Blog

Bedri Hamza, kryetar i Partisë Demokratike të Kosovës, ka rikujtuar 11 marsin e vitit 1981, atëkohë kur studentët e Kosovës u ngritën në emër të popullit duke kërkuar liri, drejtësi dhe dinjitet.

Hamza tha se historia e vendit është shkruar edhe nga ata hapa të guximshëm të studentëve, që dolën në rrugë pa frikë, duke sfiduar padrejtësinë dhe hapur rrugën drejt së ardhmes.

‘’Në marsin e vitit 1981, studentët u ngritën në emër të popullit tonë, duke kërkuar liri, drejtësi dhe dinjitet.

Historia e Kosovës është shkruar edhe nga ata hapa të guximshëm të tyre, që dolën në rrugë pa frikë, duke sfiduar padrejtësinë dhe hapur rrugën drejt së ardhmes.

Nderim për të gjithë pjesëmarrësit në protestat e vitit 1981 në Kosovë. 🇽🇰’’, ka shkruar ai.

Kryeministri spanjoll, Pedro Sánchez tha se një valë krenarie për shkak të qëndrimit të Madridit mbizotëroi në Spanjë.

“Kur i thamë ‘jo luftës’, pati një valë krenarie që jemi spanjollë, jo vetëm brenda vendit tonë, por edhe midis shumë shoqërive anembanë botës. Është një përgjigje ndaj valës reaksionare në Spanjë, Evropë dhe botë, dhe është një detyrim i qeverisë së koalicionit progresiv”, tha ai.

Kur u pyet nëse ishte i shqetësuar për përgjigjen e mundshme nga Donald Trump, kryeministri spanjoll tha:

“Jo. Qëndrimi i Spanjës ka qenë konsistent gjatë të gjitha luftërave të njëpasnjëshme që kemi përjetuar në pesë vitet e fundit: lufta e Putinit në Ukrainë, lufta në Gaza… Mbrojtja e së drejtës ndërkombëtare është qëndrimi konsistent i qeverisë spanjolle. Së dyti, ne i përkasim Bashkimit Evropian dhe Komisioni Evropian ishte shumë i qartë për këtë çështje. Dhe së fundmi, sepse besoj se shtrëngimi nuk është rruga përpara. Të jesh aleat i Shteteve të Bashkuara të Amerikës nuk do të thotë të thuash ‘po’ për gjithçka”, tha Sanchez.

Edhe pse nuk ka një qëndrim të unifikuar brenda BE-së, Sanchez deklaron se Spanja i përmbahet qëndrimit të saj.

“Brenda Bashkimit Evropian nuk kishte një qëndrim të përbashkët, ndryshe nga Ukraina. Megjithatë, Spanja ka mbajtur gjithmonë të njëjtin qëndrim, qoftë për Ukrainën, Gazën apo Iranin – mbrojtjen e së drejtës ndërkombëtare. Ky ishte një qëndrim i qëndrueshëm që gjeti jehonë jo vetëm me disa qeveri evropiane, të cilat kanë ndryshuar qëndrimet e tyre ditët e fundit, por edhe me një pjesë të madhe të shoqërisë dhe opinionit publik evropian, i cili kundërshton një luftë që nuk do të sjellë asgjë të mirë dhe na kthen në vitin 2003, kur u zhvillua lufta në Irak. Do të ketë projekte politike që mbrojnë luftën në Iran, por besoj se ata nuk kanë mësuar asgjë dhe vazhdojnë të bëjnë gabime”, tha kryeministri spanjoll në një intervistë me El Diario .

Deputeti i Lëvizjes Vetëvendosje, Adnan Rrustemi përmes një postimi në Facebook, ka kërkuar nga ambasadorët që të ‘’mos e shkatërrojnë’’ Gjykatën Kushtetuese me vizitat e tyre.

Vizitat e ambasadorëve të huaj duket se po e ‘’pengojnë’’ Rrustemin e VV’së, cili ka shtuar se ‘’shkatërrimin’’ e Kushtetuese, ata po e bëjnë me takime e ndërhyrje.

‘’I lus disa ambasadorë që të mos e shkatërrojnë Gjykatën Kushtetuese me vizita, takime e ndërhyrje, sepse dëmet për vendin tonë do të jenë të pariparueshme’’, ka shkruar ai.

Autoritetet në shtetin amerikan të New Mexico kanë rihapur hetimet për aktivitetet e financierit të ndjerë Jeffrey Epstein në pronën e tij të njohur si Zorro Ranch, pothuajse shtatë vjet pas arrestimit të tij për trafikim seksual të të miturve.

Prokurorët federalë në New York kishin deklaruar në vitin 2019 se Epstein kishte abuzuar me dhjetëra vajza të mitura në disa vende, përfshirë Manhattanin, Palm Beach dhe pronën e tij në Neë Mexico.

Zorro Ranch i Epstein u përmend shpesh në procedurat penale dhe civile pas vdekjes së tij në burg më 10 gusht 2019, ndërsa priste gjyqin. Një hetim i fundit ka ngritur dyshime se autoritetet federale nuk e kanë kontrolluar kurrë fizikisht këtë pronë. Publikimi i rreth tre milionë dokumenteve hetimore sipas ligjit të transparencës për dosjet Epstein ka rikthyer vëmendjen ndaj kësaj prone.

Prokurori i përgjithshëm i New Mexico-s njoftoi se shteti do të rihapë hetimin e vitit 2019, i cili ishte pezulluar me kërkesë të prokurorëve federalë. Ndërkohë, ligjvënësit e shtetit kanë krijuar edhe një “komision të së vërtetës” për të hetuar aktivitetet e kaluara në Ranch.

Ekspertët ligjorë paralajmërojnë se hetimi pas kaq shumë vitesh paraqet sfida serioze. Sipas ish-prokurorit John Day, për të marrë një urdhër kontrolli nevojiten prova të reja dhe jo informacion i vjetruar. Për më tepër, prona tashmë ka ndryshuar pronar, çka e bën edhe më të vështirë gjetjen e provave fizike.

Autoritetet pritet të fokusohen më shumë te dëshmitë njerëzore, duke kërkuar ish-punonjës, kontraktorë dhe banorë lokalë që mund të kenë pasur lidhje me pronën. Në dokumentet e reja përfshihet edhe një raport i FBI-së për një email anonim që pretendonte se dy vajza të reja ishin varrosur në Zorro Ranch, informacion që u raportua tek autoritetet në vitin 2019.

Kryetarja e Kuvendit, Albulena Haxhiu, priti sot në takim ambasadorin e Turqisë në Kosovë, Tunç Angılı.

Bazuar në njoftimin zyrtar, gjatë takimit u diskutua për marrëdhëniet e mira dhe bashkëpunimin ndërmjet dy vendeve, si dhe për mundësitë e thellimit të mëtejmë të këtij bashkëpunimi në fusha me interes të përbashkët.

“Kryetarja Haxhiu vlerësoi mbështetjen e vazhdueshme të Turqisë për Republikën e Kosovës dhe shprehu gatishmërinë për forcimin e mëtejmë të bashkëpunimit ndërinstitucional dhe parlamentar në të ardhmen”, thuhet në njoftim.

Vazhdon operacioni i kërkimit për personin e zhdukur në fshatin Zatriq – Rahovec

Policia e Kosovës, respektivisht Drejtoria Rajonale e Policisë në Gjakovë, është duke zhvilluar një operacion të gjerë kërkimi pas raportimit për zhdukjen e viktimës Alush (Vesel) Kastrati, i cili për herë të fundit është parë me datën 7 mars në fshatin Zatriq, komuna e Rahovecit.

Përmes një njoftimi në Facebook, policia thotë se në kuadër të këtij operacioni, njësitë policore kanë dalë në terren dhe kanë zhvilluar patrullime intensive në një perimetër të zgjeruar kërkimi, duke përfshirë zona malore dhe hapësira të tjera përreth.

Në operacionin e kërkimit janë angazhuar: njësitë patrulluese të Policisë së Kosovës, Njësia për Reagim të Shpejtë, njësia me dron për monitorim nga ajri, njësia K9 me qen kërkues. Gjithashtu në këtë operacion janë përfshirë edhe Njësia e Kërkim-Shpëtimit e FSK-së, zjarrfikësit, Shoqata e Kosovës për Kërkim dhe Shpëtim, si dhe qytetarë vullnetarë që kanë ofruar mbështetje në terren.

Po ashtu, në këtë iniciativë mbështetje k a ofruar edhe kryetari i Komunës së Rahovecit, duke kontribuar në koordinimin e institucioneve lokale dhe komunitetit, për të ndihmuar në përpjekjet për gjetjen e personit të zhdukur.

Operacioni i kërkimit po vazhdon.

Profesori amerikan, Edward Joseph, beson që dalja nga ngërçi i ri politik në Kosovë është rizgjedhja e Vjosa Osmanit presidente.

Ai tha se kjo është një “zgjedhje logjike” që Osmani të mbetet në pozicionin e presidentes dhe lavdëroi atë për lidhjen me Administratën Trump.

“A bëri presidentja diçka për ta diskualifikuar veten? Kjo është pyetja, jo nëse ju pëlqen Osmani apo jo. Pyetja është nëse Osmani bëri diçka për ta diskualifikuar veten nga një mandat i dytë. Dhe përgjigjja është absolutisht jo. Përkundrazi, ne themi këtu në Uashington se ajo është presidentja që ka ndërtuar marrëdhënien më të ngushtë me administratën Trump. Pra, kjo është një përgjigje shumë e qartë dhe lidhet me mbrojtjen e interesave të Kosovës”, tha Joseph për mediumin në gjuhën serbe “Kosovo Online”.

Joseph tha se kjo është “një krizë artificiale, një krizë egoje dhe mungese lidershipi dhe nuk është në interes të Kosovës”.

“Presidentja Osmani ka ndërtuar marrëdhënie të ngushta që janë të dukshme. E prita vitin e kaluar, ajo u takua gjithashtu me zyrtarë të lartë amerikanë dhe ajo ka ruajtur komunikimin midis Kosovës dhe Shteteve të Bashkuara, edhe pasi dialogu strategjik me Kosovën u pezullua”, shtoi Joseph.

Siç shtoi ai, është e qartë se Albin Kurti, si Kryeministër dhe udhëheqës i partisë me më shumë vende në parlament, ka një rol kyç në këtë situatë politike.

Lidhur me marrëdhënien midis Kurtit dhe Osmanit, Joseph pohon se ato janë dinamike, por se tani është koha për të marrë parasysh “ekskluzivisht interesat e Kosovës”.

“Unë e di që këto janë figura politike dinamike, pavarësisht se si filloi marrëdhënia e tyre. Të gjitha marrëdhëniet politike janë dinamike. Pavarësisht nëse Kurti ishte politikisht mbi Osmanin në fillim dhe më pas u bë politikisht e pavarur, marrëdhëniet në politikë ndryshojnë. Çështja është se cila është puna e presidentes. Ky është i vetmi problem – dhe shmangia e një krize që dëmton vendin. Çfarëdo keqkuptimesh, pakënaqësish apo mosmarrëveshjesh që të ketë midis Kurtit dhe Osmanit, nuk ka rëndësi. Ajo që ka rëndësi është ajo që është në interes të Kosovës dhe kjo është që presidentja të mbetet në detyrë”, tha Joseph.