ATV

Blog

  • Sonte Drita synon të përmbysë rezultatin nga ndeshja kundër Celjes në Conference League

    Sonte Drita synon të përmbysë rezultatin nga ndeshja kundër Celjes në Conference League

    Kampioni i Kosovës Drita sonte zhvillon ndeshjen e kthimit në UEFA Conference League,ku në udhëtim luan kundër skuadrës sllovene Celje.

    Gjilanasit pësuan humbje në ndeshjen e parë ndaj sllovenëve në Fadil Vokrri me rezultat 3:2,dhe në ndeshjen e kthimit Drita synon përmbysjen dhe të siguroj kualifikimin në 1/8 e finales së garës së tretë më të rëndësishme në Evropë.

    Përndryshe trajneri Zekerija Ramadani ka premtuar se skuadra do të bëjë një luftë të madhe për kualifikim,dhe në anën tjetër Ramadani kërkon nga lojtarët të jenë të qetë dhe gjatë 90 minutave të jenë të koncentruar.

    Kujtojmë që ndeshja Celje-Drita e vlerfshme për fazën e play-off-it të Conference League  pritet të nis nga ora 18:45.

  • Një qese me kocka njerëzore gjendet në koshin e mbeturinave në hyrje të një spitali në Greqi

    Një qese me kocka njerëzore gjendet në koshin e mbeturinave në hyrje të një spitali në Greqi

    Një alarm u ngrit mëngjesin e sotëm në ambientet e General Hospital of Karditsa, pasi një qese e gjetur në një kosh plehrash në oborr dyshohet se përmbante kocka njerëzore.

    Sipas informacioneve paraprake nga administrata e spitalit, gjetja u konstatua herët të enjten në mëngjes. Menjëherë pas zbulimit, u aktivizuan procedurat e parashikuara për raste të tilla.

    Në vendngjarje pritet të mbërrijë një ekip i Hellenic Police për të kryer verifikimet e nevojshme, ndërsa një prokuror është nisur për të mbikëqyrur hetimet dhe për të sqaruar rrethanat në të cilat u gjet qesja.

    Mobilizimi i autoriteteve vjen pas urdhrit të Ministrit grek të Shëndetësisë, Adonis Georgiadis, me synimin për zbardhjen e menjëhershme të rastit. Hetimet janë në vijim dhe pritet që ekspertiza mjeko-ligjore të përcaktojë natyrën dhe origjinën e mbetjeve të gjetura.

  • Konspiracioni i rokut që nuk shuhet: Kush e vrau Kurt Cobainin?

    Konspiracioni i rokut që nuk shuhet: Kush e vrau Kurt Cobainin?

    Më shumë se 30 vjet pasi këngëtari i Nirvana-s u gjet i vdekur në moshën 27-vjeçare, rasti mbetet i diskutueshëm – dhe kjo podkastere nuk po e lë çështjen të qetë.

    Në dokumentarin e ri për jetën e saj, Antiheroina [Antiheroine], Courtney Love duket e lodhur nga fakti që disa njerëz vazhdojnë ta fajësojnë për vdekjen e bashkëshortit të saj të ndjerë. “Kurt Cobain futet në qendër të vëmendjes para se të hyjë Courtney”, thotë ajo, duke shtuar: “Nuk do të vijë kurrë ajo kohë kur do të largohem nga ndonjë festë apo darkë me 20 veta dhe një ose dy prej tyre të mos bëjnë shaka: ‘Vë bast se ajo e vrau’”.

    Më 8 prill 1994, trupi i liderit të [grupit] Nirvana-s u zbulua nga një elektricist që mbërriti në shtëpinë e tij në Sietël për të instaluar një sistem sigurie. Cobaini ishte zhdukur për gati një javë pasi u largua – duke kapërcyer gardhin – nga Qendra e Rehabilitimit “Exodus” në Los Anxhelos. Mbi kraharorin e tij ndodhej një armë gjahu “Remington Model 11”, kalibër 20, të cilën e kishte përdorur për t’ia dhënë fundin jetës së tij.

    Si një version i Gjeneratës X i vrasjes së presidentit John F. Kennedy, vdekja e Cobainit, vetëm 27 vjeç, ishte aq tronditëse saqë u bë magnet për teori të ndërlikuara konspirative që pretendonin se ai ishte vrarë. Besimtarët e konspiracionit i drejtohen policisë së Sietlit për çdo javë me kërkesa për rihapjen e çështjes.

    Këto teori janë ringjallur këtë muaj falë podkasteres dhe “hulumtueses së pavarur” Michelle Wilkins. Një video hyrëse në faqen e saj në YouTube, Kush e vrau Kurtin? [Who Killed Kurt?] hapet me një zë të montuar të Cobainit që flet në mënyrë rrëqethëse – sikur nga përtej varrit. “Mjaft me këto budallallëqe për vetëvrasjen. U vrava me gjakftohtësi”, thotë zëri – teksa dëgjohet një e shtënë dramatike me armë – “prej njerëzve që ishin pranë meje.”

    Wilkinsi tërhoqi vëmendjen e mediave duke mbledhur një ekip specialistësh nga sektori privat, për të shqyrtuar dokumentet e qasshme për publikun (raportet e policisë, fotografitë e vendngjarjes) dhe një kopje të pjesshme të autopsisë së Cobainit, e cila pretendohet se iu dha nga një i afërm i tij. Ajo realizoi një punim të rishikuar nga kolegët, të botuar në International Journal of Forensic Science, i cili pohon se Cobaini ishte viktimë e një vrasjeje dhe se skena ishte inskenuar për t’u dukur si vetëvrasje. Teoria e tyre? Cobainit ia dhanë një “hotshot” (një dozë shumë e pastër heroine) përpara se dora e tij të vendosej mbi tytën e armës.

    Ndër gjetjet e tyre përfshihen mostrat e bartjes së gjakut në xhinset e Cobainit, që tregojnë se trupi i tij ishte lëvizur pas vdekjes. Raporti përmend gjithashtu dëmtime të organeve që, sipas tyre, nuk përputhen me vdekjen nga një armë gjahu (por, përputhen me një mbidozë heroine), si dhe mungesën e gjakut të pompuar në mushkëritë e tij. “Patologët tanë mjekoligjorë besojnë se ai ishte i vdekur përpara se arma të shkrepej”, thotë Wilkins. “Nuk ka asnjë mundësi që ai ta ketë përdorur atë armë”. Për më tepër, testimet e tyre me armë identike hodhën dyshime mbi mundësinë që vetë Cobaini ta kishte përdorur armën e madhe, përderisa niveli jashtëzakonisht i lartë i heroinës në gjakun e tij, sipas tyre, e bënte të paaftë për ta operuar.

    Ndërkohë, analiza e shkrimit të dorës në letrën e vetëvrasjes së Cobainit tregoi se ajo përmbante dy stile të ndryshme – ku pjesa e fundit, sipas tyre, i përkiste dikujt “të afërt me Cobainin”. “Nëse e shikoni letrën, do të vini re se dy pjesët duken ndryshe”, thotë Wilkins. “Në pjesën e sipërme flitet për Nirvana-n dhe për planin për të lënë grupin. Katër rreshtat e fundit janë lamtumira më absurde dhe dramatike – ‘Mirupafshim, botë mizore’ – që keni lexuar ndonjëherë”.

    Pasi e zbuloi Nirvana-n në moshën 17-vjeçare, Wilkinsi u bë adhuruese e përkushtuar. Çfarë e ka shtyrë atë dhe të tjerët që t’i kalojnë tri vjet (dhe të mbledhin “dhjetëra mijëra dollarë”) për të hetuar vdekjen e Cobainit, tani, më shumë se 30 vjet pas ngjarjes? “Ka ende të rinj që i japin fund jetës sepse besojnë se Kurti e bëri këtë”, përgjigjet Wilkins, 50 vjeçe. “Është një shqetësim shëndetësor edhe sot. Kjo duhet të ndalet”. Ajo shton se “në vitin 2026, njerëzit kërkojnë transparencë. Janë lodhur duke u gënjyer ose duke u manipuluar nga autoritetet”.

    Një ditë pasi u zbulua trupi i Cobainit, presidenti Bill Clinton e pyeti Eddie Vedderin e [grupit] Pearl Jam-it nëse duhej t’i drejtohej kombit (Vedderi e këshilloi të mos e bënte). Është e lehtë të kuptohet pse. Nirvana e solli skenën nëndheshme në rrjedhën kryesore: albumi Nevermind i vitit 1991 e rrëzoi Michael Jacksonin nga maja e top-listës “Billboard”. Te figura e Cobainit shoqëria krijoi një “zë të një brezi”, rebel dhe ngurrues, i cili u bë edhe më i famshëm pas vdekjes së tij.

    Edhe sot, pjesërisht për shkak se iu bashkua tragjikisht “Klubit 27” – ku bëjnë pjesë Jimi Hendrix dhe Amy Winehouse – Cobaini mbetet i ngrirë në kohë si simbol përfundimtar për autsajderat e torturuar.

    Teoritë konspirative filluan të qarkullonin menjëherë pas vdekjes së Cobainit, por ishte dokumentari i diskutueshëm i vitit 1998, Kurti dhe Kortni [Kurt & Courtney] nga Nick Broomfield, ai që i bëri ato pjesë të rrjedhës kryesore. Dyshimet e Wilkinsit ndaj përfundimit zyrtar të policisë së Sietlit për vetëvrasje, u ndezën pikërisht pasi ajo pa filmin.

    Në të takojmë muzikantin e pankut, El Duce, i cili pretendon se Love ia kishte ofruar 50 mijë dollarë për ta “hequr qafe” Cobainin (pak më vonë, El Duce u gjet i vdekur pasi kishte përfunduar i dehur mbi shinat e trenit). Intervistohet gjithashtu babai i lëçitur i Loveit, i cili e paraqet atë në një dritë jo të favorshme. Në fund, Broomfieldi arrin në përfundimin se Love nuk ishte e përfshirë. “Mendoj se [Kurti] bëri vetëvrasje”, ka thënë Broomfield. “Nuk mendoj se ka një provë përfundimtare”.

    Por, kjo nuk i ka ndalur kërkuesit e “të vërtetës për Kurtin” që të thellohen edhe më shumë në teori. Pretendimet përfshijnë idenë se Cobaini e inskenoi vdekjen e tij dhe u rikthye si Rivers Cuomo, frontmeni i [grupit] Weezer-it, deri te pohimet e influencueses politike Candace Owens, e cila së fundmi tha se Love i kishte treguar se CIA ishte përfshirë në vdekjen e Cobainit.

    Megjithatë, hipoteza më këmbëngulëse është se Love, nga frika se Cobaini po përgatitej ta shkurorëzonte, e vrau bashkëshortin për paratë e tij. Udhëheqësja e grupit Hole ishte demonizuar nga adhuruesit e Nirvana-s që në ditët e para të marrëdhënies së tyre të trazuar. Kur Hole publikoi albumin e tyre të rëndësishëm Live Through This, vetëm një javë pas vdekjes së Cobainit, dhimbja e saj u shfaq publikisht – madje, në një nga koncertet e grupit, dikush hodhi fishekë arme gjahu në skenë.

    Forca shtytëse pas këtyre pretendimeve është Tom Grant, një hetues privat i cili, në mënyrë ironike, ishte punësuar fillimisht nga Love për të gjetur Cobainin pasi ai u arratis nga rehabilitimi në vitin 1994. Granti pretendoi se avokatja e Cobainit, Rosemary Carroll, i kishte thënë privatisht se ai po planifikonte të ndryshonte testamentin për të përjashtuar Lovein (Carroll nuk ka komentuar kurrë publikisht mbi akuzat). Në dokumentarin e vitit 2015, Zhytur në zbardhues [Soaked In Bleach] – i cilësuar nga NME si “sensacional dhe i cekët” – nënkuptohet fuqishëm se Cali DeWitt (i lindur si Michael DeWitt), dadoja e vajzës së tyre Frances Bean Cobain, kishte komplotuar me Lovein për të vrarë Kurtin.

    Thërrimet e tjera buke e kanë ushqyer këtë histori, përfshirë një padi të ngritur në vitin 2018 nga këngëtari i grupit The Eeries, Isaiah Silva, i cili ishte i martuar me Frances Beanin nga viti 2014 deri në 2017. Ai pretendoi një komplot të çuditshëm sipas të cilit Love kishte tentuar ta vriste për të rimarrë kitarën Martin të vitit 1959 të Kurtit (atë që ai përdori në sesionin MTV Unplugged in New York të Nirvana-s, në vitin 1993). Silva gjithashtu pretendoi se nëna e Cobainit, Wendy O’Connor, besonte se “Love ishte e përfshirë në vetëvrasjen e supozuar të djalit të saj” – pavarësisht se ajo (si shumica e miqve dhe familjarëve të tij) e ka pranuar publikisht përfundimin se ai i dha fund jetës së vet.

    Shtrirja e gjerë kulturore e këtij pretendimi të pabazë u mishërua në një moment të emisionit humoristik Never Mind the Buzzcocks në vitin 2009, kur Noel Fielding i tha me shaka prezantuesit Simon Amstell se shoqja e tij Love do ta “shtypte si një shkopth [Twiglet]”, ndërsa ai iu përgjigj me ironi therëse: “Ose do të më vriste dhe do ta bënte të dukej si vetëvrasje”. Në studio dëgjohen psherëtima habie, ndërsa në ekran shfaqet një paralajmërim: “Simon Amstell e ka patjetër gabim”.

    Megjithatë, mund të argumentohet se për dikë që supozohet se donte ta shihte të vdekur, Love duket se bëri përpjekje titanike për ta mbajtur gjallë. Vetëvrasja e Cobainit erdhi pas disa ndërhyrjeve të raportuara për depresionin dhe abuzimin e tij me drogën, përfshirë një ndërhyrje, vetëm një javë para vdekjes, më 25 mars, kur Love e dëshpëruar ftoi 10 nga miqtë e tij në shtëpi, e kërcënoi se do ta linte dhe u kërkoi shokëve të grupit, Pat Smear dhe Krist Novoselic, të deklaronin se do ta shpërndanin Nirvana-n nëse ai refuzonte të hynte në rehabilitim. Më vonë, Love u pendua për atë pusi. “Ai budallallëku i viteve tetëdhjetë për mirëqenien e të dashurit me varësi – nuk funksionon”, u ankua ajo.

    Në një intervistë të vitit 2019 për The Independent, ish-menaxheri i Nirvana-s, Danny Goldberg, i hodhi poshtë teoritë e vrasjes si “qesharake”. “Ai vrau veten”, tha Goldberg. “E pashë një javë më parë, ishte në depresion. U përpoq të vriste veten gjashtë javë më herët. Kishte folur dhe shkruar shpesh për vetëvrasjen, ishte nën efektin e drogës, mori një armë. Pse njerëzit spekulojnë për këtë? Tragjedia e humbjes është aq e madhe saqë njerëzit kërkojnë shpjegime të tjera”.

