthehet pranë familjes së tij dhe t’i kalojë vitet që i ka caktuar Zoti me familjen”, tha ajo.
Avokatja Alagendra deklaroi se Zyra e Prokurorit të Specializuar mbështetet në spekulime dhe pretendime të pambështetura në akuzat ndaj Krasniqit. Sipas saj, nuk ka asnjë dëshmitar që pretendon se Krasniqi ka keqtrajtuar ndokënd.
Mbrojtja e Krasniqit e akuzoi Prokurorinë se ka përzgjedhur dokumente dhe pjesë të dëshmive të dëshmitarëve sipas interesave të saj, duke shtuar se ka injoruar pjesët e dëshmive që nuk i përshtaten ZPS-së.
Fjala përmbyllëse e Prokurorisë filloi më 9 shkurt 2026, dhe përfundoi një ditë më pas, më 10 shkurt, kur kryeprokurorja e specializuar, Kimberly West, kërkoi dënim unik prej 45 vjetësh burgim për secilin nga katër të akuzuarit.
Po më 10 shkurt u dha fjala për mbrojtjen, ndërsa më 11 shkurt 2026 fjalën përfundimtare e dha mbrojtja e Hashim Thaçit dhe filloi ajo e Kadri Veselit, e cila vazhdoi edhe më 12 shkurt. Pas përfundimit të saj, filloi mbrojtja e Rexhep Selimit.
Të gjithë kërkuan që ish-krerët e UÇK-së të lirohen të pafajshëm, duke thënë se prokuroria nuk e ka argumentuar të kundërtën. /T7
Një rezolutë e mbështetur nga 30 deputetë zviceranë është adresuar sot në Dhomat e Specializuara të Kosovës, ka bërë të ditur OVL-UÇK.
Kjo iniciativë ka ardhur si rezultat i angazhimit të veprimtarit Sali Bislimi dhe është pjesë e përpjekjeve të vazhdueshme ndërkombëtare për një proces të drejtë dhe të paanshëm. Rezoluta është dorëzuar në Hagë në bashkëpunim me kryetarin e OVL-UÇK-së, Hysni Gucati.
Bislimi ka theksuar se përmes rezolutës kërkohet një proces i drejtë dhe i paanshëm.
“Është një thirrje edhe nga parlamentarët zviceranë, në emër të Organizatës Joqeveritare ‘Zëri Perëndimor i Kosovës’, që kemi kërkuar një proces të drejtë, të paanshëm dhe të barabartë”, ka theksuar Bislimi.
Sipas tij, Gjykata nuk i ka përmbushur këto standarde dhe ai ka kritikuar kërkesën e Prokurorisë për dënime të rënda.
“Në realitet, kjo Gjykatë asnjërën nga këto nuk i ka pasur. Jemi këtu edhe për të protestuar dhe është shumë e vështirë që një Prokurori e tillë të bëjë një skandal duke kërkuar 45 vite dënim. Kjo është edhe një ofendim për drejtësinë kombëtare, për vetë Hagën dhe për krejt këtë Gjykatë”, ka deklaruar ai.
Sipas Bislimit, prania e qytetarëve në Hagë është për të mbrojtur historinë dhe luftën e UÇK-së.
“Ne s’mund të jemi pa zë. Jemi këtu për ta dëshmuar veten, kulturën tonë, historinë dhe për ta mbrojtur atë, e cila nuk guxon për asnjë çmim të njolloset”, përfundoi ai.
Ndërkaq, kryetari i OVL-UÇK-së, Hysni Gucati, ka deklaruar se ky proces gjyqësor synon ta njollosë luftën e UÇK-së, por sipas tij kjo nuk do të ketë sukses.
“Ky gjykim është i panevojshëm, me fabrikim dhe falsifikim dosjesh, me njerëz të paguar e të infiltruar, të cilët kanë bashkëpunuar me Serbinë dhe tani kanë ardhur të dëshmojnë këtu duke u munduar ta njollosin luftën e UÇK-së. Besoj se s’do t’ia arrijnë qëllimit, sepse lufta ka qenë e shenjtë dhe e popullit. Ne kemi luftuar për ta çliruar vendin tonë një herë e përgjithmonë”, deklaroi Gucati para gazetarëve.
Ndërkohë, në Hagë vazhdon gjykimi ndaj ish-udhëheqësve të UÇK-së: Hashim Thaçi, Kadri Veseli, Rexhep Selimi dhe Jakup Krasniqi, të cilët përballen me akuza për krime lufte dhe krime kundër njerëzimit. Të katërtit janë deklaruar të pafajshëm.
Gjatë ditës së sotme pritet që mbrojtja e Krasniqit të paraqesë fjalën përfundimtare, duke përmbyllur fazën e deklaratave përfundimtare. Pas kësaj, çështja do të kalojë në shqyrtim nga trupi gjykues, i cili, sipas procedurave, ka afat deri në tre muaj për të marrë vendimin ose për të shtyrë shpalljen e aktgjykimit. /RTK
Presidenti i Shtetet e Bashkuara të Amerikës, Donald Trump, i ka dërguar letër urimi Presidentes së Kosovë, Vjosa Osmani, me rastin e 18-vjetorit të shpalljes së Pavarësisë së Kosovës.
Sipas njoftimit të Presidencës, në mesazhin e tij Trump ka përgëzuar popullin e Kosovës për këtë përvjetor të rëndësishëm, duke rikonfirmuar mbështetjen e palëkundur të SHBA-ve për sovranitetin dhe integritetin territorial të Republikës së Kosovës.
Ai ka shprehur gjithashtu gatishmërinë për thellimin e partneritetit ndërmjet dy vendeve, veçanërisht përmes rritjes së tregtisë dhe investimeve, me qëllim avancimin e prosperitetit të përbashkët. Në letër theksohet se Shtetet e Bashkuara janë të gatshme të punojnë krah Kosovës për forcimin e paqes dhe stabilitetit në dobi të ndërsjellë.
Presidenti Trump ka falënderuar Presidenten Osmani dhe popullin e Kosovës për mbështetjen ndaj përpjekjeve amerikane për paqe, si dhe ka mirëpritur Kosovën si anëtare themeluese të Bordit të Paqes, iniciativë që synon ta bëjë botën më të sigurt, më të fortë dhe më të begatë.
Në përmbyllje të mesazhit, ai ka shprehur besimin në forcimin e mëtejshëm të bashkëpunimit dhe partneritetit ndërmjet dy shteteve.
Urimi i plotë: