Blog

Avokati i Jakup Krasniqit, Aidan Ellis po paraqet fjalët përmbyllëse në gjyqin e madh ndaj Thaçit dhe të tjerëve.

“Kryerja e krimeve nga anëtarë të policisë ushtarake, nuk është provë sipas nesh, që zotëri Krasniqi të ketë luajtur rol në këtë rregullore, dhe që ky rol të ketë pasur kontribut të konsiderueshëm në kryerjen e krimeve”, tha Ellis.

Nga ana tjetër, avokati tha se Prokuroria e Specializuar, në dosjen përfundimtare, sipas tij, në mënyrë të gabuar përpiqet të lidh praninë e Krasniqit në disa vende krimesh të pretenduara, me krimet e kryera.

“Pa dhënë një dëshmi të vetme, apo provë të vetme nëse prania e tij ka kontribuar në ndonjë mënyrë në kryerjen e krimeve”, shtoi ai.

Kryetari i PDK-së, Bedri Hamza, ka folur në seancën e Kuvendit për Projektbuxhetin e Kosovës për vitin 2026, duke deklaruar rëndësinë e këtij dokumenti për vendin.

Ai ka sqaruar se miratimi i buxhetit është i nevojshëm për të siguruar pagesat për të gjitha kategoritë, për të mbështetur shpenzimet operative, por tha se nuk po e kupton këtë urgjencë.

“Po e kuptoj rëndësinë që vendi me pas buxhet, dhe ne asnjë arsye ose moment mos me pas situata, ku nuk mund t’i kryn pagesat për krejt kategoritë, por ne treguam vullnet të mirë, dhe besoj që kemi bërë mirë që kemi votuar vendimin për zgjatjen e shfrytëzimit për ndarje buxhetore, dhe kështu treguam vullnet të mirë, sepse votuam që kjo pikë e rendit të ditës të vendoset sot, sepse kërkoj shmangie prej procedurave e kemi rreth 1/3 e votave të pranishme. Nuk e kuptoj pse kjo urgjencë kaq e madhe, ne nuk do duam dhe nuk lejojmë vonesa, pse kjo urgjencë, por vetëm dy arsye më shkojnë ndërmend, e para që ti pamundësojmë deputetë opozitë dhe pozitë me diskutimin e tyre, sigurisht që shprehin edhe kritikë, mirëpo të japin propozim edhe alternativë që sigurisht ndihmojnë pozitivisht në këtë dokument kaq të rëndësishëm që po e shfrytëzojmë sot, dhe e dyta nuk dua me besu sepse vendi ka nevojë për stabilitet, dhe nuk dua me besu që kjo çështje lidhet me rastin e zgjedhjes së presidentit apo presidentes. Projektbuxheti për vitin 2026 është buxhet që menaxhon statuquo, kjo si rezultat i rritjes së shpenzimeve operative dhe, posaçërisht, të transfereve dhe subvencioneve, kjo ndihmon në rritjen e konsumit në periudhë afatshkurtër, por në periudhë afatgjatë.Këto shpenzime të rritura, për subvencione dhe transfere, e zvogëlojnë hapësirën fiskale për periudhat e ardhshme dhe sigurojnë që do ndikojnë në pamundësinë e zgjerimit të bazës prodhuese dhe eksportuese”, tha mes tjerash Hamza.

Edi Rama, Kryeministri i Shqipërisë, ka folur për herë të parë gjatë prezantimit të nismës ligjore për ndryshimet në nenin 242 dhe për dorëheqjen e Belinda Ballukut. Rama ka thënë se ministrja e ka dorëzuar 3 herë dorëheqjen dhe ai nuk e ka pranuar.

“Belinda Balluku ma ka dorëzuar 3 herë dorëheqjen. I kam atje. Herën e parë ma dorëzoi dorëheqjen kur u ngrit akuza, herën e dytë kur u mor vendimi i pezullimit dhe herën e tretë kur Kushtetuesja nuk mori vendim. Por unë nuk i kam pranuar”, tha Rama.

Ai është shprehur se lidhur me imunitetin e zv.kryeministres Belinda Balluku do të shprehet Parlamenti më parë dhe pastaj do të kalojnë ndryshimet në kodin e procedurës penale.

“Rasti konkret është në proces në Kuvendin e Shqipërisë dhe do të trajtohet me gjithë përgjegjësinë që kemi si shumicë qeverisëse. Sa i përket aspektit kohor, Parlamenti do të shprehet për imunitetin dhe më pas do të kalojë në votim ky ndryshim.

Nuk ka asnjë lidhje me rastin konkret. Për aspektin tjetër, nuk është kjo dita për të folur, do të flasim në momentin e duhur, kur të bëhen procedurat e tjera”, tha Rama. /euronews/

Në seancën e kuvendit të Kosovës, ministri Hekuran Murati ka kërkuar që të procedohet projektligji për buxhetin.

Murati ka thënë se është nevojë emergjente që ky projektligj të miratohet. Ai ka theksuar se e vetmja gjë që ndryshon në këtë projektligj është për pagën e 13’të që të bëhet në fillim të vitit e jo në fund të vitit.

Tutje, ai ka treguar se si do bëhet ndarja buxhetore.

“Është një buxhet që kufiri i shpenzimit është rreth 4 miliardë euro. Këto shpenzime mund të zbërthehen në kategori paga dhe shtesa 980 milionë euro, mallra dhe shërbime 545 milionë euro, subvencione dhe transfere 1 miliardë e 358 milionë euro, shpenzime kapitale 998.4 milionë euro, si dhe 100 milionë euro të tjera të financuara nga klauzola e investimeve”, deklaroi Murati.

Deputeti i Kuvendit të Kosovës nga radhët e PDK-së, Xhavit Haliti është deklaruar në lidhej me çështjen e zgjedhjes së presidentit të Kosovës.

Haliti deklaroi se deputetët e kanë obligim që të votojnë dhe të zgjedhin presidenten e Kosovës.

Po ashtu ai tha se diskutimet veçse po bëhen në secilën parti.

Por ai nënvizoi se natyrisht Vetëvendosjes si parti fituese është më e fokusuar në këtë pikë.

“Kandidatë ka shumë, me na pyet 120 deputetë thonë jam më i miri për President, por ka dhe jashtë parlamentit”, deklaroi Haliti derisa u pyet se kush mund të jetë kandidat për President.

Gjithashtu Haliti u pyet nëse do të votoj pro Vjosa Osmanit për një mandat të dytë, ai deklaroi se vota e tij është “Votë e PDK-së”.

Kuvendi i Kosovës ka nisur seancën për buxhetin, çështje kjo për të cilën nuk pati pajtim në sesionin e fundit, që u mbajt të premten.

PDK, LDK dhe AAK, ishin kundër që projektligji të votohet me procedurë të shpejt, pa pasur diskutim paraprakisht dhe pa një analizë të detajuar.

Pasi opozita kërkoi tri ditë shtesë, ndërsa është bërë thirrje që të jetë i pranishëm edhe kryeministri Albin Kurti.