    Wilkinsi mohon se motivohet nga nevoja për t’i dhënë kuptim të pakuptimtës. “Edhe nëse Kurti do t’ju kishte telefonuar një natë para se të vdiste dhe të kishte thënë: ‘Jam në depresion të thellë. Mendoj se do të vras veten’, shkenca tregon se ai nuk e bëri”, kundërshton ajo. “Pra, në fakt nuk ka rëndësi. Njerëzit kanë këtë imazh të Kurtit si një artist tragjik, romantik, shumë i bukur për këtë botë dhe i paaftë për ta përballuar. Kjo është një ide shumë shekspiriane për atë se kush ishte Kurti”, shton ajo (Wilkins nuk e takoi kurrë Cobainin).

    Wilkins thotë se u ndje e shpërfillur nga departamenti i policisë së Sietlit kur ekipi i saj paraqiti gjetjet. Policia qëndron pas vlerësimit për vetëvrasje të bërë nga detektivi Mike Ciesynski, pasi ai e rishikoi çështjen për herë të fundit në vitin 2014.

    Në internet, reagimet ndaj raportit nga adhuruesit e Nirvana-s dhe Hole-it kanë qenë të përziera. Shumë njerëz theksojnë se gjetjet e ngjashme mjekoligjore janë ngritur edhe më parë pa ndonjë përfundim, ndërsa ka të tjerë që nënvizojnë mizogjininë në teoritë e pandërprera “Courtney e vrau Kurtin”. “Është marrëzi. Kjo ndodh çdo disa vjet dhe nuk ofron asgjë”, komenton njëri. “Njësoj si ‘më në fund e zbuluam kush ishte Xhek rrjepësi [Jack the Ripper]’”!

    Love ende nuk është përgjigjur ndaj raportit të tyre, por një “burim” i cituar në Daily Mail i ka hedhur poshtë teoritë e përsëritura të vrasjes si një “version të [filmit] Dita e Marmotës [Groundhog Day]” mbushur me dhimbje për të. Sa i përket ankthit që një hetim i tillë mund t’i shkaktojë Frances Beanit, e cila ishte vetëm 19-muajshe kur i ati vdiq, Wilkinsi thotë: “Ajo duhet ta dijë se i ati nuk e la me dëshirë. Duhet ta dijë se i ati e donte më shumë se çdo gjë në botë dhe se ai kurrë nuk do ta kishte bërë këtë, dhe kjo do t’i sjellë shumë paqe në planin afatgjatë”.

    “Njerëzit duan të besojnë se Kurt Cobain ishte një figurë tragjike”, thotë Wilkins. “Dhe, ajo që ndodhi ishte një tragjedi – thjesht jo i njëjti lloj tragjedie që ata besojnë”.

    Nga: Gary Ryan / The Telegraph (titulli: Who killed Kurt Cobain? The rock conspiracy that won’t die)
    Përkthimi: Telegrafi.com

  • ‘Faleminderit shef’, kompania kineze shpërndanë 26 milionë dollarë bonus në festën e fundvitit

    ‘Faleminderit shef’, kompania kineze shpërndanë 26 milionë dollarë bonus në festën e fundvitit

    Një kompani kineze ka grumbulluar 26 milionë dollarë në para të gatshme për festën e fundvitit, duke u lejuar punonjësve të shkojnë në shtëpi me aq sa mund të mbajnë.

    Firma, Henan Kuangshan Crane Co. Ltd, mbajti festën e saj vjetore më 13 shkurt dhe vendosi shumën e madhe të parave të gatshme në 800 tavolina banketi, transmeton Telegrafi.

    Nën dritat e ndritshme me ngjyra, punonjësit e veshur me kostume u panë duke shikuar me gëzim grumbujt e kartëmonedhave në tavolina.

    Rreth 7,000 njerëz morën pjesë në festimin e kompanisë. Një punonjës arriti të mbante në shtëpi para të gatshme me vlerë 13,000 dollarë, sipas gazetës koreane Chosun Daily.

    Gjatë galës së kompanisë, shefi i firmës Cui Peijun thuhet se tha: “Pse po japim rrobalarëse? A mendoni se çmimet e arit janë rritur? Në vitet e kaluara, ne jepnim gjerdanë dhe unaza, sillni paratë dhe u japim të gjithëve edhe 20,000 juanë (2,800 dollarë amerikanë)”.

    Ai tha për metodën e pazakontë të shpërndarjes së bonuseve: “Disa njerëz pyesin pse ne nuk i transferojmë paratë thjesht në llogaritë e tyre, por në këtë mënyrë, janë thjesht shifra të ftohta”.

    Cui mban 98.88% të aksioneve të kompanisë, duke u kthyer në mënyrë efektive një pjesë të madhe të dividentëve të tij punonjësve.

    Kompania, e cila prodhon dhe jep me qira vinça, u krijua në vitin 2002 dhe ka operacione biznesi në mbi 130 kompani. Ka një histori bujarie ndaj punonjësve të saj.

    Në vitin 2024, kompania regjistroi një fitim neto prej 38 milionë dollarësh, nga të cilat rreth 24 milionë dollarë iu dhanë punonjësve.

    Dhe për të festuar Ditën Ndërkombëtare të Gruas marsin e kaluar, ajo pati gati 230,000 dollarë në bonuse për gati 2,000 punonjëse femra.

    Peijun ka folur më parë për motivimin e tij për dhënien e kaq shumë parave stafit të tij: “Nuk është se më pëlqen të jap para, është se të rinjtë janë të ngarkuar me kredi makinash dhe hipoteka dhe çdo lehtësim që mund të ofrojmë ndihmon”.

  • Zogaj: Kurti e përdori familjen Jashari për eliminimin e Vjosës si opsion

    Zogaj: Kurti e përdori familjen Jashari për eliminimin e Vjosës si opsion

    Analisti Petrit Zogaj ka komentuar zhvillimet e fundit rreth çështjes së presidentit të ri.

    Ai ka bërë me dije Kurti e ka përdorur familjen Jashari për të eliminuar Vjosa Osmanin si opsion.

    Në profilin e tij në “Facebook”, Zogaj ka shkruar se kjo vërehet edhe nga deklarimi i fundit i Murat Jasharit.

    “Kurti paska arrite me e perca edhe familjen Jashari. Ne nje moment, Murati, duket i mllefosur, po thote “ia kemi bo te qarte, ose, une ia kam bo te qarte.’ Pra, njehere po flet ne shumes, e pastaj po e ndryshon ne veten e pare per refuzimin. Kurti e perdori familjen Jashari (sikurse nuk kishte emra specifik) per eliminimin e Vjoses si opsion”, ka shkruar ai.

  • Koha më e mirë për të pirë kafe që të mos ndikojë në gjumin tuaj

    Koha më e mirë për të pirë kafe që të mos ndikojë në gjumin tuaj

    Kafeja mund të përmirësojë fokusin tuaj dhe ta bëjë më të menaxhueshëm fillimin e ditës. Por nëse kafeja e pasdites ju mban zgjuar në orën 3 të mëngjesit, problemi mund të jetë koha e konsumit.

    Ja si të shijoni kafenë pa e komprometuar gjumin tuaj.

    Kur të ndaloni pirjen e kafes për një gjumë më të mirë

    Secili reagon ndryshe ndaj kafeinës, kështu që nuk ka një rregull të përgjithshëm për kohën se kur duhet të ndaloni pirjen e kafes. Megjithatë, zakonisht rekomandohet të shmangni kafetë pas mesditës për shkak të përmbajtjes së kafeinës.

    Sa kohë qëndron kafeina në trup ndryshon nga personi në person, me studime që sugjerojnë një interval prej 2 deri në 10 orë përpara se të eliminohet plotësisht. Kjo do të thotë që për disa njerëz, një latte në orën 15:00 mund të ndikojë ende në gjumin e natës.

    Faktorë që ndikojnë në kohëzgjatjen e efektit të kafeinës:

    Gjenetika: Disa njerëz metabolizojnë kafeinën shpejt, të tjerët më ngadalë. Variacionet gjenetike mund të bëjnë që efektet e kafesë të zgjasin më shumë dhe të ndërhyjnë në gjumë.

    Ndjeshmëria ndaj gjumit: Nëse tashmë keni probleme me pagjumësinë, edhe një sasi e vogël kafeine vonë në ditë mund të ndikojë në gjumin tuaj.

    Stresi dhe mungesa e gjumit: Stresi dhe gjumi i pakët rrisin efektet e kafeinës. Kur jeni të lodhur ose të stresuar, ndikimi i kafesë ndjehet më i fortë.

    Pra, përgjigja e trupit tuaj është më e rëndësishme sesa ora në orologj. Vëzhgimi i reagimit tuaj ndaj kafeinës pasdite mund t’ju ndihmojë të gjeni kohën optimale për ju.

    Koha më e mirë e ditës për të pirë kafe

    Shumë njerëz pijnë kafe menjëherë pas zgjimit, ndërsa të tjerët presin pak para se të marrin filxhanin e parë. Koha ideale varet nga reagimi i individit.

    Trupi prodhon natyrshëm kortizol në mëngjes, hormon stresi që ndihmon t’ju bëjë të ndiheni më të zgjuar. Nëse pini kafe për t’u zgjuar, mund të jetë më mirë të prisni pak për t’i lënë hormonet tuaja të bëjnë punën.

    Ka pak studime që tregojnë kohën më të mirë për të pirë kafe, por nëse dëshironi të përshtatni konsumimin e kafesë me rënien e energjisë, mund të prisni 60–90 minuta pas zgjimit, kur nivelet natyrale të kortizolit fillojnë të bien.

    Megjithatë, nëse ju pëlqen të pini kafenë menjëherë në mëngjes, kjo zakonisht nuk është problem përveçse nuk ndjeni ndryshime në energji ose gjumë. Për shumë njerëz, shijimi i kafesë si pjesë e rutinës së mëngjesit funksionon mirë, për sa kohë që nuk e zgjatni konsumimin deri vonë në ditë.

    Këshilla për të shijuar kafenë pa humbur gjumin

    Nëse doni kafenë, por nuk doni të komprometoni gjumin, provoni këto strategji:

    Pini kafenë më herët: Lëvizja e filxhanit të fundit 1–2 orë më përpara zvogëlon mundësinë që kafeina të prishë gjumin. Disa studime sugjerojnë që filxhani i fundit duhet pirë të paktën 8–9 orë para gjumit.

    Përshtatni madhësinë e filxhanit: Një filxhan më i vogël ndihmon të kufizoni marrjen totale të kafeinës pa e hequr plotësisht kafenë.

    Pini kafenë me ushqim: Pirja e kafesë me stomak bosh mund të shkaktojë dridhje për disa njerëz. Kombinimi i kafesë me ushqim ose një ushqim të vogël mund ta shmangë këtë efekt.

    Provoni gjysmë decaf: Nëse kafeina akoma është problem, mund të përzieni kafe normale me decaf për të ulur sasinë e kafeinës pa humbur shijen dhe ritualin.

  • IKD padit MSh-në, kërkon shfuqizimin e tarifës 3 euro për shoqëruesit e pacientëve

    IKD padit MSh-në, kërkon shfuqizimin e tarifës 3 euro për shoqëruesit e pacientëve

    Instituti i Kosovës për Drejtësi ka njoftuar se ka dorëzuar të enjten padi në Gjykatën Supreme të Kosovës, përmes së cilës ka kërkuar shfuqizimin e disa dispozitave të Udhëzimit Administrativ Nr.03/2024 – Bashkëpagesat për Shërbimet Shëndetësore.

    Padia, siç thuhet, kundërshton specifikisht pikën 4 të Shtojcës 3 dhe pikën 5 të Shtojcës 4 të këtij Udhëzimi Administrativ, të cilat parashohin obligimin për pagesën prej 3 euro për çdo ditë qëndrimi në spital për personin shoqërues të pacientit mbi moshën 15 vjeç.

    Në padi thuhet se IKD konsideron se këto pika janë të kundërligjshme, pasi që përmes një akti nënligjor është krijuar një kategori e re tarifimi që nuk gjen bazë në Ligjin për Shëndetësi. Sipas këtij ligji, bashkëpagesa lidhet drejtpërdrejt me shfrytëzimin e një shërbimi shëndetësor nga pacienti. Ndërsa, personi shoqërues nuk është përfitues i ndonjë shërbimi mjekësor, nuk i nënshtrohet trajtimit, diagnostikimit apo procedurave klinike dhe për rrjedhojë, nuk mund të konsiderohet “shfrytëzues i shërbimeve shëndetësore” në kuptim të ligjit.

    Specifikisht, IKD në padi ndër të tjera potencon se “në mungesë të një dispozite të qartë në ligj që e njeh qëndrimin e shoqëruesit si “shërbim shëndetësor”, Ministria nuk ka bazë ligjore që ta kualifikojë atë si objekt bashkë-pagese përmes një akti nënligjor. Për rrjedhojë, paditësi konsideron se pika 4 e Shtojcës 3 dhe pika 5 e shtojcës 4 e Udhëzimit Administrativ të atakuara me këtë padi, janë të kundërligjshme, sepse formulimi në këto pika tejkalon autorizimin e dhënë nga ligji, duke e zgjeruar konceptin e “shërbimit shëndetësor” përtej asaj që është përcaktuar shprehimisht nga Ligji për Shëndetësi.

    Në këtë drejtim, paditësi konsideron se një akt nënligjor nuk mund të krijojë kategori të reja tarifimi që nuk gjejnë bazë në ligjin primar, sidomos kur ato ndikojnë në ushtrimin e të drejtave themelore të qytetarëve. Në këtë rast, mungon edhe baza materiale për ta konsideruar qëndrimin e shoqëruesit si shërbim, e gjithashtu edhe lidhja e nevojshme juridike midis tarifës dhe një veprimtarie shëndetësore të ofruar nga institucioni publik ndaj atij personi”.

    Për më tepër, IKD po ashtu në padi ka përmendur edhe reagimin publik të Shërbimit Spitalor Klinik dhe Universitar të Kosovës (SHSKUK) përmes së cilës ky i fundit ka sqaruar se kjo pagesë nuk aplikohet për pacientin, por lidhet me shfrytëzimin e hapësirave dhe resurseve spitalore nga persona që nuk janë pacientë.

    Në këtë kuptim, IKD konsideron se Ministria ka tejkaluar kompetencat e saj, duke zgjeruar përmes aktit nënligjor konceptin e “shërbimit shëndetësor” përtej asaj që është përcaktuar qartë në ligjin primar.

    IKD e ka ngritur këtë padi në cilësinë e mbrojtësit të interesave të gjera të publikut, në përputhje me Ligjin për Konfliktet Administrative. Në padi, IKD ka vlerësuar se tarifa prej 3 euro në ditë për shoqëruesit cenon të drejtat e qytetarëve dhe krijon barrë financiare shtesë për familjet, sidomos në një sistem shëndetësor ku prania e shoqëruesit shpesh është domosdoshmëri faktike, pasi që, siç thuhet në padi, në praktikën aktuale, qëndrimi i familjarëve përtej orarit të vizitave nuk është zgjedhje e lirë, por nevojë reale për të ofruar mbështetje bazike për pacientët.

  • Moore: Edhe nëse numri i trupave amerikane zvogëlohet, NATO mbetet e pranishme në Kosovë, janë italianët e turqit

    Moore: Edhe nëse numri i trupave amerikane zvogëlohet, NATO mbetet e pranishme në Kosovë, janë italianët e turqit

    Diplomati dhe ish-ambasadori amerikan Jonathan Moore tha se Shtetet e Bashkuara mbeten të përkushtuara ndaj NATO-s dhe vlerësoi se misioni i KFOR-it do të vazhdojë, pasi është i rëndësishëm si për Kosovën ashtu edhe për rajonin e gjerë.

    Moore theksoi se NATO është organizata më e suksesshme e sigurisë në histori dhe vuri në dukje se ndërsa Shtetet e Bashkuara kanë qenë prej kohësh kontribuesi më i madh në Aleancë, shtetet e tjera anëtare tani pritet të rrisin kontributet e tyre.

    “Administratat demokratike dhe republikane njësoj, përfshirë sigurisht Presidentin Donald Trump, kanë qenë shumë të qarta se anëtarët e NATO-s duhet të kontribuojnë më shumë – si në aspektin e buxheteve të tyre të mbrojtjes ashtu edhe në aspektin e forcave të alokuara për operacionet, misionet dhe bazat e NATO-s. Shtetet e Bashkuara, sigurisht, po kryejnë një shqyrtim gjithëpërfshirës të gjithçkaje që bëjnë me forcat e tyre të armatosura, të udhëhequr nga Pentagoni dhe Shtëpia e Bardhë, dhe një pjesë e kësaj përfshin shqyrtimin se ku kemi trupa dhe ku nuk kemi. Unë besoj se çështja kryesore nuk është numri i saktë, as nëse rritet apo zvogëlohet. Fakti është se Shtetet e Bashkuara presin NATO-n, mbeten të përkushtuara ndaj NATO-s dhe kjo do të vazhdojë – pavarësisht nëse përfshin 10 ushtarë apo 10,000”, tha ai për mediumin në gjuhën serbe “Kosovo Online”.

    Duke komentuar mbi raportet për një tërheqje të mundshme të SHBA-së nga Kosova, Moore deklaroi se NATO do të ruajë praninë e saj ndërsa Shtetet e Bashkuara shqyrtojnë rajonet e botës të cilave duhet t’u kushtojë burimet e saj.

    “Nuk e di se cilat do të jenë vendimet përfundimtare, por thelbi do të jetë që NATO do të ruajë praninë e saj. KFOR-i është jashtëzakonisht i rëndësishëm – për të gjithë rajonin, për fqinjët e Kosovës dhe për vetë Kosovën. Nëse shikoni Shqipërinë dhe Maqedoninë e Veriut, të dyja anëtare të NATO-s; Malin e Zi në NATO; Greqinë në NATO – kjo është një strukturë themelore që do të mbetet e pandryshuar. Njerëzit po spekulojnë dhe, sinqerisht, po e interpretojnë tepër. Ka debat se ku Shtetet e Bashkuara kanë ambasadorë dhe ku jo. Fakti është se ne kemi ambasada. Ne mbajmë të njëjtin rrjet diplomatik global, me diplomatë dhe ambasadorë profesionistë që shërbejnë si përfaqësues të Presidentit në të gjithë botën. Kjo nuk ka të bëjë me Kosovën. Kjo nuk ka të bëjë me Ballkanin. Kjo ka të bëjë me një rivlerësim më të gjerë që po ndodh në Shtetet e Bashkuara për të përcaktuar se ku duhet t’i ndajmë forcat, talentet dhe burimet tona”, deklaroi Moore.

    Ai vuri në dukje se numri i trupave amerikane në Kosovë nuk është i madh dhe se forcat nga vendet e tjera mbeten në terren, edhe nëse bëhen rregullime në vendosjet e SHBA-së.

    “Ne nuk kemi një numër të madh trupash në terren në Kosovë. Përsëri, edhe nëse ky numër do të zvogëlohej me ndonjë faktor, NATO mbetet e pranishme. Forcat italiane janë atje. Forcat turke janë atje dhe do të vazhdojnë të jenë atje. Njerëzit nuk duhet të përqendrohen në avantazhet ose disavantazhet e perceptuara. Ata duhet të kuptojnë se angazhimi ndaj NATO-s, të cilin Shtetet e Bashkuara e mbështesin fuqimisht, nuk do të ndryshojë”, tha Moore për Kosova Online.

    Ai theksoi se Presidenti Trump ka ngritur pyetje në lidhje me buxhetin e mbrojtjes së SHBA-së të shpenzuar jashtë vendit, por theksoi se kjo nuk e ndryshon angazhimin e Uashingtonit ndaj NATO-s.

    “Është shumë e qartë se nën Presidentin Trump ka një rishikim gjithëpërfshirës të buxhetit tonë të mbrojtjes, shpenzimeve të mbrojtjes dhe burimeve, duke adresuar sfidat në mbarë botën. Presidenti Trump mund të marrë vendime të ndryshme, siç kanë bërë të tjerët në të kaluarën, dhe bota e njeh dhe e kupton këtë. Por përsëri, duhet të theksoj angazhimin themelor ndaj NATO-s, dhe roli i NATO-s është shumë i qartë”, tha ai. Moore shprehu gjithashtu shpresën se situata politike në Kosovë do të stabilizohet dhe se Kosova do të përmbushë detyrimet e saj ndaj shteteve fqinje.

    “Kosova aspiron të bëhet anëtare e NATO-s. Me shpresën se do të arrijë stabilitet politik dhe një qeveri funksionale – në vend të një raundi tjetër zgjedhjesh në mars – ajo duhet të përqendrohet në përgjegjësitë e saj ndaj fqinjëve të saj dhe ndaj shteteve anëtare të NATO-s, duke kërkuar marrëdhënie të përmirësuara diplomatike dhe të paktën një formë marrëveshjeje me fqinjët e saj, përfshirë Serbinë. Kjo do të ofronte më pas një mundësi, ndoshta në të ardhmen, për një vendim politik që do ta lejonte atë të lëvizte drejt anëtarësimit në NATO. Por pika thelbësore është se, pavarësisht rregullimeve dhe diskutimeve, angazhimet themelore ndaj NATO-s mbeten të forta”, përfundoi Moore.

    Dosjet “Epstein”, Hillary Clinton do të dëshmojë sot para Kongresit amerikan
    Read more

  • Lora Braha tregon aksidentin e rëndë që rrezikoi të mbetej e palëvizshme

    Lora Braha tregon aksidentin e rëndë që rrezikoi të mbetej e palëvizshme

    Këngëtarja e njohur, Lora Braha, ka zbuluar një histori të rëndë nga jeta e saj, duke ndarë me publikun përjetimin e një aksidenti të tmerrshëm që rrezikoi shëndetin dhe lëvizshmërinë e saj.

    Në një intervistë për emisionin “STUDIO A” në ATV, Lora ka treguar për herë të parë për këtë incident të rëndë, i cili ka ndodhur disa muaj më parë. Ajo ka përjetuar një moment shumë të vështirë gjatë pastrimit të kuzhinës, ku humbi ekuilibrin dhe ra nga një lartësi.

    “Meqë kam përfunduar mirë, po më duket si një ëndërr e keqe. Ka qenë aksident, u rrëzova nga lartësia duke pastruar kuzhinën. Rashë dhe u lëndova, duke thyer dy unaza të shpinës dhe dy të tjera i kam krisur,” tha Lora Braha, duke përshkruar dhimbjen dhe pasojat që e ndoqën.

    Këngëtarja theksoi se pas aksidentit, ka qëndruar dy muaj në regjim shtrati, duke kaluar një periudhë shumë të vështirë të rehabilitimit.

    “Kam mbetur dy muaj në regjim shtrati dhe e kam pasur shumë të vështirë, por tani ndjehem më mirë. Ky aksident më bëri të vlerësoj edhe më shumë shëndetin dhe kujdesin për trupin,” përfundoi Loha, duke i dhënë një mesazh pozitiv për ata që përballen me sfida të ngjashme.

     

  • Identifikohen mbetjet mortore të tre të zhdukurve gjatë luftës, rivarrosen të premten

    Identifikohen mbetjet mortore të tre të zhdukurve gjatë luftës, rivarrosen të premten

    Komisioni Qeveritar për Personat e Zhdukur bën të ditur se mbetjet mortore (eshtrat) e tre viktimave të luftës Bali Pajazit Gashi, Fadil Shaban Elezaj dhe Masar Ymer Dushi, të cilët ishin në Listën e Personave të Zhdukur dhe u identifikuan së fundmi përmes analizës shkencore të ADN-së, do të rivarrosen të premten, më 27 shkurt 2026, në Klinë, sipas kërkesës së familjarëve.

    Komisioni njofton se mbetjet e tyre mortore janë zhvarrosur nga varreza masive në Bishtazhin.

    Ceremonia e rivarrimit organizohet nga Komuna e Klinës, me përkrahjen e Komisionit Qeveritar për Persona të Zhdukur.

    Agjenda e ceremonisë:

    11:30 – 12:30 Homazhe në Shtëpinë e Kulturës “Jehona e Dukagjinit”, Klinë ;

    13:00 – Akademi Përkujtimore në Shtëpinë e Kulturës “Jehona e Dukagjinit” ;

    14:00 – Rivarrimi në Varrezat e Dëshmorëve, Kodra e Kuqe – Zajm, Klinë.

    Komisioni Qeveritar për Persona të Zhdukur u shpreh ngushëllime familjeve dhe riafirmon përkushtimin për vazhdimin e përpjekjeve në zbardhjen e fatit dhe vendndodhjes së të gjithë personave të zhdukur me forcë gjatë luftës në Kosovë.